Batumelebi

ბათუმის შოთა რუსთაველის უნივერსიტეტში 21 იანვარს რექტორის არჩევნებია ჩანიშნული.

რექტორის თანამდებობის დასაკავებლად ბსუ-მ არჩევნები 2024 წლის ბოლოს გამოაცხადა. არჩევნებში მონაწილეობის მსურველი კანდიდატების რეგისტრაცია ბსუ-ს საარჩევნო კომისიაში 6 იანვრიდან 15 იანვრის ჩათვლით გაგრძელდება [დასვენების დღეების გამოკლებით].

რექტორის თანამდებობის დასაკავებლად კონკურსში მონაწილეობის მიღება შეუძლია პირს, რომელსაც აქვს დოქტორის ან მასთან გათანაბრებული აკადემიური ხარისხი.

რექტორის თანამდებობის დასაკავებლად კანდიდატს მოეთხოვება: უმაღლესი განათლება (დოქტორის ან მასთან გათანაბრებული აკადემიური ხარისხი); 5 წლის სამუშაო გამოცდილება; სამოქმედო გეგმის წარდგენა და სხვა მოთხოვნილი დოკუმენტაცია.

რეგისტრირებულ კანდიდატთა მიერ წარმოდგენილი დოკუმენტაციისა და სამოქმედო გეგმების განხილვას ბსუ-ს აკადემიური საბჭო 21 იანვარს, 14:00 სთ-ზე, იმავე დღეს, 15 საათზე კი რექტორის არჩევნები ჩატარდება. უნივერსიტეტის აკადემიური საბჭო რექტორს 4 წლის ვადით ირჩევს.

ამჟამად ბსუ-ს რექტორის მოვალეობას მერაბ ხალვაში ასრულებს, რომელიც ორი ვადით იყო ბსუ-ს რექტორი. კანონმდებლობის თანახმად, რექტორი შეიძლება იქნეს არჩეული ორი ვადით, შესაბამისად ხალვაში არჩევნებში მონაწილეობას ვერ მიიღებს.

ახალი რექტორი ბათუმის შოთა რუსთაველის სახელმწიფო უნივერსიტეტში 19 ივლისს უნდა აერჩიათ, თუმცა არჩევნებში მონაწილეობის მისაღებად არ დარეგისტრირდა არც ერთი კანდიდატი, არჩევნები ჩაიშალა და რექტორის მოვალეობის შემსრულებლად მერაბ ხალვაში აირჩიეს.

საქართველოს კანონმდებლობის შესაბამისად რექტორის უფლებამოსილების ვადამდე შეწყვეტის შემთხვევაში, აგრეთვე რექტორის ვერ არჩევის შემთხვევაში აკადემიური საბჭო 14 დღის ვადაში, ფარული კენჭისყრით, სიითი შემადგენლობის უმრავლესობით ირჩევს რექტორის მოვალეობის შემსრულებელს არაუმეტეს 6 თვის ვადით. ერთი და იგივე პირი რექტორის მოვალეობის შემსრულებლად შეიძლება აირჩეს მხოლოდ ერთხელ.

ბათუმში ხელოვნური ნახევარკუნძულებისა და კუნძულის მოწყობის მიზნით შპს „ამბასადორი ბათუმი აილენდი“ სასარგებლო წიაღისეულის მოპოვების ლიცენზიისაგან კიდევ ერთხელ გაათავისუფლეს. კომპანია ამჯერად 371 100 კუბურ მეტრ ქვიშა-ხრეშს ულიცენზიოდ ერთი წლის განმავლობაში მოიპოვებს.

მთავრობის განკარგულებით წიაღისეულს „ამბასადორი“ ჭოროხის დელტაში, ხელვაჩაურის მუნიციპალიტეტის თხილნარის ადმინისტრაციული ერთეულის
ტერიტორიაზე ამოიღებს.

„ლიცენზიისაგან გათავისუფლებული პირი „ამბასადორი ბათუმი აილენდი“ ვალდებულია:

• მოპოვებული სასარგებლო წიაღისეული გამოიყენოს მხოლოდ ხელოვნური კუნძულის მშენებლობისთვის;
• სასარგებლო წიაღისეულის მოპოვების ლიცენზიისაგან გათავისუფლებისათვის, ერთი თვის ვადაში საქართველოს სახელმწიფო ბიუჯეტში გადაიხადოს 484 ათას 43 ლარი.“ – აღნიშნულია მთავრობის განკარგულებაში, რომელსაც „ქართული ოცნების“ პრემიერ-მინისტრმა ირაკლი კობახიძემ ხელი 2024 წლის 30 დეკემბერს მოაწერა.

ამავე განკარგულებაში ასევე აღნიშნულია, რომ შპს „ამბასადორი ბათუმი აილენდის“ მიერ, ლიცენზიისაგან გათავისუფლების საფუძველზე, წიაღით სარგებლობის პირობების შესრულების ზედამხედველობა განახორციელოს მინერალური რესურსების ეროვნულმა სააგენტომ. კომპანიამ კი, წიაღისეულის მოპოვების ვადის გასვლიდან ორი კვირის ვადაში სააგენტოს უნდა წარუდგინოს ინფორმაცია მოპოვებული ბუნებრივი რესურსის ოდენობის შესახებ.

„ამბასადორი“ ხრეშს ულიცენზიოდ ჭოროხის დელტაში კიდევ ერთ ადგილზე – ხელვაჩაურის სოფელ ახალსოფლის ტერიტორიაზე მოიპოვებს. მთავრობამ აქ კომპანიას 3 წლის ვადით 15 042 კვადრატული მეტრი ფართობის ნაკვეთი გადასცა იჯარით.

ვრცლად ამ თემაზე: კუნძულისთვის ხრეშს ჭოროხიდანაც ამოიღებენ – მთავრობამ „ამბასადორს“ ადგილი 3 წლით გადასცა

კომპანია „ამბასადორი ბათუმი აილენდი“, რომელმაც ბათუმში ხელოვნური კუნძული უნდა ააშენოს, გეგმავს, რომ 4-5 ცათამბჯენი უკვე მოწყობილ ნახევარკუნძულზე ააშენოს, დანარჩენ ტერიტორიას კი, რომელიც ხელოვნურად ამის შემდეგ უნდა მოაწყოს ზღვაში, სტრატეგიული გარემოსდაცვითი შეფასების [სგშ] პროცედურის დასრულების შემდეგ აითვისებს.

ამავე თემაზე: კუნძულის აშენების შემდეგ ბათუმის მოსახლეობა 70 000-ით გაიზრდება – რას სთხოვს სააგენტო „ამბასადორს“

„ამბასადორის“ განცხადებით, „ტექნიკური და სამშენებლო ზედამხედველობის სააგენტომ ბათუმის ორი ხელოვნური ნახევარკუნძულის და ერთი ხელოვნური კუნძულის სამშენებლო ნებართვა უკვე გასცა. სამშენებლო ნებართვა მოიცავს შავი ზღვის სანაპიროზე ჯამურად 102 ჰექტარი მიწის ნაკვეთის და ნაპირდამცავი ჯებირების მოწყობას“.

 

მთავარი ფოტო: ხელოვნური ნახევარკუნძულის მშენებლობა ბათუმში / „ბათუმელების“ არქივიდან

 

„საჯარო სექტორიდან გათავისუფლების შემდეგ ჩვენ 33-მა მოქალაქემ მოგვმართა, ეს ადამიანები გაათავისუფლეს სხვადასხვა საჯარო უწყებიდან: საჯარო რეესტრიდან, პრობაციის სამსახურიდან, მთავრობის ადმინისტრაციიდან, ცესკოდან, შსს-დან… ეს რიცხვი არაა ზუსტი, ბევრად მეტი საჯარო მოსამსახურე გაუშვეს სამსახურიდან მარტო იმის გამო, რომ მათ კონსტიტუციის 78-ე მუხლის დაცვა, ანუ ევროატლანტიკური ინტეგრაციის დაცვა მოითხოვეს.

მხოლოდ საჯარო რეესტრიდან 86 ადამიანია გაშვებული. ჯერ უცნობია, რამდენი დაიწყებს სამართლებრივ დავას და გაასაჩივრებს გათავისუფლებას,“ – ამბობს „ბათუმელებთან“ კახი სამხარაძე, „საჯარო მოსამსახურეთა დამოუკიდებელი პროფკავშირის – კონსტიტუციის 78-ე მუხლის“ თანათავმჯდომარე.

„ქართული ოცნება“ ამჯერად პროტესტის ჩახშობას საჯარო სამსახურებში ცდილობს. მას შემდეგ, რაც „ოცნების“ პრეზიდენტმა მიხეილ ყაველაშვილმა საჯარო სამსახურის შესახებ რეპრესიულ კანონმდებლობას მოაწერა ხელი, სამსახურებიდან იმ საჯარო მოხელეებს ათავისუფლებენ, რომლებმაც ევროპისკენ მიმავალი გზის ჩაკეტვა ღიად გააპროტესტეს.

უფლებადამცველების თქმით, ყველაზე მეტი საჯარო მოხელე ამ ეტაპზე საჯარო რეესტრიდან გაუშვეს, რადგან იქ დასაქმებულთა დიდი ნაწილი ვადიანი ხელშეკრულებით იყო დასაქმებული.

გათავისუფლებული საჯარო მოხელეების საქმეებიდან „სამართლიანი არჩევნების და დემოკრატიის საერთაშორისო საზოგადოების“ პროექტების კოორდინატორმა, თათია ქინქლაძემ სასამართლოს 10 სარჩელით უკვე მიმართა, 20 სარჩელზე კი ახლა მუშაობს.

„ეს რეპრესიების ტალღის გაგრძელებაა, აბსოლუტურად დაუსაბუთებლად ათავისუფლებენ ადამიანებს, დაუსაბუთებელია ამ საჯარო მოხელეების გათავისუფლების შესახებ გამოცემული სამართლებრივი აქტები, ვლინდება პოლიტიკური ნიშნით დისკრიმინაცია.

ამ საქმეების ანალიზიდან ჩანს, რომ გაათავისუფლეს ის მოხელეები, რომლებმაც ღიად დაუჭირეს მხარის ევროინტეგრაციის პროცესს,“ – გვითხრა თათია ქინქლაძემ.

იურისტის თქმით, ეს საქმეები სასამართლოებში წარმოებაში მიღების ეტაპზეა. სარჩელების მოთხოვნა გათავისუფლების აქტების ბათილად ცნობაა. სარჩელებში, რომლებიც ამ დღეებში შევა სასამართლოში, მოითხოვენ დისკრიმინაციის დადგენასაც.

