მწვანე კონცხსა და მახინჯაურში წყლის სისტემის მოსაწყობად გამოცხადებულ 16-მილიონიან ტენდერში ბათუმის მერიის შპს „ბათუმის წყალს“ უჩივიან.
მომჩივანი კომპანია „ბილდინგ-დეველოპერ“ მომსახურებას შემსყიდველს 14,9 მილიონად სთავაზობდა, თუმცა მას დისკვალიფიკაცია მისცეს. მომდევნო პრეტენდენტი კი „ოცნების“ კანდიდატის და შემწირველის, გიორგი ჭყონიას კომპანიაა, რომელიც „ბათუმის წყალს“ მომსახურებას 185 ათასი ლარით ძვირად, 15 მილიონ 85 ათას ლარად სთავაზობს.
ტენდერი „ბათუმის წყალმა“ 2024 წლის 18 ივლისს გამოაცხადა. სატენდერო კომისიამ კი „ბილდინგ-დეველოპერს“ დისკვალიფიკაცია 2023 წლის 23 აგვისტოს ოქმით მისცა. თარიღში აშკარად ტექნიკური შეცდომაა, თუმცა, თუ ოქმის შინაარსს გადავხედავთ, დისკვალიფიკაცია კომპანიას სწორედ „ტექნიკური შეუსაბამობის“ გამო მისცეს.
ამონარიდი სატენდერო კომისიის ოქმიდან:
„ბილდინგ-დეველოპერი“ სატენდერო კომისიის ამ გადაწყვეტილებას ასაჩივრებს და ოქმის გაუქმებას ითხოვს.
მომჩივანი კომპანია თვლის, რომ განფასება, რომელიც კომისიამ დაზუსტებულ დოკუმენტში შეუსაბამოდ ჩათვალა, ანალოგიურად იყო იმ დოკუმენტშიც, რომელიც კომპანიამ მანამდე წარადგინა, ვიდრე კომისია მონაცემების დაზუსტებას მოსთხოვდა. დასაზუსტებელ ოქმში კი, აღნიშნული განფასების დაზუსტებაზე არაფერი იყო ნათქვამი.
„2023 წლის [უნდა ეწეროს 2024 წელი] 23 აგვისტოს N3 ოქმის მიხედვით კომპანიის მიერ ატვირთულ სახარჯთაღრიცხვო დოკუმენტაციის განხილვის შედეგად [სატენდერო კომისიამ] დაადგინა, რომ ლოკალურ-რესურსული ხარჯთაღრიცხვის მე-7 სტრიქონის ქვესტრიქონები არ ითვალისწინებდა განფასებას. თავდაპირველ ხარჯთაღრიცხვაში, რომელიც ავტვირთეთ 2024 წლის 6 აგვისტოს ეს ქვესტრიქონები ანალოგიურად არის განფასებული, როგორც 2024 წლის 19 აგვისტოს დაზუსტებულ ხარჯთაღრიცხვაში. კომისიის 2024 წლის N2 ოქმით კი, აღნიშნული ქვესტრიქონები არ ითვალისწინებდა დაზუსტებას.
შესაბამისად, შემსყიდველ ორგანიზაციას შერჩევა-შეფასების დროს თავად გამორჩა დასაზუსტებელი პუნქტები და არ მიუთითა დასაზუსტებელი პუნქტების ჩამონათვალში სრულად, რითაც დარღვეულია მოქმედი კანონმდებლობის მოთხოვნები. ასეთი პრაქტიკის დაშვება და დანერგვა კი დაუშვებელია.
მოვითხოვთ გაუქმდეს სატენდერო კომისიის N3 ოქმი და ჩვენს კომპანიას არ მიეცეს დისკვალიფიკაცია“, – აღნიშნულია კომპანიის საჩივარში.
სახელმწიფო შესყიდვების სააგენტოს დავების საბჭოში კომპანიის საჩივრის განხილვის თარიღად 2024 წლის 29 აგვისტოა ჩანიშნული.
შესყიდვების პორტალის მიხედვით, მეორე პრეტენდენტია შპს „გზა“, რომლის 100 პროცენტი წილის მფლობელი „ქართული ოცნების“ კანდიდატი გიორგი ჭყონიაა [ტენდერი შერჩევა-შეფასების ეტაპზეა].
შპს „გზა“ გამარჯვებულად გამოავლინეს საერთაშორისო ტენდერშიც, რომელიც აჭარის 40 სოფელსა და დაბაში წყლისა და კანალიზაციის სისტემების მოწყობას ითვალისწინებს. კონტრაქტის ღირებულება დაახლოებით 62 მილიონი ევროა. ეს პროექტი ფინანსდება 40 მილიონი ევრო შეღავათიანი სესხით KFW-სგან და 20 მილიონი ევრო გრანტით [აქედან 17 მილიონი ევრო – გრანტი KFW-გან ხოლო 3 მილიონი ევრო – გრანტი ევროკავშირისგან]. ამ შემთხვევაში ტენდერი „აჭარის წყლის ალიანსს“ ჰქონდა გამოცხადებული.
ვრცლად: აჭარის რომელ სოფლებში უნდა აშენდეს წელს წყლისა და კანალიზაციის სისტემები
რაც შეეხება „ბათუმის წყლის“ 16-მილიონიან ტენდერს, სამუშაოები ამ შემთხვევაში ბათუმის ბიუჯეტიდან უნდა დაფინანსდეს. ამასთან, მოეწყობა მხოლოდ სასმელი წყლის სისტემა წყალარინების, ანუ საკანალიზაციო ქსელის გარეშე. მერიის ადრინდელი განცხადებებით სამუშაოები KFW-ს მხარდაჭერილ მეხუთე ფაზაში უნდა შესრულებულიყო, თუმცა ქალაქის მერიაში გვითხრეს, რომ დაფინანსება საკმარისი არ აღმოჩნდა.
მწვანე კონცხსა და მახინჯაურში საკანალიზაციო სისტემების მოწყობა სავარაუდოდ მე-6 ფაზაში განიხილება, თუმცა, ვინ დააფინანსებს ამ „მეექვსე ფაზის“ სამუშაოებს და არის თუ არა იმის წინაპირობა, რომ ქალაქი შეღავათიან კრედიტს ისევ KfW-გან მიიღებს, უცნობია.
___
ამ თემაზე ვრცლად:
16 მილიონი ლარი წყალმომარაგებისთვის მწვანე კონცხზე, სადაც კანალიზაცია არ არის
