Batumelebi

დღეს, 18 ნოემბერს, ბათუმის რუსთაველის სახელობის სახელმწიფო უნივერსიტეტის პროფესორებმა საპროტესტო აქცია გამართეს და  განაცხადეს, რომ ისინი შეშფოთებული არიან ქვეყანაში შექმნილი პოლიტიკური დაძაბულობით, ასევე მესამე პრეზიდენტის, მიხეილ სააკაშვილის ჯანმრთელობის მდგომარეობით. პროფესორები მოითხოვენ, რომ ხელისუფლებამ დროულად გადაიყვანოს მოშიმშილე მიხეილ სააკაშვილი მაღალტექნოლოგიურ, სამოქალაქო კლინიკაში.

„ამ ქვეყანაში დაცული უნდა იყოს ადამიანის სიცოცხლის და ჯანმრთელობის უფლება. ეს არის სახელმწიფოს პოზიტიური ვალდებულება, ეს ყველა სახელმწიფომ უნდა უზრუნველყოს, მათ შორის საქართველოს მთავრობამ.

სახალხო დამცველის მიერ შექმნილი ექიმთა კონსილიუმის დასკვნით, ცნობილი გახდა, რომ მესამე პრეზიდენტის ჯანმრთელობის მდგომარეობა არის კრიტიკული. მათი რეკომენდაციაა, რომ გადაიყვანონ ის შესაბამის კლინიკაში. ამიტომ ჩვენც მოვითხოვთ იმავეს, გადაიყვანონ სააკაშვილი დაუყოვნებლივ“, – ამბობს მალხაზ ნაკაშიძე.

ამავე უნივერსიტეტის კიდევ ერთი პროფესორი კახა სურგულაძე მიიჩნევს, რომ დღევანდელი ქმედებებით ხელისუფლება ემსგავსება პუტინისა და ლუკაშენკოს მთავრობას.

„ერთხელ და სამუდამოდ უნდა შეწყდეს საქართველოში გამოცხადებული სიკვდილის პროპაგანდა. თუ ჩვენ გვინდა ვიყოთ ევროპა, მაშინ სხვა გზით უნდა წავიდეთ და არა პუტინის რუსეთის და ლუკაშენკოს ბელორუსიის გზით. ჩვენ ამ ქმედებით, რასაც ახლა ვაკეთებთ ყოფილი პრეზიდენტის მიმართ, ევროპას უარს ვეუბნებით. მე არ მინდა ჩვენს შვილებს ჰქონდეთ ისეთი ქვეყანა, როგორიც არის რუსეთი ან ბელორუსი“.

აჭარის უმაღლესი საბჭოს ყოფილი თავმჯდომარე და უნივერსიტეტის პროფესორი მიხეილ მახარაძეც მიიჩნევს, რომ სააკაშვილის ჯანმრთელობა და სიცოცხლე უნდა იყოს დაცული.

„აქ არ არის მხოლოდ სააკაშვილის საავადმყოფოში გადაყვანაზე საუბარი, ქვეყანა არის ძალიან მძიმე მდგომარეობაში და სააკაშვილის საკითხმა კიდევ უფრო მეტად გამოააშკარავა ეს. სამი დღის წინ 75 წლის გავხდი და მსგავსი რამ არც ფაშისტების დროს წამიკითხავს. მთელი ერი უნდა ადგეს ფეხზე და მოითხოვოს სააკაშვილის ჯანმრთელობის უსაფრთხოება“, – ამბობს ის.

ოთარ ცეცხლაძის თქმით, სოციალურ ქსელში შექმნილია პეტიციის ტექსტი და ვისაც სურს, რომ დაცული იყოს მესამე პრეზიდენტის ჯანმრთელობა და გადაიყვანონ ის შესაბამის კლინიკაში, შეუძლია ელექტრონულად მოაწეროს ხელი.

მათივე თქმით, პეტიციაზე ხელის მოწერა შეუძლიათ როგორც უნივერსიტეტში დასაქმებულ პირებს, ასევე სტუდენტებსაც – ელექტრონულად და ასევე ბეჭდური სახით.

„როდესაც ქვეყანა ასეთ მდგომარეობაშია და მესამე პრეზიდენტის სიცოცხლე ეგზისტენციალური საფრთხის წინაშეა, როდესაც შეიქმნა კონსილიუმი და თითქმის ყველა ამბობს, რომ გლდანის მე-18 დაწესებულებაში არ არის არც სამედიცინო პერსონალის კვალიფიციური გუნდი, არც ლაბორატორიული კვლევის საშუალებები, სააკაშვილის სიცოცხლე არის საფრთხეში. ამიტომ ჩვენ მოვითხოვთ დაუყოვნებლივ გადაიყვანონ სააკაშვილი მულტიპროფილურ კლინიკაში, სადაც შესაძლებელი იქნება მისი გამოჯანმრთელება და რეაბილიტაცია“, – ამბობს ოთარ ცეცხლაძე.

ოთარ ცეცხლაძის თქმით, თუ ეს ასე არ მოხდება, შესაძლოა მივიღოთ ფატალური შედეგი და არავინ იცის ქვეყანა კიდევ რა გამოწვევის წინაშე დადგება: „ის დაპირისპირება, რაც არის პოლიტიკურ პარტიებს შორის, პიროვნებებსა და საზოგადოებას შორის, კიდევ უფრო გამწვავდება და შესაძლოა ქვეყანა მიიყვანოს სრულ კოლაფსამდე“.

____

ამავე თემაზე:

„სესხი შვილის წამლებისთვის გამოვიტანე, აღარ იყო მეტი საშველი,“ – ამბობს ოზურგეთში, სოფელ შრომაში მცხოვრები ციალა ჩხაიძე. ის 70 წლისაა და შვილს უვლის, რომელსაც გადაადგილება უჭირს.

დედა-შვილი მარტო ცხოვრობს. ოჯახი ვერ იღებს სოციალურ შემწეობას და არსებობის ერთადერთი წყარო მხოლოდ პენსიაა, საიდანაც 65 ლარი ყოველთვიურად სესხის დასაფარი თანხაა.

„გვიან აღმოუჩინეს შაქარი, ვერ მიხვდნენ ექიმები და ორი თითი მოკვეთეს ფეხზე,“ – გვიყვება პენსიონერი შვილზე. – „მაისში ინსულტიც მიიღო და მთლად წაიქცა, აღარ შეუძლია გადაადგილება, მოძრაობა… 10 დღის წამალში 150 ლარია საჭირო, რით მეყიდა? სესხი ავიღე და ვიყიდე წამლები, ახლა ვეღარ ვყიდულობ, მარტო წნევის წამლებს ვყიდულობ, რომ ისევ არ მიიღოს ინსულტი…

პენსია დაუნიშნეს ჩემს შვილსაც: პირველი ჯგუფია, 49 წლისაა, ჯერ არ აუღია პენსია, ველოდებით.

ნევროპათოლოგი სჭირდება, მასაჟისტი აუცილებელიაო, ექიმმა გვითხრა, მაგრამ რანაირად?“ – კითხულობს ციალა ჩხაიძე.

• პენსიონერმა სესხის ხელშეკრულებაც გვაჩვენა, რომლის მიხედვითაც მან მხოლოდ პროცენტში 2669 ლარი უნდა გადაიხადოს. მას  2020 წელს აუღია სესხი – 1980 ლარი. პენსიონერი სესხის გადახდას 2026 წელს დაასრულებს.

„ხან 300 ლარი გამოვიტანე, ხან – 400. როცა მჭირდებოდა, რა მექნა? მერე გამიერთიანეს და ეს გამოვიდა ჯამში. მხოლოდ შაქრის წამალს გვაძლევს მთავრობა უფასოდ, მეტს არაფერს.

მეც იცით, რამდენი წამალი მჭირდება? სახსრები მტკივა, სიარული მიჭირს, მაგრამ ჩემს თავს ვინღა დარდობს. ჩემი შვილი ლოგინად ჩავარდნილია და უნდა მოვარჩინო,“  – ამბობს ციალა ჩხაიძე.

ციალა ჩხაიძეს სოფელ შრომაში კერძო სახლი აქვს. მისი თქმით, სახლი ურემონტოა და არ აქვს სველი წერტილებიც კი. დედა-შვილს აქვს მანდარინის ბაღი.

„ალბათ ამის გამოა, რომ დახმარებაც არ მომიწია. მეუღლე სამი წლის წინ დამეღუპა, სხვა არავინ მყავს, ძალიან გვიჭირს,“ – გვითხრა ციალა ჩხაიძემ.

ციალა ჩხაიძეს „ლიბერთი ბანკმა“ სესხი 35 პროცენტად მისცა.

