Batumelebi

საქართველოს მართლმადიდებელი ეკლესიის ქუთაის-გაენათის ეპარქიის მიტროპოლიტმა იოანე გამრეკელმა ილია ჭავჭავაძის მკვლელობა, იმდროინდელი სოციალ-დემოკრატების გავლით, „ევროპას“ დაუკავშირა და განაცხადა, რომ მკვლელობის „დაკვეთა ევროპიდან იყო“. მის ამ ნათქვამს – ილიას მკვლელობის ევროპასთან დაკავშირებას – ისტორიკოსები „წარმოუდგენელ აბსურდს“ უწოდებენ.

მიტროპოლიტი იოანეს ძველ ნათქვამ-ნააზრევის ფონზე, ზოგიერთი კომენტატორი მის ახალ განცხადებაში რუსული პროპაგანდის კიდევ ერთ მოქნილ, მავნე გამოვლინებას ხედავს, ხოლო იმის გათვალისწინებით, რომ ქუთაის-გაენათის (გელათის) ეპარქია  სიდიდითა და მნიშვნელობით ქვეყანაში მეორეა, მის იქ დანიშვნად საგანგაშოდ მიიჩნევს.

რა თქვა მიტროპოლიტმა იოანემ?

10 ნოემბერს, ბაგრატის ტაძრის გარეთ, ადგილობრივ მედიასაშუალება „ქუთაისიპოსტთან“ საუბარში მიტროპოლიტმა იოანემ თქვა:

„ილია ჭავჭავაძე აწამეს?.. თუ? ვინ მოკლა? იცით, ვინ მოკლა? უშიშროების სამსხურს მიმართეთ. მათ ფილმი გააკეთეს, გამოიძიეს. სოციალ-დემოკრატებმა მოკლეს. და დაკვეთა იყო ევროპიდან.

იმიტომ, რომ ისინი ებრძოდნენ პოლიტიკურ ელიტას მთელ იმპერიაში. 20 წლის განმავლობაში 20 ათასზე მეტი სახელმწიფო მოხელე იყო მოკლული რევოლუციონერების მიერ, მათ შორის ილიაც მოჰყვა ამ სიაში… სოციალ-დემოკრატებმა [მოკლეს]… და ეს იდეები საიდან მოდის, ეგ კარგად იცით“.

ილია ჭავჭავაძე 1907 წლის 30 აგვისტოს (ახალი სტილით) მოკლეს სოფელ წიწამურთან. გამოძიება მალევე დაიწყო მეფის რუსეთის საიდუმლო პოლიციამ („ოხრანკამ“), თუმცა როგორც ამ გამოძიების შედეგებს, ასევე, საბჭოთა პერიოდის გამოძიების ოფიციალურ ვერსიას ისტორიკოსები სკეპტიკურად უყურებენ.

იმ ფილმშიც, რაზეც გამრეკელი მიუთითებს, — რომელიც არა უშიშროებამ, არამედ შინაგან საქმეთა სამინისტრომ გადაიღო 2014 წელს, — მიმოხილულია დაახლობით ასწლიან პერიოდში განვითარებული სხვადასხვა, განსხვავებული ვერსია.

მიუხედავად იმისა, რომ სადავო და ბოლომდე დაუმტკიცებელი სხვადასხვა ვერსია არსებობს მკვლელობის შესახებ, არც ფილმში და, როგორც სპეციალისტები გვეუბნებიან, არც სამეცნიერო თუ სხვა სახის ლიტერატურაში, გაკვრითაც კი არ არის ნახსენები „დაკვეთა ევროპიდან“.

მეტიც, ფილმის ბოლოსკენ, მკვლელობის მონაწილეები არა მენშევიკებთან, არამედ სოციალ-დემოკრატების ბოლშევიკების ფრთასთან არიან დაკავშირებული.

სხვადასხვა ვერსია

ისტორიკოსი ირაკლი ხვადაგიანი, რომელიც ილია ჭავჭავაძის მკვლელობას „XX საუკუნის ჯერჯერობით უპასუხო გამოცანას“ უწოდებს, „ნეტგაზეთთან“ საუბარში მოკლედ მიმოიხილავს იმ ვერსიებს, რაც ამ საქმესთან დაკავშირებით არსებობს:

„არსებობს უამრავი ვერსია. ჯერ იყო ცარისტული რუსეთის [„ოხრანკის“] გამოძიება და ვერსია, რომლის შემდეგაც დააპატიმრეს და დასაჯეს მკვლელობის მონაწილე რამდენიმე პირი, როდესაც პირდაპირ გამოცხადდა, რომ ეს იყო სოციალ-დემოკრატიული პარტიის ჩადენილი დანაშაული. არადა, კონტექსტი ასეთი იყო: რევოლუციური მოძრაობა ებრძვის ცარიზმს, ცდილობს მის დამხობას და რეჟიმი იყენებს ამას მტრის კომპრომატიზაციისთვის.

დროთა განმავლობაში ეს საკითხი უკანა პლანზე იყო გადაწეული. 40-იანი წლების დამდეგს რეჟიმმა ჩათვალა, რომ ილიას მკვლელობას ახალი დასაბუთება უნდა მიეცეს და შემოიტანა გიგლა ბერბიჭაშვილის ვერსია, რომ ეს იყო ცარისტული რეჟიმის, ოხრანკის მიერ ორგანიზებული მკვლელობა.

