Batumelebi

ქალთა უფლებადამცველი ორგანიზაცია „საფარი“ აცხადებს, რომ არ აპირებს დარეგისტრირდეს რეესტრში, რომელიც რუსული კანონის საფუძველზე შექმნა სახელმწიფომ.

დღეს, 2 სექტემბერს, ორგანიზაციამ ამის თაობაზე განცხადებაც გაავრცელა ფეისბუქში.

„საფარი“ რუსულ კანონს დაუმორჩილებლობას უცხადებს.

ჩვენ, სხვა ქართული არასამთავრობო ორგანიზაციების აბსოლუტურ უმრავლესობასთან ერთად, ვაგრძელებთ სამართლიანობისთვის ბრძოლას.

ჩვენ არ შევეგუებით იმ ფაქტს, რომ გვიკრძალავენ ქალებისა და ბავშვების დახმარებას. ჩვენ ვაგრძელებთ მუშაობას და ისევ დავეხმარებით ადამიანებს, რომლებიც ძალადობას უპირისპირდებიან.

მთავარი ბრძოლა წინ გველის, ჩვენ სამოქალაქო საზოგადოების მხარდამხარ ბოლომდე ვიბრძოლებთ, სანამ საბოლოოდ არ გაუქმდება რუსული კანონი. ქართველი ხალხის და ქართული არასამთავრობო ორგანიზაციების ერთიანობა საბოლოო გამარჯვებამდე აუცილებლად მიგვიყვანს!“, – წერს „საფარი“.

იუსტიციის სამინისტროს განცხადებით, რუსული კანონის ფარგლებში შექმნილ რეესტრში დარეგისტრირების ვადა ორგანიზაციებისთვის 2 სექტემბრის ჩათვლითაა განსაზღვრული.

რუსული კანონი საქართველოში 3 ივნისიდან მოქმედებს. ის გრანტის მიმღებ მედია და არასამთავრობო ორგანიზაციებს „უცხოური ძალის ინტერესების გამტარებლის“, ხოლო, მათ შორის, აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის“ სტატუსს მიანიჭებს.

იმ შემთხვევაში, თუ ორგანიზაცია უარს იტყვის „უცხოური ძალის ინტერესების გამტარის“ იარლიყზე, მაშინ, მისი ნების საწინააღმდეგოდ, მას მაინც დაარეგისტრირებენ და 25 000 ლარითაც დააჯარიმებენ.

ენათმეცნიერ მარინე ბერიძის განმარტებით, „…ინტერესების გამტარებელს [რიგით ქართველში] მხოლოდ და მხოლოდ უარყოფითი დამოკიდებულება შეიძლება ჰქონდეს. [ეს ტერმინი] მტრული ორგანიზაციების მონიშვნის საშუალებაა რიგითი ქართველისთვის“.

___

ენათმეცნიერი: “უცხოური ძალის ინტერესების გამტარებელი” მკვეთრად უარყოფითი კონოტაციის შესიტყვებაა

See more

აფხაზეთს გაეროში გაწევრიანება აქვს გამიზნული – ამის შესახებ რუსულ პროპაგანდისტულ მედია „იზვესტიასთან“, დე-ფაქტო რესპუბლიკის საგარეო საქმეთა მინისტრმა, სერგეი შამბამ განაცხადა. მისივე თქმით, ამ პროცესს აშშ და ევროკავშირი აფერხებს.

„რა თქმა უნდა, აფხაზეთის რესპუბლიკისთვის საბოლოო მიზანი გაეროში გაწევრიანებაა. ეს არის თავად პროცესის საბოლოო მიზანი ჩვენი ქვეყნის ფართო საერთაშორისო აღიარებისთვის. ეს ყველაფერი ლოგიკურად ურთიერთკავშირშია. რა თქმა უნდა, შესანიშნავად ვხვდებით, რომ ეს ძალიან რთული პროცესია. ორმაგი სტანდარტის პოლიტიკა, რომელსაც ჩვენ ვეჯახებით, არ გაუქმებულა“, – თქვა შამბამ.

„… აფხაზეთს აქვს უარყოფითი გამოცდილება, როდესაც შეერთებული შტატები და მისი პარტნიორები მნიშვნელოვან ზეწოლას ახდენდნენ იმ ქვეყნებზე, რომლებთანაც აფხაზეთს უკვე ჰქონდა დიპლომატიური ურთიერთობა. ამიტომ ჩვენ ვცდილობთ დავამყაროთ კონტაქტები მსოფლიოს იმ რეგიონებში, სადაც დასავლეთის ქვეყნებს არ აქვთ მნიშვნელოვანი გავლენა და არ შეუძლიათ პირდაპირი ზეწოლა გარკვეულ ქვეყნებზე“, – თქვა დე ფაქტო მინისტრმა. – „მიუხედავად ყველა სირთულისა და კოლექტიური დასავლეთის მხრიდან სერიოზული ზეწოლისა, ჩვენ ვაგრძელებთ შესაძლებლობების ძიებას მსოფლიოს სხვადასხვა რეგიონში ახალი კავშირებისა და კონტაქტების დასამყარებლად და ვეძებთ ახალ პარტნიორებს“.

მისივე თქმით, ამ საკითხებში მათი სტრატეგიული მოკავშირის – რუსეთის ფედერაციის მხარდაჭერის იმედი აქვთ.

რუსეთი პირველი სახელმწიფო იყო, რომელმაც აფხაზეთის დამოუკიდებლობა აღიარა საქართველოსთან 2008 წლის აგვისტოს ომის შემდეგ.

„იზვესტია“ წერს, რომ 2024 წლის ივნისში სოხუმმა გაეროს გენერალურ მდივანს, ანტონიო გუტარეშს მიმართა „საბოლოოდ გამოიჩინოს პოლიტიკური ნება და უზრუნველყოს აფხაზეთის რესპუბლიკის წარმომადგენლების მონაწილეობის შესაძლებლობა გაეროს შესაბამისი კომიტეტების მუშაობაში“.

ავტორი: ნათია კაპანაძე

___

„მე არ ვოცნებობდი ამერიკაში ცხოვრებაზე, მე ვოცნებობდი მხოლოდ განათლების პერიოდულად განახლებაზე. ყოველთვის მინდოდა და ახლაც მინდა ჩემი ცოდნა საქართველოს განვითარებას მოვახმარო“, – ამბობს ანა აბაშიძე, საქართველოში ერთ-ერთი ცნობილი უფლებადამცველი და იურისტი. 