გათავისუფლებული საჯარო მოხელეების კონკრეტული საქმეების შესახებ დეტალური ინფორმაციის გამოქვეყნებას ISFED და სხვა უფლებადამცველი ორგანიზაციები უახლოეს დღეებში, მონაცემების შესწავლის შემდეგ აპირებენ.

„საერთაშორისო გამჭვირვალობა-საქართველოს“ ცხელი ხაზზე მიმართვა ისევ შეუძლიათ საჯარო მოხელეებს ნომერზე – 599 948 671

„ჩვენ მოგვმართეს 16 შემთხვევაში.

ჭარბობს საჯარო რეესტრიდან გათავისუფლებულთა მაჩვენებელი. თითოეულ მათგანს სჯიან იმის გამო, რომ მათ ჰქონდათ მკაფიო პოზიცია საგარეო კურსის ცვლილების გამო, ასევე საპროტესტო აქციებზე ძალის გადამეტებასთან დაკავშირებით. ადგილი აქვს განსხვავებულ მოპყრობას სხვადასხვა ნიშნით, ამაზე ჩამოვყალიბდებით, სათითაოდ როცა განვიხილავთ საქმეებს,“ – გვითხრა თეო ზაქარაშვილმა, „საერთაშორისო გამჭვირვალობა საქართველოს“ პროექტის კოორდინატორმა და მთავარმა იურისტმა.

თუ კონკრეტული საჯარო მოხელე კონკრეტული ვადით იყო დასაქმებული და ეს ვადა გავიდა, რატომ არ არსებობს მისი გათავისუფლების სამართლებრივი საფუძველი? – ვკითხეთ იურისტს.

„შესასწავლია, რა საფუძვლით გამოარჩიეს ეს პირები, ვისაც ხელშეკრულება შეუწყვიტეს. არის შემთხვევები, როცა ვადის გასვლის ფორმალური საფუძველი არ არის საკმარისი ხელშეკრულების შესაწყვეტად, როცა ხელშეკრულება გაფორმებულია ზედიზედ 30 თვეზე მეტი დროის განმავლობაში. ის უკვე ითვლება უვადოდ დასაქმებულად.

თუ 30 თვე არ არის გასული, უნდა შემოწმდეს, რა გახდა ვადიანი ხელშეკრულების დადების საფუძველი, დასაბუთებული იყო თუ არა ვადა, მცირე ვადით ხელშეკრულების დადებას საფუძველი უნდა ჰქონდეს. შესასწავლია, სწორად მოიქცა თუ არა ესა თუ ის უწყება. ჩვენ გვაქვს პრეცედენტი, როცა ვადის გასვლის შემდეგ, მაგალითად, სკოლის დირექტორების ნაწილს გაუგრძელეს ვადა, ნაწილს – არა.

ამ ეტაპზე რაც ნამდვილად გამოხატულია, არის ის, რომ ვინც ჩვენ მოგვმართა და უკვე აღარ აქვს შრომით-სამართლებრივი ურთიერთობა სახელმწიფოსთან, მათ დაფიქსირებული აქვთ კრიტიკული პოზიციები „ქართული ოცნების“ მიმართ, მათ შორის, პეტიციაზე ხელის მოწერით და აქციებში მონაწილეობით,“ – ამბობს თეო ზაქარაშვილი.

არის ყოფილი საჯარო მოხელის დაცვის საშუალება სასამართლო?

„9 და 10 წელი გვიდავია სასამართლოში და მიგვიღწევია შედეგისთვის. გვქონია საქმეები, როცა 13 წელი ვიცავდით საჯარო მოხელეების ინტერესებს. ბევრი ცუდი კანონი გვინახავს, რომელიც გაუქმდა. ჩვენ საბოლოოდ მაინც შევძლებთ გამარჯვებას.

გაუარესდა სისტემა და მექანიზმებიც, რეორგანიზაციებს დაგეგმავენ, საჯარო სამსახურის შესახებ კანონი რეპრესიულ კანონად გადააქციეს.

მანამდე თუ რეპრესიები ძირითადად უკავშირდებოდა ადმინისტრაციულ სამართალდარღვევათა კოდექსს, ამჯერად რეპრესიების წყარო ეს კანონიც გახდა, მაგრამ მე მჯერა, რომ ამით საჯარო მოხელეებს ვერ შეაშინებენ. ის წინააღმდეგობა, რომელიც არსებობს, ამ სისტემას საბოლოოდ ჩამოშლის. ამ პროფესიონალ ადამიანებზე დგას დღეს სახელმწიფო ინსტიტუციები,“ – უთხრა „ბათუმელებს“ თეო ზაქარაშვილმა.

„შრომითი დავების შემთხვევაში სასამართლო ძირითადად სარჩელებს აკმაყოფილებს,“ – სასამართლოში საჯარო მოხელეების ინტერესების დაცვის შესაძლებლობას ხედავს კახი სამხარაძე, ის საჯარო მოხელეა და რამდენიმე საჯარო მოხელესთან ერთად „საჯარო მოსამსახურეთა დამოუკიდებელი პროფესიული კავშირის – კონსტიტუციის 78-ე მუხლის“ დაფუძნებას ცდილობს. კახი სამხარაძე ამბობს, რომ რეესტრი განზრახ უქმნის ბარიერს საჯარო მოსამსახურეებს, შექმნან პროფესიული კავშირი. განაცხადი ახალი პროფკავშირის შექმნაზე რეესტრში 2024 წლის 25 დეკემბერს შევიდა.

„საჯარო რეესტრში ცალსახად ხდება დისკრიმინაცია, როცა იქიდან ათავისუფლებენ ადამიანებს… ვიაქტიურებთ არამხოლოდ შიდასამართლებრივი მექანიზმებით, არამედ ჩვენი მიზანია ვამხილოთ ეს საჯარო უწყებები საერთაშორისო ორგანიზაციებთან.

ჩვენი მიზანია, რომ ეს პროფესიონალი, კეთილსინდისიერი ადამიანები დაბრუნდნენ საჯარო სამსახურებში. არსებობენ ფონდებიც, რომლითაც შესაძლებელია დავეხმაროთ საჯარო მოხელეებს. გრძელვადიანი პროგრამაც უნდა შევიმუშაოთ, რომ დავეხმაროთ ყოფილ საჯარო მოსამსახურეებს დასაქმების პროცედურებში. უნდა შეიქმნას გრძელვადიანი სოციალური გარანტიები,“ – გვითხრა კახი სამხარაძემ.

უახლოეს პერიოდში საჯარო მოსამსახურეების პროფკავშირი რამდენიმე სამოქალაქო ორგანიზაციასთან ერთად საჯარო სამსახურის შესახებ კანონში შესულ ცვლილებებს საკონსტიტუციო სასამართლოში გაასაჩივრებს.

________________________

ფოტო: „ნეტგაზეთი“

ამავე თემაზე:

კიდევ ერთი საჯარო მოხელე წერს, რომ გაათავისუფლეს პოლიტიკური ნიშნით

See more

2 იანვარს, ღამით, ხანძარი გაჩნდა „ოცნების ქალაქის“ დასახლებაში.

ხანძრის შედეგად სახლი დაიწვა.

„ბათუმელების“ ინფორმაციით, შემთხვევის შედეგად არავინ დაშავებულა.

ადგილზე გამოძახებული იყო სახანძრო სამსახური.

არასრულწლოვანთა რეფერირების ცენტრის ხელმძღვანელი, ნათია ალიაშვილი აცხადებს, რომ სამსახურიდან გაათავისუფლეს მიმდინარე პოლიტიკურ მოვლენებთან დაკავშირებით. ამის შესახებ ალიაშვილი ფეისბუქზე წერს.

„წელს 12 წელი მიხდებოდა რაც საჯარო სამსახურში ვმუშაობ. ბოლოს, 2 წელზე მეტი ვხელმძღვანელობდი არასრულწლოვანთა რეფერირების ცენტრს, რომელიც საქართველოს იუსტიციის სამინისტროს, სსიპ დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს სტრუქტურული ერთეულია. ჩვენი თანამშრომლობა 31 დეკემბერს, 1 წინადადებით, ოფიციალური შეტყობინების საფუძველზე სრულდება.

მატყობინებენ, რომ 1 თებერვლიდან თავისუფალი ვარ.

აქ ალბათ კითხვა, რა მიზეზით მოხდა ჩემი გათავისუფლება უკვე რიტორიკული იქნება. გამომდინარე იქიდან, რომ დეკემბრის თვეში „პროფესიული საჯარო მოხელის შეფასების წესისა და პირობების“ მიხედვით მივიღე უმაღლესი შეფასება, ასევე 12 წლის განმავლობაში არ მქონია ერთი გადაცდომაც კი. ვფიქრობ, რომ მიმდინარე პოლიტიკურ მოვლენებთან და თანამშრომლების გათავისუფლებასთან დაკავშირებით პოზიციის დაფიქსირების გამო გამათავისუფლეს.

სისტემაში მუშაობა 22 წლის ვიყავი როდესაც დავიწყე, თავდაპირველად ვმუშაობდი სოციალური მუშაკის პოზიციაზე. წლების განმავლობაში არაერთხელ დავწინაურდი, გავხდი პროფესიული ზედამხედველი, შემდეგ კი ცენტრის უფროსი. ცალკე საკითხია ის, რომ ამ პერიოდში არაერთი სიტყვიერი შექება, ოფიციალური ჯილდო და სერტიფიკატი მაქვს მიღებული. პარალელურად ვიყავი საქართველოს იუსტიციის სამინისტროს მიწვეული ტრენერი და დაახლოებით 3 თვეში ერთხელ სააგენტოს ახალ თანამშრომლებს ვაცნობდით საქმიანობის სპეციფიკას.

მას შემდეგ რაც არასრულწლოვანთა რეფერირების ცენტრში დავიწყე მუშაობა, საკმაოდ დიდი დრო და რესურსი ჩავდე იმისთვის, რომ რთული ქცევის მოზარდებთან მეტად ეფექტიანი და ხარისხიანი საქმისწარმოება გვქონოდა. ამ პერიოდში გუნდის მხარდაჭერით, შევძელი და სააგენტოს ყველაზე სუსტი მიმართულება – დანაშაულის პირველი დონის პრევენცია ავამუშავე, აქტიურად ვმუშაობდი კურსზე, რომელიც მასწავლებლებისთვის მომზადდა.

