Batumelebi | ევროპისა და აზიის ფერმებში ფრინველის გრიპი ვრცელდება ევროპისა და აზიის ფერმებში ფრინველის გრიპი ვრცელდება – Batumelebi
ნეტგაზეთი • RU

ევროპისა და აზიის ფერმებში ფრინველის გრიპი ვრცელდება

ბოლო დღეებში ცხოველთა ჯანმრთელობის მსოფლიო ორგანიზაციამ (OIE) ევროპასა და აზიაში ფრინველის მძიმე გრიპის რამდენიმე აფეთქება დააფიქსირა.

ჩინეთში ამ წლის მონაცემებით უკვე 21 ადამიანი დაინფიცირდა ფრინველის გრიპის H5N6 ქვეტიპით, რაც ამ ვირუსის გავრცელების 2020 წლის მთლიან მაჩვენებელზე მეტია.

სამხრეთ კორეაში დაფიქსირდა ვირუსის აფეთქების შემთხვევა ფრინველის ფერმაში. ინფორმაცია ამის შესახებ ცხოველთა ჯანმრთელობის მსოფლიო ორგანიზაციამ ორშაბათს სამხრეთ კორეის ხელისუფლების ანგარიშზე დაყრდნობით გაავრცელა. ფერმაში ყველა ფრინველი დახოცეს.

ასევე, გასულ კვირას იაპონიის სოფლის მეურნეობის სამინისტრომ დააფიქსირა ფრინველის გრიპის 2021 წლის ზამთრის სეზონის პირველი აფეთქება ქვეყნის ჩრდილო-აღმოსავლეთით მდებარე მეფრინველეობის ფერმაში. სეროტიპი ამ ეპიდაფეთქებაში იყო H5N8.

ჯანმრთელობის მსოფლიო ორგანიზაციის მონაცემებით, ევროპაში, ნორვეგიაში, დაფიქსირდა H5N1 ფრინველის გრიპის აფეთქება ფრინველების ფერმაში.

Reuters-ი წერს, რომ მას შემდეგ, რაც ანტვერპენის მახლობლად ფრინველის გრიპის მაღალი პათოგენური ვარიანტი გამოვლინდა, ბელგიის მთავრობამ ბრძანება გასცა, რომ მიმდინარე კვირიდან ფერმერებს შინაური ფრინველები ჰყავდეთ დახურულ სივრცეში.

Guardian-ი წერს, რომ ამ თვის დასაწყისში, დიდი ბრიტანეთის მთელ ტერიტორიაზე გამოცხადდა ფრინველის გრიპის პრევენციული ზომა, რაც ავალდებულებს ფრინველის ყველა მეპატრონეს მკაცრი ბიოუსაფრთხოების ზომების დაცვას. ეს მას შემდეგ მოხდა, რაც შოტლანდიაში ფრინველის გრიპის გავრცელების საპასუხოდ ფრინველების გუნდი დახოცეს.

ფრინველის გრიპის გავრცელება პირველ რიგში მეფრინველეობის ინდუსტრიას ემუქრება, რადგან ამ ვირუსის აფეთქებების შედეგად, წინა წლებში, ფერმებში ათობით მილიონი ფრინველი განადგურდა. მსგავსი ეპიდაფეთქებები ასევე ხშირად იწვევს შეზღუდვებს ვაჭრობაში.

ფრინველის გრიპის ეპიდაფეთქებები ჩვეულებრივ შემოდგომაზე ხდება, მას გადამფრენი გარეული ფრინველები ავრცელებენ.

დღეისთვის ცნობილია, რომ ფრინველის გრიპის H5N1-ვირუსით შესაძლოა დაინფიცირდნენ გარეული და შინაური ფრინველები, ღორები, ცხენები, კატისებრთა ოჯახის წარმომადგენლები, ვეშაპები, სელაპები და ადამიანები. კვლევები ადასტურებს, რომ ვირუსის მასპინძელთა წრე თანდათან ფართოვდება.

ფრინველის გრიპი ადამიანს გადაეცემა ინფიცირებულ ფრინველთან შეხების ან მისი საკვებად გამოყენების შემთხვევაში.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან