ბათუმში სამი ახალი მოსამართლე შეუდგა მუშაობას: მარიანა ფომაევა – ადმინისტრაციულ საქმეთა კოლეგია, ვიქტორ მეტრეველი – სისხლის სამართლის საქმეთა კოლეგია, ეკატერინე კახნიაშვილი – სამოქალაქო საქმეთა კოლეგია.
ახალი მოსამართლეები 2024 წლის 24 დეკემბრიდან გაამწესეს ბათუმის საქალაქო სასამართლოში. ამ მოსამართლეებს მოსამართლედ მუშაობის გამოცდილება არ აქვთ.
მარიანა ფომაევა, იუსტიციის უმაღლესი საბჭოს ოფიციალურ გვერდზე გამოქვეყნებული მონაცემების მიხედვით, 32 წლისაა. მას თბილისის სახელმწიფო უნივერსიტეტში აქვს სამართალმცოდნეობის სპეციალობა დამთავრებული. ამავე უნივერსიტეტში ფომაევამ 2016 წელს მიიღო მაგისტრის აკადემიური ხარისხი.
2015 წლიდან მარიანა ფომაევა შპს „ტვინოში“ მუშაობდა, 2018 წლიდან 2023 წლის ივლისამდე კი – იუსტიციის უმაღლეს საბჭოში, საბჭოს ერთ-ერთი წევრის რეფერენტის პოზიციაზე.
„2023 წლის 18 მარტს ჩავაბარე მოსამართლის საკვალიფიკაციო გამოცდა სამოქალაქო და ადმინისტრაციული სამართლის სპეციალიზაციაში“, – ვკითხულობთ მარიანა ფომაევას ბიოგრაფიაში.
იუსტიციის უმაღლესი საბჭოს ოფიციალურ გვერდზე გამოქვეყნებული მონაცემების მიხედვით, ვიქტორ მეტრეველმა 2007 წელს დაამთავრა ტექნიკური უნივერსიტეტის ჰუმანიტარულ-ტექნიკური ფაკულტეტის სამართალმცოდნეობის სპეციალობა, 2009 წელს კი ამავე უნივერსიტეტში მიიღო მაგისტრის აკადემიური ხარისხი სისხლის სამართლის სპეციალობით.
2010 წლიდან ვიქტორ მეტრეველი თბილისის საქალაქო სასამართლოს კანცელარიაში იწყებს მუშაობს. 2011-2014 წლებში იგი თბილისის საქალაქო სასამართლოში სხდომის მდივანი იყო, 2014-2023 წლებში კი – მოსამართლის თანაშემწე.
2023 წლის ოქტომბრიდან ვიქტორ მეტრეველი იუსტიციის უმაღლესი საბჭოს მსმენელი გახდა.
ვიქტორ მეტრეველი 38 წლისაა.
მოსამართლე ეკატერინე კახნიაშვილს კი 2005 წელს დაუსრულებია ნოდარ დუმბაძის სახელობის თბილისის უნივერსიტეტში სამართალმცოდნეობის სპეციალობა. 2011 წლიდან მას ადვოკატის გამოცდა ჩაუბარებია, თუმცა ოფიციალურ ბიოგრაფიაში არ ჩანს, მუშაობდა თუ არა იგი ადვოკატად.
2001 წლიდან ეკატერინე კახნიაშვილს სხვადასხვა პოზიციაზე უმუშავია თბილისის საოლქო და თბილისის საქალაქო სასამართლოებში, ყველაზე ხანგრძლივად – 2006 წლიდან 2018 წლამდე ეკატერინე კახნიაშვილი თბილისის საქალაქო სასამართლოში მოსამართლის თანაშემწედ მუშაობდა.
ეკატერინე კახნიაშვილი იუსტიციის უმაღლესი სკოლის მსმენელი იყო 2023 წელს. იგი 47 წლისაა.