რაც შეეხება ცენტრის მიზნობრივ ჯგუფს, სააგენტოს და დონორების ჩართულობით არაერთი მნიშვნელოვანი ნაბიჯი გადავდგით, როგორიც არის ახალი შეფასების ინსტრუმენტი, სარეაბილიტაციო პროგრამები, გაიხსნა რეგიონული ცენტრები, გაიზარდა ცენტრის მიზნობრივი ჯგუფები, აქტიურად ავამუშავეთ უწყებათშორისი კოორდინაციის პროცესი. დიდი შრომა გვაქვს ჩადებული კანონპროექტში, შემთხვევის მართვის ბრძანების პროექტში, ინსტრუმენტების დახვეწაში. თუმცა, დეკემბრის ბოლოს ჯერ ჩემს სოციალურ მუშაკს და ფსიქოლოგს შეუწყვიტეს ხელშეკრულება და მთელი იმერეთის რეგიონი დატოვეს კვალიფიციური კადრების გარეშე, ხოლო მე 31 დეკემბერს ყოველგვარი მიზეზის გარეშე შემატყობინეს, რომ 1 თვეში მიწყვეტდნენ ხელშეკრულებას. მსგავსი ფორმით თანამშრომლობა 1 თებერვლიდან დაასრულეს ჩემს კოლეგებთან, ნინო ტყეშელაშვილთან და მორის ბარამიასთან. აღსანიშნავია, რომ ორივე ჩემს ტოლფას პოზიციას იკავებდნენ წლების განმავლობაში და ორივე ხელმძღვანელის როლი რეაბილიტაცია – რესოციალიზაციის პროცესში შეუცვლელია!

მიუხედავად იმისა, რომ საჯარო მოხელეებს კანონში შეტანილი ცვლილებების შედეგად ბევრი არაფერი შეგვიძლია, მე საჯარო მოხელის გარდა ჯერ ვარ ამ ქვეყნის მოქალაქე, პროფესიით სოციალური მუშაკი და აუცილებლად ვიბრძოლებ ჩემი და ჩემი კოლეგების სამართლიანობისთვის!“ – წერს ნათია ალიაშვილი ფეისბუქზე.

ასევე დღეს, 2 იანვარს, მსჯავრდებულთა და ყოფილ პატიმართა რესოციალიზაცია-რეაბილიტაციის დეპარტამენტის უფროსმა ნინო ტყეშელაშვილმა ფეისბუქზე დაწერა, რომ საჯარო სამსახურიდან პოლიტიკური ნიშნით გაათავისუფლეს.

2024 წლის ბოლო დღეებიდან მოყოლებული, საჯარო სამსახურებიდან, რეორგანიზაციის, შტატის გაუქმების და მსგავსი საბაბით ათავისუფლებენ იმ საჯარო მოხელეებს, რომლებიც ღიად გამოხატავენ პროტესტს ქვეყნის პროევროპული კურსის ცვლილების გამო და, ასევე, სოლიდარული არიან იმ კოლეგების მიმართ, რომლებიც აცხადებენ, რომ მათი გათავისუფლება მოხდა პოლიტიკური ნიშნით.

_________________

ფოტოზე: ნათია ალიაშვილი/facebook

მსჯავრდებულთა და ყოფილ პატიმართა რესოციალიზაცია-რეაბილიტაციის დეპარტამენტის უფროსი ნინო ტყეშელაშვილი ფეისბუქზე წერს, რომ ის და მისი ორი კოლეგა, საჯარო სამსახურიდან პოლიტიკური ნიშნით გაათავისუფლეს.

„ეს პოსტი ეხება საჯარო სექტორიდან მენეჯერულ პოზიციებზე დასაქმებული ადამიანების პოლიტიკური ნიშნით წმენდას!

2009 წლიდან საჯარო სამსახურში ვარ დასაქმებული, ჯერ სკოლაში, შემდეგ პენიტენციურ სისტემაში, 2014 წლიდან კი დანაშაულის პრევენციის, არასაპატიმრო სასჯელთა აღსრულების და პრობაციის ეროვნულ სააგენტოში. ყველგან მხოლოდ განათლება და გამოცდილება იყო ჩემი „პატრონი“, ასევე საქმის ერთგულება, პასუხისმგებლობა და უდიდესი მოტივაცია, ჯერ, როგორც ფსიქოლოგი, დავხმარებოდი ადამიანებს, რომლებსაც ჰაერივით სჭირდებოდათ იმედი, მხარდაჭერა და ემპათია ამ სამყაროს მიმართ.

შემდეგ 2016 წლიდან სარეაბილიტაციო პროგრამების სამმართველოს უფროსის, 2019 წლიდან კი მსჯავრდებულთა და ყოფილ პატიმართა რესოციალიზაცია-რეაბილიტაციის დეპარტამენტის უფროსის პოზიციიდან მემუშავა პოლიტიკის დოკუმენტებზე, მსჯავრდებულთა უფლებების დაცვაზე, კანონთან კონფლიქტში მყოფი არასრულწლოვანების ჰუმანური, მხარდამჭერი პროცესების შემუშავებასა და დანერგვაზე. ამ წლების მანძილზე, ჩემს ერთგულ, უჭკვიანეს და პროფესიონალ გუნდთან, ფსიქოლოგებთან, სოციალურ მუშაკებთან ერთად, შევიმუშავეთ და დავნერგეთ პროფესიული სტანდარტები, გავაუმჯობესეთ რისკის და საჭიროების შეფასების ინსტრუმენტები და ელექტრონული ბაზა, შევქმენით 30-მდე სარეაბილიტაციო პროგრამა, რომელშიც 2016 წლიდან დღემდე ჩართული იყო 12513 პრობაციონერი, განრიდებული და ყოფილი პატიმარი (ეს უნიკალური რიცხვია და მომსახურებებით სამჯერ შეგვიძლია გადავამრავლოთ) 2016 წლიდან მოვამზადეთ 4500 წინასასამართლო ანგარიში და ამ პროცესში, სოციალური მუშაკები შეისწავლიან, არასრულწლოვანის განვითარების დონის, აღზრდის, განვითარების პირობების, განათლების, ჯანმრთელობისა და სხვა გარემო პირობებს, რომლებიც განსაზღვრავს მათ ხასიათს და ქცევის თავისებურებებს, რაც თავის მხრივ შეფასების და საჭიროებების განსაზღვრის შესაძლებლობას იძლევა. აღნიშნული შეფასება კი მოსამართლეებს/პროკურორებს ბავშვის საუკეთესო ინტერესებს მორგებული რეკომენდაციების შემუშავებასა და სასჯელის გამოტანაში უწყობს ხელს.

ამის პარალელურად, 2015 წლიდან ვმუშაობდი ჯერ სასჯელაღსრულების შემდეგ კი იუსტიციის სასწავლო ცენტრში, სადაც ტრენინგებს ვატარებდი სუიციდის, ეფექტური კომუნიკაციის, ქალთა მიმართ ძალადობის, გენდერული თანასწორობის თემებზე. აქტიურ მონაწილეობას ვიღებდი „პრობაციონერთა საორიენტაციო კურსის“ დანერგვასა და განხორციელებაში და „მასწავლებელთა კურსის“ მოდულში, როგორც ერთ-ერთი ავტორი.

საკმაოდ ვრცელი სტატუსი გამომივიდა, მაგრამ, ეს კიდევ არ არის სრული ჩამონათვალი, რაც ჩემს გუნდთან ერთად ამ წლების განმავლობაში განვახორციელეთ. თუმცა, ეს ყველაფერი არ გამოგვივიდოდა, რომ არა საელჩოები, საერთაშორისო ორგანიზაციები და ადგილობრივი არასამთავრობო სექტორი. განსაკუთრებული მადლობა ყველას, რომლებიც ჯერ ჩვენს საჭიროებებს იკვლევდნენ, შემდეგ კი ჩვენს მხარდამხარ მუშაობდნენ იმისთვის, რომ ჩვენს უწყება, ჩვენს სამინისტროს, ჩვენს ქვეყანას გაცილებით კარგი მომავალი ჰქონოდა, შემცირებული დანაშაულით და ბევრი კარგი ადამიანით.

და ამ ყველაფრის შემდეგ, 31 დეკემბერს სასწრაფოდ გააუქმეს ჩემი შტატი (ახალი კაბალური კანონის თანახმად, რადგან ამ დრომდე სამჯერ კონკურს გავლილი უვადო საჯარო მოხელე გახლდით) 1 იანვარს საქმის წარმოების სისტემაში შემთხვევით შესული მე და ჩემი ორი კოლეგა – განრიდება მედიაციის დეპარტამენტის უფროსი მორის ბარამია და არასრულწლოვანთა რეფერირების ცენტრის უფროსი – ნათია ალიაშვილი ვიგებთ, რომ სამსახურიდან გვათავისუფლებენ, თან „კეთილი ნება“ გამოიჩინეს და 1 თვით ადრე შეგვატყობინეს. აქვე აღვნიშნავ, რომ 15 წლის მანძილზე, არასოდეს არ მიმიღია არც საყვედური, არც გაფრთხილება, 2-ჯერ მაქვს მადლობის ჯილდო აღებული და ყოველთვის მოწინავე რიგებში ვიყავი სამუშაო ჯგუფებში, კონფერენციებსა თუ სხვადასხვა დელეგაციებთან შეხვედრის დროს.

ჩვენს გათავისუფლებას მიმდინარე პოლიტიკურ მოვლენებს და თანამშრომლების გათავისუფლებასთან დაკავშირებულ ღიად გამოხატულ პოზიციის დაფიქსირებას ვუკავშირებთ! აუცილებლად ვიბრძოლებთ სამართლიანობისთვის, და არ გავჩერდებით იმ დრომდე სანამ ჩვენი ქვეყანა თავის ევროპულ გეზს არ დაუბრუნდება!“ – წერს ნინო ტყეშელაშვილი ფეისბუქზე.

2024 წლის ბოლო დღეებიდან მოყოლებული, საჯარო სამსახურებიდან, რეორგანიზაციის, შტატის გაუქმების და მსგავსი საბაბით ათავისუფლებენ იმ საჯარო მოხელეებს, რომლებიც ღიად გამოხატავენ პროტესტს ქვეყნის პროევროპული კურსის ცვლილების გამო და, ასევე, სოლიდარული არიან იმ კოლეგების მიმართ, რომლებიც აცხადებენ, რომ მათი გათავისუფლება მოხდა პოლიტიკური ნიშნით.

________________

ფოტოზე: ნინო ტყეშელაშვილი/facebook

პირველ იანვარს, გამთენიისას, ხელვაჩაურის მუნიციპალიტეტში, მაჭახლისპირთან, გზიდან ავტომანქანა გადავარდა.