2022 წლის სექტემბრიდან, სახალხო დამცველის კანდიდატად დასახელების შემდეგ, უფლებადამცველი პრორუსული დეზინფორმაციის განსაკუთრებული სამიზნე გახდა. ხელისუფლების წარმომადგენლები და პრორუსული ჯგუფები მას საქართველოსა და ქართველი ხალხის ინტერესების მოწინააღმდეგედ და ეკლესიის მტრად  აცხადებდნენ.

ანა ერთ-ერთი პირველი იყო, ვინც „სხვა ქვეყნის ინტერესების გამტარის“ იარლიყით კამპანიური დისკრედიტაციით იდევნებოდა ქვეყანაში. მისი დევნის ტემპი სწორედ უცხოეთში წასვლით შესუსტდა. განათლება მიღების შემდეგ, ანამ ამერიკული ცხოვრება ქართველების სამართლებრივი მხარდაჭერით გააგრძელა. 

უფლებადამცველს ვთხოვეთ შეეფასებინა საქართველოს ხელისუფლების გაუცხოება, რას ნიშნავს, როცა ხელისუფლება არ ითვალისწინებს ადამიანების პროტესტს და მოთხოვნას. ვთხოვეთ გაეზიარებინა გამოცდილება, რომელიც ჩიკაგოს პროკურატურაში მუშაობისას მიიღო.

• ანა, რას ნიშნავს საქართველოს ხელისუფლების გაუცხოება თქვენთვის?

„რუსული კანონის“ მიღება ხელისუფლების გაუცხოების ყველაზე ღია განაცხადია – „ქართულ ოცნებას” როგორც პოლიტიკურ პარტიას, არანაირი კავშირი აღარ აქვს ქართველი ხალხის ხასიათთან, იდენტობასთან, ისტორიულ გამოცდილებასთან. წარსულს თუ გადავხედავთ, ქართველ ერს ყოველთვის ჰქონდა ღირსება, იცოდა სიტყვის ფასი. მმართველ პოლიტიკურ ძალას კი შეუძლია ჯერ გაიწვიოს კანონი, შემდეგ ისევ დააბრუნოს და თავს მოახვიოს საზოგადოებას. არ გაითვალისწინოს მასშტაბური საპროტესტო გამოსვლების შინაარსი, დევნოს ცალკეული ადამიანები და გააუქმოს საერთაშორისო პარტნიორებთან დადებული შეთანხმებები. 

ამ ნაბიჯებით, მმართველმა გუნდმა დაგვანახა, რომ მისი შინაარსი არ არის ქართული. ეს არის საქართველოს მოსახლეობის ინტერესებისგან დაშორებული უცხო ძალა და მისი წევრები ცდილობენ უკანონობით თუ პოლიტიკური ძალადობით შეინარჩუნონ ძალაუფლება.  

რუსული კანონის მიღებით ყველაზე ნათლად დავინახეთ, როგორია სახელმწიფოს მართვა მორალური დილემების გარეშე. გადაწყვეტილების მიმღებ პირებს შუბლის ძარღვი აქვთ გაწყვეტილი. ზუსტად ამ მდგომარეობაშია ახლა „ქართული ოცნების“ ყველა წევრი. ისინი ჰგვანან ცხვირს ფარას და ასე კოლექტიურად Ჩადიან გამოუსწორებელ დანაშაულებს.

არავის ვუსურვებდი ისტორიაში შევიდნენ ისე, როგორც „ქართული ოცნების“ წევრები წერენ საკუთარ თავს. მეორე მხრივ, ეს ძალა, მილევად მდგომარეობაშია. არჩევნების გზით ჩვენ მოგვიწევს ხელახლა დავიწყოთ დემოკრატიის შენება, ადამიანური ურთიერთობა. „ქართული ოცნების“ მართვის მთავარი იარაღი – ადამიანებს შორის შუღლის გაღვივების პოლიტიკა, ადამიანების ინტერესების გააზრებით უნდა შეიცვალოს. 

რუსული კანონის მიღებას რა მიზანიც ჰქონდა, ნელ-ნელა აღსრულებას იწყებენ – ესაა ნიჰილიზმი. ხელისუფლებას სჭირდება ჩვენ საზოგადოებას ჰქონდეს მარცხის, ჯგუფური მარცხის და უიმედობის განცდა. ეს არის ავტორიტარიზმის სცენარი. მეორე და უფრო კონკრეტული პრაგმატული შედეგი არის უფლებადამცველი ორგანიზაციების დახურვა. უკვე ნებაყოფლობითი რეგისტრაციის ვადაც იწურება და ხელისუფლებას აქვს მოლოდინი, ბევრი ორგანიზაცია არ და ვერ გააგრძელებს მუშაობას. ალბათ, სექტემბრიდან ჩვენ დავინახავთ რამდენი ორგანიზაცია შეწყვეტს არსებობას. 

Მათ შორის შეიძლება იყოს ჩემი დაფუძნებული ორგანიზაცია „პარტნიორობა ადამიანის უფლებებისთვის“, რომელშიც ჩემი შეგნებული ცხოვრება გავატარე. ეს მოხდება, რადგან საქართველოში დემოკრატიული პროცესები გაქრა. მმართველი გუნდის სტრატეგიული მიზანი იყო ფრუსტრაცია და ეს შედგა. თუმცა შეუძლებელია რუსულმა კანონმა იმოქმედოს საქართველოში დიდ ხანს, შეუძლებელია ადამიანები დაიმორჩილონ ისე, როგორც გათვლილი აქვთ. 

ადამიანებს საქართველოში ყოველთვის უნდოდათ და უნდათ ისარგებლონ დემოკრატიის პროცესით, ისარგებლონ ცივილიზაციის შედეგებით, საერთაშორისო პარტნიორობის სიკეთეებით.. ხელისუფლება პროგრესის ამ სურვილს ვერაფრით შეაჩერებს. 

გასათვალისწინებელია ისიც, რომ ჩვენ არ გვაქვს დემოკრატიაში ცხოვრების გამოცდილება. ჩვენ ვსწავლობთ დემოკრატიას. ეს პროცესი გეომეტრიული სიზუსტით არ იზომება. ზოგჯერ პროცესები უკანაც მიდის და შემდეგ განვითარების ტრამპლინი ხდება. 

ჩვენ დავიწყებთ თავიდან, მაგრამ აუცილებლად დავიწყებთ.

• რას ნიშნავს ადამიანის ინტერესების გააზრება სახელმწიფო მმართველობისას? როგორ დაინახეთ ეს პროცესი ჩიკაგოში?