1980-იანი წლების ბოლომდე ამას ალტერნატივად მხოლოდ ფოლკლოლური ვერსიები შეხვდა — იმ ნაწილმა, რომელიც სკეპტიკურად და მტრულად იყო განწყობილი ოფიციალური იდეოლოგიისა და ისტორიოგრაფიის მიმართ, დაიწყო ლეგენდის შეთხზვა, რომ ეს უკავშირდებოდა ბოლშევიკებს და ფილიპე მახარაძე და სერგო ორჯონიკიძე პირადად მონაწილეობდნენ ამ მკვლელობაში;

1990-იანი წლების შემდეგ ეს ყველაფერი ერთმანეთში აირია და დღემდე, თითო-ოროლა გამონაკლისს თუ არ ჩავთვლით, ახლოსაც კი ვერავინ მივიდა ამ საქმის გარკვევასთან“.

თუმცა, როგორც ირაკლი ხვადაგიანი გვეუბნება, მაინც გაურკვეველი რჩება, რატომ ჩაიდინეს ეს მკვლელობა: „ილიას მკვლელობა რჩება სამეცნიერო, ისტორიულ და, გარკვეულწილად, კრიმინალისტურ გამოცანად“.

„ევროპისგან დაკვეთილი მკვლელობა“?

რას ამბობენ ისტორიკოსები ილიას მკვლელობის „ევროპასთან“ დაკავშირებაზე? ან რომელ „ევროპას“ გულისხმობს გამრეკელი 1907 წლის რეალობაში, არსებობდა კი დღევანდელივით, შედარებით ერთიანი სივრცე პირველ მსოფლიო ომამდე 7 წლით ადრე?

კიდევ ერთი ისტორიკოსი, ირაკლი ირემაძე იოანე გამრეკელის ამ ნათქვამზე ამბობს, რომ არც კი ღირს მეცნიერულ დისკუსიაში შესვლა: „ევროპელების ხელი რუსეთში განვითარებულ ტერორისტულ აქტებში აბსურდულია, არსად არაფრით არ იკვეთება“.

პირველ რიგში, ისტორიკოსები მიუთითებენ, რომ ამ განცხადებით [20 წლის განმავლობაში 20 ათასზე მეტი სახელმწიფო მოხელე იყო მოკლული რევოლუციონერების მიერ, მათ შორის ილიაც მოჰყვა ამ სიაში] იოანე გამრეკელმა ილია ჭავჭავაძე რუსეთის იმპერიის სახელმწიფო მოხელეებს გაუთანაბრა.

1800-იანი წლების მეორე ნახევრიდან ცარისტული რეჟიმის არაერთი წარმომადგენელი მართლაც გახდა „ტერორისტული შეტევების“ სამიზნე, თუმცა ჭავჭავაძის მათ გვერდში დაყენება ყველანაირად გაუმართლებელია, ამბობენ ისინი.

ირაკლი ხვადაგიანი განმარტავს: „სხვადასხვა დროს „ნაროდნიკები“ [ხალხოსნები – პოლიტიკური მოძრაობა], ესერები [სოციალისტ-რევოლუციონერები] და ანარქისტები, ზოგჯერ სოციალ-დემოკრატიული პარტიაც — და განსაკუთრებით ბოლშევიკური ფრაქცია — მიმართავდნენ ტერორს, ოღონდ მეფის რეჟიმის წარმომადგენლების წინააღმდეგ“.

„ანუ მათი სამიზნეები იყვნენ სადამსჯელო ოპერაციების მეთაურები, ჟანდარმერიის ოფიცრები, პოლიციის ჩინოსნები, შინაგან საქმეთა მინისტრები, რომლებიც თვითონ ახორციელებდნენ ტერორს. ანუ ეს იყო „ტერორი ტერორს“. გამრეკელის ნარატივით კი, ილია ჭავჭავაძეც ისეთი პიროვნებების გვერდით დგას, როგორებიც იყვნენ, მაგალითად, გენერალი ფიოდორ გრიაზნოვი, ალიხანოვ-ავარკსი, ჟანდარმერიის ოფიცრები და ა.შ.“, — გვეუბნება ირაკლი ხვადაგიანი.

ამ ტერორის ევროპასთან რაიმე სახის კავშირზე საუბარს მეორე ისტორიკოსი, ირაკლი ირემაძე აბსურდულს უწოდებს და იმავეს გვეუბნება, რასაც ხვადაგიანი: „ეს ტერორი, რაც რუსეთში ხორციელდებოდა, იყო წმინდად ხალხოსნური მემკვიდრეობა, XIX საუკუნის 60-70-იანი წლებში ჯერ დეკაბრისტების, შემდეგ ხალხოსნების [იგივე „ნაროდნიკების“] მოქმედებებისა“.

