Batumelebi | ბათუმში გაიმართება სასკოლო თეატრალური დასების ფესტივალი „პირველი ავტოგრაფი“ ბათუმში გაიმართება სასკოლო თეატრალური დასების ფესტივალი „პირველი ავტოგრაფი“ – Batumelebi
RU | GE  

ბათუმში გაიმართება სასკოლო თეატრალური დასების ფესტივალი „პირველი ავტოგრაფი“

28 ნოემბერს ბათუმში საყმაწვილო-სასკოლო დასების თეატრალური ფესტივალი „პირველი ავტოგრაფი” გაიხსნება. 

„პირველი ავტოგრაფი“ 7 დღეს გაგრძელდება და 5 დეკემბერს დასრულდება. 

ფესტივალი ბათუმში ერთდროულად სამ სცენაზე გაიმართება – ბათუმის დრამატულ თეატრში, თეატრში – „ახალი სცენა“ და თოჯინებისა და მოზარდ მაყურებელთა თეატრში. 

ფესტივალის ავტორი, დამფუძნებელი და ორგანიზატორია ა(ა)იპ „არტ პორტალი.“

ფესტივალის დირექტორი, მიხეილ გაბაიძე ამბობს, რომ „პირველ ავტოგრაფზე“ წელს დაახლოებით 12 სპექტაკლი იქნება წარმოდგენილო. მისივე თქმით, საყმაწვილო-სასკოლო დასები შერჩეულია აჭარის ყველა მუნიციპალიტეტიდან.

რეპერტუარის შერჩევა სასკოლო დასებს დამოუკიდებლად შეუძლიათ, თუმცა აუცილებელი მოთხოვნაა ქართული ნაწარმოების წარდგენა.

ასევე, სკოლები წყვეტენ იმასაც, რა ასაკის მოსწავლეებისგან შედგება დასები. 

„ჩვენ სკოლებს ვუთხარით – თუ თქვენ სპექტაკლში გჭირდებათ 6 წლის ბავშვი, იყოს 6 წლის ბავშვიც, მაგრამ ვურჩიეთ, რომ არ ყოფილიყვნენ მეთორმეტეკლასელები, რადგან აბიტურიენტები არიან, შეიძლება ვერ მოიცალონ. ეს რეკომენდაციის სახით, თუმცა ასაკზე შეზღუდვა არ გვაქვს. მთავარია, იყვნენ სკოლის ასაკის ბავშვები,“ – ამბობს მიხეილ გაბაიძე.

ფესტივალის ორგანიზატორები ინფორმაციას ფესტივალის შესახებ „ზუმისა“ და „თიმსის“ საშუალებით აწვდიდნენ სკოლებს:

„აღმოჩნდა, რომ მეტწილად, დასები ამ ფესტივალისთვის შეიქმნა. შეგვიძლია ვთქვათ, რომ ერთი-ორი სკოლა იყო, სადაც სპექტაკლის მომზადების გამოცდილება ჰქონდათ, დასები არ ჰყავდათ.

ვთხოვეთ, რომ ყველა დასისთვის დაერქმიათ სახელი, რაც ერთგვარად ბიძგი იქნება იმისთვის, რომ თუ მომავალ წელს ბავშვები შეიცვლებიან, სასკოლო დასი გააგრძელებს სიცოცხლეს,“ – აღნიშნა მიხეილ გაბაიძემ. 

უკვე ცნობილია სპექტაკლების ჩამონათვალიც, რომლებსაც მოსწავლეები წარადგენენ.

მაგალითად: ბათუმის №1 საჯარო სკოლა მუშაობს „ბაკულას ღორებზე“; №2 საჯაროს სკოლა ნოდარ დუმბაძის „ბოშების“ წარდგენას აპირებს; ბათუმის წმ. ანდრია პირველწოდებულის სახელობის სკოლამ გოდერძი ჩოხელის „მართა“ აირჩია; ქობულეთის სოფელი საჩინო „მე, ბებია, ილიკო და ილარიონიდან“ წარადგენს ნაწყვეტს; ხელვაჩაურიდან ჭარნალის სკოლის დასი „ჩხიკვთა ქორწილზე“ მუშაობს და ა.შ.