„ბათუმელების“ ინფორმაციით, ავტომანქანა თითქმის 24-საათიანი ძებნის შემდეგ იპოვეს.

ავტომანქანის მძღოლი დაიღუპა.

ადგილზე საგანგებო სიტუაციების მართვის სამსახური მუშაობდა.

_____________

ფოტო „ბათუმელების“ არქივიდან

 

 

საქართველოს მეხუთე პრეზიდენტი სალომე ზურაბიშვილი ფეისბუქზე წერს, რომ ვერ გათვალეს მათ, ვისაც საპროტესტო მუხტის განელების იმედი ჰქონდათ და საკუთარი ხალხის ხასიათის გაუთვალისწინებლობა, არავის ეპატიება.

„ვისაც იმედი გქონდათ მუხტი განელდება ახალწლის ღამის მერეო… ესეც ვერ გათვალეთ!

ვერ გათვალეთ, ვერც ამერიკის რეაქცია, ვერც ვაიმარის სამკუთხედის განცხადება, ვერც საფრანგეთის პრეზიდენტის მილოცვა, ვერც გერმანიის სანქციები, ეს კიდევ შეიძლება გასაგები იყოს და უცოდინარობას დავაბრალოთ, მაგრამ საკუთარი ხალხის ხასიათის, გამძლეობისა და შემართების ვერ გათვლა ეს არავის ეპატიება!

დღესაც დგანან, ხვალაც იქნებიან, არ დაიღლებიან!“ – წერს სალომე ზურაბიშვილი ფეისბუქზე.

სალომე ზურაბიშვილი ორბელიანების სასახლე 30 დეკემბერს დატოვა. მან განაცხადა, რომ ლეგიტიმაციის წყარო ხალხია და არა შენობა.

ზურაბიშვილის განცხადებით, ახლო მომავალში ის დაიწყებს მასშტაბურ შეხვედრებს საზოგადოების სხვადასხვა სეგმენტის წარმომადგენლებთან: ბიზნესთან, საჯარო მოხელეებთან, ახალ პოლიტიკურ ძალებთან, გავა რეგიონებში და დაგეგმავს უცხოეთში ვიზიტებს.

სალომე ზურაბიშვილი ახალი წლის ღამეს იმყოფებოდა თბილისში, რუსთაველის გამზირზე, სადაც ათი ათასობით ადამიანი იყო შეკრებილი საპროტესტო აქციაზე. აქციაზე მას მხარდამჭერი შეძახილებით შეხვდნენ.

დღეს, 2 იანვარს, ბათუმში, საკონსტიტუციო სასამართლოსთან საპროტესტო აქცია ანონსდება.

დღეს ბათუმში ყოველდღიური, უწყვეტი პროტესტის 36-ე დღეა. მოქალაქეები ყოველ საღამოს იკრიბებიან საკონსტიტუციო სასამართლოსთან, რათა გააჟღერონ საპროტესტო მოძრაობის მთავარი მოთხოვნები: ხელახალი არჩევნები და აქციებზე დაკავებული ადამიანების გათავისუფლება.

საპროტესტო აქციებს ბათუმში პერიოდულად უერთდებიან სხვადასხვა პროფესიული ჯგუფები.

უწყვეტი საპროტესტო აქციები მიმდინარეობს თბილისში და პერიოდულად იმართება აქციები საქართველოს სხვა ქალაქებსა და ადმინისტრაციულ ცენტრებშიც.

• რა ხდება?

საქართველოში მიმდინარეობს მასშტაბური პროტესტი, რომელმაც არა მარტო თბილისი, არამედ საქართველოს სხვა ქალაქებიც მოიცვა.

პროტესტი გამწვავდა 28 ნოემბერს, მას შემდეგ, რაც ირაკლი კობახიძემ განაცხადა, რომ „ქართული ოცნება“ ევროკავშირში გაწევრიანების პროცესს 2028 წლის ბოლომდე აჩერებს.

28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. დაკავებულია და სასტიკად ნაცემი ასობით ადამიანი, მათ შორის, მედიის წარმომადგენლები, სახელოვნებო სივრცის წარმომადგენლები. არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიის წარმომადგენლებს.

საპროტესტო აქციებზე ორგანიზებულად გამოდიან სხვადასხვა პროფესიული სფეროს და, ასევე, საქართველოს სხვადასხვა ქალაქისა და რეგიონის წარმომადგენლები.

ამ დროისათვის საპროტესტო მოძრაობის ძირითადი მოთხოვნა ორია: ხელახალი საპარლამენტო არჩევნები და აქციებზე დაკავებული პირების გათავისუფლება.

„დაუღალავი მედროშე“ – ასე მოიხსენიებენ ბათუმში საპროტესტო აქციის მონაწილეები 54 წლის თემურ ქათამაძეს, რომელიც უკვე ერთი თვეა ბათუმში ყველა აქციაზე დგას დროშით ხელში. ბათუმში პროტესტი და აქციები უკვე ყველასთვის წარმოუდგენელია მედროშის გარეშე.

კაცი საქართველოს დროშით ყოველ საღამოს მიდის აჭარის მთავრობის სახლთან, რუსული რეჟიმის საწინააღმდეგო აქციებზე, არჩევს ნათელ ადგილს და მთელი ძალითა და მონდომებით აფრიალებს საქართველოს დროშას.

მედროშე თემურ ქათამაძე მუჰაჯირების შთამომავალია. საქართველოში 2012 წლიდან ცხოვრობს და მიუხედავად ბევრი მცდელობისა, ჯერაც არ აქვს საქართველოს მოქალაქეობა.

თემურის შვილი და ოჯახის სხვა წევრები თურქეთში ცხოვრობენ. თემურს ერთი შვილი ჰყავს, თამარი. ამბობს, რომ შვილს სახელი თამარ მეფის პატივსაცემად დაარქვა.

„ჩემი სახელი და გვარია გაფფარ ილმაზი, ჩვენებურად თემურ ქათამაძე. მე თურქეთის ქართველებიდან ვარ. ჩემი წინაპრები მუჰაჯირები იყვნენ. ქობულეთის სოფელ ხინოდან წასულები, 150 წლის წინ, ორდუს პროვინციაში, ფაცაში ჩასახლებულები. სტამბულში დავიბადე, მაგრამ სკოლის ასაკამდე ფაცაში ვიზრდებოდი, ბებია-ბაბუასთან.

იქ ქართველი მუჰაჯირები ერთად დასახლებულები იყვნენ. თავიდან, 100 წლის განმავლობაში, ყველაფერ ქართულს ინარჩუნებდნენ. აჭარიდან წასული ხალხი ქართულად საუბრობდა, ქართულ კერძებს აკეთებდა, ქართულ ბეღლებს აშენებდა და ხილის დამყნამდე მისვლამდე, ყველაფერს ისე აკეთებდნენ, როგორც საქართველოში“.

თემურ ქათამაძის თქმით, სწორედ ბებია-ბაბუის წყალობითაა, რომ ჯერ კიდევ მაშინ შეუყვარდა საქართველო, თავის სამშობლოდ ჩათვალა და გაუჩნდა ენისა და ქართული კულტურის კარგად შეცნობის სურვილი.

„ბაბუასთან ერთად ყანაში ან საქონლის საბალახოდ რომ გავიდოდი, ბაბუა ხშირად მეტყოდა, დატოვე ეს საქმე, მოდი, დამიჯექი გვერდზე და რასაც გეტყვი, კარგად დაიმახსოვრეო.

მეტყოდა – „ჩვენ ქათამაძეები ვართ გვარად, ძველი წიკვიროღლები, ხინოდან წამოსულები“. მე მაშინ ბავშვი ვიყავი და კარგად ვერ ვხვდებოდი, ხინო რა იყო, არ ვიცოდი, ან წიკვიროღლი ქათამაძე რას ნიშნავდა, მაგრამ კარგად დავიმახსოვრე ეს ყველაფერი.

ბოსტანში რომ გავიდოდით, ბაბუა ხშირად იმასაც მეტყოდა, მოდი, ნახე, ამ მსხლის ნერგი ბათუმიდანაა წამოღებული, სხვა ნერგებიცო. სახლში სულ მაჩვენებდა ნივთებს და მიყვებოდა მათ ამბებს, თუ როგორ ჩამოიტანეს საქართველოდან“.

როგორც თემური გვიყვება, ბავშვობაშივე გრძნობდა, ქართველი რომ იყო: „სიტყვა ქართველს, ქართულს ნაკლებად ვიყენებდით. უფრო ხშირად თავს „ჩვენებურებად“ მოვიხსენიებდით.

მახსოვს, რადიოდან ერთხელ ქართული მოვისმინე. ეს ქართული ძალიან განსხვავდებოდა იმისგან, რაც მე ვიცოდი და როგორც ჩვენებურები საუბრობდნენ ერთმანეთში. მივხვდი, რომ მე არ ვიცოდი ქართული. მხოლოდ ცალკეული სიტყვების მნიშვნელობას ვიგებდი. მაგალითად, მახსოვს, რომ ბაბუას ვკითხე, რას ნიშნავს სიტყვა „ბატონი“-მეთქი და არც მან იცოდა“.

თემური გვიყვება, რომ სკოლის ასაკის რომ გახდა, სტამბოლში, მშობლებთან გადავიდა საცხოვრებლად, სადაც გაჰყვა ძლიერი ინტერესი საქართველოს ნახვის. მედროშემ მალევე დაიწყო ქართულის სწავლა.

„ხშირად ვკითხულობდი საქართველოს ისტორიის შესახებ. როცა სტამბოლში, უნივერსიტეტში პოლიტიკურ მეცნიერებებზე ვსწავლობდი, საქართველო ჯერ კიდევ საბჭოთა კავშირში იყო… საზღვარი გაიხსნა, საქართველოდან ჩვენი ხალხი ჩამოვიდა, მათთან ურთიერთობა დავამყარე. ძალიან უკვირდათ, ქართულად საუბარი რომ შემეძლო“.

ქართველებთან კომუნიკაცია თემურს ენის დახვეწაში დაეხმარა. ამ ამბიდან მალევე მოვახერხე და პირველად დავადექი საქართველოს გზასო, ამბობს ის.

„ძველი იკარუსის ავტობუსში ჩავჯექი. 24 საათი ფეხზე ვიდექი და ასე ჩამოვედი პირველად ბათუმში. შოკი მქონდა. ყველაფერი საბჭოური იყო. შენობები, მანქანები… სამი თვე დავრჩი.