ირაკლი ხვადაგიანი ამბობს: „იმის თქმა, თითქოს ევროპა იდგა სოციალ-დემოკრატების [მენშევიკების] უკან, ცოტა არ იყოს, ირონიულია საქართველოს სოციალ-დემოკრატიული პარტიის შემთხვევაში. ევროპა მართლაც იყო მათი სამიზნე, ეს მოძრაობა ევროპისკენ იყო მიმართული, იქაურ სოციალ-დემოკრატიულ იდეებს ეფუძნებოდა, იქითკენ ჰქონდა მიზიდულობის ცენტრი და არა რუსულ სოციალიზმთან. მაგრამ გამრეკელს ძალიან ღრმად მოუვიდა შესვლა და ასეთი წარმოუდგენელი ფორმულა დააყენა: თითქოს სოციალ-დემოკრატებმა იმპერიის არსებობის პერიოდში ევროპის დავალებით ამდენი სახელმწიფო მოღვაწე მოკლეს იმიტომ, რომ ევროპა ებრძოდა რუსეთს და უნდოდა მისი გადაგვარება და დასუსტება“…

მაშ, რატომ ამბობს ამას გამრეკელი?

ირაკლი ხვადაგიანი გვეუბნება: „ისტორიული დისკუსიის გამართვა სასაცილოა, რამდენადაც ეს ფორმულა, რაც გამრეკელმა წარმოადგინა, ზუსტად ისევე აბსურდულია, ვინმემ რომ უცხოპლანეტელების ელემენტი შემოიტანოს ამ საქმეში“. არც თვითონ იოანე გამრეკელის მიერ დასახელებულ ფილმში, რომელიც 2014 წელს გადაიღო შინაგან საქმეთა სამინისტროს არქივმა, არ არის ნახსენები ან რაიმე სახით მინიშნებულიც კი მკვლელობის კავშირი „ევროპასთან“.

თუკი იოანე გამრეკელის ნათქვამი არც ისტორიული აკურატულობით ხასიათდება და არც რაიმე კავშირი აქვს რეალურ ისტორიულ წარსულთან, რის გამო შეიძლება ამას ამბობდეს? ხვადაგიანის თანახმად, ეს ნათქვამი „შეიძლება შევაფასო მხოლოდ თანამედროვე საინფორმაციო ომისა და რუსული პროპაგანდის განზომილებაში“:

„ეს ცხადზე ცხადი ფორმულაა, იქიდან გამომდინარე, რასაც ეყრდნობა რუსული პროპაგანდა და რბილი ძალა: იღებს გარკვეულ სახე-სიმბოლოებს და ფიქრობს, რომ ქართული საზოგადოებისთვის ილია ჭავჭავაძე არის წმინდანის რანგში აყვანილი ხელშეუხებელი სიმბოლო, რომელიც უკავშირდება რელიგიურობას, რწმენას, და იყენებს იმ ძველ სტერეოტიპებს, მისი მვკელლობის თითქოს სოციალ-დემოკრატებთან კავშირს, და ამას ამატებს ევროპის კომპონენტს — რომელიც არის მთავარი „საფრთხობელა“ და „დესტრუქციული ძალა“, რომელიც ცდილობს, გარყვნას და წაართვას რუსულ სამყაროს მისი სიწმინდეები“, — ამბობს ხვადაგიანი.

ისტორიის გამრეკელისეული ხედვა

როდესაც იოანე გამრეკელი ოფიციალურად დანიშნეს ქუთაის-გაენათის ეპარქიაში, არაერთმა თეოლოგმა გაიხსენა მის მიერ 2014 წელს გამოქვეყნებული წერილი, „საქართველოს გზა“, რომელშიც იგი წერს:

• • „რუსეთი თვითონ აღმოჩნდა მსხვერპლი ევროპაში გავრცელებული ათეიზმისა და სოციალ-დემოკრატიული იდეებისა. ევროპამ და ამერიკამ დააფინანსეს ჯერ რევოლუცია და მერე სამოქალაქო ომი რუსეთში“.
  • „სამწუხაროდ, ვრცელდება მოარული შეხედულება, რომ რუსებმა შურის გამო გადაათეთრეს ჩვენი ტაძრები და ქართულ ენაზე წირვა-ლოცვა აკრძალეს. ეს განცხადება ვიღაცამ ოდესღაც გაავრცელა და ბევრმა აიტაცა ისე, რომ არც გააანალიზა, რაში იყო საქმე. საერთოდ ტაძრები კი არ შეუთეთრებიათ, არამედ რუსეთის მეფის საქართველოში სტუმრობის წინ, გზაზე, რომელზეც მას უნდა გაევლო, იმ ტაძართა კედლები, რომლებზეც ფრესკების მხოლოდ ფრაგმენტებიღა იყო, რადგან მათი რესტავრაციის ან ხელახალი მოხატვის საშუალება არ იყო, შეათეთრეს და ხატები დაკიდეს“…

