ნიდერლანდების შეიარაღებულმა ძალებმა ხაზგასმით განაცხადეს, რომ მათ არ დაუწესებიათ არანაირი შეზღუდვა უკრაინისთვის გადაცემული F-16-ების გამოყენებაზე – უკრაინის შეიარაღებულ ძალებს თავისუფლად შეუძლიათ გამოიყენონ F-16 და ნიდერლანდებიდან მიღებული სხვა იარაღი საკუთარი შეხედულებისამებრ.
ამის შესახებ „დოიჩე ველე“ წერს ნიდერლანდების ეროვნულ მაუწყებელზე, NOS-ზე დაყრდნობით.
კერძოდ, დღეს, 29 აგვისტოს, ნიდერლანდების შეიარაღებული ძალების სარდალმა, ონნო ეიჩელჰაიმმა NOS-სთან ინტერვიუში განაცხადა, რომ მათ არ დაუწესებიათ არანაირი შეზღუდვა F-16-ის გამოყენებასა და დიაპაზონზე.
F-16 თანამედროვე საბრძოლო თვითმფრინავია, რომელსაც რაკეტის გასროლა 800 კილომეტრის მანძილზე შეუძლია.
იგივე ეხება ნიდერლანდების მიერ მიწოდებულ სხვა იარაღს – უკრაინის შეიარაღებულ ძალებს შეუძლიათ მათი განკარგვა ბრძოლის ველზე „საკუთარი შეხედულებისამებრ“, თუ ისინი შეესაბამება საერთაშორისო ჰუმანიტარული სამართლის პრინციპებს.
„ჩვენ გვინდა, რომ უკრაინამ მოიგოს ომი და ჩვენ ყველა ღონეს ვხმარობთ, რომ ეს მოხდეს“, – თქვა ნიდერლანდების შეიარაღებული ძალების სარდალმა ინტერვიუში.
ნიდერლანდები უკრაინას დაჰპირდა ჯამში 24 F-16 საბრძოლო თვითმფრინავის გადაცემას. ნიდერლანდების შეიარაღებული ძალების სარდალს არ დაუკონკრეტებია, რამდენი F-16 გადასცეს უკვე უკრაინას.
ბოლო დღეებში დასავლურ მედიაში აქტიურად განიხილება, რომ დასავლური იარაღის, კერძოდ, ბრიტანული შორი მოქმედების რაკეტების, Storm Shadow-ს რუსეთის ტერიტორიაზე გამოყენების ნებართვას უკრაინას აშშ-ი არ აძლევს. ეს საკითხი მოხვდა ომის კვლევის ამერიკული ინსტიტუტის – ISW-ის ბოლო ანგარიშშიც. მედია მიუთითებს იმაზე, რომ დიდი ბრიტანეთი და საფრანგეთი თანახმა არიან ამაზე.
ISW-ის ცნობით, მიუხედავად იმისა, რომ რუსულმა ძალებმა შორს გადაიტანეს იარაღი, რუსული სამხედრო ობიექტების მნიშვნელოვანი რაოდენობა კვლავ რჩება დასავლური იარაღით დარტყმისთვის ხელმისაწვდომ მანძილზე.