პენსიონერების ძვირადღირებული სესხის პრობლემაზე „ოცნების“ ხელისუფლებამ დაპირება რამდენჯერმე გასცა, თუმცა ამ დრომდე არაფერი შეცვლილა. ამ დრომდე კონკრეტული გადაწყვეტილება არც პარლამენტში ამ საკითხის გამო შექმნილ სამუშაო ჯგუფს მიუღია.

„ბათუმელები“ ბოლო ორი კვირის განმავლობაში ცდილობს პარლამენტის ჯანდაცვის კომიტეტის წევრებს ჰკითხოს, ხომ არ იგეგმება საპენსიო სესხის საპროცენტო განაკვეთის შემცირებაზე მსჯელობა საკანონმდებლო ორგანოში. თუმცა რამდენიმე დეპუტატმა შემოგვითვალა, რომ საკითხს არ იცნობენ და კომენტარს ვერ გააკეთებენ.

ამ თემაზე:

ბათუმის ახალი მოწვევის საკრებულოს წევრი „ნაციონალური მოძრაობიდან“ ნუგზარ ფუტკარაძე გარდაიცვალა. ამის შესახებ ინფორმაციას პარტიის წევრები ავრცელებენ.

„ბათუმელები“ დაუკავშირდა ბათუმის ახალი საკრებულოს წევრს ენმ-დან, რეზო ხარაზს, რომელმაც თავისი კოლეგის გარდაცვალების შესახებ ინფორმაცია დაადასტურა. მისი თქმით, საკრებულოს ახალი წევრის გარდაცვალების სავარაუდო მიზეზი ჯანმრთელობის პრობლემა იყო.

ნუგზარ ფუტკარაძე ადლიის მაჟორიტარული ოლქიდან გახდა ბათუმის საკრებულოს წევრი.

ნუგზარ ფუტკარაძის გარდაცვალებამდე ბათუმის ახალ საკრებულოში ოპოზიცია უმრავლესობით იყო წარმოდგენილი. მისი გარდაცვალების შემდეგ „ნაციონალურ მოძრაობას“ 14 წევრი დარჩა საკრებულოში, „ლელოს“ – 1 წევრი, გახარიას პარტიას – 2 წევრი და 1 დამოუკიდებელი წევრი [გახარიას პარტიის მესამე წევრმა ირაკლი თავდგირიძემ არჩევნების შემდეგ პარტია დატოვა და თქვა, რომ „ნაციონალურ მოძრაობასთან“ თანამშრომლობა მისთვის მიუღებელია].

„ქართული ოცნება“ კი 16 წევრით არის წარმოდგენილი საკრებულოში.

შესაბამისად, ნუგზარ ფუტკარაძის გარდაცვალების შემდეგ ადგილები ბათუმის 35-წევრიან საკრებულოში ასე გადანაწილდება:

• მმართველი პარტია – „ქართული ოცნება“ – 16 წევრი
• ოპოზიცია – 17 წევრი
• დამოუკიდებელი დეპუტატი – 1 წევრი

ახალი საკრებულოს შეკრების თარიღი ცესკოს ჯერ არ გამოუცხადებია.

საია-ს იურისტის, მირზა მამულაძის განმარტებით, ბათუმის საკრებულოს ახალ წევრს მომავალი წლის მაისში აირჩევენ შუალედური არჩევნების გზით. საარჩევნო კოდექსის მიხედვით, „თუ მაჟორიტარული საარჩევნო სისტემით არჩეულ საკრებულოს წევრს უფლებამოსილება ვადამდე შეუწყდება, ამ კანონით დადგენილი წესით ტარდება შუალედური არჩევნები. თუ საკრებულოს წევრს უფლებამოსილება 15 თებერვლიდან 15 ივლისამდე შეუწყდა, შუალედური არჩევნები ტარდება იმავე წლის ოქტომბერში, ხოლო თუ საკრებულოს წევრს უფლებამოსილება 15 ივლისიდან 15 თებერვლამდე შეუწყდა − უახლოეს მაისში.“

__________________

ბოლო 24 საათის განმავლობაში კორონავირუსის 4446 ახალი შემთხვევა დადასტურდა, გარდაიცვალა 77ადამიანი.

stopcov.ge-ის მონაცემებით, 18 ნოემბერს კოვიდკლინიკებში მკურნალობს 6505 ადამიანი. ხელოვნურ სუნთქვაზეა 383 პაციენტი.

აჭარის რეგიონში ბოლო 24 საათის განმავლობაში დაფიქსირდა კორონავირუსით ინფიცირების 190 შემთხვევა.

სარფის საბაჟო საზღვარზე განსაკუთრებით დიდი ოდენობით არადეკლარირებული საქონლის გადმოტანის გამო პასუხისგებაში მისცეს ერთი პირი.

საგამოძიებო სამსახურის ინფორმაციით, ბრალდებულმა, საბაჟო გამშვები პუნქტი სარფის გავლით, საქართველოში შემოიტანა სხვადასხვა სახის საქონელი, რომელშიც, საბაჟო კონტროლის შედეგად, აღმოჩნდა არადეკლარირებული ძვირფასი ლითონის ნაწარმი.

„ამოღებულია 5 კილოგრამზე მეტი ოქროს ნაკეთობები, რომლის საბაჟო ღირებულება 565 000 ლარს აღემატება“, – ამბობს საგამოძიებო სამსახური.

ამავე წყაროს ინფორმაციით, გამოძიება მიმდინარეობს საქართველოს სისხლის სამართლის კოდექსის 214-ე მუხლის მე-2 ნაწილით, რაც სასჯელის სახით ითვალისწინებს თავისუფლების აღკვეთას 5-დან 7 წლამდე ვადით.

დიაბეტი ქრონიკული დაავადებაა, რომელიც ვითარდება მაშინ, როდესაც პანკრეასი არ გამოიმუშავებს საკმარის ინსულინს, ან როცა ორგანიზმი ეფექტურად ვერ იყენებს მის მიერ გამომუშავებულ ინსულინს.

სტატისტიკის თანახმად, დიაბეტით დაავადებულთა 80% განვითარებად ქვეყნებში ცხოვრობს. საქართველოში, ოფიციალური მონაცემებით, 85 000 ადამიანია დიაბეტით დაავადებული.

ბათუმის სამედიცინო ცენტრის ენდოკრინოლოგი გიზო გორგილაძე ამბობს, რომ დიაბეტის ადრეულ დიაგნოსტიკას ძალიან დიდი მნიშვნელობა აქვს.

• ბატონო გიზო, რა არის დიაბეტი?

დიაბეტი არის ქრონიკული დაავადება, რომელიც ხასიათდება სისხლში გლუკოზის დონის მომატებით, ანუ ჰიპერგლიკემიით. განასხვავებენ ორი ტიპის დიაბეტს, ტიპი 1 და ტიპი 2 შაქრიანი დიაბეტი. ორივე შემთხვევაში სისხლში შაქრის დონე არის მომატებული.

ლიეტუვის მთავრობამ მიიღო გადაწყვეტილება საქართველოს უსასყიდლოდ გადმოსცეს 50,000 დოზა „ფაიზერის“ ვაქცინა.

ამის შესახებ წერს ფეისბუქზე ლიეტუვის საელჩო საქართველოში.

„დღეს ლიეტუვის მთავრობამ მიიღო გადაწყვეტილება საქართველოს უსასყიდლოდ გადმოსცეს 50,000 დოზა ფაიზერ-ბაიონტეკის, იგივე კომირნატის ვაქცინა.

ლიეტუვა აგრძელებს პარტნიორი ქვეყნების მხარდაჭერას კოვიდ 19-ის პანდემიის წინააღმდეგ ბრძოლაში, რის ფარგლებშიც ივლისის თვეში საქართველოს უკვე გადმოეცა 15,000 დოზა ვაქსზევრიას, იგივე ასტრაზენეკას ვაქცინა“ – წერია საელჩოს განცხადებაში.

„სოლიდარობის თემს“ ტოლერანტობის ქომაგის პრიზი გადასცეს.

„სოლიდარობის თემი“ სულ რაღაც 6 თვეა რაც დაარსდა ხულოში, თუმცა ამ მოკლე დროში თემის წევრებმა შეძლეს ბევრ მნიშვნელოვან თემაზე და პრობლემაზე მუშაობა.

„სოლიდარობის თემს“ 10 ახალგაზრდა აქტივისტი ჰყავს ამ დროისთვის, რომელთა მთავარი მიზანი დისკრიმინაციისა და ჩაგვრის მსხვერპლი ადამიანების თუ კონკრეტული ჯგუფების სოლიდარობა და სხვადასხვა ფორმით მხარდაჭერაა.

„ბათუმელები“ სოლიდარობის თემის ერთ-ერთ დამფუძნებელს ზაზა მიქელაძეს ესაუბრა, რომელსაც ვკითხეთ, თუ რამ განსაზღვრა ტოლერანტობის ქომაგის პრიზით თემის დაჯილდოება და რატომ არის ეს ახალგაზრდა ორგანიზაციისთვის მნიშვნელოვანი.

