Batumelebi

ხვალ, 25 ივლისს, ბათუმში აქტივისტებისთვის, მოქალაქეებისთვის და მედია ორგანიზაციებისთვის სამუშაო შეხვედრა გაიმართება.

შეხვედრის თემა საჯარო ინფორმაციაზე ხელმისაწვდომობაა. შეხვედრა 17:00 საათზე დაიწყება „თავისუფალ სივრცეში“.

სამუშაო შეხვედრის ორგანიზატორი CMIS – მედიის, ინფორმაციისა და სოციალური კვლევების ცენტრია.

სამუშაო შეხვედრას ორგანიზაციის ხელმძღვანელები: ეკატერინე ბასილაია და მამუკა ანდღულაძე გაუძღვებიან, ხოლო მოწვეული სპიკერი მალხაზ ჭკადუა იქნება, „საერთაშორისო გამჭვირვალობა საქართველოს“ რეგიონული კოორდინატორი.

შეხვედრის დასრულების შემდეგ, 18:00 საათზე, „კინედოკის“ ინიციატივით გაიმართება დოკუმენტური ფილმის – „ძაღლი ყეფს, ქარავანი მიდის“ კინოჩვენება.

ფილმი ასახავს პირადი და პოლიტიკური დილემის წინაშე მყოფ რუს დამოუკიდებელ ჟურნალისტებს და აქტივისტებს, რომლებსაც სასტიკი სასჯელი ემუქრებათ.

როგორც ცნობილია, „უცხოეთის გავლენის აგენტების“ კანონის პირველი ვერსია რუსეთში 2012 წელს მიიღეს. „აგენტების კანონმა“ ქვეყანაში მედია და კრიტიკული სამოქალაქო სექტორი გააქრო.

სამუშაო შეხვედრა, კინოჩვენება და დისკუსია „თავისუფალ სივრცეში“ [ მისამართი: ზ. გამსახურდიას 6ა] გაიმართება.

რამდენიმედღიანი დუმილის შემდეგ სახელმწიფო უსაფრთხოების სამსახურში დაადასტურეს, რომ ბიძინა ივანიშვილის მკვლელობის მომზადების ფაქტებს იძიებენ.

სუს-მა განცხადება მას შემდეგ გაავრცელა, რაც აღნიშნულის შესახებ ბოლო დღეებია „ქართული ოცნების“ წევრები და სახელისუფლებო არხები საუბრობენ.

დღეს, 24 ივლისს, სუსი თავის განცხადებაში წერს:

„მაღალი საჯარო ინტერესიდან გამომდინარე გვსურს საზოგადოებას ვაცნობოთ, რომ სახელმწიფო უსაფრთხოების სამსახურში მიმდინარეობს გამოძიება ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე, დანაშაული გათვალისწინებული საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით.

სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, მათ შორის, პარტია „ქართული ოცნების“ საპატიო თავმჯდომარის, ბიძინა ივანიშვილის მკვლელობის მომზადების ფაქტებს.

ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.

სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით“.

___

საპარლამენტო უმრავლესობის ლიდერი მამუკა მდინარაძე ამბობს, რომ სუსი ტერორიზმისა და შეთქმულების მუხლით გამოძიებას აწარმოების ბიძინა ივანიშვილის და „ოცნების“ სხვა ლიდერების მკვლელობის დაგეგმვაზე.

თავად სახელმწიფო უსაფრთხოების სამსახური კი დუმდა და მიმდინარე გამოძიებასთან დაკავშირებით  კითხვებს არ პასუხობდა.

ამასთან, რამდენიმე დღეა სუს-ში გამოკითხვაზე იბარებენ უკრაინაში მებრძოლ ქართველებს, მათ შორის არიან: ნადიმ ხმალაძე, გელა კახაბრიშვილი, ლაშა ჭიღლაძე, ვაჟა ცეცაძე, ლაშა რუხაია, კონსტანტინე ჯღამაია.

რაც შეეხება შეთქმულების საქმეებს, „ქართული ოცნების” ხელისუფლება ოპოზიციის მხრიდან სახელმწიფო გადატრიალების შეთქმულებებზე 2014 წლიდან საუბრობს აქტიურად, როდესაც შს მინისტრი ალექსანდრე ჭიკაიძე იყო. ჭიკაიძემ 2014 წელს განაცხადა, რომ ენმ „ევრომაიდნის სცენარზე” მუშაობს და დაწყებული იყო საბურავების მომარაგება.

სახელმწიფო უსაფრთხოების სამსახურს „დესტრუქციული ძალების“ მხრიდან მოსალოდნელ რევოლუციურ სცენარებსა და ხელისუფლების ძალადობრივი გზით დამხობის შესახებ აქამდეც არაერთხელ განუცხადებია და გამოძიებაც დაუწყია.

• „თურმე გეგმავდნენ ივანიშვილის და სხვა ლიდერების მკვლელობას“ — მდინარაძე
• ჭიკაიძიდან გახარიამდე – ამბოხება/გადატრიალების საქმეების სპირალი

გონიოში, ჭოროხის ხიდის მიმდებარედ ერთმანეთს ორი სატვირთო შეეჯახა, დაშავდა ორი ადამიანი, ისინი საავადმყოფოში გადაიყვანეს.

ადგილზე მობილიზებული იყო სამაშველო ჯგუფი და პოლიცია.

შინაგან საქმეთა სამინისტროს ინფორმაციით დაწყებულია გამოძიება სისხლის სამართლის კოდექსის 276 მუხლით. ეს მუხლი ტრანსპორტის მოძრაობისას უსაფრთხოების წესების დარღვევას გულისხმობს.

