ჩეხეთში, პრაღაში გამართულ ევროპის ახალგაზრდულ პირველობაზე ბათუმელი მოჭადრაკე, მარიამ კალანდაძე ვერცხლის პრიზიორი გახდა, ხოლო ასევე ბათუმელმა, კესარია მგელაძემ ბრინჯაოს მედალი მოიპოვა.
ორივე მოჭადრაკე 14 წლამდე კატეგორიაში ასპარეზობდა.
„14 წლამდე ასაკის გოგონათა შორის ჩემპიონატზე ბოლო ტურამდე დაძაბული ბრძოლა მიმდინარეობდა. მარიამ კალანდაძემ არც თუ ისე სახარბიელო სტარტის შემდეგ, 6 პარტია მოიგო ზედიზედ და ბოლო ტურში ჩემპიონთან დაფიქსირებული ყაიმით დამაჯერებლად მოიპოვა ევროპის ვიცე-ჩემპიონის ტიტული.
დასკვნით ტურში მოპოვებული გადამწყვეტი გამარჯვებით ბრინჯაოს მედალი მოიპოვა კესარია მგელაძემ“ – ინფორმაციას საქართველოს ჭადრაკის ფედერაცია ავრცელებს.
ჭადრაკის ფედერაციის ცნობით, ჩემპიონატი შვეიცარიული სისტემით, 9 ტურად გაიმართა და მასში 47 ევროპული ქვეყნის 1231 მოჭადრაკე მონაწილეობდა. ჩემპიონატზე საქართველოს სახელით 25 მოჭადრაკე ასპარეზობდა.
ფედერაცია გავრცელებულ ინფორმაციაში აღნიშნავს, რომ 16 წლამდე გოგონების პირველობაზე შესანიშნავად ითამაშა მარიამ ცეცხლაძემ, რომელიც დამატებითი მაჩვენებლებით გავიდა IV ადგილზე.
________________
ფოტოზე: კესარია მგელაძე და მარიამ კალანდაძე. ფოტო: საქართველოს ჭადრაკის ფედერაცია