„ჩვენი პირველი გამოჩენა საჯარო სივრცეში უკავშირდება სოლიდარობას ეთნიკური უმცირესობების მიმართ, როდესაც მათ ჰქონდათ პროტესტი იმაზე, რომ სახელმწიფომ ეთნიკური უმცირესობების საკითხები გადაიტანა პარლამენტის დიასპორის კომიტეტის საქმიანობაში – საქართველოში მცხოვრები ეთნიკური უმცირესობები განიხილა არა როგორც საკუთარი მოქალაქეები, არამედ როგორც უცხო ქვეყნის დიასპორა.

ჩვენ ამ დროს გამოვიჩინეთ სოლიდარობა ჩვენი მოქალაქეების მიმართ და ეს იყო ჩვენი პირველი აქტიურობა.

შემდეგი აქტიურობა უკავშირდება ბათუმში ახალი მეჩეთის მშენებლობას, როცა ჩავატარეთ აქტიური კამპანია „თავისუფლების მეჩეთის“ მხარდასაჭერად და ამაში ბევრი ჩვენი თანამოქალაქე და მეგობარი გვიჭერდა მხარს.

მესამე და საკვანძო საკითხი ვფიქრობ იყო 5 ივნისის ამბებზე ჩვენი თანმიმდევრული და მყარი პოზიცია – ვამბობდით, რომ ჩვენ გვინდა ინკლუზიური, თანასწორობაზე დაფუძნებული საზოგადოების მშენებლობა, სამართლებრივი სახელმწიფოს ჩამოყალიბება, სადაც თითოეული მოქალაქის უსაფრთხოება და მისი ფუნდამენტური უფლებები იქნება უზრუნველყოფილი, სადაც ადამიანებს უფლება ექნებათ გამოიყენონ თავიანთი კონსტიტუციური უფლება, – გამოხატვის და შეკრების უფლება. ამის დაცვის პასუხისმგებლობა ეკისრება სახელმწიფოს“, – გვეუბნება ზაზა მიქელაძე.

მისი თქმით, „სოლიდარობის თემის“ თანმიმდევრულმა და მწყობრმა პოზიციამ, როგორც ეთნიკურ უმცირესობებთან, ასევე რელიგიურ უმცირესობებთან და ქვიარ თემთან მიმართებაში, განაპირობა სახალხო დამცველის და რელიგიათა საბჭოს გადაწყვეტილება, მათთვის გადაეცათ ტოლერანტობის ქომაგის პრიზი.

რა გამოცდილება შეიძინა „სოლიდარობის თემმა“ ქვიარ თემთან მიმართებაში ამ პროცესებში – ვკითხეთ ზაზა მიქელაძეს. ის ამბობს, რომ ამ თემთან მიმართებაში სოლიდარობის თემი მოკვლევის პროცესშია და აქტიური კომუნიკაცია აქვს სხვადასხვა არასამთავრობო ორგანიზაციასთან. შესაბამისად, აპირებენ დაიწყონ უფრო აქტიური მუშაობა არა მხოლოდ მათი უფლებების ადვოკატირების, ასევე სოციალურ მხარდაჭერის კუთხითაც.

„5 ივნისის მოვლენების დროს, როდესაც რელიგიურმა ორგანიზაციებმა, მათ შორის მუსლიმთა სამმართველომ ჰომოფობიური და ძალადობის წამახალისებელი შინაარსის განცხადება გააკეთა, ჩვენი პოზიცია იყო მყისიერი – დავუკავშირდით მუფთს და ავუხსენით, რომ ეს განცხადება შესაძლოა ყოფილიყო ძალადობის წამხალისებელი და დაღვრილიყო სისხლი.

ამის შემდეგ, თითქოს შეიცვალა მიდგომა – მუსლიმთა სამმართველომ და არა მარტო მათ, იეზიდთა უმაღლესმა სასულიერო საბჭომაც დააფიქსირა განსხვავებული პოზიცია. ბუნებრივია, ჩვენი პოზიცია მთელი პროცესის განმავლობაში მყარად დავიცავით, როგორც მედია სივრცეში, ასევე ჩვენს ოფიციალურ გვერდზეც და პერსონალი ურთიერთობების შემთხვევაშიც.

თუ ჩვენ გვინდა, რომ იყოს უზრუნველყოფილი ჩვენი მოქალაქეების უფლებები, მნიშვნელოვანია ნებისმიერი ჯგუფის დისკრედიტაციის დროს ვიდგეთ იქ, სადაც ეს არის საჭირო. ამიტომ არ გვჯერა და არ გვწამს ფრაგმენტული თანასწორობის, ჩვენ გვწამს და გვჯერა, რომ ყველას აქვს უფლება იარსებოს, იცხოვროს და ჰქონდეს კეთილდღეობა“, – ამბობს ზაზა მიქელაძე „ბათუმელებთან“.

„სოლიდარობის თემი“ არის რეგიონული ორგანიზაცია, თემის საქმიანობის ძირითადი არეალი არის აჭარა და საქართველოს ის რეგიონები, სადაც აჭარიდან ჩასახლებული ეკომიგრანტები ცხოვრობენ კომპაქტურად.

„პირველი რიგში ჩვენი საქმიანობა არის მუსლიმი თემის უფლებრივი საკითხების კვლევა და ადვოკატირება, კულტურული მემკვიდრეობის დაცვა აჭარის და არა მხოლოდ აჭარის კონტექსტში, ისტორიის კვლევა, – ამ შემთხვევაში ვგულისხმობთ ალტერნატიული ცოდნის შექმნას ქართველი მუსლიმების შესახებ იქნებიან ეს საზოგადო მოღვაწეები თუ დღეს არსებული სივრცის ფონზე, მისი განვითარების პროცესების ისტორიულ კონტექსტში.

ასევე ჩვენ გვაქვს ეკომიგრანტებისა და ქალების საჭიროებების ადვოკატირების საქმიანობა.

ასევე, ადგილობრივი სათემო ორგანიზაციებისა და ცენტრების განვითარება და ახალგაზრდების გააქტიურება, სამოქალაქო აქტივიზმის გამოცოცხლების ხელშეწყობა და როგორც უკვე აღვნიშნე, ქვიარ თემის უფლებების დაცვა და მათი საჭიროებების ადვოკატირება“-ამბობს ზაზა მიქელაძე.

თუმცა როგორც მიქელაძე ამბობს, ეს ყველაფერი არ გამორიცხავს იმას, რომ „სოლიდარობის თემს“ ჰქონდეს მისი მკვეთრი პოზიცია ქვეყანაში მიმდინარე მნიშვნელოვან პროცესებზე.

„ბუნებრივია ჩვენ არ ვიზღუდავთ საკუთარ თავს და მივიჩნევთ, რომ სახელმწიფოებრივად მნიშვნელოვან პროცესში ყოველთვის გვქონდეს ჩვენი პოზიცია“-ამბობს ზაზა მიქელაძე.

„სოლიდარობის თემს“ ტოლერანტობის ქომაგის ჯილდო 16 ნოემბერს, ტოლერანტობის საერთაშორისო დღეზე გადაეცა.

პროკურატურის ცნობით, გამოავლინეს თაღლითურად მოქმედი დანაშაულებრივი ჯგუფი და დიდი ოდენობით თანხის მოტყუებით დაუფლების ფაქტზე დანაშაულებრივი სქემის მონაწილე დააკავეს.

„გამოძიებით დგინდება, რომ დანაშაულებრივი ჯგუფის მონაწილეებმა – საქართველოს და უცხო ქვეყნის მოქალაქეებმა – დააფუძნეს და ინტერნეტსივრცესა და სოციალურ ქსელებში განათავსეს შპს „მარკეტ ბული“-ს (Market Bull LTD) რეკლამა. ვებგვერდზე – marketbull.live – კომპანიის საქმიანობის სფეროდ მითითებული იყო კრიპტოვალუტის ბაზარზე ვაჭრობისას საუკეთესო პირობებით მომსახურება.

საიტზე აღნიშნული იყო, რომ კომპანია ავტორიზებულია და ვაჭრობის შესაბამისი ლიცენზია გააჩნია.

აღნიშნულ ინფორმაციაზე დაზარალებულის მხრიდან დაინტერესების გამოხატვის შემდგომ, მას დაუკავშირდა კომპანიის თანამშრომელი, რომელმაც განუცხადა, რომ მათი კომპანია დაინტერესებულ პირებს ეხმარებოდა საფონდო ბირჟაზე მომგებიან ონლაინვაჭრობაში. მან დაარწმუნა დაზარალებული, რომ „ჭკვიანურ ვაჭრობებში“ მისი ფულის ჩადებით შეეძლო მოგების მიღება და ნებისმიერ დროს თავის ბალანსზე არსებული მოგებული თანხის განაღდება.

