„იუსტიციის სამინისტრომ იუსტიციის ახალი სახლის ფართობი ბათუმში „ქართული ოცნების“ შემწირველი ბიზნესმენის, გიორგი ჭყონიას კომპანიისგან იქირავა.
იჯარაში ჭყონიას კომპანია სახელმწიფოსგან ყოველწლიურად 704 880 ლარს მიიღებს,“ – ინფორმაციას ამის შესახებ „საერთაშორისო გამჭვირვალობა საქართველო“ აქვეყნებს.
ახალი იუსტიციის სახლი ბათუმში რკინიგზის სადგურის შენობაში მიმდინარე წლის ივლისში გაიხსნა. „ბათუმი ცენტრალს“ ბიზნესმენი გიორგი ჭყონია ფლობს.
„საერთაშორისო გამჭვირვალობა საქართველოს“ თანახმად, „მთავრობამ გიორგი ჭყონიასგან სულ 445 კვადრატული მეტრის ფართი იქირავა და ერთ კვადრატულ მეტრზე 132 ლარს უხდის. იჯარის ხელშეკრულება სამწლიანია და გიორგი ჭყონიას კომპანია ამ პერიოდში 2 114 640 ლარს მიიღებს“.
გიორგი ჭყონია „ქართულმა ოცნებამ“ საპარლამენტო სიის წევრად 15 აგვისტოს წარადგინა.
გია ჭყონია „ქართულ ოცნებასთან“ დაახლოებული ბიზნესმენი და ამ პარტიის მსხვილი შემწირველია. ის ერთ–ერთია იმ ბიზნესმენებს შორის, ვინც 2022 წელს, აჭარის მთავრობასთან ერთად იმყოფებოდა კუნძულ მალიორკაზე. აჭარის მთავრობის ინფორმაციით, ეს ვიზიტი სწორედ ბათუმელმა ბიზნესმენებმა დააფინანასეს.
გიორგი ჭყონიას კომპანიები: შპს „გზა“, შპს „ბათუმი ცენტრალი“ და შპს „შატო კვირიკე“ აქტიურად მონაწილეობენ სახელმწიფო შესყიდვებში, საიდანაც 2011-2023 წლებში შემოსავლის სახით მიიღეს 335 მილიონ 638 ათას 719 ლარი.
გიორგი ჭყონიამ და მისმა ბიზნესპარტნიორებმა მმართველ პარტიას და საპრეზიდენტო კანდიდატს, სალომე ზურაბიშვილს, ჯამში 1 394 000 ლარი შესწირეს. ბიზნესმენის საქმიანობაზე დეტალურად წაიკითხეთ აქ.
2016 წლიდან 2023 წლის ჩათვლით პირადად გიორგი ჭყონიამ „ქართულ ოცნებას“ ჯამში 400 000 ლარზე მეტი შეწირა.
__
ამავე თემაზე:
გონიოში 2 კორპუსს და 38 სახლს „ოცნებასთან“ დაახლოებული ბიზნესმენი აშენებს