იცით, როდის იყო ჩემი პირველი ჩამოსვლა? გამსახურდიამ ქვეყნის დამოუკიდებლობა რომ გამოაცხადა. მაშინაც ვიყავი მიტინგებში ჩართული.

ძალიან შევეჩვიე საქართველოს და როცა თურქეთში დავბრუნდი, მალევე მომინდა გამობრუნება“, – გვიყვება თემური.

საქართველოში პირველად ჩამოსვლისას თემურმა ნათესავები გაიცნო და მათთან ერთად მოინახულა ყველა მნიშვნელოვანი ადგილი ბათუმში. ესტუმრა თბილისს და იქაურ ღირსშესანიშნაობებსაც.

„საქართველოში საბოლოოდ 2012 წელს დავბრუნდი. ჩემი გონება აქ იყო დარჩენილი და ვგრძნობდი, რომ გასაკეთებელიც ბევრი იყო აქ.

დავაარსე „მსოფლიო ქართველთა კავშირი ფენიქსი“, რომლის მიზანიც თურქეთში, ირანსა და აზერბაიჯანში მცხოვრები ეთნიკური ქართველების ენის, კულტურის, იდენტობის შენარჩუნებაა. ვხვდებოდი, რომ მათი ძალებით ვერ შეინარჩუნებდნენ ისინი ქართულ იდენტობას და სჭირდებოდათ დახმარება.

ჩემთვის „ქართულმა ოცნებამ“ ნიღაბი 2018 წელს ჩამოიხსნა და მისი ნამდვილი სახე აჩვენა ქართველ საზოგადოებას. ის, თუ როგორი პრორუსი იყო და საბჭოთა კავშირის პერიოდში დაბრუნებას ლამობს.

მე ჩემი პირადი ბრძოლა საერთო ბრძოლას შევუერთე და ქუჩაში გამოსულ ხალხს შევუერთდი. შარშან, რუსული კანონის პროტესტში ჩავერთე და დღემდე მოვედით.

რა თქმა უნდა, ჩემთვის პირველ რიგში უპირატესობა სამშობლოს აქვს. სამშობლო თუ ძლიერი არ იქნება, საზღვარგარეთ მცხოვრებ ეთნიკურ ქართველებს, დიასპორას, არაფერი არ ეშველება. ჯერ საქართველო უნდა დავიბრუნოთ და შემდეგ დიასპორის ხალხსაც გვიპატრონებენ – თურქეთის ჩვენებურებს, ირანის ფერეიდნელებს და ჰერეთის ინგილოებს.

მე რომ ქართული ოცნების ლიდერებს შევხვდე, ან თქვენი მეშვეობით დაველაპარაკო, ვეტყოდი:

თქვენ ქართველები ხართ, საქართველოში ცხოვრობთ, საქართველოს შვილები ხართ, საქართველოს მართავთ. უნდა გახსოვდეთ, რომ ქართველი ისე უნდა მოიქცეს, როგორც მას, მის ერსა და სამშობლოს დაშვენდება. ქართველობას თუ არ კადრულობთ, ადამიანები ხომ ხართ!? ადამიანურად მოიქეცით!

ყველაფერი საუკეთესო ევროპაშია, ჩვენი მისწრაფება ევროპაა. თქვენ რამ დაგაბნიათ? რა მიზეზით გინდათ რუსეთში? ეს მარტო ჩვენთვის კი არა, თქვენთვისაც კატასტროფაა. რა უნდა ნახოთ იქ თქვენი შვილების მომავლისთვის? ასლან აბაშიძე რომ გაიქცა და რუსეთში თავი შეაფარა, რა ნახა? თქვენც ეს გელით, ეს გინდათ თქვენთვის, თქვენი შვილებისთვის, თქვენი მომავლისთვის? ეს გინდათ ჩვენთვის, ქართველი ერისთვის? დადექით ცივილიზაციის და დემოკრატიის მხარეს!

მე ამ ყველაფრის თქმის და ყოველ დღე მიტინგზე დაუღალავად დროშის ფრიალის ძალას ჩემი ქართული გენი მაძლევს, რაც წინაპრებისგან მაქვს. ხედავთ, რამდენს ნიშნავს ეს ჩემთვის და თქვენ რა ქენით, რა ჭამეთ და სვით, რომ ასე უმოქმედოდაა თქვენი გენი?!

აი, ეს მიკვირს „ქართული ოცნების“, – გვითხრა საუბრის ბოლოს თემურ ქათამაძემ.

მალე „ბათუმელებზე“ ნახავთ ვიდეორეპორტაჟსაც თემურ ქათამაძის შესახებ.

საქართველოში 2025 წლის პირველი იანვრიდან პარლამენტის წევრებს ხელფასები (საშემოსავლო გადასახადის ჩათვლით) გაეზარდათ.

პარლამენტის თავმჯდომარეს ხელფასი  6 740 ლარიდან 14 600 ლარამდე გაეზრდება;

პარლამენტის თავმჯდომარის პირველ მოადგილეს – 6 400 ლარიდან 13 432 ლარამდე, ხოლო პარლამენტის თავმჯდომარის მოადგილეს – 6 340 ლარიდან 13 140 ლარამდე ეზრდება ხელფასი.

საპარლამენტო კომიტეტის თავმჯდომარეს, ფრაქციის თავმჯდომარეს ხელფასი 5 540 ლარიდან 12 556 ლარამდე გაეზრდება; კომიტეტის თავმჯდომარის პირველ მოადგილეს, ფრაქციის თავმჯდომარის პირველ მოადგილეს კი – 4 800 ლარიდან 12 410 ლარამდე. კომიტეტის თავმჯდომარის მოადგილის ხელფასი 4 740 ლარიდან 11 972 ლარამდე გაეზრდება.

ხოლო პარლამენტის წევრს, რომელიც არ არის პარლამენტში თანამდებობის პირი, ხელფასი გაეზრდება 4 624 ლარიდან 11 680 ლარამდე.

საქართველოში დღეიდან, პირველი იანვრიდან, იზრდება პენსიაც, ოღონდ გაცილებით ნაკლებად შესამჩნევად.

კერძოდ, 70 წლის და მეტი ასაკის პენსიონერთა პენსია იზრდება 35 ლარით და განისაზღვრება 450 ლარის ოდენობით. ამავე კატეგორიის პენსიონერთა პენსია მაღალმთიან დასახლებებში 540 ლარს გაუტოლდება.

70 წლამდე პირთა პენსია, სამთავრობო პროგრამის შესაბამისად, ასევე იზრდება 35 ლარით და განისაზღვრება 350 ლარის, ხოლო მაღალმთიან დასახლებებში – 420 ლარის ოდენობით.

ასევე,  შეზღუდული შესაძლებლობის პირთა სოციალური გასაცემელი იზრდება 35 ლარით.

2024 წლის 31 დეკემბერს, ახალი წლის ღამეს, თბილისში, რუსთაველის გამზირზე, პარლამენტის შენობასთან საპროტესტო აქციის მონაწილეებმა სუფრის გაშლა დაიწყეს.

რუსთაველზე მაგიდებს საქართველოს დროშის ფერების, თეთრი და წითელი გადასაფარებლები გადააფარეს და აქციის მონაწილეებმა საკვების დალაგება დაიწყეს. ესაა ტკბილეული, ციტრუსი, ხილი, კანფეტები, სხვადასხვა საკვები…

ეს პირველი შემთხვევაა, როცა რუსთაველის გამზირზე, სადაც საპროტესტო აქცია ბევრი ფორმით გამართულა, სუფრა იშლება, როგორც პროტესტის და ერთიანობის სიმბოლო.

რუსთაველის გამზირზე ღამის 10 საათიდან იკრიბებიან მოქალაქეები. აქცია სახელწოდებით -„ახალი წლის ჯადოსნური საპროტესტო ღამე“ რამდენიმე დღის წინ დაანონსდა. „ამ ქვეყანაში მხოლოდ ჩვენ ვართ ლეგიტიმური – ქართველი ხალხი“ – წერია ღონისძიების გვერდზე, ფეისბუქზე.

რუსთაველის გამზირზე წელს ტრადიციული, საახალწლო კონცერტი, რომელსაც თბილისის მერია მართავს, არ იქნება. დედაქალაქის მთავარი ქუჩა მთლიანად დაიკავა საპროტესტო მოძრაობამ, რომელიც საქართველოში უკვე 34 დღეა, უწყვეტად გრძელდება.

თვეზე მეტია საქართველოში მიმდინარეობს მასშტაბური პროტესტი, რომელმაც არა მარტო თბილისი, არამედ საქართველოს სხვა ქალაქებიც მოიცვა. პროტესტი გამწვავდა 28 ნოემბერს ირაკლი კობახიძის განცხადების შემდეგ, რომ „ქართული ოცნება“ ევროკავშირში გაწევრიანების პროცესს 2028 წლის ბოლომდე აჩერებს.

28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. დაკავებულია და სასტიკად ნაცემი ასობით ადამიანი, მათ შორის, მედიის წარმომადგენლები, სახელოვნებო სივრცის წარმომადგენლები.

არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიის წარმომადგენლებს. საპროტესტო აქციებზე ორგანიზებულად გამოდიან სხვადასხვა პროფესიული სფეროს და, ასევე, საქართველოს სხვადასხვა ქალაქისა და რეგიონის წარმომადგენლები.

ნახეთ ფოტოები, რა ხდება თბილისში, რუსთაველზე, 2024 წლის 31 დეკემბერს.

 

„საქართველოს საზოგადოების ნაწილის მიერ წამოყენებული ახალი არჩევნების ჩატარების შესაძლებლობა უნდა იქნას განხილული ხელისუფლების მიერ ყველა პოლიტიკურ ძალასთან და სამოქალაქო საზოგადოების წარმომადგენლებთან გულწრფელი დიალოგის გზით,“ – აღნიშნულია განცხადებაში, რომელსაც დღეს, 31 დეკემბერს გერმანიის, საფრანგეთის და პოლონეთის [„ვაიმარის სამკუთხედის“ ქვეყნები] საგარეო საქმეთა მინისტრები ავრცელებენ საქართველოში არსებულ პოლიტიკურ კრიზისზე.

„ჩვენ, ვაიმარის სამკუთხედის საგარეო საქმეთა მინისტრები, სერიოზულად შეშფოთებული ვართ საქართველოში პოლიტიკური კრიზისით, რომელიც განვითარდა 26 ოქტომბრის საპარლამენტო არჩევნების შემდეგ და ევროკავშირში გაწევრიანების პროცესის შეჩერების შესახებ „ქართული ოცნების“ გადაწყვეტილებით. კრიზისის მიზეზი არის საქართველოს მმართველი პარტიის პოლიტიკური კურსი და მის მიერ ევროპული გზიდან გადახვევა.