• „ჩვენ გვაშინებენ ჩრდილოელი მეზობლით — რუსეთით, და გვიკიჟინებენ, რომ „რუსეთი ამას და ამას გიზამთ თქვენ“… ქვეყანა, რომელსაც წარსულში ბევრი ბოროტება დაატეხა თავს ჩვენს ქვეყანას, მომავალში კიდევ უფრო მეტად გაგვამწარებს, რუსეთს ეს და ეს გაუკეთებია ჩვენთვისო. რუსეთს საქართველოსთან სულ ცოტა ორსაუკუნოვანი ურთიერთობის ისტორია აქვს. მანამდე ეს ურთიერთობები ეპიზოდურ ხასიათს ატარებდა. ამ ურთიერთობის მთავარი სიკეთე იმაში მდგომარეობდა, რომ საქართველოს ეძლეოდა საშაულება არსებობის იმ გზით გაგრძელებისა, რომელიც 15 საუკუნის წინ აირჩია, რაც ძალიან კარგად იცოდა ერეკლე მეორემ. თუ მის მიერ გადადგმული პოლიტიკური ნაბიჯის შედეგს ფართო მასშტაბით ობიექტურად გავაანალიზებთ, ისტორიული პროცესი დაგვიდასტურებს, რომ რუსეთთან თანაცხოვრების პერიოდი საქართველოსთვის დადებითი იყო, თუმცა დღეს ბევრი საპირისპიროს დამტკიცებას ცდილობს“.
• ევროპაზე მისეულ მსჯელობაში ჰომოფობიასაც გადააწყდებით: „ევროპული ღირებულებები, ერთი მხრივ, თავის თავში შეიცავს ქრისტიანული ღირებულებების ნატამალს და მეორე მხრივ, არაქრისტიანულს და ანტიქრისტიანულს. ანტიქრისტიანულია ადამიანის უფლებების დაცვის საბაბით, შემწყნარებლობის ნიღბით არატრადიციული სექსუალური ორიენტაციის პროპაგანდა, გავრცელება და სოციალურ ფენომენად გადაქცევის მცდელობა“…

თეოლოგ ლადო წითლიძეს მიტროპოლიტი იაონე „ერთმნიშვნელოვნად პრორუსულ ფიგურად“ მიაჩნია, სხვა საკითხებთან ერთად, აღნიშნული წერილის შინაარსის გამო და „ნეტგაზეთთან“ საუბარში მანიპულაციურსა და კატასტროფულს უწოდებს XIX საუკუნეში მომხდარი მოვლენების მიტროპოლიტისეულ ინტერპრეტაციას.

[toggle title=”იოანე გამრეკელი”]

საპატრიარქოს ვებგვერდის თანახმად, 73 წლის მიტროპოლიტის ბიოგრაფიის მოკლე შეჯამება ასეთია: დაიბადა თბილისში, ისტორიკოსის ოჯახში. სკოლის დამთავრების შემდეგ ჯერ თბილისის პოლიტექნიკურ, შემდეგ კი ნოვოჩერკასის (ქალაქი როსტოვში) გეოლოგიის ინსტიტუტებში გეოლოგია ისწავლა და კარიერაც ამავე სფეროში გააგრძელა 1985 წლამდე.

37 წლის ასაკში სიონის ტაძრის სტიქაროსანი გამხდარა, 2 წელიწადში კი მცხეთის სასულიერო სემინარიაში გადასულა სასწავლებლად. იქ სწავლის დასრულებამდე, 41 წლის ასაკში, დიაკვნად აკურთხეს, აქედან ერთ წელიწადში კი უკვე მღვდელი გახდა.

1989 წელს, როდესაც თბილისში მძიმე მოვლენები ვითარდება, ის უკვე სიონის ტაძრის პროტოპრესვიტერი (ხელმძღვანელი) და თბილისის სასულიერო აკადემიისა და სემინარიის რექტორია. ამავე წყაროს ცნობით, 9 აპრილის დილა — როდესაც საბჭოთა არმიის ნაწილებმა მშვიდობიანი მანიფესტაციის მონაწილეები დაარბიეს და დახოცეს — მან ილია II-სთან ერთად გაატარა მთავრობის სასახლესთან.

[ეს ერთ-ერთი წინააღმდეგობრივი ეპიზოდია ილია II-ის პატრიარქობის პერიოდში: 9 აპრილს მან ანტისაბჭოთა დემონსტრაციას განუცხადა, რომ მისი ინფორმაციით, [დარბევის] საშიშროება რეალური იყო და მოუწოდა, „ქაშვეთის ეკლესიაში შესულიყვნენ“. თვითონ უარყოფს, რომ ეს დაშლისკენ მოწოდება იყო, თუმცა არაერთი დღემდე ასე აღიქვამს ამ განცხადებას].

შემდეგ პერიოდში, 1995 წელს, იოანე გელათის მეცნიერებათა აკადემიის აკადემიკოსი გახდა. ამავე პერიოდიდან გამოსცემდა რელიგიურ ჟურნალს, კითხულობდა ლექციებს სემინარიაში. ბერად 2008 წელს აღიკვეცა. საინტერესოა, რომ ეპისკოპოსად აქედან სულ რაღაც სამ დღეში აკურთხეს. მთავარეპისკოპოსის ტიტული 2010 წელს მიანიჭეს, ხოლო კიდევ უფრო მაღალი იერარქია — მიტროპოლიტობა — 2011 წელს. [/toggle]

ირაკლი ხვადაგიანი ამბობს: „მეფისდროინდელი რუსეთის სიკეთედ წარმოჩენა და იმის უარყოფა და დამალვა, როგორ ხდებოდა ქართული საეკლესიო სიძველეების, წერილობითი წყაროების, კულტურული მემკვიდრეობის ძეგლების დაზიანება-განადგურება, ისტორიული არტეფაქტების ქურდობა და გატაცება, ეკლესიაში კონკრეტული სასულიერო პირების დევნა, ქართული ენის შევიწროება, საგანმანათლებლო და კულტურული მუშაობის, საღვთისმეტყველო მიმართულების ჩაკვლა, არის ზუსტად პროპაგანდისტული დღის წესრიგი. თუ ამას ვინმე სიკეთედ წარმოაჩენს, გასაგებია, რომ დღესაც ასე ხედავს საკუთარ ადგილს — იმპერიულ განზომილებაში“.