უკვე მეორედ მქონდა შანსი, ამერიკული განათლება მიმეღო. 2017 წელსაც ვცხოვრობდი ამერიკაში. თუმცა ამ ეტაპზე ბევრად განსხვავებული რეალობის წინაშე აღმოვჩნდი. გამოცდილება, რომელიც დავაგროვე, უნიკალურია. ერთი წლის განმავლობაში ვსწავლობდი სასამართლო ლიტიგაციას, ვავითარებდი ჩემ უნარებს, დაიცვა ადამიანი, ადამიანის უფლებები სახელმწიფოს წინაშე. სასამართლოში წარმომადგენლობა იყო ჩემი სწავლაც და გამოცდაც.

ნახევარი წლის განმავლობაში ასევე ვმუშაობდი ჩიკაგოს პროკურატურაში, ერთ-ერთი მთავარი მიმართულება იყო მოქალაქეების განაცხადების შესწავლა. იმ პერიოდში ვაკვირდებოდი, როგორ აღიქვამდნენ მოქალაქის განაცხადს. ეს იყო კულტურულ-სამართლებრივი შოკი. აღმოვაჩინე, რომ მოქალაქის განცხადება იყო ყველაზე მნიშვნელოვანი სიგნალი, რომლითაც დაინტერესებული იყო მთავარი პროკურორიც კი. თითოეულ განაცხადს პროკურატურაში განიხილავდნენ ძალიან ყურადღებით, ძალიან დიდი სიფრთხილით, გულისხმიერებით და პატივისცემით. 

Როდესაც მუნიციპალიტეტი იღებს გადაწყვეტილებას, აქვეყნებს ე.წ. Სამუშაო ვერსიას და მოქალაქეებს აძლევს კომენტარების, მოსაზრებების შანსს. ამის გარეშე ადმინისტრაციული ორგანო არ იღებს გადაწყვეტილებას. საკითხი შეიძლება იყოს პარკირება, გამწვანება, ქუჩის მოწყობა. ეს არის არა მხოლოდ ლამაზად დაწერილი ტექსტი, არამედ ცოცხალი პროცესი და არა უკიდურესად უსიცოცხლო პროცესი, როგორც ქართულ რეალობაშია.

ამერიკაში ადამიანი შეიძლება არ იყოს პოლიტიკურად აქტიური, მაგრამ ის ჩართულია თავისი ქალაქის თუ უბნის მმართველობის პროცესში. მაგალითად, ჩართულია საკუთარი სადარბაზოს წინ ნაგვის გატანის საკითხით, თუ აღმოაჩენს რომ ქუჩა დაზიანებულია, რეკავს მუნიციპალურ სამსახურში – ეს არის ყველაზე მნიშვნელოვანი როლი მისთვის. 

 ზუსტად ეს არის დემოკრატია.  

• როგორ აგრძელებთ მუშაობას საქართველოს მოქალაქეებისთვის?

Ბედის ირონიაა, ამერიკაშიც კი, ისევ ქართველების ინტერესებისთვის ვმუშაობ. ახლა ვეხმარები საქართველოდან ჩამოსულ ემიგრანტებს დაიწყონ ახალი ცხოვრება. ამ თვალსაზრისით დაშორებას ვერ ვგრძნობ საქართველოსგან. ყოველდღიური კავშირი მაქვს, ვაკვირდები პოლიტიკურ ამინდს, რომ დავეხმარო პოლიტიკური თავშესაფრის ძიებისას დაინტერესებულ პირებს. ისე ნათლად ვგრძნობ არსებულ გამოწვევებს, რომ ზოგჯერ მგონია თბილისშია ჩემი ოფისი. 

• ანა, რას გაურბიან საქართველოს მოქალაქეები საქართველოდან?

ვფიქრობ, წამყვანი მიზეზი ეკონომიკური სიდუხჭირეა. დაბალი შემოსავალი და გაზრდილი ფასები, ოჯახების რჩენის ვალდებულებებთან გამკლავება და სხვა ყოფითი პრობლემები, რომლის მოგვარებაზეც არ ზრუნავს დღეს ხელისუფლება. თუმცა არიან ადამიანები, რომლებიც წარმატებული არიან საქართველოში, შეუძლიათ ფინანსურ გამოწვევებს გაუძლონ და მაინც იღებენ ქვეყნის დატოვების გადაწყვეტილებას. ეს ძალიან სევდიანია. 

მეც მსგავსი ისტორიის ნაწილი ვარ სხვათა შორის. მე არ ვოცნებობდი ამერიკაში ცხოვრებაზე, არ ვოცნებობდი ცხოვრების სტილის შეცვლაზე. ახლა ეს მიწევს. ბოლო პერიოდში სახალხო დამცველის არჩევის პროცესში მიღებულმა ორგანიზებულმა მუქარებმა და შანტაჟმა დამარწმუნა, რომ საქართველოს მოქალაქეები არ იმსახურებენ მათი დამცველის არჩევაც კი დევნის, ადამიანის უფლებების დარღვევის და სამართლიანობის დარღვევით ხდებოდეს.

ჩემთვის საჭირო იყო გავცლოდი ამ პროცესებს. მიზნად დავისახე განახლება. ყველას სჭირდება გადატვირთვა – ახალი ცოდნის მიღება არის ჩემი ძალების აღდგენის შესაძლებლობა.

ვაგროვებ ცოდნას, რათა უფრო მეტი გავაკეთო საქართველოსთვის.

სამუშაო პროცესში უფრო და უფრო ცხადია, რომ ემიგრანტების უმეტესი ნაწილისთვის ემიგრაცია არ იყო საოცნებო გადაწყვეტილება. ეს არის უძნელესი ეტაპი საკუთარი თავის და ოჯახის გადასარჩენად. აქ არიან ადამიანები სხვადასხვა ნიშნით დევნილები: პოლიტიკოსები, აქტივისტები, იდენტობის გამო დევნილები, რომლებიც თავად ხელისუფლების წარმომადგენლების აგრესიის სამიზნე გახდნენ. 

• თქვენი, როგორც საიმიგრაციო იურისტის გამოცდილებით, რა შეიძლება იყოს ემიგრანტების საოცნებო გადაწყვეტილება?

სამშობლოში დაბრუნება და კომფორტის ზონაში ახლობლების და მეგობრების გარემოცვაში ცხოვრების გაგრძელება. 