კომპანიის თანამშრომლის თქმით, მათ საქართველოში საკუთარი წარმომადგენელი ჰყავდათ და ე.წ. „სავაჭრო“ თანხა დაზარალებულს მისთვის უნდა გადაეცა.

შეთანხმების შესაბამისად, დაზარალებულმა დანაშაულებრივი ჯგუფის წევრებს ეტაპობრივად გადასცა ფულადი თანხა 164 580 აშშ დოლარის ოდენობით, რის სანაცვლოდაც დაზარალებულის ელექტრონული საფულის ანგარიშზე გადარიცხული თანხის ეკვივალენტი კრიპტოვალუტა აისახა.

დანაშაულებრივი სქემის მონაწილეთა მოთხოვნის შესაბამისად, აღნიშნული კრიპტოვალუტა, ვითომდა სარფიან ვაჭრობებში მონაწილეობის მისაღებად, დაზარალებულის მიერ სრულად იქნა გადარიცხული კომპანიის წარმომადგენლის მიერ კონტროლირებად ანგარიშებზე.

პარალელურად, დაზარალებულისთვის მცდარი შთაბეჭდილებების შექმნის მიზნით, ყალბ სავაჭრო პლატფორმაზე, კომპანიის წარმომადგენლები პერიოდულად აფიქსირებდნენ, რომ თითქოსდა დაზარალებულის საქმიანობა იყო მომგებიანი და მისმა მოგებამ, შეადგინა 91 643.96 აშშ დოლარი.

მას შემდეგ, რაც დაზარალებულმა თანხის განაღდება მოინდომა, ბრალდებულმა და კომპანიის წარმომადგენელმა მოთხოვნაზე უარი განუცხადეს და პლატფორმა, სადაც დაზარალებული ვაჭრობას ახორციელებდა, გააუქმეს,“ – წერს პროკურატურა.

დაკავებულს ბრალდება საქართველოს სსკ-ის 180-ე მუხლის II ნაწილის „ა“ და III ნაწილის „ბ“ ქვეპუნქტებით წარედგინა (თაღლითობა, – წინასწარი შეთანხმებით ჯგუფის მიერ სხვისი დიდი ოდენობით ფულადი თანხის მოტყუებით დაუფლება), რაც სასჯელის სახედ და ზომად თავისუფლების აღკვეთას 6-დან 9 წლამდე ვადით ითვალისწინებს.

ბრალდებულს აღკვეთის ღონისძიების სახედ პატიმრობა უკვე შეეფარდა.

საქმეზე გრძელდება გამოძიება.

„გვსურს გავაფრთხილოთ საქართველოს მოსახლეობა, რომ მთელ მსოფლიოში მომრავლდნენ თაღლითური ჯგუფები, რომლებიც მოქალაქეებს ყალბი ვებგვერდებით და შეთავაზებებით საფონდო ბირჟაზე და კრიპტოვალუტის ვითომდა მომგებიან ონლაინვაჭრობას სთავაზობენ. მოგიწოდებთ, მსგავსი ტიპის შეთავაზებებთან დაკავშირებით გამოიჩინოთ მაქსიმალური სიფრთხილე და პირველივე შემთხვევისთანავე მიმართოთ სამართალდამცავ სტრუქტურებს“ – აცხადებს პროკურატურა.

დღეს, 17 ნოემბერს, საქართველოს პრეზიდენტმა სალომე ზურაბიშვილმა, მესამე პრეზიდენტის მიხეილ სააკაშვილის პატიმრობასთან დაკავშირებით განცხადება გააკეთა. ზურაბიშვილის თქმით, პირველ რიგში დაცული უნდა იყოს ყოფილი პრეზიდენტის ღირსება, მისი ჯანმრთელობა და უსაფრთხოება.

„ნებისმიერი სახელმწიფოსთვის ყოფილი პრეზიდენტის დაპატიმრება არის ძალიან დიდი გამოწვევა, დიდი გამოწვევაა სასამართლო სისტემისთვის, პენიტენციური სამსახურისთვის, ხელისუფლებისთვის და, ზოგადად, საზოგადოებისთვის.

ყოფილი და აწ უკვე მსჯავრდებული პრეზიდენტის დაკავება კანონის წინაშე თანასწორობას ეფუძნება და ეს მასაც კარგად ჰქონდა გააზრებული. მიუხედავად ამისა, ჩამოვიდა, თანაც უკანონოდ.

კანონის წინაშე ყველა ერთია, მაგრამ სასჯელის აღსრულების დროს, ციხეში მყოფი ექსპრეზიდენტი არ არის და ვერ იქნება რიგითი პატიმარი. იგი განსაკუთრებული პატიმარია. საერთაშორისო საზოგადოება აკვირდება მის მდგომარეობას და მოითხოვს უმაღლესი სტანდარტების შესრულებას.

ჩვენი ქვეყნის სახე იმაში გამოიხატება, თუ როგორ მოვეპყრობით მას, როგორ იქნება დაცული მისი ღირსება, ჯანმრთელობა და უსაფრთხოება. მე რეგულარულად ვიღებდი და ვიღებ მისი ჯანმრთელობის მდგომარეობის შესახებ ინფორმაციას შესაბამისი უწყებებისგან, მათ შორის სახალხო დამცველისგან, იუსტიციის სამინისტროსგან, ჯანდაცვის სამინისტროსგან. ყოფილი პრეზიდენტის ჯანმრთელობა უნდა იყოს განსაკუთრებული ყურადღების ქვეშ.

პირველ რიგში დაცული უნდა იყოს ყოფილი პრეზიდენტის ღირსება, მისივე ქცევის მიუხედავად, რადგან ყოფილი პრეზიდენტი მაინც დაკავშირებულია სახელმწიფოსთან და ამ სტატუსს უნდა ეცეს პატივი. ამდენად, იმ კადრების გავრცელება, რომელიც ამ ღირსების და პატივის შემლახველია, ჩემთვის, როგორც ამ ქვეყნის პრეზიდენტისთვის, კატეგორიულად მიუღებელია“, – ამბობს სალომე ზურაბიშვილი.

სალომე ზურაბიშვილის თქმით, არსებული ხელისუფლება არ უნდა დაემსგავსოს წინამორბედს. „ამიტომ გულგრილობა, დაცინვა, ქილიკი და შეურაცხყოფა მიუღებელია არა მხოლოდ ჩემთვის, არამედ დარწმუნებული ვარ, მთელი საზოგადოებისთვის“, – განაცხადა მან.

ზურაბიშვილის თქმით, საზოგადოებას სრული უფლება აქვს ყოველდღიურად მიიღოს სრულყოფილი, მიუკერძოებელი, სანდო და დეტალური ინფორმაცია  ყოფილი პრეზიდენტის შიმშილობის, კვების, ანალიზების შესახებ. „ეს არის ხელისუფლების ვალდებულება. ამიტომ მივმართავ მას, რომ დაუყოვნებლივ შეუდგეს ამ ვალდებულების შესრულებას“.

მისი თქმით, ხელისუფლება ასევე ვალდებულია საზოგადოებას კარგად აუხსნას, რატომ ვერ იქნება ყოფილი პრეზიდენტის სამოქალაქო კლინიკაში გადაყვანა უზრუნველყოფილი და ახსნას ის საფრთხეები რაც ამ პროცესს უკავშირდება.

„ხელისუფლებას ევალება ყველა იმ ინფორმციის გაცემა რამაც შესაძლოა გავლენა იქონიოს ქვეყნის სტაბილურობაზე. ინფორმაციის ნაკლებობა კი თავისთავად კვებავს მღელვარებას“-ამბობს ის.

სალომე ზურაშვილმა ხელისუფლების მხრიდან გაკეთებულ კომენტერებზეც გააკეთა აქცენტი.

„ინფორმაციისა და მოზომილი კომენტარების მაგივრად ზოგი ოფიციალური პირის მიერ გაკეთებული გამომწვევი განცხადებები საზოგადოებაში იწვევს მეტ გაუგებრობას, დაძაბულობას თუ გაღიზიანებას. ქვეყნის სიმშვიდისა და დეპოლარიზაციისთვის მნიშვნელოვანია კარგად იყოს გააზრებული ნებისმიერი სიტყვა და ქმედება.

ქვეყანა რომელიც ოკუპირებულია და რომლის მიზანიც ევროინტეგრაციაა განსაკუთრებული დაკვირვების ქვეშაა და ნებისმიერი პროვოკაცია, საიდანაც არ უნდა მომდინარეობდეს, ითხოვს დაფიქრებას და ყურადღებას“-ამბობს ზურაბიშვილი.