კიდევ ერთმა თეოლოგმა, ლადო ნარსიამ კი „ნეტგაზეთს“ უთხრა: „წერილში კარგად ჩანს, როგორ ხედავს ეს ადამიანი ქვეყნისთვის სტრატეგიულად მნიშვნელოვან საკითხებს და რა ორბიტაზე წარმოუდგენია მომავალი“.

წაიკითხეთ ასევე:

https://netgazeti.ge/news/402781/

საქართველოს პრემიერ-მინისტრი გიორგი გახარია დღეს, 7 დეკემბერს, ბათუმში იმყოფება. მან ჟურნალისტებთან კომენტარი გააკეთა ცხინვალის იზოლატორში მყოფ ქართველ ექიმზე, ვაჟა გაფრინდაშვილზე.

„ექიმ ვაჟა გაფრინდაშვილთან მიმართებაში, ამ მძიმე პრობლემასთან მიმართებაში მინდა გითხრათ, რომ მთავრობა, ყველა შესაბამისი უწყება სრულ კოორდინაციაშია ჩვენს პარტნიორ საერთაშორისო ორგანიზაციებთან.

ერთობლივად ვმოქმედებთ და იმედი მაქვს, უახლოეს პერიოდში ყველას ერთად შეგვეძლება, ამ მძიმე ისტორიის დასრულება ერთმანეთს მივულოცოთ“ – განაცხადა გიორგი გახარიამ.

სინგაპურის წყალქვეშა ჰოკეის გუნდის წევრმა, 50 წლის კრისტინა ტემმა სამხრეთ-აღმოსავლეთ აზიის სპორტულ შეჯიბრზე ოქროს მედალი მოიპოვა. ეს პირველი ოქროს მედალია სპორტსმენისთვის, რომელმაც კარიერა 12 წლის ასაკში დაიწყო.

პირველად კრისტინა სინგაპურის ნაკრებში 1881 წელს გამოვიდა და ვერცხლის მედალი მიიღო ცურვაში, სპორტული დებიუტიდან 38 წლის შემდეგ კი ქალმა წელს ორი ოქროს მედალი დაიმსახურა.

კრისტინამ სპორტულ კარიერა წლების წინ შეწყვიტა, თუმცა 2015 წელს, 51 წლის ასაკში მან გადაწყვიტა სპორტში დაბრუნებულიყო.

კრისტინა ტემი გაჩერებას არ აპირებს. 2021 წელს სამხრეთ-აღმოსავლეთ აზიის თამაშები ვიეტნამში გაიმართება და ოქროსმედალოსანი სპორტსმენი ვარჯიშს გააგრძელებს.

„ვვარჯიშობ, იმიტომ რომ მიყვარს შეჯიბრი, მიყვარს პროცესი, როცა მნიშვნელოვან დროს იხარჯები ბოლომდე.

რას ვეტყოდი 12 წლის ასაკში საკუთარ თავს? ვეტყოდი – გჯეროდეს საკუთარი თავის.  საკუთარი თავის რწმენაზე მნიშვნელოვანი თითქმის არაფერია“ – უთხრა კრისტინამ „ბიბისის“. 

__________

წყარო: bbc.com

სახელმწიფო შესყიდვების სააგენტომ სასწრაფო სამედიცინო დანიშნულების ავტომანქანების [მათ შორის რეანომობილების] შეძენაზე 4 ტენდერი გამოაცხადა. სახელმწიფო 84 ავტომანქანის შესყიდვას გეგმავს, რისთვისაც ჯამში 7 997 024 ლარია გათვალისწინებული.

84 ავტომანქანიდან 20 – სასწრაფო სამედიცინო დანიშნულების უნდა იყოს, ხოლო 64 – სპეციალიზებული სასწრაფო დახმარების [მათ შორის 19 – ე.წ. „რეანომობილი“].

შესყიდვების სააგენტოს მიერ გამოცხადებული კონსოლიდირებული ტენდერებით, სასწრაფო სამედიცინო დანიშნულების ავტომანქანებს საქართველოს თავდაცვისა და ჯანდაცვის სამინისტროები შეიძენენ.

[highlight color=” red”] 2 954 160 ლარით[/highlight] [შესყიდვის სავარაუდო/სატენდერო ღირებულება] დაგეგმილია სამედიცინო დანიშნულების 20 ავტომანქანის ყიდვა, რომლებიც განკუთვნილია საქართველოს თავდაცვის სამინისტროსათვის. ტენდერის პირობებში აღნიშნულია, რომ ავტომანქანების რაოდენობა საორიენტაციო ხასიათისაა და შესაძლებელია შეიცვალოს 20%-ის ოდენობით. ამ ავტომანქანების ტექნიკური მოთხოვნები ნახეთ ბმულზე.

ტენდერში წინადადებების მიღება დაიწყება 2019 წლის 9 დეკემბერს და დასრულდება მეორე დღეს, 11 დეკემბერს.