ადამიანების ინტერესებზე მორგებულ ქვეყანა რომ შევქმნათ, ამიტომაც ოქტომბრის არჩევნებში მონაწილეობას ვაპირებდი და ვაპირებ. მართალია ყველაფერს აკეთებს „ქართული ოცნება“ ახალი უბნები არ გაიხსნას ამერიკაში, მაგალითად, ჩიკაგოში ასეთი პრობლემა იყო.  

ამგვარი ხელოვნური ბარიერების მიუხედავად, ყველას მოვუწოდებ მიიღოს არჩევნებში მონაწილეობა. 

• Რატომ? 

ყველა ამბობს, რომ არაფერი შეიცვლება, არის ნიჰილიზმი, ფავორიტის პრობლემა, მაგრამ საქმე საქმეზე რომ მიდგება, ჩვენ მოგვიწევს ვუპასუხოთ მთავარ კითხვას, შენზე რაც იყო დამოკიდებული ეს გააკეთე თუ არა? მინიმუმ ის ვიცით, რა არის „ოცნების“ პოლიტიკა. მინიმუმ ის ვიცით, რომ ამ პოლიტიკით ჩვენ დავიღუპებით.

• Რა იქნება ახალი არჩევანის შემთხვევაში?

არ ვიცით, ვინ როგორ გაგვიმართლებს. იმედების გაცრუების კარგი მაგალითი სწორედ „ქართული ოცნებაა“.

ემიგრანტებმა ფინანსურად გადაარჩინეს ქვეყანა, ახლა სწორედ ემიგრანტებს შეუძლიათ საქართველო დემოკრატიულ ორბიტაზე დატოვონ. 

ბევრი არაფერი მოგვეთხოვება. მოგვეთხოვება უკეთესი არჩევანი გავაკეთოთ. შემდეგ კი ვიყოთ უფრო მომთხოვნი და კრიტიკული ამომრჩევლები. არცერთ ხელისუფლებას არ უნდა გავაბედინოთ ასეთი მავნე მმართველობა და აღარ მივცეთ უფლება დაუშვან საბედისწერო შეცდომები. ხელისუფლება უნდა ხელმძღვანელობდეს ქართველი ხალხის ინტერესით. მოქალაქეები უნდა წყვეტდნენ ქვეყნის ბედს. სხვა ნებისმიერი გადაწყვეტილება არის გაუცხოება და ავტორიტარიზმი.

„რუსული კანონი კლავს თავისუფალ მედიას“ – მაისურზე ამ წარწერით ესწრებიან დღეს, 31 აგვისტოს, საკონსტიტუციო სასამართლოს სხდომას ჟურნალისტები თავისუფალი მედიიდან.

მესამე დღეა ბათუმში მდებარე საკონსტიტუციო სასამართლოში მიმდინარეობს რუსული კანონის წინააღმდეგ სარჩელების განხილვა.

სასამართლოში კანონის გაუქმების მოთხოვნით, რომელიც საზოგადოების დიდი ნაწილის მასშტაბური პროტესტის მიუხედავად „ქართულმა ოცნებამ“ მაინც მიიღო, რამდენიმე სარჩელი შევიდა.

რუსული კანონის გაუქმებას ითხოვს საქართველოს პრეზიდენტი, არასამთავრობო და მედიაორგანიზაციების ნაწილი და საპარლამენტო ოპოზიცია.

საკონსტიტუციო სასამართლო რუსული კანონის განხილვის გამწესრიგებელი ეტაპის ბოლო სხდომას დღეს,  31 აგვისტოს მართავს.

რუსული კანონი საქართველოში 3 ივნისიდან მოქმედებს. ის გრანტის მიმღებ მედია და არასამთავრობო ორგანიზაციებს „უცხოური ძალის ინტერესების გამტარებლის“, ხოლო, მათ შორის, აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის“ სტატუსებს მიანიჭებს.

კანონის ძალაში შესვლიდან 60 დღის, ანუ 2 თვის ვადაში, იუსტიციის სამინისტროს რუსული კანონის შესასრულებლად საჭირო წინასწარი „მატერიალურ – ტექნიკური“ ღონისძიებები (მათ შორის იგულისხმება უცხოური ძალის ინტერესების გამტარებელი ორგანიზაციათა რეესტრის და შესაბამისი ვებგვერდის შექმნა, სადაც რეგისტრაციის შევსების განაცხადი იქნება) უნდა განეხორციელებინა.

ამ პუნქტის ამოქმედებიდან 1 თვის ვადაში კი ის სუბიექტები, რომლებიც 2023 წლის მონაცემებით, რუსული კანონის მიხედვით აკმაყოფილებს „უცხოური ძალის ინტერესების გამტარებელი ორგანიზაციის“ კრიტერიუმებს, ვალდებული არიან, მიმართონ საჯარო რეესტრს უცხოური ძალის ინტერესების გამტარებელ ორგანიზაციად დარეგისტრირების თაობაზე.

შესაბამისად, გრანტის მიმღებ სუბიექტებს რეესტრში რეგისტრაციის ვალდებულება კანონის ძალაში შესვლიდან მაქსიმუმ 3 თვეში (3 სექტემბრიდან) წარმოეშვებათ.

იმ შემთხვევაში, თუ სუბიექტი უარს იტყვის ამ რეესტრში რეგისტრაციაზე, მაშინ, მისი ნების მიუხედავად, მაინც დაარეგისტრირებენ.

რუსული კანონის მიხედვით, უცხოური ძალის ინტერესების გამტარებელ ორგანიზაციად რეგისტრაციისთვის თავის არიდება პირველ ჯერზე გამოიწვევს დაჯარიმებას 25 000 ლარის ოდენობით.

აღნიშნული კანონი ზღუდავს სამოქალაქო ორგანიზაციებისა და მედიის საქმიანობას. მსგავსმა კანონმდებლობამ რუსეთში სრულად გააქრო დამოუკიდებელი მედია და სამოქალაქო სექტორი.

ამავე თემაზე: 

რა გადაწყვიტა 2014 წელს რუსეთის საკონსტიტუციო სასამართლომ რუსულ კანონზე – ამონარიდები

See more

პროკურატურამ ბათუმში მომხდარი განზრახ მკვლელობის მცდელობის ფაქტზე ერთ პირს ბრალდება წარუდგინა.

პროკურატურის ცნობით, შსს-ს მიერ ჩატარებული გამოძიებით დადგინდა, რომ 7 აგვისტოს, ბათუმში, თურქეთის რესპუბლიკის მოქალაქემ ასევე თურქეთის რესპუბლიკის სამი მოქალაქის მიმართულებით ცეცხლსასროლი იარაღიდან მრავალჯერადად გაისროლა. სროლის შედეგად ერთ-ერთმა დაზარალებულმა და იქვე შემთხვევით მყოფმა საქართველოს სამმა მოქალაქემ სხეულის სხვადასხვა არეში დაზიანებები მიიღეს.

