29 აგვისტოს, ღამით, რუსეთის შეიარაღებული ძალები უკრაინას თავს დაესხნენ სამი Х-59/Х-69 მართვადი რაკეტითა და 74 „შაჰედით“. მათგან უკრაინის საჰაერო თავდაცვის ძალებმა ჩამოაგდეს 2 რაკეტა და 60 ირანული დრონი – ამის შესახებ უკრაინული მედია ავრცელებს ინფორმაციას უკრაინის შეიარაღებული ძალების საჰაერო ძალების სარდალზე, ნიკოლაი ოლეშჩუკზე დაყრდნობით.
ასევე, რუსეთმა შეტევისთვის გამოიყენა კიდევ ორი მართვადი რაკეტა, რომელთა ტიპი ახლა დგინდება.
რუსეთის შეიარაღებულმა ძალებმა რაკეტები გაუშვეს ფედერაციის კურსკის და ბელგოროდის რეგიონების საჰაერო სივრციდან.
უკრაინაზე საჰაერო თავდასხმის მოგერიებაში მონაწილეობდნენ ავიაცია, საზენიტო-სარაკეტო ძალები და მობილური საცეცხლე ჯგუფები.
უკრაინის საჰაერო თავდაცვა მუშაობდა ხარკოვის, ჩერკასის, კიროვოგრადის, კიევის, პოლტავას, დნეპროპეტროვსკის, ხერსონის, სუმისა და დონეცკის რეგიონებში.