გამარჯვებული მიმწოდებელი ვალდებულია შემსყიდველი ორგანიზაციის მოთხოვნის შემთხვევაში განახორციელოს სატრანსპორტო საშუალებების დასტიკერება. ავტომანქანები უნდა იყოს თეთრი ფერის და ტენდერში გამარჯვებულმა მათი მიწოდება [შესაბამისი წერილობითი მოთხოვნის წარდგენიდან 200 დღის განმავლობაში] უნდა განახორციელოს თბილისის მასშტაბით, შემსყიდველი ორგანიზაციის მიერ განსაზღვრულ ადგილას. ურთიერთშეთანხმებით შესაძლებელია განისაზღვროს მიწოდების ადგილად სხვა ქალაქ(ებ)ი.

[highlight color=” red”] 10 628 010 ლარით[/highlight][სატენდერო თანხა] დაგეგმილია 45 ერთეული სპეციალიზებული სასწრაფო დახმარების ავტომანქანის შესყიდვა. ეს ავტომანქანები საქართველოს ჯანდაცვის სამინისტროსთვისაა განკუთვნილი. აღნიშნული რაოდენობაც საორიენტაციო ხასიათისაა და შეიძლება შეიცვალოს 20%-ით.

პარლამენტის თავმჯდომარე არჩილ თალაკვაძე დეპუტატის მხრიდან გინებას „მკაცრი შეფასებად“ მიიჩნევს და ამბობს, რომ „გამოხატვის ფორმებს ყველა თვითონ ირჩევს“. გურია TV-თან ინტერვიუში არჩილ თალაკვაძეს დეპუტატ დიტო სამხარაძის შესახებ ჰკითხეს, რომელმაც ფეისბუქში მიხეილ სააკაშვილს 3 დეკემბერს უცენზუროდ აგინა.

„დიტო სამხარაძე არის ჩვენი მეგობარი, ჩვენი პოლიტიკური გუნდის წევრი, ის არის ერთ-ერთი ადამიანი, რომელიც როცა ოპოზიციაში იყო „ქართული ოცნება“, ქვებით უპირისპირდებოდნენ, პოლიტიკური დევნით უპირისპირდებოდნენ, მას უპირისპირდებოდნენ ფიზიკური ძალით, მას ეს ბრძოლა აქვს გამოვლილი და დღეს ეს ოპოზიციის წევრები, რომლებიც არ ლაპარაკობენ და თქვენ უფრო მეტად იცავთ მათ პოზიციას. ნუ გაუკვირდებათ, რომ დიტო სამხარაძეს აქვს საკმაოდ მკაცრი შეფასებები მათთან დაკავშირებით,“ – აღნიშნა არჩილ თალაკვაძემ.

„დედის გინება არის მკაცრი შეფასება და ეს ნორმალურია?“ – ჰკითხა ჟურნალისტმა არჩილ თალაკვაძეს.

„ეს არის პოლიტიკა და გამოხატვის ფორმებს ყველა ირჩევს თვითონ, თუ ვინმე დაარღვევს კანონს, ამაზე იქნება რეაგირება…“ – თქვა პარლამენტის თავმჯდომარემ.

ჟურნალისტმა პარლამენტის თავმჯდომარეს ასევე ჰკითხა მედიით გავრცელებულ ინფორმაციაზე იმის შესახებ, რომ არჩილ თალაკვაძემ ბიძინა ივანიშვილს სტამბულის აეროპორტში აგინა სატელეფონო საუბრის დროს.

„კარგით ახლა, სერიოზულ თემებზე გადავიდეთ…“ – უპასუხა კითხვას არჩილ თალაკვაძემ. განმეორებითი კითხვის დასმის შემდეგ არჩილ თალაკვაძემ თქვა: „კარგით ახლა, კარგით, რას ამბობთ. სხვა კითხვები თუ დაგრჩათ“.

ოპოზიციური პარტიები ბათუმში ახლახან [11:20] ბათუმის ცენტრალურ პარკთან შეიკრიბნენ და მსვლელობას აწყობენ აჭარის მთავრობისკენ. მათი დღევანდელი საპროტესტო სლოგანია – „ერთად ერთის წინააღმდეგ“.

აქციის მონაწილეების მთავარი მოთხოვნაა როგორც საქართველოს პარლამენტის, ისე აჭარის უმაღლესი საბჭოს 2020 წლის არჩევნები ჩატარდეს პროპორციული სისტემით. აქციის მონაწილეების თქმით, აჭარის კონსტიტუციაში შესატანი ცვლილებები პროპორციულ სისტემაზე გადასასვლელად მზადაა და მას მხოლოდ დამტკიცება სჭირდება.

აქციის მონაწილეები ბათუმიდან, ისე როგორც თბილისიდან და ქვეყნის სხვა რეგიონებიდან, ქუთაისში მიდიან, სადაც დღეს დაგეგმილია ოპოზიციის ერთიანი საპროტესტო აქცია.

„დინამო ბათუმის“ კაპიტანმა ვაკო თევდორაძემ 2019 წლის ეროვნულ ლიგაზე მოპოვებული ვერცხლის მედალი ზაალ დევაძეს გადასცა, „დინამოს“ უსინათლო, ერთგულ გულშემატკივარს.