საქართველოს პარლამენტმა მესამე მოსმენით დაამტკიცა მოპედების რეგისტრაციის შესახებ კანონში შესატანი ცვლილება.

ცვლილების თანახმად, მოპედი დაექვემდებარება კანონმდებლობით დადგენილი წესით რეგისტრაციას და მის სამართავად პირს სავალდებულოდ დასჭირდება ახალი – “AM” კატეგორიის მართვის მოწმობის აღება.

შსს-ს ცნობით, მოპედებზე, გარკვეული თავისებურებების გათვალისწინებით, გავრცელდება სხვა მექანიკური სატრანსპორტო საშუალებების მიმართ არსებული რეგულაციები.

მოპედის მართვის უფლების მოსაპოვებლად მინიმალური ასაკობრივი ზღვარია 16 წელი.

“AM” კატეგორიის სატრანსპორტო საშუალების მართვის უფლების მოპოვება და ამავე კატეგორიაში შემავალი სატრანსპორტო საშუალების რეგისტრაცია ნებაყოფლობითია 2022 წლის 28 მარტამდე, ამის შემდეგ კი სავალდებულო გახდება.

საქართველოს შინაგან საქმეთა სამინისტროს ცნობით, თავდაპირველ, გარდამავალ პერიოდში, მოპედების რეგისტრაცია ასევე იქნება შესაძლებელი ტექნიკური ინსპექტირების ცენტრებში.

ასევე, “AM” კატეგორიის სატრანსპორტო საშუალების მართვის უფლების მისაღებ თეორიულ გამოცდაზე ერთჯერადად დაშვებისას მომსახურების საფასურის გადახდა არ იქნება საჭირო.

ბოლო 24 საათის განმავლობაში აჭარაში კორონავირუსის 136 შემთხვევა დაფიქსირდა, გარდაიცვალა 3 პაციენტი.

აჭარაში კორონავირუსით ინფიცირებული 1758 ადამიანი მკურნალობს, მათგან 553 კოვიდკლინიკაშია, ხოლო 969 – ონლაინკლინიკაში.

დღეს, 17 ნოემბერს, კორონავირუსის 4732 ახალი შემთხვევა დადასტურდა.

შპს „მწვანე კონცხი ბოტანიკო“ მწვანე კონცხზე მიმდინარე სამშენებლო პროექტში ცვლილებას ითხოვს. კომპანიას მერიაში წარდგენილი აქვს პროექტი, რომელიც შეთანხმებულ შვიდსართულიან შენობაზე ერთი სართულის დამატებას, ასევე შენობის ფუნქციის ცვლილებას ითვალისწინებს.

ბათუმის საკრებულო ამ საკითხს დღეს სხდომაზე განიხილავს.

საკრებულოსთვის წარდგენილ განმარტებით ბარათში ვკითხულობთ: „იცვლება საპროექტო შენობის ფუნქციური დანიშნულება, ნებართვით დამტკიცებული 7 სართულის ნაცვლად წარმოდგენილია 8 სართული. დაგეგმილია  სააგარაკე სახლის და სპორტული და გასართობი შენობის მოწყობა. განაშენიანების ინტენსივობის ფართობი შეადგენს 8 850 მეტრს“.

„მწვანე კონცხი ბოტანიკო“ „სილქ როუდ ჯგუფისა“ და „ანაგი დეველოპმენტის“ ერთობლივი პროექტია. საცხოვრებელი კომპლექსი ბათუმის ბოტანიკური ბაღის მიმდებარედ შენდება.

კომპანია ითხოვს ასევე შენობის ფუნქციური დანიშნულების ცვლილებას – საცხოვრებელი კომპლექსის ნაცვლად სააგარაკო სახლი და სპორტული-გასართობი კომპლექსი აშენდება.

მშენებლობა 8850 კვ.მეტრ ტერიტორიაზე მიმდინარეობს. ტერიტორია ძეგლის დაცვის ზონაშია.

ბათუმში გამთენიისას საცხოვრებელ სახლში ხანძარი გაჩნდა. ადგილზე იმყოფებოდნენ სამაშველო და სასწრაფო დახმარების ჯგუფები.

როგორც „ბათუმელებს“ სახანძრო სამსახურში უთხრეს, დაიწვა საცხოვრებელი სახლის მეორე სართული. ხანძრის შედეგად არავინ დაშავებულა.

საცხოვრებელი სახლი ბათუმში, თაყაიშვილის ქუჩაზე მდებარეობს.

როგორც ბათუმის მერიის მუნიციპალური სერვისების განვითარების სააგენტოში გვითხრეს, ხანძრის შედეგად დაზარალებულ ოჯახს მერია განცხადებით მიმართვის შემდეგ დაეხმარება.

„სახლი გადაიხურება დროებით ტენტით, შემდეგ, მესაკუთრის განცხადების საფუძველზე, შევისწავლით ზარალს და ამის მიხედვით დავეხმარებით,“- გვითხრეს სააგენტოში.

ბოლო 24 საათის განმავლობაში, კორონავირუსის 4732 ახალი შემთხვევა დადასტურდა, გარდაიცვალა 72 პაციენტი.

აჭარის რეგიონში დადასტურდა კორონავირუსის 136 ახალი შემთხვევა.

ამ ეტაპზე 6614 ადამიანი მკურნალობს კოვიდკლინიკებში.

დღეს, 16 ნოემბერს, „ფაიზერმა“ განაცხადა, რომ გენერიკების მწარმოებლებს მისცემს საშუალებას, ექსპერიმენტული, COVID-19 ანტივირუსული აბი მიაწოდონ დაბალი და საშუალო შემოსავლის მქონე 95 ქვეყანას. 

„როიტერსის“ ინფორმაციით, Pfizer-სა და მედიკამენტების საპატენტო ფონდს [MPP] შორის დადებული სალიცენზიო შეთანხმება საშუალებას მისცემს გაეროს მიერ მხარდაჭერილ ჯგუფს, ლიცენზია მისცეს გენერიკების მწარმოებლებს, რათა შექმნან ანტივირუსული პრეპარატის საკუთარი ვერსიები. 

კომპანია Pfizer-ი თავის ტაბლეტებს Paxlovid-ის სახელწოდებით გაყიდის. 

კომპანია Pfizer-მა, რომელიც ასევე აწარმოებს ერთ-ერთ ყველაზე ფართოდ გამოყენებულ COVID-19-ის საწინააღმდეგო ვაქცინას, განაცხადა, რომ კლინიკური კვლევების მიხედვით, მედიკამენტი 89%-ით ამცირებს ჰოსპიტალიზაციას ან სიკვდილს მოზრდილებში, რომლებიც კოვიდით მძიმე ავადმყოფობის რისკის ქვეშ იმყოფებიან.

პრეპარატი გამოყენებული იქნება რიტონავირთან, აივ/შიდსის სამკურნალო მედიკამენტთან ერთად. 

„მოხარული ვართ, რომ გვაქვს კიდევ ერთი იარაღი, რათა დავიცვათ ადამიანები COVID-19-ის დამანგრეველი ზემოქმედებისგან“, – თქვა მედიკამენტების საპატენტო ფონდის აღმასრულებელმა დირექტორმა ჩარლზ გორმა.

იგი იმედოვნებს, რომ Pfizer-ის კოვიდის საწინააღმდეგო მედიკამენტის გენერიკული ვერსია რამდენიმე თვეში იქნება ხელმისაწვდომი.

„ჩვენ გვჯერა, რომ ორალურ ანტივირუსულ პრეპარატებს შეუძლიათ გადამწყვეტი როლი შეასრულონ COVID-19 ინფექციების სიმძიმის შემცირებაში. ჩვენ უნდა უზრუნველვყოთ, რომ  ყველა ადამიანს – არ აქვს მნიშვნელობა სად ცხოვრობს ან რა ვითარებაში – ჰქონდეს წვდომა ამ მიღწევებზე,“ – განაცხადა Pfizer-ის ხელმძღვანელმა ალბერტ ბურლამ. 

Pfizer-მა განაცხადა, რომ კოვიდის სამკურნალო მედიკამენტს გაყიდის თითოეული ქვეყნის შემოსავლის დონის მიხედვით. 

შეერთებულ შტატებში, სავარაუდოდ, მკურნალობის საფასური ახლოს იქნება იმ ღირებულებასთან, რომლითაც ტრანსნაციონალურმა ფარმაცევტულმა კომპანიამ – Merck-მა შეაფასა მედიკამენტი – დაახლოებით 700 დოლარი ერთი კურსისთვის.

ამავე თემაზე: 

უწყებათაშორის საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, საქართველოს მოქალაქეებს, რომელთაც 16 ნოემბრამდე აიღეს კოვიდპასპორტი იუსტიციის სახლში და აპირებენ უცხოეთში გამგზავრებას, კოვიდპასპორტის განახლება მოუწევთ.