გამოძიებით ასევე დადგინდა, რომ ბრალდებული საზღვრის გადაკვეთისთვის დადგენილი წესების დარღვევით, უკანონოდ შემოვიდა საქართველოს ტერიტორიაზე.

მას ბრალდება საქართველოს სისხლის სამართლის კოდექსის 19, 109-ე მუხლის „ბ“ და „ლ“ ქვეპუნქტებით (განზრახ მკვლელობის მცდელობა ორზე მეტი პირისა და ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას) 236-ე მუხლის მე-3 და მე-4 ნაწილით (ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა და ტარება) და 344-ე მუხლის პირველი ნაწილით (საქართველოს სახელმწიფო საზღვრის უკანონოდ გადაკვეთა) დაუსწრებლად წარედგინა.

ბათუმის საქალაქო სასამართლომ ბრალდებულს აღკვეთის ღონისძიების სახით პატიმრობა შეუფარდა და მის მიმართ გამოცხადდა ძებნა.

საქართველოს პროკურატურის ცნობით, არასრულწლოვნის მიმართ ქორწინების იძულების ფაქტზე დაზარალებულის მამას ბრალდება წარუდგინეს.

სამართალდამცველებმა ბრალდებული 28 აგვისტოს დააკავეს.

საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებული, გენდერული დისკრიმინაციის ნიშნით შეუწყნარებლობის მოტივით, 17 წლის შვილს აიძულებდა, რომ საკუთარი ნების საწინააღმდეგოდ, მის მიერვე შერჩეულ მამაკაცზე დაქორწინებულიყო.

დაზარალებული ქორწინებისგან თავის არიდების მიზნით ქვეყნის დატოვებას შეეცადა.

მას ბრალდება საქართველოს სისხლის სამართლის კოდექსის 11 პრიმა, 150 პრიმა მუხლის მე-2 ნაწილის „ა“ ქვეპუნქტით (ოჯახის ერთი წევრის მიერ ოჯახის სხვა წევრის მიმართ ქორწინების იძულება, ჩადენილი არასრულწლოვნის მიმართ) წარედგინა, რაც სასჯელის სახედ და ზომად 2-დან 4 წლამდე თავისუფლების აღკვეთას ითვალისწინებს.

პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, სასამართლოს კანონით დადგენილ ვადაში მიმართავს.

ავტორი: ნათია როყვა

___

ირაკლი დანელია ამერიკაში წასვლამდე – 2013-2016 წლებში ჯერ გარემოს დაცვისა და ბუნებრივი რესურსების, შემდეგ კი რეგიონული განვითარებისა და ინფრასტრუქტურის სამინისტროში მუშაობდა. ბოლოს რუსთავის მერიაში საქმიანობდა. სწორედ საჯარო სამსახურში ყოფნის პერიოდში შეცვალა ცხოვრება – ტურისტული ვიზა აიღო, ამერიკაში სამოგზაუროდ წამოვიდა და დარჩა. მანამდე ირაკლი მედიაში მუშაობდა – ჟურნალისტი იყო.

• რატომ წამოვედი ამერიკაში?                    

2018 წლის ბოლოს, რუსთავის მერიაში შვებულება ავიღე და ამერიკაში, ჩემი ოცნების ქვეყანაში წამოვედი სამოგზაუროდ.

მოგზაურობის პირველივე დღეების შთაბეჭდილებებმა ჩემი ცხოვრება თავდაყირა დააყენა. ყოველდღიური ქაოსისგან დაშორების შემდეგ, უფრო მტკივნეულად გამოჩნდა ჩემი და ჩემნაირი  საჯარო მოხელეების ცხოვრება. მალევე მივხვდი, აქ ბევრად მშვიდად და სტაბილურად რატომ ცხოვრობს დამლაგებელი, რომელსაც უფრო მაღალი შემოსავალი აქვს, ვიდრე შუა რგოლის მოხელეს საქართველოში.

საჯარო სამსახურში ჩემი და ჩემნაირი ადამიანების ოჯახის მომავალი, უფროსის ცვლილებიდან დაწყებული არჩევნების შედეგებით დამთავრებული, ყველა ფაქტორს უკავშირდებოდა და უკავშირდება. უმრავლესობა ხელფასიდან ხელფასამდე ცხოვრობს და ახლა სამსახურების შენარჩუნება ბევრ რამეზეა დამოკიდებული.

სწორედ პირველივე კვირაში აღმოვაჩინე ისიც, მთელი წლის ხელფასი აქ ერთ თვეში რომ შემეძლო გამომემუშავებინა. შემეძლო, ჩემი ოჯახის მომავალზე მშვიდად მეზრუნა, მეოცნება უკეთეს განათლებაზეც კი… გადავწყვიტე, მყარი ნაბიჯებით გამეგრძელებინა ჩემი ამერიკული ცხოვრება ძალიან ქაოსურ და არამყარ ქართულ რეალობაში დაბრუნების ნაცვლად. სტაბილურობის და ხელფასის სხვაობის გამო, უარი ვთქვი საჯარო სამსახურში დაბრუნებაზე.

ასე დავთმე ჩემი 19 წლიანი გამოცდილება.

• როგორ ვახერხებ დავრჩე აქტიურ მოქალაქედ?

ამ მტკივნეულ ცვლილებებში უარი არასდროს მითქვამს ჩემ როლზე – დავრჩე ჩემი ქვეყნისთვის აქტიური მოქალაქე. ახლა ძალიან შორიდან და იგივე ძალისხმევით ვცდილობ ჩემი წვლილი შევიტანო საქართველოს განვითარებაში.

ხომ ამბობენ, ყოფილი ჟურნალისტები არ არსებობენო – მეც ზუსტად ინფორმაციის მიტანით ვცდილობ გარშემომყოფებს (და უკვე ამომრჩევლებს) ავუხსნა, რა საფრთხეები გაჩნდა რუსული კანონის ამოქმედების შემდეგ.

დღეს, ევროკავშირის წევრობა რეალობად იქცა და ამ გზისკენ მიისწრაფვის საქართველოს მოსახლეობა. ხელისუფლება კი ისე იღებს კანონს, რომ მისი მოქალაქეების აზრს არ ითვალისწინებს. არ ითვალისწინებს ქართველი ახალგაზრდების პროტესტს, არ უსმენენ მსოფლიო ლიდერების, ჩვენი ევროპელი და ამერიკელი მეგობრების რეკომენდაციებს.