„ზაალ დევაძე ყველა საშინაო შეხვედრას დაესწრო და როგორც ამბობს, ვერაფერი დაინახა, თუმცა ყველა ეპიზოდი იგრძნო,“ – აღნიშნულია „დინამო ბათუმის“ ფეისბუქგვერდზე გავრცელებულ ვიდეომასალაში. 

„მინდა მოგილოცოთ ვერცხლის მედალი, ჩვენ, ქართველები მაქსიმალისტები ვართ და უფრო მეტი გვინდა, ჩემპიონობა ბათუმის დინამომ უნდა იზეიმოს. ყველას უღრმესი მადლობა,“ – განაცხადა ზაალ დევაძემ. იგი ბათუმის „დინამოს“ 1979 წლიდან გულშემატკივრობს.

წელს ბათუმის „დინამო“ ეროვნული ლიგის ვიცე-ჩემპიონი გახდა.

ქედის მერიის თანამშრომელს ანტიკორუფციული სააგენტო ქრთამის სახით 2 ათასი ლარის აღებას ედავება. სახელმწიფო უსაფრთხოების სამსახურის მიერ გავრცელებული ინფორმაციით, ტარიელ თურმანიძემ მოქალაქეს ქედის მუნიციპალიტეტში, სოფელ მეძიბნაში, სახელმწიფო საკუთრებაში არსებულ მიწის ნაკვეთზე უნებართვო მშენებლობაში მფარველობის სანაცვლოდ გამოართვა ქრთამი ორ ნაწილად.

ქედის მერიის თანამშრომელი გუშინ, 5 დეკემბერს, დააკავეს ბათუმში.

გამოძიება ქრთამის აღების ფაქტზე მიმდინარეობს, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით. გამოძიებას აწარმოებს სახელმწიფო უსაფრთხოების სამსახურის ანტიკორუფციული სააგენტო.

დაკავებული თბილისში გადაიყვანეს.

საქართველოს ფინანსთა სამინისტროს საგამოძიებო სამსახურის ინფორმაციით, სამსახურის თანამშრომლებმა,  ოპერატიულ-სამძებრო და საგამოძიებო მოქმედებების შედეგად, დიდი ოდენობით ყალბი ფულის გასაღების ფაქტზე, უცხო ქვეყნის ორი მოქალაქე დააკავეს.

„გამოძიებით დადგინდა, რომ ბრალდებულებმა საქართველოში შემოიტანეს  და ქვემო ქართლის რეგიონში გაასაღეს 20 ცალი ყალბი 500-ევროიანი კუპიურა.  საგამოძიებო მოქმედებების შედეგად, ამოღებულია 10 000 ევროს ოდენობის ყალბი კუპიურა,“ – აცხადებს საგამოძიებო სამსახური.

გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 7-დან 10 წლამდე ვადით.

ბათუმში, გორგილაძის ქუჩაზე, სახანძრო სამსახური და პოლიციაა მობილიზებული. როგორც „ბათუმელებს“ ადგილზე უთხრეს, ცეცხლი მოედო ერთ-ერთი მაღლივი კორპუსის საკვამლე მილს, რომელიც ჭვარტლით იყო გაჭედილი.

შემთხვევის შედეგად არავინ დაშავებულა.

ვინ არის გიორგი გიორგაძე, რომელიც პროპორციული არჩევნების ჩავარდნის შემდეგ წამოწყებულ საპროტესტო აქციებზე ჩნდება და აგრესიულობით გამოირჩევა. აქციაზე ბათუმის მერიის წინ მას არ დაუმალავს, რომ ის მერიის შპს-ს „ბათუმის წყლის“ თანამშრომელია.

გიორგი გიორგაძე მედიის ყურადღების ცენტრში ბოლოს 2 დეკემბერს მოექცა – თბილისში, „ქართული ოცნების“ ოფისთან გამართულ აქციაზე, სადაც ჟურნალისტებმა სხვებთან ერთად მისი აგრესიული ქცევა დააფიქსირეს. „ოცნების“ ოფისთან არჩევნების პროპორციულად ჩატარების წესის ჩავარდნას „სირცხვილიას“ წევრები აპროტესტებდნენ. სწორედ ამ დღეს წაიყვანეს სტუდენტები რეგიონებიდან თბილისში იმისათვის, რომ, როგორც თავად აცხადებდნენ, საქართველოს ევროსაბჭოს თავმჯდომარეობის აღსანიშნავ კონცერტს დასწრებოდნენ.

„სირცხვილიას“ წევრებმა მაშინ თქვეს, რომ სინამდვილეში რეგიონებიდან სტუდენტები ხელისუფლებამ კონტრაქციის მოსაწყობად ჩაიყვანა.

„ბათუმელები“ დაუკავშირდა „ბათუმის წყალს“ იმის გასარკვევად, რის საფუძველზე არ იმყოფებოდა გიორგი გიორგაძე 2 დეკემბერს [ორშაბათს] სამსახურში. ბათუმის მერიის შპს-ში ზეპირსიტყვიერად გვითხრეს, რომ გიორგი გიორგაძე შვებულებაში იმყოფება. მათ შესაბამისი დოკუმენტის მოწოდებაც ვთხოვეთ, თუმცა ამ დრომდე დოკუმენტი, რითაც გიორგი გიორგაძის შვებულებაში ყოფნა დადასტურდებოდა, არ მოუწოდებიათ.