ღიბრაძის თქმით, საქართველო ერთიან ელექტრონულ კოვიდსივრცეს 17 ნოემბრიდან შეუერთდება, ამიტომ აქამდე აღებული კოვიდპასპორტები არ იქნება ასახული ერთიან სისტემაში.

„კოვიდპასპორტები ვალიდური იქნება მხოლოდ ხვალიდან, ანუ 17 ნოემბრიდან.

სამწუხაროდ, ადრე გაცემულ კოვიდპასპორტებზე სისტემა არ ვრცელდება, ამიტომ სისტემაში მხოლოდ ხვალიდან გაცემული კოვიდპასპორტები იქნება ასახული. იმ პირებმა, ვინც საზღვარგარეთ აპირებენ გამგზავრებას, აუცილებლად უნდა განაახლონ კოვიდპასპორტი“ – ამბობს გიორგი ღიბრაძე.

მისი თქმით, იგივე მოთხოვნა ვრცელდება ყველა იმ ცნობაზე, რომლებიც გაცემულია ამცრელი ან ტესტირების დაწესებულებების მიერ.

„უცხოეთში გამგზავრებამდე მოქალაქემ მაინც უნდა გადაამოწმოს იმ ქვეყნის პოლიტიკა, სადაც მიემგზავრება, რადგან ყველა ქვეყანას მაინც განსხვავებული პოლიტიკა აქვს აცრებთან მიმართებაში და შესაძლებელია, რომელიმე ქვეყანა ითხოვდეს ბუსტერდოზას ან რომელიმე კონკრეტული ვაქცინით რომ იყოთ აცრილი,“ – ამბობს გიორგი ღიბრაძე.

ევროკომისიამ  საქართველოს კოვიდპასპორტების აღიარების შესახებ გადაწყვეტილება  რამდენიმე დღის წინ მიიღო. საქართველო ამ ერთიან სისტემაში, სადაც 49 ქვეყანაა ჩართული, ოფიციალურად 17 ნოემბრიდან ჩაერთვება.

კოვიდპასპორტების ციფრული ვერსიის გამოყენებისთვის აუცილებელია ტელეფონში ჩამოტვირთოთ QR კოდის წამკითხველი აპლიკაცია. დეტალები შეგიძლიათ იხილოთ აქ. 

47 დღეა საქართველოს მესამე პრეზიდენტი შიმშილობს. მიხეილ სააკაშვილის სამოქალაქო კლინიკაში გადაყვანას ხელისუფლება არ თანხმდება. დღეს, 16 ნოემბერს, მე-18 ციხის სამკურნალო დაწესებულებაში მოთავსებული ექსპრეზიდენტის მონახულებაზე უარი უთხრეს უკრაინის სახალხო დამცველს, მანამდე კი სააკაშვილის სანახავად არ შეუშვეს ევროპარლამენტარი ანა ფოტიგა.

რას ნიშნავს ევროპარლამენტარის მიმართ ეს დამოკიდებულება და რა რეაქციას უნდა ველოდოთ დასავლეთიდან? – ამ საკითხებზე “ბათუმელები” აშშ-ში საქართველოს ყოფილ ელჩს, ატლანტიკური საბჭოს და ელენე ხოშტარიას პარტია “დროას” წევრს, ბათუ ქუთელიას ესაუბრა.

• 13 ნოემბერს ევროპარლამენტარ ანა ფოტიგას მიხეილ სააკაშვილთან ვიზიტზე უარი უთხრეს. “ქართული ოცნების” თავმჯდომარემ, ირაკლი კობახიძემ, წერილი გამოაქვეყნა და კრიმინალების მფარველი უწოდა ევროპარლამენტარებს, რომლებიც არ “აღიარებენ, რომ კანონი უნდა კანონობდეს”. ევროპარლამენტარის ციხეში არშეშვება, მისი იგნორირება და მსგავსი ბრალდებები რას ნიშნავს?

რაც კობახიძემ თქვა, ამაზე სერიოზულ მსჯელობას აზრი არ აქვს. ეს არის რუსული ხაზი. სახელმწიფოს მიმტაცებლებს არაფერში აწყობთ ევროკავშირთან ღია, გახსნილი ურთიერთობა. არც ის პრინციპები, რაც ასოცირების ხელშეკრულებაშია.

მიუხედავად დეკლარირებული განცხადებებისა, არც მაინც და მაინც ბიძინა ივანიშვილის სურვილი იყო რეალური ინტეგრაცია ევროკავშირში. ამიტომაც სამიზნედ ჰყავთ ყველა ის ადამიანი, ვისაც ამ პროცესში დიდი წვლილი აქვს შეტანილი. მათ შორის ანა ფოტიგაც, რომელიც ერთ-ერთი ჩემპიონია ევროკავშირში საქართველოს ინტეგრაციის. ასევე ნატოში საქართველოს გაწევრიანების. დიდი ხნის ისტორიის მქონე, თავისუფლებისთვის მებრძოლი პოლიტიკოსია და ძალიან სავალალოა, როდესაც პირდაპირ რუსეთზე მიბმული პოლიტიკოსები მას აბრალებენ კრიმინალების მფარველობას.

პირადი შეფასებების გარეთ რომ დავინახოთ, ეს არის ღიად გაცხადებული კურსის ცვლილება. რომელსაც ზოგი უფრო ადრე ხედავდა, ზოგი – გვიან. მგონი, ეს ბოლო წვეთი იყო. „ქართული ოცნება“ რეალურად საქართველოს მიაქანებს რუსეთისკენ და არა ევროპისკენ.

• 47 დღეა საქართველოს მესამე პრეზიდენტი შიმშილობს. ცალკეული ევროპარლამენტარის თუ ყოფილი ელჩის გარდა არ გვინახავს/წაგვიკითხავს არც ევროპიდან და არც აშშ-დან ჩართულობა/განცხადებები იმ დოზით და შინაარსით, რაც მსგავს დაძაბულ პოლიტიკურ ვითარებაში გვესმოდა ხოლმე. როგორ ფიქრობთ, რა არის ამის მიზეზი?

ეს არის ექსტრაორდინარული სიტუაცია, მსგავსი მანამდე არასდროს ყოფილა, მიუხედავად იმისა, რომ მათ ჰყავდათ პოლიტიკური პატიმრები. ამ საკითხზე რეაგირება ისე, როგორც ამას ითხოვს დემოკრატიული, თავისუფალი სამყაროს სტანდარტები, ავტომატურად ნიშნავს საქართველოს გადადებას არადემოკრატიული ქვეყნების კალათაში.

ეს სხვა გარემოებებს შექმნის მათთვისაც და ჩვენთვისაც, ამიტომაც ისინი აკვირდებიან პროცესს. ასე ხდება ხოლმე, დასავლეთის რეაგირება არ არის მყისიერი ასეთ საკითხებზე, ძალიან ბევრი ნიუანსია. თუმცა არაფორმალურად ძალიან ბევრი ინტენსიური დისკუსია მიმდინარეობს ამ საკითხზე. მანამ ფორმალურად გაცხადდება, რომ საქართველოს ჰყავს ავტორიტარული მმართველი ან საქართველო გადავიდა ავტორიტარიზმის სიაში. ამას მოკვლევა სჭირდება. ბევრ გამოუსწორებელ შედეგს მოუტანს ეს საქართველოს.

სწორედ ამიტომაც იყო საგანგაშო ის, რაც მათ გააკეთეს, როგორც მოექცნენ საქართველოს მესამე პრეზიდენტს და შემდეგ რა რეაქციები ჰქონდათ ამაზე.

იყო საუბრები სანქციებზე, წინა პოლიტიკური უმსგავსობების ჩადენისას, პოლიტიკური პატიმრების, შარლ მიშელის დოკუმენტის დარღვევისას და ა.შ. „ბლუმბერგი“, „ვაშინგტონ პოსტი“, „ჰერალდ ტრიბუნი“ წერდა ამაზე, მაგრამ მერე ეს თემა კოვიდის გამო გადავიდა მეორე მხარეს – საერთო მსოფლიო გაჭირვება იყო და აქცენტები სხვაგან გადავიდა. მაგრამ დღეს ისევ უკან დაბრუნდა.

იმის მაგივრად, რომ „ქართულ ოცნებას“, როგორც პოლიტიკურ ორგანიზაციას, რეალურად ემართა ეს ქვეყანა, თავისი ძალაუფლების განმტკიცებით და ხელების გრეხვით არის დაკავებული საკუთარი მოქალაქეების წინააღმდეგ.

• დამოკიდებულება, რომ დასავლეთის როლი ამ პროცესებში პასიურია და თითქოს დასავლეთს აღარ ვაინტერესებთ, რამდენად სწორია?