როგორც ჟურნალისტი, დავინტერესდი და გადავამოწმე მართლა ჰგავს თუ არა რუსული კანონი ამერიკულ „ფარას“. შემიძლია ცალსახად ვთქვა, მსგავსი სახით აშშ-ში არცერთი კანონი არ მოქმედებს. ხელისუფლების ეს არგუმენტი ამერიკულ რეალობას აცდენილია.

ისევე როგორც არ მოდის თანხვედრაში რუსული კანონის იდეა ევროპულ კანონმდებლობასთან.

ხშირად ვფიქრობ იმაზეც, რატომ აპელირებს ხელისუფლება გამჭვირვალობის საკითხებზე. გამჭვირვალობა სწორედ საჯარო ფუნქციის ნაწილია – საქართველოს მთავრობის წევრები თავად უნდა იყვნენ გამჭვირვალეები ფინანსებისა თუ სხვა მიმართულებით, შემდეგ მიუთითონ მედიასა და არასამთავრობო სექტორს.

აქ, ჩემი ნაცნობების უმრავლესობა ფიზიკურად შრომობს – ქალები მოხუცებს უვლიან, სახლებს და ოფისებს ალაგებენ. კაცები კი ტაქსისა და სატვირთო მანქანების მძღოლებად მუშაობენ. ახალგაზრდების ძირითადი ნაწილი საჭმლის მიტანის სერვისზე ე.წ „დორდაშზე“ მუშაობს. შეიძლება ითქვას, რომ „დორდაშმა“ და „უბერმა“ გადაარჩინა საქართველოს ეკონომიკა და დღემდე აცოცხლებს ქვეყანას. ფულადი გზავნილები ევროპიდან და ამერიკიდან ინახავს ქართულ ოჯახებს. და შეიძლება ჩვენ ყველას ხელისუფლებამ აგენტები გვიწოდოს?

• რატომ არ მინდა რუსეთი?

ამაზე პასუხი მარტივია, რუსეთი ოკუპანტია!

წლებია რუსეთი ყველა საერთაშორისო ხელშეკრულებას არღვევდა, ახდენდა მშვიდობიანი სახელმწიფოების ოკუპაციას, ანექსიას და ფეხქვეშ თელავდა დამოუკიდებელი ქვეყნების უფლებას.

მე ხშირად ვაშუქებდი ინფორმაციას პუტინის რეჟიმის მიერ მიღებული კანონების შესახებ და ახლა ხალხი გადაწყვეტს შევძლებთ ისეთ ქვეყანაში ცხოვრებას, სადაც არასამთავრობო სექტორი არ არსებობს, კრიტიკული მედია არ არსებობს, სადაც ადამიანის უფლებები გათელილია, სადაც ოპოზიციის წევრებს სასტიკად უსწორდებიან, სადაც მთავრობის წინააღმდეგ გამართულ საპროტესტო აქციების მონაწილეებს ფიზიკურად გაუსწორდებიან?

იქნებ ასეთი რეალობა უკვე გარდაუვალი გახდება საქართველოში?

ალბათ, უნდა დაგვაფიქროს, გაურკვეველ ვითარებაში ოპოზიციონერი ლიდერის ალექსეი ნავალნის გარდაცვალებამ. ამის ფონზე, უკიდურესად საშიშად გამოიყურება საქართველოში ოპოზიციური პარტიის ლიდერების დაპატიმრების ანონსი. ასე მგონია, ეს ყველა საჯარო მოხელეს დევნის და რეპრესიების ანონსსაც ჰგავს.

• როგორ დავბრუნდეთ?

ზუსტად ვიცი, ევროკავშირის წევრობა მართვის ევროპული სტილით მოსახლეობის კეთილდღეობაა. ადამიანებზე მორგებული, სერვისების შექმნის გარანტია ქართველი საჯარო მოხელეების ღირსეული სამუშაო პირობებიც მგონია. საჯარო სამსახური – სათანადო ანაზღაურებით და ხალხისთვის მუშაობის თავისუფლებით.

ხელისუფლების წარმომადგენლები ხშირად ამბობენ – „ღირსებით ევროპისკენ“. მე ვიტყოდი, „ღირსებით სამსახურისკენ“, სადაც საჯარო სამსახურში ყოფნა ხალხისთვის მუშაობის პრივილეგია, დაცულობა და ოჯახების წარმატება გახდება.

კი ევროპას! – ეს არჩევანი ერის განვითარების კიდევ ერთი ტალღა იქნება, ემიგრანტების დაბრუნების ტალღა.

მხოლოდ ჩვენი მონაწილეობით დავბრუნდებით „ღირსებით სამშობლოსკენ“ – რომელსაც ახლა რუსეთისგან არჩევნების გზითაც გადავარჩენთ.

რუსეთის საკონსტიტუციო სასამართლო აგენტების შესახებ კანონის შეჩერებაზე [რომლის ანალოგიც არის საქართველოს პარლამენტის მიერ მიღებული რუსული კანონი] 2014 წელს მიმართეს რუსეთის მოქალაქეებმა. რუსეთის საკონსტიტუციო სასამართლომ მოსარჩელეების მხოლოდ ერთი მოთხოვნა დააკმაყოფილა – ადმინისტრაციული ჯარიმების ნაწილში:

სასამართლოს დასაბუთებით, ადმინისტრაციული ჯარიმები არ შეესაბამება კონსტიტუციის მე-17 მუხლს, რამდენადაც – მოქმედი საკანონმდებლო რეგულირება არ იძლევა შესაძლებლობას, კანონით განსაზღვრულ სანქციით დადგენილ ქვედა ზღვარზე მცირე ადმინისტრაციული სახდელის დაკისრების საშუალებას – ის არ აძლევს უფლებამოსილ პირს უფლებას ყველა შემთხვევას მიუდგეს ინდივიდუალურად.

ხვალ, 29 აგვისტოს, საქართველოს საკონსტიტუციო სასამართლო იწყებს საქართველოს პარლამენტის მიერ მიღებული რუსული კანონის შეჩერების მოთხოვნით შესული ოთხი სარჩელის განხილვას. არ არის გამორიცხული, ქართველი კანონმდებლების მსგავსად, საქართველოს საკონსტიტუციო სასამართლომაც არ გაიზიაროს სარჩელის მოთხოვნები და იხელმძღვანელოს რუსეთის ფედერაციის საკონსტიტუციო სასამართლოს გადაწყვეტილებით – მაგალითად, რუსეთის საკონსტიტუციო სასამართლოს მსგავსად დააკმაყოფილოს ერთი რომელიმე ისეთი მოთხოვნა, რაც ვერ შეუშლის ხელს საქართველოს ხელისუფლების სურვილს მედია და არასამთავრობო სექტორი გაანადგუროს.