15-დან 20 ნოემბრამდე მოსწავლეები სპექტაკლებს ღონისძიების ორგანიზატორებსა და ხელმძღვანელებს წარუდგენენ. მიხეილ გაბაიძის თქმით, სპექტაკლები სცენებზე გადანაწილდება მათი სპეციფიკისა და მასშტაბის მიხედვით.

ღონისძიებაზე დასწრება თავისუფალი იქნება.

ღონისძიება დაიყოფა საფესტივალო და არასაფესტივალო რეპერტუარებად. 

ორგანიზატორის განმარტებით, ამგვარი განაწილება დამოკიდებულია ფესტივალში მონაწილე დასების რაოდენობასა და თეატრალური სივრცეების თავისუფალ განრიგზე. მისივე თქმით, საფესტივალო სპექტაკლების შერჩევისას ყურადღება მიექცევა მეტყველებას, სასცენო კოსტიუმებს, მუსიკალურ გაფორმებას და სხვა მნიშვნელოვან დეტალებს. 

„არასაფესტივალო წარმოდგენებს კი წლის განმავლობაში, სადაც მათ მოესურვებათ ან ჩვენ შევთავაზებთ სივრცეებს, მაინც ჩავატარებთ, რომ დასებმა არ დაკარგონ ენთუზიაზმი და მოემზადონ მომავალი წლისთვის,“ – ამბობს მიხეილ გაბაიძე. 

ფესტივალზე ჟიური გამოავლენს გამარჯვებულს 5 ნომინაციაში: საუკეთესო სპექტაკლი, საუკეთესო მუსიკალური გაფორმება, საუკეთესო სცენოგრაფია, საუკეთესო მსახიობი ქალი, საუკეთესო მსახიობი ვაჟი. 

ნომინაციებში გამარჯვებული დასებისთვის შერჩეულია ჯილდოც:

„ჩემი აზრით, ძალიან მნიშვნელოვანი პრიზი გვექნება. ძალიან ბევრი ვიფიქრეთ, რა შეიძლებოდა ყოფილიყო. გვინდოდა ყოფილიყო რამე ბათუმთან ასოცირებული, ეს იქნება ისტორიის გაცოცხლება. ჩამოისხმება და იქნება ღირებული სკულპტურა, რაც ასოცირდება ბათუმთან.”

ფესტივალის დირექტორი მიხეილ გაბაიძე და სამხატვრო ხელმძღვანელი პეტრე ჩარგეიშვილი მიზნად ისახავენ თეატრის პოპულარიზაციას ახალგაზრდებში.

„პროექტის მიზანია ახალგაზრდებს შევაყვაროთ თეატრი, რადგან, არ მოვერიდები ამის თქმას, ზოგიერთმა მათგანმა თეატრის მისამართიც კი არ იცის.

სამინისტროსაც ამ პროექტის შექმნის იდეა გაუჩნდა მას შემდეგ, რაც დრამატულ თეატრში გამოჩნდა სპექტაკლი „ჰელადოსი“. მას მოჰყვა დიდი გამოხმაურება და ვაპირებთ, რომ სწორედ ამ სპექტაკლით გავხსნათ ღონისძიება“ – ამბობს მიხეილ გაბაიძე. 

ფესტივალის ბიუჯეტი 30 000 ლარს შეადგენს და ფინანსდება აჭარის განათლების, კულტურისა და სპორტის სამინისტროს მიერ.

„გვექნება, როგორც ამას ვუწოდეთ, სუფთა დაფა – კითხვარი, რომელიც ყველას დაურიგდება და ვისაც რა მოესურვება, შეძლებს დაწეროს, იქნება ეს შთაბეჭდილება, ჩანახატი თუ კრიტიკა.

ერთ-ერთი კითხვა იქნება იმის შესახებ, თუ რა სიხშირით უნდა მაყურებელს, რომ ეს ფესტივალი იმართებოდეს – წელიწადში ერთხელ, ორ წელიწადში ერთხელ და ა.შ“ – ამბობს მიხეილ გაბაიძე. 

პროექტის ორგანიზატორებს სურთ, საყმაწვილო-სასკოლო დასების თეატრალური ფესტივალი საერთაშორისოდ აქციონ.

______________

ფოტოზე: საყმაწვილო-სასკოლო დასების თეატრალური ფესტივალის სარეკლამო ვიდეორგოლის გადაღება ბათუმის დრამატულ თეატრში.
ნეტგაზეთის მასალების სხვა გამოცემებში გადაბეჭდვის წესი
ავტორი