არ არის ასე. ამას ცდილობს სამთავრობო პროპაგანდა და მათთან დაკავშირებული სუბიექტები, ასევე რუსული პროპაგანდა ავრცელებს. საქართველოს თემა მარტო საქართველოსი არ არის. დასავლეთის ინტერესებშია, რომ აქ რუსეთმა არ გაიმარჯვოს. დასავლეთი საკუთარ ინტერესებზე ხომ არ იტყვის უარს? შესაბამისად, დასავლეთი საქართველოს მიმართ იმოქმედებს ისე, როგორც მის საუკეთესო ინტერესებშია, მაგრამ ასევე საქართველოს მხრიდანაც არის გადასადგმელი ნაბიჯები, კერძოდ ამ ქვეყნის მოქალაქეების მხრიდანაც.

რამდენადაც ჩვენ გვადარდებს ჩვენი ქვეყნის პრობლემა, იმდენად აღმოგვიჩენენ ისინი დახმარებას. ეს არის საერთო ბრძოლა. ეს არ არის მარტო დასავლეთის ბრძოლა: არაა ასე, რომ ჩვენ გულხელდაკრეფილი დავსხდეთ, ვიღაცა მოვა და ჩვენს საქმეს გააკეთებს; არც ის, რომ ჩვენ მარტო ვართ ამ ბრძოლაში და სხვას არავის არ ვაინტერესებთ.

ჩვენ ვართ მოკავშირეები, ევროპარლამენტარი ანა ფოტიგა და ჩვენი სხვა მეგობრები ზუსტად ამაზე საუბრობენ. ეს არის საერთო ბრძოლა და საერთო ბრძოლაში ყველა აკეთებს მაქსიმუმს საერთო მტრის წინააღმდეგ.

საერთო მტერია რუსული ტიპის ავტორიტარული რეჟიმი და სახელმწიფოს მიტაცება, რომელიც გააფორმა ბიძინა ივანიშვილმა საქართველოში.

• აშშ–ის სახელმწიფო დეპარტამენტი თავის განცხადებაში ძალიან მოზომილია. მაგალითად, 10 ნოემბერს სახელმწიფო დეპარტამენტის პრესსპიკერმა, ნედ პრაისმა თქვა, რომ “ახლოდან აკვირდება”, თუ როგორ ეპყრობიან ექსპრეზიდენტს. სააკაშვილთან დაკავშირებით თითქმის არაფერი გვსმენია არც კონგრესმენებისგან და არც სხვა გავლენიანი ამერიკელი პოლიტიკოსებისგან. როგორ ფიქრობთ, რამდენ ხანს გაგრძელდება ეს დაკვირვება?

ჩვენ გვქონდა აშშ-ის კონგრესმენების სერიოზული განცხადებები. სამწუხაროდ, ყველა მათგანს შემდეგ „ქართულმა ოცნებამ“ შეურაცხყოფა მიაყენა. მანამდე მიანიშნა პომპეომ.

არც ერთი ეს ეტაპი ტყუილად არ ყოფილა. ყველა ეტაპი არის იმის მცდელობა, რომ მინიმალური ჩარევით დააბრუნონ ქვეყანა ნორმალური განვითარების გზაზე. ამ სისტემამ არ იმუშავა. რაც ერთხელ ნაცადია და არ იმუშავა, იმას არავინ აღარ გაიმეორებს. ახლა ალბათ საჭიროა უფრო ხისტი ჩარევა. დარწმუნებული ვარ და ჩემი მცდელობებიც აქეთ არის მიმართული ჩვენს პარტნიორებს ზუსტად ავუხსნათ, რომ შემდეგ ეტაპზე უნდა იყოს ხისტი ქმედებები. წინა მეთოდებმა არ იმუშავა, არ მოიტანა ეფექტი. პირიქით. „ქართულმა ოცნებამ“ კიდევ უფრო ღრმად გადაუხვია ავტორიტარიზმის გზაზე. არცერთი მიცემული შანსი დასავლელი პარტნიორების არ გამოიყენეს.

• სააკაშვილის ციხეში ყოფნის პარალელურად სულ გვესმის, რომ აი, ევროპელმა პოლიტიკოსებმა მას უთხრეს – არ წახვიდე საქართველოში და ის მაინც წავიდა. მიიჩნევა, რომ ევროპული პოლიტიკა უფრო რაფინირებულია, სააკაშვილი კი აღმოჩნდა ჯიუტი პოლიტიკოსი, რომელიც არ დაემორჩილა ამ მითითებებს…

ცოტა რთული წარმოსადგენია, რომ რომელიმე პოლიტიკოსს ევროპელებმა სთხოვონ დამორჩილება. ასე არ ხდება და არც ევროპელი პოლიტიკოსები არავის არ ეტყვიან, გინდა თუ არა წადი და ჩაჯექი ციხეში.

ევროპელმა პოლიტიკოსებმა ძალიან კარგად იცოდნენ – თუ სააკაშვილი ჩაჯდებოდა ციხეში, ეს იქნებოდა პოლიტიკური კრიზისის მომასწავებელი. ამიტომ ამ რჩევას არ მისცემდნენ და ლოგიკურიცაა, რომ არ უნდა მიეცათ.

გამოსვლა, ციხეში ჩაჯდომა და ამ ფორმით პოლიტიკურ პროცესში შემოსვლა არის ინდივიდუალური გადაწყვეტილება, ექსტრაორდინარული ნაბიჯი, რომელიც თავის შედეგებს მოიტანს, გამომდინარე იქიდან, რომ სტანდარტული პოლიტიკური მეთოდები უკვე „ქართულ ოცნებასთან“, არაფორმალურ ოლიგარქიულ მმართველობასთან არ და ვეღარ ჭრის. სააკაშვილმა არ დაუჯერა, ასე არ ხდება. ბუნებრივია, არც შიმშილობაზე არ მოუწოდებდნენ. ეს ყველაფერი არის ინდივიდუალური პოლიტიკური გადაწყვეტილება.

• ეს არაპროგნოზირებადობა, ინდივიდუალიზმი, სააკაშვილის ნაცნობ და ასევე საქართველოს მეგობარ პოლიტიკოსებს ხომ არ აფრთხობს და ამის გამო ერთგვარად ხომ არ დისტანცირდებიან? ამის გამო ხომ არ იკავებენ თავს ღია მხარდაჭერისგან?

პოლიტიკოსები არიან სხვადასხვა სტილის. ზოგს შეიძლება მოსწონდეს არაპროგნოზირებადობა. ძალიან კარგია პროგნოზირებად სამყაროში ცხოვრება, მაგრამ როდესაც უპირისპირდები რუსულ ავტორიტარიზმს, რუსული სტილით სახელმწიფოს მიტაცებას, პროგნოზირებადი ნაბიჯები არ ჭრის.

ნელი და პროგნოზირებადი ნაბიჯებით ლუკაშენკო მივიდა იქამდე, სადამდეც მივიდა. იყო ილუზიები, რომ პუტინი და რუსეთი  გახდებოდა დასავლეთის პარტნიორი, მაგრამ გახდა მთავარი ავტორიტარული აგრესიული ძალა.

ძალიან ბევრი საუბრობს, რომ ეს არის განსაკუთრებული ეტაპი მსოფლიო ისტორიაში, როდესაც ავტორიტარული და არათავისუფალი სამყარო გადავიდა შეტევაზე. “ფრიდონ ჰაუსის” მონაცემებს თუ შევხედავთ, თავისუფალი სამყარო შემცირდა. არათავისუფალი სამყაროა შეტევაზე გადმოსული და უკან შეტევაზე გადასვლას სჭირდება არაორდინალური ნაბიჯები. ეს, ბუნებრივია, განსაზღვრულ წესებს არ დაექვემდებარება.

თუმცა, როდესაც ახალ მსოფლიო წესრიგამდე მივალთ, იმედია, მერე უფრო პროგნოზირებადი პოლიტიკური ქმედების საშუალება გვექნება.

ამ ეტაპზე გვაქვს ის, რაც გვაქვს და ეს არის გარემოებებით ნაკარნახევი, ეს არის ძალიან მძიმე ბრძოლა, რომლის ფრონტიც გაშლილია მთელ მსოფლიოში. ჩვენ არ ვართ ცალკე. ეს არ არის სააკაშვილის ბრძოლა ცალკე პუტინის წინააღმდეგ, ან ქართველების ბრძოლა რუსეთის აგრესიის წინააღმდეგ. ეს არის თავისუფალი სამყაროს ბრძოლა არათავისუფალ სამყაროსთან. რიგ შემთხვევებში ექსტრაორდინარული ნაბიჯები იწვევს ზოგიერთი ჩვენი თანამებრძოლის უკმაყოფილებას. ასე მუშაობს პოლიტიკა და ასე იქმნება მსოფლიოში პრეცედენტები წარმატებული ნაბიჯის. თავის დროზე, მაგალითად, 2003 წელს, არშემდგარი სახელმწიფოდან #1 დემოკრატიის შუქურას გაჩენა ამ რეგიონში თითქმის წარმოუდგენელი იყო, მაგრამ ეს მოხდა არაორდინალური ნაბიჯების შედეგად.