ნიშანდობლივია, რომ რუსეთის ფედერაციის საკონსტიტუციო სასამართლომ არაკომერციული ორგანიზაციებისა და არაკომერციული გაერთიანებების უცხოური ინტერესების აგენტების რეესტრში სავალდებულო რეგისტრაცია მიიჩნია რუსეთის ფედერაციის კონსტიტუციასთან შესაბამისად.

გთავაზობთ ამონარიდებს რუსეთის საკონსტიტუციო სასამართლოს მიერ 2014 წლის 8 აპრილს მიღებული გადაწყვეტილებიდან. თუმცა, გასათვალისწინებელია ისიც, რომ დღეს ეს კანონი ეხება ყველას, მათ შორის ამ გადაწყვეტილებაში მითითებულ ჯგუფებსაც.

მოკლე მიმოხილვა:

რუსეთის ფედერაციის საკონსტიტუციო სასამართლოს განმარტებით: „არაკომერციული ორგანიზაციების შესახებ“ ფედერალური კანონი ითვალისწინებს, რომ არაკომერციულ ორგანიზაციებს, რომლებიც ასრულებენ უცხოური აგენტის ფუნქციებს, მიეკუთვნებიან ისეთი რუსული არაკომერციული ორგანიზაციები, რომლებიც იღებენ ფინანსურ სახსრებს და სხვა სახის ქონებას უცხოური წყაროებიდან და რუსეთის ფედერაციის ტერიტორიაზე აორგანიზებენ და ატარებენ პოლიტიკურ აქციებს, რომლებიც მიმართულია ზეგავლენის მოხდენაზე (მიუხედავად/განურჩევლად დასახული მიზნებისა) სახელმწიფო ორგანოების მიერ მიღებულ გადაწყვეტილებებსა და მათ მიერ განხორციელებულ სახელმწიფო პოლიტიკაზე, ასევე გარკვეული საზოგადოებრივი აზრის ჩამოყალიბებაზე სახელმწიფო ორგანოების მიერ განხორციელებული პოლიტიკისა და მიმდინარე პროცესების მიმართ.   

საკონსტიტუციო სასამართლოს განმარტებითვე გასათვალისწინებელია, რომ საქმიანობა მეცნიერების, კულტურის, ხელოვნების, ჯანდაცვის, მოქალაქეთა ჯანმრთელობის პრევენციისა და დაცვის, მოქალაქეთა სოციალური მხარდაჭერისა და დაცვის, დედობისა და ბავშვობის დაცვის, შშმ პირთა სოციალური დახმარების, ხელშეწყობის სფეროებში, ასევე, ჯანსაღი ცხოვრების წესის, სპორტის, მცენარეთა და ველური ბუნების დაცვის, საქველმოქმედო საქმიანობის, აგრეთვე ქველმოქმედებისა და მოხალისეობის ხელშეწყობის სფეროები არ უკავშირდება პოლიტიკურ საქმიანობას (ფედერალური კანონის მე-2 მუხლის მე-6 პუნქტის მე-3 პუნქტით), რაც არის ერთ-ერთი პირობა არაკომერციული ორგანიზაციის უცხო ქვეყნის აგენტად ცნობის.

შესაბამისად, როგორიც არ უნდა იყოს არაკომერციული ორგანიზაციების სახსრებისა და სხვა მატერიალური რესურსების წყაროები, თუ მათი საქმიანობის მიზნები არ სცილდება მითითებულ სფეროებს, ისინი არ შეიძლება ჩაითვალოს უცხოური აგენტის ფუნქციების შესრულებად. 

ის არაკომერციული ორგანიზაციები და გაერთიანებები (არაკომერციული ორგანიზაციებისა და არაკომერციული გაერთიანებების შესახებ ფედერალური კანონები), რომლებსაც განზრახული აქვთ მიიღონ უცხოური დაფინანსება და მონაწილეობა მიიღონ პოლიტიკური საქმიანობაში, ვალდებული არიან წინასწარი რეგისტრაცია გაიარონ შესაბამისი სახელმწიფო დაწესებულებაში. 

სასამართლოს განმარტებით: „ამ ვალდებულების დადგენისას ფედერალური კანონმდებელი ხელმძღვანელობდა არაკომერციული ორგანიზაციების საქმიანობის ფინანსური (ქონებრივი) კომპონენტის გამჭვირვალობის (გახსნილობის) აუცილებლობით, რომლებიც აპირებენ მონაწილეობა მიიღონ პოლიტიკურ საქმიანობაში რუსეთის ფედერაციის ტერიტორიაზე და სურთ გავლენა მოახდინოს სახელმწიფო ორგანოების მიერ მიღებულ გადაწყვეტილებებზე და მათ მიერ გატარებულ საჯარო პოლიტიკაზე.

ასეთი საქმიანობა, როგორც შინაარსით, ასევე იმ შედეგებით, რომელთა მიღწევასაც ის ითვალისწინებს, არ შემოიფარგლება არაკომერციული ორგანიზაციის საკუთარი (შიდა) საჭიროებებით, არამედ აშკარა შემხებლობაშია როგორც საჯარო კანონიერ ინტერესებზე ზოგადად, ასევე ყველა მოქალაქის უფლებებთან და თავისუფლებებთან… 

აქედან გამომდინარე, არაკომერციული ორგანიზაციებისთვის, რომლებიც იღებენ უცხოურ დაფინანსებას და მონაწილეობენ პოლიტიკურ საქმიანობაში რუსეთის ფედერაციის ტერიტორიაზე, ვალდებულების დაკისრება, შეატყობინონ შესაბამის ორგანოებს ამის შესახებ და აღიარონ საკუთარი თავი არაკომერციულ ორგანიზაციებად, რომლებიც ასრულებენ უცხოური აგენტის ფუნქციებს (რუსეთის ფედერაციის კონსტიტუციის, მე-2, მე-18 , 24 (2), 29 ( 4) და 30 (1) შეტყობინებების პროცედურის საშუალებით) არ შეიძლება ჩაითვალოს კონსტიტუციურ მიზნებთან და ღირებულებებთან შეუთავსებლად, რადგან ის მიზნად ისახავს უზრუნველყოს ყველა დაინტერესებული მხარის ინფორმირება უცხოური სუბიექტების (სახელმწიფოების, ორგანიზაციების ან ფიზიკური პირების) მონაწილეობის შესახებ, არაკომერციული ორგანიზაციებისთვის ფულადი  და (ან) სხვა მატერიალური მხარდაჭერის თაობაზე.