ჩვენ არაერთხელ მოვუწოდეთ საქართველოს ხელისუფლებას, შეცვალოს თავისი კურსი და ევროკავშირში ინტეგრაციის პროცესს დაუბრუნდეს, ევროპული ნორმებისა და ღირებულებების დაცვისა და რეფორმების განხორციელების გზით,“ – აღნიშნულია „ვაიმარის სამკუთხედის“ ქვეყნების საგარეო საქმეთა მინისტრების მიერ გავრცელებულ განცხადებაში.

ერთობლივ განცხადებაში ხაზგასმულია მშვიდობიან მომიტინგეებზე, მედიის წარმომადგენლებსა და ოპოზიციურ ლიდერებზე ძალადობის ფაქტებზე. განცხადებაში ყურადღება გამახვილებულია საქართველოში ჩატარებული არჩევნების შესახებ ეუთო/ოდირის ბოლო დასკვნაზე, რაც „ვაიმარის სამკუთხედის“ ქვეყნების შეფასებით, ადასტურებს მათ შეშფოთებას:

„მკაცრად ვგმობთ გასული კვირების ძალადობას მშვიდობიანი მომიტინგეების, მედიისა და ოპოზიციური ლიდერების წინააღმდეგ და ვახსენებთ საქართველოს ხელისუფლებას ადამიანის უფლებების პატივისცემისა და ფუნდამენტური თავისუფლებების, მათ შორის შეკრებისა და მედიის თავისუფლების დაცვის პასუხისმგებლობას. ასევე ვგმობთ პოლიტიკოსების მიმართ მუქარას.

„ქართული ოცნების“ რეპრესიულმა პოლიტიკურმა კურსმა და დემოკრატიულმა უკუსვლამ რეაქციულად გამოიწვია ჩვენი ურთიერთობების გაუარესება, როგორც ევროპულ, ისე ეროვნულ დონეზე და ჩვენი დახმარებისა და თანამშრომლობის შემცირება საქართველოს ხელისუფლებასთან.

შესაბამისად, აღვასრულებთ ევროკავშირის გადაწყვეტილებას საქართველოს დიპლომატიური და სამსახურებრივი პასპორტის მფლობელებისთვის უვიზო რეჟიმის აკრძალვაზე და განვიხილავთ დამატებით ზომებს, როგორც ევროკავშირის, ისე ეროვნული დონეზე.

ეუთოს/ოდირის საბოლოო ანგარიში 26 ოქტომბრის საპარლამენტო არჩევნების შესახებ გამოვლენილი მასშტაბური დარღვევებითა და ბრალდებების საპასუხოდ არასათანადო გამოძიებებით, ადასტურებს ჩვენ შეშფოთებას საარჩევნო პროცესების სრულფასოვნებზე. არჩევნები არ ჩატარდა ევროკავშირის კანდიდატისგან მოსალოდნელი სტანდარტების შესაბამისად.

ჩვენ მოვუწოდებთ საქართველოს ხელისუფლებას, ჩაერთოს ეროვნულ დიალოგში ყველა შესაბამის მხარესთან, რათა მოიძებნოს გამოსავალი არსებული მდგომარეობიდან და აღდგეს საზოგადოებრივი ნდობა ქართული დემოკრატიის მიმართ. OSCE/ODIHR-ის რეკომენდაციების და სტანდარტების განხორციელების, ასევე საქართველოს საზოგადოების ნაწილის მიერ წამოყენებული ახალი არჩევნების ჩატარების შესაძლებლობა უნდა იქნას განხილული ხელისუფლების მიერ ყველა პოლიტიკურ ძალასა და სამოქალაქო საზოგადოების წარმომადგენლებთან გულწრფელი დიალოგის გზით.

კიდევ ერთხელ ვადასტურებთ ჩვენს გადაწყვეტილებას, მხარი დავუჭიროთ ქართველი ხალხის დემოკრატიულ და ევროპულ მისწრაფებებს,“ – აღნიშნულია გერმანიის, საფრანგეთის და პოლონეთის საგარეო საქმეთა მინისტრების ერთობლივ განცხადებაში.

___

28 ნოემბრიდან, მას შემდეგ, რაც ირაკლი კობახიძემ „ქართული ოცნების“ გადაწყვეტილება გააჟღერა 2028 წლის ბოლომდე ევროკავშირში ინტეგრაციის პროცესის შეჩერებასთან დაკავშირებით, თბილისსა და სხვა ქალაქებში 34-ე დღეა, უწყვეტი მასობრივი პროევროპული პროტესტი მიმდინარეობს.

აჭარის ტურიზმისა და კურორტების დეპარტამენტის თანამშრომელი თამარ ლომაძე სამსახურიდან გაათავისუფლეს.

მან ამის შესახებ პოსტი ფეისბუქში გამოაქვეყნა, სადაც წერს, რომ მისი ხელშეკრულების შეწყვეტის მიზეზი პოლიტიკურია.

„დღეს დამიბარეს და მითხრეს, რომ ხელშეკრულებას არ მიგრძელებენ. წინა დღეებში მკითხეს, რას ვაპირებდი, ვიცვლიდი თუ არა პოზიციას და ვივლიდი თუ არა კიდევ აქციებზე.

ვინც მიცნობთ, იცით, რა იქნებოდა ჩემი პასუხი – თუკი ვთვლი, რომ რაღაც არასწორია, გავაპროტესტებ ყველა პლატფორმაზე, სადაც შემეძლება“ – წერს თამარ ლომაძე.

თამარი „ბათუმელებთან“ საუბარში ამბობს, რომ ის ბოლო ორი წელია, ტურიზმისა და კურორტების დეპარტამენტში შიდა ტურიზმის სტიმულირებისა და საზოგადოებასთან ურთიერთობის სამსახურში მუშაობდა. მანამდე, 2016 წლიდან კი, პერიოდულად სხვადასხვა პოზიციაზე იყო დასაქმებული.

თამარ ლომიძე ამბობს, რომ მას ამ დროის განმავლობაში არასდროს მიუღია შენიშვნა.

„პროფესიული კუთხით არასდროს არაფერი დამიკლია ჩემი საქმისთვის. იმაზე მეტსაც ვაკეთებდი, ვიდრე საჭირო იყო. ამიტომ, მაქვს უსამართლობის ძალიან დიდი განცდა.

გულწრფელად ვერ ვხდები, როგორ გინდათ ვინმეს ისეთ ქვეყანაში ცხოვრება, სადაც აზრის გამოხატვის გამო გათავისუფლებენ სამსახურიდან.

საქართველო აუცილებლად იქნება ევროპული ოჯახის წევრი“- ამბობს თამარ ლომაძე.

მას შემდეგ, რაც საჯარო სამსახურებში დასაქმებულმა პირებმა მხარი დაუჭირეს საქართველოს ევროინტეგრაციის პროცესს და გაემიჯნნენ „ქართული ოცნების“ პრემიერ-მინისტრის ირაკლი კობახიძის განცხადებას, რომ ისინი აჩერებდნენ ევროპასთან მოლაპარაკებებს 2028 წლამდე, „ოცნების“ ანტიკონსტიტუციურმა ხელისუფლებამ ცვლილებები შეიტანა საჯარო სამსახურის შესახებ კანონში და კრიტიკულად განწყობილი საჯარო მოხელეების სამსახურებიდან გათავისუფლებები დაიწყო.

საჯარო სამსახურის შესახებ კანონში შესული ცვლილებები, როგორც იურისტები აცხადებენ, რეპრესიული და არადემოკრატიულია.

„ბათუმელებმა“ სცადა დაკავშირებოდა ტურიზმის დეპარტამენტის თავმჯდომარის პირველ მოადგილეს, თამარ კაიკაციშვილს. მისთვის გვინდოდა გვეკითხა, რატომ დევნიან ადამიანებს პოლიტიკური ნიშნით იმ უწყებაში, სადაც თვითონ არის მაღალი თანამდებობის პირი.

თამარ კაიკაციშვილი „ნაცების რეჟიმს“ თავად ადანაშაულებდა სამსახურიდან პოლიტიკური ნიშნით გათავისუფლებაზე. თუმცა ახლა, „ბათუმელების“ სატელეფონო ზარებს არ უპასუხა.

პროევროპულ აქციებზე პროფესიული საქმიანობის ხელშეშლის საქმეებზე 21 ჟურნალისტს და ოპერატორს დაზარალებულის სტატუსი მიენიჭა.

სტატუსის მინიჭების მოთხოვნით საგამოძიებო უწყებას ორგანიზაცია „მედიაომბუდსმენმა“ მიმართა.

„2024 წლის ბოლოს მასშტაბური აქციების გადაღებისას კრიტიკული მედიის წარმომადგენლებს სპეცრაზმელები აყენებდნენ შეურაცხყოფას, სცემდნენ, აკავებდნენ და პროფესიულ საქმიანობაში ხელს უშლიდნენ.

„მედიაომბუდსმენი“ აგრძელებს დაცვის ქვეშ მყოფი პირების სამართლებრივ მხარდაჭერას, როგორც შიდა, ისე საერთაშორისო მექანიზმების გამოყენებით,“ – აღნიშნულია „მედიამბუდსმენის“ მიერ დღეს, 31 დეკემბერს გავრცელებულ ინფორმაციაში.

28 ნოემბრიდან, მას შემდეგ, რაც ირაკლი კობახიძემ „ქართული ოცნების“ გადაწყვეტილება გააჟღერა 2028 წლის ბოლომდე ევროკავშირში ინტეგრაციის პროცესის შეჩერებასთან დაკავშირებით, თბილისსა და სხვა ქალაქებში 34-ე დღეა, უწყვეტი მასობრივი პროევროპული პროტესტი მიმდინარეობს.

TI-ის ანგარიშის მიხედვით , 2024 წელს ჟურნალისტებზე ძალადობის, შევიწროების და დაშინების მცდელობების 200-მდე შემთხვევა დაფიქსირდა.

ახალი წლის ღამეს ბათუმში პროევროპული საპროტესტო აქცია გაიმართება.

„31 დეკემბერს, 23:00 საათზე, ვიკრიბებით საკონსტიტუციო სასამართლოსთან! ერთად შევხვდეთ დიდი ცვლილებების წელს“ – ნათქვამია საპროტესტო აქციის ანონსში.