• ხელისუფლების ბოლო განცხადებები აჩენს კითხვას, ღიად ხომ არ იწყებს „ქართული ოცნება“ ერთგვარი „ბალანსის“ დაცვას რუსულ და დასავლურ ორბიტებს შორის. თქვენ რას ფიქრობთ?

ერთადერთი, რაშიც „ქართული ოცნება“ თანმიმდევრულად მოქმედებდა, დასავლური ორბიტიდან საქართველოს ჩამოშორება და ნელ-ნელა რუსულ ორბიტაზე გადაყვანა იყო, პოლიტიკურადაც, ეკონომიკურადაც და სოციალურადაც.

თუ ნახავთ ელექტროენერგიის იმპორტს, მთლიანად რუსეთზე ვართ დამოკიდებული, ფული რუსული შემოდის, სხვა ინვესტიცია ამ ქვეყანაში არ შემოდის, კორუფციული სისტემა რუსული გახდა – ანუ ყველაფრით უკვე ვემსგავსებით რუსულ ავტორიტარულ სისტემას. ე.წ. სუვერენულ დემოკრატიას. ამიტომაც ეს განცხადებები ყველაზე უფრო ლოგიკურია „ქართული ოცნების“ ქცევაში და მოსალოდნელიც იყო.

„ქართულ ოცნებას“ აქვს იანუკოვიჩის მომენტი – ის, რაც იანუკოვიჩმა გააკეთა სწრაფად და მოულოდნელად უკრაინაში, რასაც უკრაინელების რეაქცია მოჰყვა. იქ არ გამოვიდა რუსული ოპერაცია. აქ, როგორც ჩანს, რუსეთმა იხმარა ჭკუა და “ქართულ ოცნებასთან” ერთად ნელ-ნელა დაიწყო გადასვლა რუსულ რელსებზე.

ბაყაყის მოხარშვის თეორიაა – თუ ნელ-ნელა აუწევ ტემპერატურას, ვერ გრძნობს ბაყაყი ამას და თუ სწრაფად აუწევ, უცებ ამოხტება. აი, ასე, ნელ-ნელა მოახდინეს დეგრადირება სისტემის და გადაიყვანეს რუსულ ორბიტაზე. ამაში მოულოდნელი არაფერი არ არის. სამწუხაროდ, მივდიოდით აქეთკენ. ადრე თუ გვიან ყველა ხვდება რეალურად რასთან გვაქვს საქმე. ირაკლი კობახიძის განცხადება ბოლო, ოფიციალური გაფორმება იყო იმის, რომ დასავლეთი „ქართულ ოცნებასთან“ საერთოს ვერასდროს იპოვის იმ ფორმით, რა ფორმითაც ისინი არიან ახლა კონსტრუირებული.

• 11 ნოემბერს ადამიანის უფლებათა ევროპული სასამართლოს მიერ გამოცემული დროებითი ღონისძიება მოთხოვნაზე „სააკაშვილი საქართველოს წინააღმდეგ“ განხილვის საგნად იქცა. ეს გადაწყვეტილება ორივე მხარემ სხვადასხვაგვარად წაიკითხა. თქვენ რას ფიქრობთ, რა უთხრა ევროსასამართლომ მესამე პრეზიდენტს?

ევროსასამართლომ მარტო მესამე პრეზიდენტს არ უთხრა. ევროსასამართლომ უთხრა ყველა მხარეს, ვინც არის ჩართული. პირველი – ევროსასამართლომ 24-მდე ითხოვა დრო დამატებითი საკითხის შესწავლისთვის. ევროსასამართლოსთვის ძალიან მნიშვნელოვანია ადამიანების სიცოცხლე, ამიტომაც მოუწოდა სააკაშვილს, რომ შეეწყვიტა შიმშილობა და პარალელურად ასევე დაავალა ხელისუფლებას, ვისი პასუხისმგებლობაცაა, ამ ადამიანის ჯანმრთელობაზე სათანადო ზრუნვა.

მეორე – ევროსასამართლომ გაიზიარა ის ფაქტი, რომ ეს ადამიანი შიმშილობს და აპროტესტებს. ასევე გაიზიარა ის, რომ ამას სჭირდებოდა სასწრაფო რეაგირება და სწორედ ამიტომაც მიიღო ეს საქმე წარმოებაში.

ასევე ევროსასამართლომ მხარეებს დაუტოვა დრო – 24-მდე იპოვონ პოლიტიკური გამოსავალი. ასეთი გამოსავალი რამდენჯერმე შესთავაზეს „ქართულ ოცნებას“, წინა სხვა კრიზისებში – დაწყებული პროპორციული არჩევნებით, 20 ივნისის შემდგომ პროცესებით. არც ერთი ეს შეთავაზება „ქართულ ოცნებას“ არ გამოუყენებია არასდროს. პირიქით, საწინააღმდეგო ნაბიჯები გადადგა. ახლაც ზუსტად იმავეს აგრძელებს.

მოძრაობას – „შენთან ერთად“ წევრები კახა  მიქელაძე და ალექსანდრე ბერიძე ბათუმში, ენმ-ს ოფისში შიმშილობას იწყებენ. მათი განცხადებით, შიმშილობის მოტივი სოლიდარობაა იმ პროტესტის მიმართ, რომელიც დღეს არსებობს ქვეყანაში.

„შორს ვართ იმ აზრისგან, რომ ხელისუფლებას, რომელსაც მივიჩნევთ ამორალური ადამიანებისგან შემდგარ დაჯგუფებად, რასაც ბოლოდროინდელი მოვლენები და მათი ნაბიჯებიც მოწმობს, ვუბიძგოთ მორალური გადაწყვეტილებებისკენ, მაგრამ თუ ამ პროტესტს შემოუერთდებიან სხვებიც და ვიქნებით უფრო ბევრნი,  ეს იქნება იძულების მექანიზმი ჩვენს ხელში,“- ამბობს კახა მიქელაძე.

მოშიმშილეების მოთხოვნაა მესამე პრეზიდენტის მიხეილ სააკაშვილის სამოქალაქო კლინიკაში გადაყვანა, რადგან მათი აზრით, პროცესი გასცდა მართლმსაჯულების ფარგლებს და პირადი ანგარიშსწორების სახე მიიღო.

„ის, რასაც ვხედავთ, არის პირადი ანგარიშსწორება, რადგან ადამიანს მათი უსამართლო სასამართლოს უფლებაც წაართვეს და არ მიჰყავთ სასამართლო პროცესებზე. ინკვიზიციის თანამედროვე მოდელია რაღაც ის, რასაც ვხედავთ,“ – ამბობს კახა მიქელაძე „ბათუმელებთან“.

სააკაშვილის სამოქალაქო საავადმყოფოში გადაყვანის მოთხოვნით საქართველოს პარლამენტის ათი წევრი შიმშილობს, მათ შორის, ელენე ხოშტარია, რომლის მდგომარეობა ამ დროისთვის საკმაოდ მძიმეა.

სააკაშვილის საავადმყოფოში გადაყვანის მოთხოვნით დაიწყო შიმშილობა გიორგი ბარამიძემაც.

8 ნოემბრიდან საქართველოში ყველა პენსიონერი, რომელიც კორონავირუსის საწინააღმდეგო ვაქცინას ჩაიტარებს, 200 ლარს იღებს ერთჯერადი საპენსიო დანამატის სახით.

ვაქცინაციის წამახალისებელი ეს აქცია ვრცელდება იმ პენსიონერებზე, რომლებიც პირველ იანვრამდე აიცრებიან.

სოციალური მომსახურების სააგენტოს ცნობით, ვაქცინირებულ პირთა შესახებ ინფორმაცია სააგენტოს თვის განმავლობაში ორჯერ მიეწოდება და ინფორმაციის მიღებიდან მომდევნო 5 სამუშაო დღის ვადაში აღნიშნული თანხა პენსიონერს „ლიბერთი ბანკში“, მისივე ანგარიშზე ჩაერიცხება.

სააგენტოს ცნობით, ის მოქალაქეები, რომლებიც აცრის პირველ დოზას 2021 წლის დეკემბრის თვის ბოლოს გაიკეთებენ, ერთჯერად დანამატს 2022 წელს მიიღებენ.

200-ლარიანი საპენსიო დანამატი გაიცემა პირველი აცრის გაკეთების შემდეგ.

საპენსიო დანამატს მიიღებენ მხოლოდ ის პენსიონერები, რომლებიც პირველ აცრას ახლა ჩაიტარებენ.