მედიამ გიორგი გიორგაძე დააფიქსირა 28 ნოემბერსაც, ამჯერად ბათუმის მერიასთან. ის მერიასთან საკრებულოს წევრს „ერთიანი ნაციონალური მოძრაობიდან“, ლევან ანთაძეს სიტყვიერად დაუპირისპირდა და თანამოაზრეებს შორის აგრესიულობით გამოირჩეოდა.

„თქვენმა გუნდმა მოჭრა ხატებს თავი, გააჩუქა კოდორი, გააუპატიურა პატიმრები და გაანადგურა ქვეყანა – რა უნდა გელაპარაკოთ თქვენ“, – უყვიროდა ის ლევან ანთაძეს.

გიორგი გიორგაძის ძალადობაზე გვითხრა ჯელალ ქიქავამაც. მას 22 ნოემბერს ბათუმის მერიასთან სცემეს. ფაქტზე შსს-მ გამოძიება დაიწყო. ჯელალ ქიქავამ მოითხოვა, რომ ის სასამართლოში დაეკითხათ, რადგან პოლიციას არ ენდობოდა.

ენმ-ის წევრი ჯელალ ქიქავა აცხადებს, რომ ის 22 ნოემბერს ბათუმის მერიასთან გამართული აქციის მონაწილე არ ყოფილა. „მერიაში პირად საქმეზე მივედიო“ – გვითხრა. ჯელალ ქიქავა ამბობს, რომ არაერთი მოწმის თანდასწრებით მას დეპუტატმა და წარსულში ცნობილმა სპორტსმენმა მუხრან ვახტანგაძემ სცემა, თუმცა ის მარტო არ იყო და ამ ცემაში გიორგი გიორგაძე და სხვებიც მონაწილეობდნენ.

ჯელალ ქიქავამ არ იცის, ცემის ფაქტზე დაკითხა თუ არა გიორგი გიორგაძე გამოძიებამ. ამ კითხვით დავუკავშირდით შინაგან საქმეთა სამინისტროსაც, სამინისტროს პრესსამსახურში გვითხრეს, რომ ფაქტზე გამოძიება დაწყებულია და ამ ეტაპზე მეტ ინფორმაციას ვერ მოგვაწვდიან.

გიორგი გიორგაძე „ერთიანი ნაციონალური მოძრაობის“ წევრებად განიხილავს ყველას, ვინც 2020 – ში საპარლამენტო არჩევნების ჩატარებას პროპორციული წესით ითხოვს და ამ მოთხოვნით აქციებს მართავს. „ ნაცების ადგილი არ არის“ – ამბობს ის აგრესიული ტონით და ყვირილით. აგრესიით გამოირჩევა ჟურნალისტების მიმართაც: „ ერთი სექტა ხართ, პროვოკატორები ხართ ყველა, რამე გიკვირთ?“

გიორგი გიორგაძის ფეისბუქგვერდის მიხედვით, ის აჭარის მთავრობასთან დაახლოებული პირია, ხშირად აქვეყნებს თორნიკე რიჟვაძესთან ერთად გადაღებულ ფოტოებს. მას ფოტობი გადაღებული აქვს ცენტრალური და რეგიონული ხელისუფლების სხვა მაღალი თანამდებობის პირებთან ერთადაც, მაგალითად, ირაკლი ღარიბაშვილთან და  მთავრობის სხვა წევრებთან.

„ბათუმელები“ გიორგი გიორგაძეს დაუკავშირდა მცირე ინტერვიუს ჩაწერის მიზნით. მან გვთხოვა, რომ კითხვები ფეისბუქით მიგვეწოდებინა, თუმცა ამის შემდეგ აღარ გვიპასუხა. მას პირად ტელეფონის ნომერზეც დავუკავშირდით, რომელსაც თანამშრომელმა უპასუხა [ასე წარმოგვიდგა] და გვითხრა, რომ გიორგი გიორგაძეს ტელეფონი მასთან დარჩა და ამ დროისთვის ის სამსახურში არ იმყოფება. „როცა მოვა, გადავცემ და დაგიკავშირდებათ“, – გვითხრა მან.

________

ამავე თემაზე:

„ბათუმის წყლის“ ინფორმაციით, დღეს, 5 დეკემბერს, ავარიული დაზიანების გამო 16 საათიდან ღამის 12 საათამდე წყლის მიწოდება შეუწყდება:

[crosslist]

• შარტავას ქუჩას
• ფიროსმანის ქუჩას
• ტბელ აბუსერიძის ქუჩას

[/crosslist]

„ბათუმის წყლის“ ინფორმაციით, წყალმომარაგების მიწოდების აღდგენის შემდეგ, შესაძლოა სარემონტო სამუშაოების გამო წყალი იყოს მცირედით ამღვრეული, რაც გამოწვეულია მილზე არსებული ჯანმრთელობისათვის უსაფრთხო მინერალების ჩამორეცხვით.

„გთხოვთ, წყლის მიწოდების აღდგენის შემდეგ, ონკანი გააღეთ და წყალი ადინეთ რამდენიმე წუთით, შესაძლო ამღვრეული წყლის გამოშვების მიზნით,“ – აღნიშნულია კომპანიის განცხადებაში.