33 დღეა საქართველოს მოქალაქეები ქვეყნის სხვადასხვა ქალაქში იკრიბებიან და აპროტესტებენ „ქართული ოცნების“ მიერ ქვეყნის ევროპული კურსის შეცვლას.

საქართველოში პროევროპული აქციები 28 ნოემბერს დაიწყო მას შემდეგ, რაც ირაკლი კობახიძემ თქვა, რომ „ქართული ოცნება“ 2028 წლამდე უარს ამბობდა ევროკავშირთან მოლაპარაკებების დაწყებაზე.

საჯარო რეესტრის თანამშრომელი ელზა გელაძე სოციალურ ქსელში პოსტს აქვეყნებს და ამბობს, რომ სამსახურიდან პოლიტიკური ნიშნით გაათავისუფლეს.

„რამდენიმე საათის წინ სატელეფონო კომუნიკაციის საშუალებით დამიკავშირდნენ და მითხრეს, რომ საჯარო რეესტრის ეროვნული სააგენტო ჩემთან ხელშეკრულებას აღარ გააგრძელებს, რის მიზეზადაც ჩემი როგორც კადრის საჭიროების არ არსებობა დასახელდა. რა თქმა უნდა, ამისი არავის სჯერა, როგორც ჩანს ამოქმედდა „კანონი შემცირებებთან“ დაკავშირებით.

ერთ-ერთი პირველი ვიყავი ვინც მოაწერა ხელი პეტიციას, რომლითაც ვგმობდით ძალადობას, ჩვენს თანამოქალაქეებზე და ვითხოვდით საქართველოს კონსტიტუციის 78-ე მუხლის აღსრულებას.

ჩემთან ერთად გაუშვეს არაერთი ადამიანი, მათ შორის ქუთაისის ოფისიდან, ვისაც ასევე ჰქონდა პეტიციაზე ხელი მოწერილი. ეს ყველაფერი მოხდა სრულიად გაუფრთხილებლად, ახალი წლის წინა ღამით. რა თქმა უნდა, ვიბრძოლებ ბოლომდე, ჩვენი ევროპული მომავლისთვის და თუ ამის გამო უნდა ვიდევნებოდე, ესე იგი სწორი გზით მივლია აქამდეც.

მე ხვალ გავიღვიძებ ჩემს შვილთან ერთად და მისთვის თვალებში ჩახედვის არ შემრცხვება და თქვენ, რას მოუყვებით შვილებს??

და ბოლოს მივმართავ ჩემს ყოფილ კოლეგებს, ის რაც დღეს მოხდა არის კლასიკური დაშინებისა და რეპრესიების მაგალითი და თუ დღეს ამას ვინმე შეეგუება შემდეგი შეიძლება თვითონ იყოს !!!

წინ ევროპისკენ!“ – წერს სოციალურ ქსელში ელზა გელაძე.

ამავე თემაზე:

როგორ შეიცვალა საჯარო მოხელეთა უფლებრივი მდგომარეობა კანონში შეტანილი ცვლილებებით – ISFED-ის შეფასება

See more

 

 

„ივანიშვილი თვითგანადგურების გზაზეა. ეს არის, რომ ამ თვითგანადგურებასთან ერთად იძირება თვითონ და ძირავს მთელ ქვეყანასაც,“ – მიიჩნევს ფილოსოფოსი გიორგი მაისურაძე. მასთან საუბარი „ოცნების“ დღევანდელი გადაწყვეტილებით დავიწყეთ: უზენაესი სასამართლოს თავმჯდომარის მოადგილე დასანქცირებული გომელაურის მოადგილედ დანიშნეს.

გიორგი მაისურაძის ეს ამბავი აღარ გაჰკვირვებია. „ივანიშვილია მხოლოდ იქ, დანარჩენი არიან მხოლოდ ნიღბები ადამიანების… სახელმწიფო ინსტიტუციები ჩვენს ქვეყანაში სრულიად ჩამოშლილია. ეს უკვე ერთი ადამიანის პირადი სერვისია,“ – ამბობს გიორგი მაისურაძე.

თუმცა ივანიშვილი ჯერჯერობით უკან არ იხევს. რა რესურსი რჩება წინააღმდეგობას უკვე ამოქმედებული რეპრესიული კანონების პირობებში? – „ბათუმელებმა“ გიორგი მაისურაძესთან ინტერვიუ ჩაწერა. ის ფილოსოფოსია, ილიას სახელმწიფო უნივერსიტეტის პროფესორი.

• ბატონო გიორგი, „ოცნების“ დღევანდელ გადაწყვეტილებაზე მინდა გკითხოთ: უზენაესი სასამართლოს თავმჯდომარის მოადგილე „მაგნიტსკის სიაში“ ჩასმული გომელაურის მოადგილედ დანიშნეს. რას აჩვენებს ეს ამბავი თქვენთვის? 

ეს აჩვენებს კარისკაცების, პირადი ხელქვეითების დანიშვნას თანამდებობაზე. თვითონ შს მინისტრი გომელაური ვიცით, რომ იყო ივანიშვილის პირადი მცველი, მერე დაცვის უფროსი. ახლა ვიცე-პრემიერიც გახდა. რეალურად ეს არის პირადი ხელქვეითების დანიშვნა სახელმწიფო თანამდებობებზე, რაც სახელმწიფოს უგულებელყოფა, მისი ჩამოშლაა.

სახელმწიფო ინსტიტუციები ჩვენს ქვეყანაში სრულიად ჩამოშლილია. ეს უკვე ერთი ადამიანის პირადი სერვისია.

არ ვიცი, რა შეიძლება ეწოდოს ამას, რა გითხრათ? ჩვენ გვინდა, რომ სახელმწიფოებრივი, სამართლებრივი ტერმინებით ვილაპარაკოთ იმაზე, რაც გასულია კანონს გარეთ უკვე დიდი ხანია. ეს არის სრული ჩამოშლა სახელმწიფო ინსტიტუტების და მათი ფაქტობრივი გაუქმება.

სახელმწიფო, როგორც ასეთი, უქმდება.

იგივე ამბავი იყო ყაველაშვილის პრეზიდენტად დანიშვნა. დანიშვნაა, აბა, რა არის. გასაგებია, რომ საკუთარი არ იყო, მაგრამ ადამიანს რომ ნაწერის კითხვა არ შეუძლია, ყველანაირად შეუფერებელი თანამდებობისთვის. მისი დეპუტატობაც იყო კომედია – გინების, აგრესიის, უზრდელობის მეტი ამ ადამიანისგან არაფერი მოგვისმენია.

• შალვა პაპუაშვილი ამბობდა, რომ ინაუგურაცია 40 წუთს გაგრძელდებოდა, თუმცა 27 წუთიც საკმარისი აღმოჩნდა. ყაველაშვილს კონსტიტუციით გათვალისწინებული ევროკავშირის ინტეგრაცია ერთხელაც არ უხსენებია… 

რა ინაუგურაცია უნდა სჭირდებოდეს ადამიანს, რომელიც მართლა „ტყემალზე ზის“? ეს ყველაფერი ხომ იმდენად ფარსი იყო, სერიოზული მსჯელობა არ შეიძლება.

ინაუგურაცია სხვა რამეა. ინაუგურაცია სახელმწიფოებრივი აქტია. ის არ ტარდება პარლამენტის სხდომათა დარბაზში.

• ხომ არ არის ეს გზავნილი იგივე ყაველაშვილისთვის, მართლა პრეზიდენტი არ ეგონოს თავი? ან მოსამართლემ არ ჩათვალოს, რომ მართლა უვადოდ გამწესებულია, როგორც შალვა თადუმაძე იყო? 

მაგათ ეს ძალიან კარგად იციან, ჩემი აზრით.

ამით საქართველოს, ჩვენ გვაჩვენებენ, არ გეგონოთ, რომ თქვენ მართლა სახელმწიფოში ცხოვრობთ. სახელმწიფო გაუქმებულია იმ მომენტიდან, როცა არაფორმალური მმართველობა დაიწყო საქართველოში. დღეს უკვე იმ ეტაპზე ვართ, როცა არაფერი კანონიერი აღარ არის. ეს ყველაფერი ერთი ადამიანის პირადი ორგანიზაციაა, რომელსაც მიტაცებული აქვს სახელმწიფო.

• ივანიშვილი ჯერ კიდევ არაფერს თმობს იმის მიუხედავად, რომ წინააღმდეგობა 33-ე დღეა ძლიერდება, აქტიურდება სანქციები.

ამ ქვეყანას ივანიშვილი აღიქვამს არა სახელმწიფოდ, არამედ ეს არის მისი პირადი კარტელი. ივანიშვილი თავის მოურავებს თუ ხელქვეითებს უწოდებს რაღაც სახელებს. ჩვენ სახელმწიფო აღარ გვაქვს. ის კი არა, რომ არადემოკრატიულია ხელისუფლება, ავტორიტარია და ასე შემდეგ, უბრალოდ დღეს ჩვენ ვქრებით, როგორც სახელმწიფო.

• მაგრამ მოქალაქეები ხედავენ ამ საფრთხეს და წინააღმდეგობა ძლიერდება. ის, რომ საქართველოს აქვს დემოკრატიის გამოცდილება, რამდენად მისცემს საშუალებას ივანიშვილს, შეინარჩუნოს მიტაცებული ძალაუფლება? 

დიახ, საქართველოში დემოკრატიულობის სურვილიც არსებობს და სამართლის სურვილიც. დემოკრატია და სამართალი ერთმანეთის გარეშე ვერ იარსებებს. სამართლიანი სახელმწიფო მაშინ არსებობს, როდესაც არსებობენ დემოკრატიული ინსტიტუტები და არა ერთმმართველობა, ოლიგარქია, ტირანია და დამანგრეველი ფორმები მმართველობის, რომლებიც, პირველ რიგში, აუქმებენ სახელმწიფოს. ეს არის სახელმწიფოს მიტაცება და ერთი ადამიანის საკუთრებად ქცევა.

ყველაფერი იმაზეა დამოკიდებულიო, ვინ როგორ შეძლებს. ვიცით  ისტორია, ვთქვათ, კოლუმბიაში პაბლო ესკობარს სურდა გამხდარიყო პრეზიდენტი, მაგრამ ვერ გახდა – მას სახელმწიფო დახვდა. ესკობარი სიმდიდრით მეოთხე ადამიანი იყო მსოფლიოში, მაგრამ ვერ მოახერხა ადამიანებისთვის თავს მოეხვია საკუთარი ნება. არსებობდა იქ სამართლებრივი და დემოკრატიული ინსტიტუტები.