იმის გათვალისწინებით, რომ არაკომერციული ორგანიზაციების მიერ ფინანსური ან სხვა საქმის ქონების მიღება უცხოური აგენტებისგან არ გამორიცხავს რუსეთის ფედერაციის სახელმწიფო ორგანოებზე ზეგავლენის მოხდენის მიზნით (ამ სახსრების/რესურსების) გამოყენების შესაძლებლობას, ასეთი წყაროების (უცხოური) ინტერესების სასარგებლოდ, მათი საკანონმდებლო გამიჯვნა, უცხოური ინტერესების გამტარებელი აგენტების სახით, შესაბამისობაშია კონსტიტუციასთან, რადგან კონსტიტუციის პრეამბულა და მესამე მუხლის პირველი პუნქტი აღიარებს რუსეთის ფედერაციას სუვერენულ სახელმწიფოდ და ხელისუფლების ერთადერთ წყაროდ კი რუსეთის ფედერაციის მრავალეროვან ხალხს. 

რუსეთის ფედერაციის საკონსტიტუციო სასამართლოს გადაწყვეტილებით, არაკომერციული ორგანიზაციებისათვის, რომლებიც იღებენ უცხოურ დაფინანსებას, სავალდებულო რეგისტრაციის დაწესება არ ეწინააღმდეგება კონსტიტუციას, რადგან „მიმართულია გამჭვირვალობის უზრუნველყოფისაკენ (ასეთი ორგანიზაციების) იმ ორგანიზაციების, რომლებიც პირდაპირი ან არაპირდაპირი (საზოგადოებრივი აზრის ფორმირებაზე ზეგავლენა) გზით ცდილობენ ზეგავლენის მოხდენას სახელმწიფო ორგანოების მიერ გადაწყვეტილების მიღებასა და მათ მიერ განხორციელებულ პოლიტიკურ საქმიანობაზე.

გამჭვირვალობის ვალდებულების დაწესება არ ითვალისწინებს სახელმწიფო ჩარევას სასურველი შინაარსის ან მსგავსი საქმიანობის პრიორიტეტების განსაზღვრაში. შესაბამისად, რეგისტრაციის ვალდებულების დაწესება არ ნიშნავს არაკომერციული ორგანიზაციების, რომლებიც უცხოური აგენტის ფუნქციას ასრულებენ, ნეგატიურ საკანონმდებლო შეფასებას.  

საკანონმდებლო ნორმები ადგენენ მხოლოდ რეესტრში რეგისტრაციის ვალდებულებას და არ აფერხებენ არაკომერციული ორგანიზაციებს თავისუფლად მოიძიონ და მიიღონ ფულადი სახსრები და სხვა სახის ქონება, როგორც უცხოური, ასევე რუსეთში არსებული წყაროებიდან და გამოიყენონ თავიანთი ორგანიზაციული პოლიტიკური საქმიანობისთვის, მათ შორის უცხოური წყაროების ინტერესების (თვის) სასარგებლოდ. 

რუსეთის ფედერაციის საკონსტიტუციო სასამართლო უცხოური აგენტების რეესტრში რეგისტრაციის ვალდებულებას არც დისკრიმინაციულად მიიჩნევს, რადგან „რეგისტრაცია… არ აფერხებს არაკომერციულ ორგანიზაციას არც ფინანსური სახსრების ან ამა თუ იმ სახის ქონების მიღებაში, როგორც უცხოური, ან საერთაშორისო ორგანიზაციების, ან უცხო ქვეყნის მოქალაქეების ან მოქალაქეობის არმქონე პირებისგან.

არაკომერციული ორგანიზაცია, ასევე არ კარგავს პოლიტიკურ საქმიანობაში მონაწილეობის შესაძლებლობას. აქედან გამომდინარე, ის არ არის დისკრიმინაციულ მდგომარეობაში იმ ორგანიზაციებთან მიმართებაში, რომლებიც არ იღებენ უცხოურ დაფინანსებას და არ არიან რეგისტრირებული უცხოური აგენტების რეესტრში.

შესაბამისად, უცხოური დაფინანსების მიმღები არაკომერციული ორგანიზაციებისათვის საკანონმდებლო ვალდებულების დაკისრება, რომ გაიარონ რეგისტრაცია პოლიტიკური საქმიანობის დაწყებამდე, მიმართულია მხოლოდ ასეთი ორგანიზაციების დამატებითი გამჭვირვალობის უზრუნველსაყოფად. 

სასამართლოსავე განმარტებით, რეგისტრაციის ვალდებულება არ ნიშნავს სახელმწიფო ჩარევას ან კონტროლის განხორციელებას არაკომერციული ორგანიზაციის საქმიანობის მიზანშეწონილობაზე. არ ზღუდავს ასეთ ორგანიზაციებს და ამ საქმიანობაში მონაწილე პირებს სასამართლო დაცვის უფლების განხორციელებაში, სახელმწიფო ორგანოების მიერ მიღებული გადაწყვეტილებების გასაჩივრების თვალსაზრისით“. 

ბახმაროს კინოთეატრის ახალ შენობაში, რომელიც 2012 წელს აშენდა და რომელსაც, როგორც აქ ამბობენ, არასოდეს უმუშავია, ნაგავი და ნაკელი ყრია.

დაზიანებულია დარბაზის სკამები, დამტვრეულია იატაკის ფილები, დაზიანებულია ჭერი.

ბახმაროს კინოთეატრის შენობა 2019 წელს დაარბიეს, რაშიც პოლიციამ ექვსი არასრულწლოვანი ამხილა. შენობაში დაზიანებული ინვენტარის ნარჩენები დღემდე ყრია.

ბახმაროს კინოთეატრის შენობა მდებარეობს იმ მიწის ნაკვეთზე, რომელიც სამშენებლო კომპანია „ორბი ჯგუფი ბახმარომ“ 2024 წლის თებერვალში იყიდა. გარდა ამ ნაკვეთისა „ორბი ჯგუფი ბახმაროს„ საკუთრებაშია ბახმაროში მდებარე 9 მიწის ნაკვეთი, ჯამში 4 ჰექტარზე მეტი მიწა, რომლებიც 2019 წელს სახელმწიფომ კომპანიას 1 ლარად მიჰყიდა.