რუსეთის თავდაცვის მინისტრის, შოიგუს ყოფილი მოადგილე, პაველ პოპოვი დააკავეს. რუსული მედიის ცნობით, მის წინააღმდეგ სისხლის სამართლის საქმე თაღლითობის მუხლითაა აღძრული.
რუსული სააგენტო „ტასი“ წერს, რომ გამოძიების თანახმად, პოპოვი, რომელიც 2021-2024 წლებში პასუხისმგებელი იყო პარკ „პატრიოტის“ განვითარებაზე, მოვლა-პატრონობაზე და ექსპლუატაციაზე, ამ დაწესებულების ხარჯზე გამდიდრდა.
კერძოდ, პოპოვმა, „პატრიოტის“ ხარჯზე ააშენა და გაარემონტა აგარაკი მოსკოვის ოლქის კრასნოგორსკის რაიონში და ასევე, თავისი ხელქვეითების მეშვეობით აიძულებდა იმ კომპანიებს, რომლებსაც ხელშეკრულებები ჰქონდათ „პატრიოტთან“, მის აგარაკზე სამშენებლო-სამონტაჟო სამუშაოები ანაზღაურების გარეშე ეწარმოებინათ.
„პატრიოტი“ არის მუზეუმი და საგამოფენო სივრცე, რომლის ფართობი თითქმის 5,5 ათასი ჰექტარია, სადაც განთავსებულია რუსეთის არმიის მთავარი ტაძარი. „პატრიოტი“ 2014 წელს გახსნა სერგეი შოიგუმ, რომელიც 2024 წლის გაზაფხულზე მოხსნეს თავდაცვის მინისტრის პოსტიდან და რუსეთის ფედერაციის უშიშროების საბჭოს მდივნად დანიშნეს.
პოპოვი მიმდინარე წლის ივნისის შუა რიცხვებში გაათავისუფლეს თავდაცვის მინისტრის მოადგილის თანამდებობიდან და სამხედრო სამსახურიდან.
პოპოვი ერთადერთი არ არის რუსეთის თავდაცვის სამინისტროდან, რომელიც შოიგუს წასვლის შემდეგ დააკავეს.
რუსეთის თავდაცვის სამინისტროში დაკავებების სერია დაიწყო 2024 წლის აპრილში, როცა დააკავეს თავდაცვის მინისტრის მოადგილე, ტიმურ ივანოვი. ივანოვის შემდეგ დააკავეს თავდაცვის სამინისტროს საკადრო და კომუნიკაციების დეპარტამენტის ყოფილი ხელმძღვანელები: იური კუზნეცოვი და ვადიმ შამარინი, ასევე თავდაცვის შესყიდვების დეპარტამენტის უფროსი ვლადიმერ ვერტელეცკი, ხოლო 2024 წლის 26 ივლისს დააკავეს თავდაცვის მინისტრის ყოფილი მოადგილე დიმიტრი ბულგაკოვი, რომელიც ლოჯისტიკაზე იყო პასუხისმგებელი.
____________
ფოტოზე: პაველ პოპოვი