ჩვენთან სახელმწიფო უკვე მიისაკუთრა ივანიშვილმა, რჩება ხალხი, რომელიც ან ებმება ამ კარტელის ფერხულში, ან უწევს წინააღმდეგობას ივანიშვილს. ჩვენ გვაქვს მზარდი წინააღმდეგობა და ვფიქრობ, არც არავინ აპირებს სახელმწიფოს მიტაცების მიღებას იმ ნაწილის გარდა, რომელიც არის ივანიშვილის ბრმა მიმდევარი, თაყვანისმცემელი, ან კორუმპირებული.

• ხალხი ქუჩაშია, სადაც უკვე ამოქმედდა ივანიშვილის რეპრესიული მექანიზმები, მაგალითად, ქუჩის გადაკეტვა ჯარიმდება, მაგრამ აქტივისტებმა ნახეს „გამოსავალი“: ზებრაზე უწყვეტი გადასვლით და გადმოსვლით შეაჩერეს მოძრაობა. რას შეცვლის რეპრესიული კანონების ამოქმედება, თქვენი აზრით? 

ზებრის ეს მაგალითი, რაც ახლა ახსენეთ, აჩვენებს იმას, რომ ყოველთვის მოიძებნება გზა, რომ გაგრძელდეს საპროტესტო აქციები.

თუ მართლა კომენდანტის საათს გამოაცხადებენ 24-საათიანს, ყოველდღიურად და სახლებიდან აღარ გამოუშვებენ ხალხს, ტანკებით და ავტომატებით თუ დადგებიან, თუ გადაკეტავენ ყველაფერს, ესაა, მაგრამ ამის რესურსი მათ არ აქვთ. რუსეთი, ჩრდილოეთ კორეა, ირანი, თუ ჩეჩნეთი,? – არ ვიცი, რომელი ქვეყნიდან მოიტანენ რესურსს. ჩვენ ვხედავთ, რა რესურსიც აქვს ამ ქვეყანას.

• რესურსის მიუხედავად, ჩვენ ვნახეთ რა რეაქცია მოჰყვა რუსთაველზე ადამიანების წამებას – უფრო მეტი ადამიანი გამოვიდა ქუჩაში. უშვებთ, რომ შეიძლება ამ გზას დაადგეს ისევ „ოცნება“? 

უდიდესი ნაწილი საზოგადოების არ ეგუება ტირანიას, დიქტატურის დამყარებას. ვხედავთ ასობით ადამიანს, რომელიც ამას ერ ეგუება. მოიძებნება ათასი საშუალება, რომ გაგრძელდეს წინააღმდეგობა.

არ ვიცი, თუ მთელ ქვეყანას მავთულხლართს შემოარტყამენ და სახლებში გამოგვამწყვდევენ, რანაირად უნდა ჩაახშონ ეს პროტესტი?

ივანიშვილს პროტესტის ჩახშობის რეალური საშუალებები არ აქვს. არსებობს ეკონომიკური თუ სხვა მხრიდან ზეწოლა, მაგრამ ჩვენ არ გვაქვს დიქტატურაში ცხოვრების გამოცდილება. დიქტატურა იყო მხოლოდ სტალინის დროს, შემდეგ უკვე იწყება საბჭოთა სისტემის თვისობრივი გარდაქმნა. ხალხი, რომელიც დაიბადა და გაიზარდა მეტ-ნაკლები დემოკრატიის პირობებში, ძალიან ძნელია აიძულო, დაბრუნდნენ უკან.

უკანაც ვერ ვიტყვით, რადგან ის ძალიან ღრმა, ისტორიული წარსულია უკვე.

• მასობრივი ძალადობის შემდეგ „ოცნება“ ამჯერად ნაკლებად იმჩნევს საპროტესტო აქციებს. რა სტრატეგიით მოქმედებს ივანიშვილი, თქვენი დაკვირვებით? 

მათ ხელთ უპყრიათ ყველაფერი, რაც კი დარჩა ამ სახელმწიფოში. სახელმწიფო ინსტიტუციები მათი კონტროლის ქვეშაა, თუმცა დაინახეს, რომ როცა არბევდნენ და აწიოკებდნენ ადამიანებს, ამას უკურეაქცია ჰქონდა – უფრო მეტი ადამიანი გამოვიდა ქუჩაში.

ამიტომაც შეცვალეს ტაქტიკა. დროის მოგების ტაქტიკაც შეიძლება ეწოდოს ამას – იქნებ სამყაროში რამე მათ სასარგებლოდ მოხდეს. ხედავენ ნათლად, რომ ტრამპის იმედი აღარ უნდა ჰქონდეთ. შესაძლოა, რაღაც ფანტაზიები აქვთ. ჩვენ ნუ წარმოვიდგენთ, რომ ეს ბრძენი ხალხია. ვიცით, რომ მათი მაქსიმალური ინტელექტუალური შესაძლებლობა არის ირაკლი კობახიძე, მისი ფანტაზიები და ზღაპრები, რომელსაც ის გაუთავებლად ჰყვება.

როგორც ჩანს, მათ მაინც აქვთ იმედი, რომ საერთაშორისო აღიარებას მიიღებენ, მაგრამ საქართველო დღითიდღე ეფლობა იზოლაციაში. მსოფლიოს დიდი ნაწილი, გამონაკლისი ქვეყნების გარდა, არ აღიარებს მათ, არავის მათთან ურთიერთობა არ სურს.

ჩვენი ქვეყანა მთლიანად ტურიზმზეა აწყობილი, მაგრამ ამ ქვეყანაში ტურისტები აღარ ჩამოდიან. რაღაც რომ შეემთხვეს ტურისტს, ვერ მიმართავს პოლიციას, სასამართლოს, რადგან პოლიცია არის სადამსჯელო ორგანიზაცია. ამ გარემოში რატომ გარისკავს ინვესტორი, რომ აქ ფული შემოიტანოს? რატომ უნდა წამოიწყოს რამე საქმიანი ურთიერთობა, როცა იზოლირებულია ქვეყანა, როცა ქვეყნის ხელმძღვანელობას აქვს სანქციები დადებული? მხოლოდ კაზინოებით ხომ ვერ მოაწყობენ ეკონომიკას?

ვინ რამდენ ხანს გაძლებს, ამაზეა დამოკიდებული ეს ბრძოლა.

იზოლაციის ეს პროცესი გაღრმავდება. ქვეყანა დაზარალდება ისე, რომ ამ ყველაფრისგან გათავისუფლებას და აღდგენას იმ ნიშნულზე, რაც 2 წლის იყო, შესაძლოა, ათეული წელი დაგვჭირდეს. ეს საშინელი რეგრესია, რომლის ქვეშაც ჩვენ მოვექეცით. ივანიშვილმა ისტორიულად უკან გადაათრია მთელი განვითარების გზა, რაც ბოლო სამ ათწლეულში ჰქონდა საქართველოს.

• დიდხანს ვერ გაჩერდება ივანიშვილი და მისი მხარდამჭერები გამოკეტილი? 

გაჩერდება რაღაც პერიოდი, მაგრამ თვითკვებაზე ხომ არ არიან? ჰაერიდან ხომ არ იღებენ და მზიდან საკვებს, ფინანსურ საშუალებას? არც ოფშორების იმედი ექნებათ, რომ ამაზე მსოფლიო თვალს დახუჭავს, რომ რაღაც დაუბეგრავი შავი ფული ათეთრონ…

ამ ლოგიკამ, რასაც ივანიშვილი იყენებს, შეიძლება იარსებოს რამდენიმე თვე, საბოლოო ჯამში კი, ეს არის სრული კატასტროფა, თვითნგრევა. ივანიშვილი თვითგანადგურების გზაზეა. ამ თვითგანადგურებასთან ერთად იძირება თვითონ და ძირავს მთელ ქვეყანასაც.

• ივანიშვილი ჯერ კიდევ ინარჩუნებს სახელისუფლებო ვერტიკალს. თქვენ სად ხედავთ ნიშნებს, რომ„ოცნება“ თვითგანადგურების გზაზეა? 

ივანიშვილი კიდევ უფრო ამტკიცებს სახელისუფლებო ვერტიკალს, მაგრამ გააჩნია რის ხარჯზე – სახელმწიფო ინსტიტუტების განადგურების და ჩამოშლის ხარჯზე. უფრო მეტი სანქცია იქნება, რასაც ვხედავთ, რასაც ვისმენთ და ვკითხულობთ.

ახლა სხვა ეპოქაა. ვერ ჩამოაფარებ რკინის ფარდას ქვეყანას.

აქ ვერ იქნება ბელარუსი, რადგან მას, ჯერ ერთი, ჰყავს რუსეთი. ბელარუსს აქვს საკუთარი ეკონომიკა, საკმაოდ ძლიერი, მას შეუძლია თავიდან ბოლომდე საკუთარი თავის უზრუნველყოფა.

• რა არის ამ ეტაპზე გამოწვევა წინააღმდეგობისთვის? 

უნდა გაგრძელდეს ისევ მშვიდობიანი ფორმით საპროტესტო აქციები. თუ ვინმეს აწყობს დაძაბულობა და ექსცესები, ეს თვითონ ივანიშვილი და მისი გარემოცვაა. ივანიშვილია მხოლოდ იქ, დანარჩენი არიან მხოლოდ ნიღბები ადამიანების.

ყოველთვის მოიძებნება პროტესტის ახალი საშუალებები. ასევე, პოლიტიკოსები უნდა ჩაერთონ ამ პროცესში, რომლებიც სამწუხაროდ არ გვყავს. ივანიშვილმა არამხოლოდ სახელმწიფო ინსტიტუტები ჩამოშალა და გაანადგურა, არამედ მთელი პოლიტიკური სივრცეა განადგურებული. აქედან გამოსვლას და წელში გამართვას მართლა წლები დასჭირდება.

თუმცა თუ პროტესტი გაგრძელდება უწყვეტად, ამას ექნება შედეგი, რა თქმა უნდა.

ულევი არაფერია. ულევი არც მილიარდერის რესურსია. მას თუ გადაუკეტავ მომარაგების წყაროებს, გამოლევადია. დაერევიან ბოლოს ერთმანეთს. ჩვეულებრივი ბუნების კანონია ეს. ჯერჯერობით კარგად არიან, თუმცა კარგად არ ჰქვია იმას, რა სახითაც ივანიშვილი იჯდა ინაუგურაციაზე. კარგად მყოფი გარეგნობა არ იყო ეს.