საქართველოში ცხვრისა და თხის რაოდენობა კვლავ მცირდება

საქართველოს სტატისტიკის ეროვნული სამსახურის 2021 წლის III კვარტალი წინასწარი მონაცემებით, საქართველოში ცხვრისა და თხის რაოდენობა კვლავ მცირდება.

სტატისტიკის თანახმად, ცხვრისა და თხის ჯამური რაოდენობა წინა წლის ანალოგიურ მაჩვენებელთან შედარებით 26.0 პროცენტით შემცირდა და 764.6 ათასი სული შეადგინა.

ბოლო ერთ წელში შემცირდა ღორისა და ფრინველის რაოდენობაც.

სტატისტიკის თანახმაც, საქართველოში ღორის რაოდენობა 232.9 ათასი სულით განისაზღვრა, რაც 8.3 პროცენტით ნაკლებია წინა წლის შესაბამის მაჩვენებელზე, ფრინველის რაოდენობა კი წინა წლის ანალოგიურ მაჩვენებელთან შედარებით 13.4 პროცენტით შემცირდა და 10.3 მილიონ ფრთა შეადგინა.

წინასწარი მონაცემებით, 2021 წლის III კვარტლის ბოლოსათვის მსხვილფეხა რქოსანი პირუტყვის სულადობა წინა წლის შესაბამის მაჩვენებელთან შედარებით 0.7 პროცენტით გაიზარდა და 972.2 ათასი სული შეადგინა. აქედან, ფურისა და ფურკამეჩის ჯამური რაოდენობა 441.7 ათასი სულით განისაზღვრა, რაც წინა წლის შესაბამის მაჩვენებელზე 3.2 პროცენტით ნაკლებია.

წინასწარი მონაცემებით, 2021 წლის III კვარტალში რძის წარმოებამ 168.8 მილიონი ლიტრი შეადგინა, რაც წინა წლის ანალოგიურ მაჩვენებელზე 0.4 პროცენტით ნაკლებია.

ხორცის წარმოებამ 16.1 ათასი ტონა შეადგინა, რაც 2020 წლის შესაბამის პერიოდის მაჩვენებელზე 3.9 პროცენტით მეტია.

სტატისტიკის თანახმად, საანგარიშო პერიოდის განმავლობაში წარმოებულია 149.4 მილიონი კვერცხი, რაც წინა წლის ანალოგიურ მაჩვენებელს 9.8 პროცენტით ჩამორჩება.

სტატისტიკის ეროვნული სამსახურის ცნობით, საქართველოში მეცხოველეობის შესახებ 2021 წლის საბოლოო მონაცემები 2022 წლის 15 ივნისს გამოქვეყნდება.

ამავე თემაზე: 

ქართული ცხვრის ბიზნესი და პრობლემები