„წავიდნენ სოფლიდან ამზომველები ისე, რომ ჩემთან არ მოსულან,“ – ამბობს ქობულეთის ერთ-ერთ სოფელში მცხოვრები მოქალაქე. ადამიანები სხვადასხვა სოფლიდან გვიყვებიან, რომ საჯარო რეესტრის წარმომადგენლებმა მათ სოფლებში მუშაობა უკვე დაასრულეს, ყველა მიწის ნაკვეთი კი, რაზეც განცხადება დაწერილია, არ შეუსწავლიათ.

მოქალაქეები, რომლებიც „ბათუმელებს“ დაუკავშირდნენ, ამბობენ, რომ სისტემური რეგისტრაციის მოთხოვნით საჯარო რეესტრს განცხადებით 2023 წელს მიმართეს.

სახელმწიფო პროგრამის ფარგლებში მიწის სისტემური რეგისტრაცია [რომელიც მოქალაქეებისთვის უფასოა] 2022 წელს დაიწყო. ქვეყნის 59 მუნიციპალიტეტში, მათ შორის, ქობულეთის, ხელვაჩაურის, ქედის, შუახევისა და ხულოს მუნიციპალიტეტებში რეგისტრაცია 2024 წლის ბოლომდე უნდა დასრულდეს.

საჯარო რეესტრის პრესცენტრის ინფორმაციით, რეგისტრაციის პროცესი განრიგის მიხედვით მიმდინარეობს და იგი აუცილებლად დასრულდება 2024 წელს.

ეს განრიგი კი, ანუ მიწების აზომვის გეგმა-გრაფიკი, სააგენტომ რამდენჯერმე შეცვალა.

საჯარო რეესტრის პრესცენტრში ასევე განმარტეს, რომ სოფლებს რეესტრის წარმომადგენლები პერიოდულად სტუმრობენ, რადგან პარალელურად მონაცემები მუშავდება.

• მიწის ნაკვეთებზე ჩატარებული საკადასტრო სამუშაოების მონაცემებს რეესტრი პერიოდულად აქვეყნებს. ამ მონაცემების გაცნობა შესაძლებელია საჯარო რეესტრის ეროვნული სააგენტოს ოფიციალურ ვებგვერდზე.

სოფლები, სადაც განახლებული გრაფიკით, 2023 წელს სისტემური რეგისტრაცია დაიწყო:

„თევზაობას ვაპირებდი და დენმა დამარტყა, მიკვირს, რომ გადავრჩი… არავინ გვცემს პასუხს იმაზე, რომ მდინარეშია უკვე დენის ტრანსფორმატორი, აქციას გავმართავთ,“ – ამბობს ხელვაჩაურში, სოფელ მარადიდში მცხოვრები როინ დიდმანიძე.

მოქალაქის თქმით, გუშინწინ, 21 ივლისს, ის თევზაობას თავის სოფელში, მდინარე ჭოროხზე აპირებდა, როცა დენმა დაარტყა. ადგილი, სადაც როინ დიდმანიძე თევზაობს, გვერდითაა სატრანსფორმატორო პუნქტთან, რომელიც მდინარით იფარება.

„ბამბუკი გავშალე თუ არა, ძაბვამ დამიჭირა, გამიქნია დენმა შორს და მაგით გადავრჩი, გონება დავკარგე, ბამბუკის ჯოხი დაიწვა… კიდევ კარგი, ბიძაშვილებმა დამინახეს და გადამარჩინეს, ხელები მაქვს დახეთქილი,“ – გვითხრა როინ დიდმანიძემ.

მარადიდი ის სოფელია, სადაც სახლები, ეზოები, თხილის ბაღები, თუ საფლავები წყლით იფარება. მოსახლეობის თქმით, მდინარე ჭოროხი წლების წინ დააგუბეს, როცა ხეობაში „კირნათი ჰესი“ მოეწყო, თუმცა ბოლო 3 თვეა წყლის დონე ისევ იმატებს და აზარალებს იმ ოჯახებსაც, რომლებსაც ჰესის მფლობელი კომპანია „აჭარა ენერჯი 2007“-გან რაიმე სახის კომპენსაცია არ მიუღიათ.

მოსახლეობის თქმით, ჰესის მფლობელი კომპანია სოფელს არ უსრულებს კონკრეტულ დაპირებებს, რაც ეხება, როგორც გზების და მოშლილი ღობეების აღდგენას, ისე სკვერის და სტადიონის მოწყობას მარადიდში.

როინ დიდმანიძე ამბობს, რომ ჰესის მფლობელი კომპანია მოსახლეობას სატრანსფორმატორო პუნქტის უსაფრთხო ადგილზე გადატანასაც დაჰპირდა, მაგრამ არც ეს დაპირება შესრულდა.

როინ დიდმანიძის თქმით, ტრანსფორმატორი მდინარეში დგას. ამ მდინარეში თევზაობისას მას დენმა დაარტყა და შემთხვევით გადარჩა

„ამ სადენებსაც რომ შეუდგა წყალი, გვითხრეს, გამოვყავით ადგილი და გადავიტანთო, მაგრამ არც ეს პირობა შეგვისრულეს. მე სულ ამ ადგილას ვთევზაობდი და ისევ აქ გამოვედი,“ – დასძინა როინ დიდმანიძემ.

„ბათუმელების“ სატელეფონო შეტყობინებას არც ამჯერად უპასუხეს კომპანიაში „აჭარა ენერჯი 2007“.

შინაგან საქმეთა სამინისტროს პრესცენტრის ინფორმაციით კი, გამოძიება დაიწყო სისხლის სამართლის კოდექსის 240-ე პრიმა ერთი მუხლის შესაბამისად, რაც გულისხმობს „ელექტრო, ან თბოენერგიის, გაზის, ნავთობის ან ნავთობპროდუქტების ობიექტის განლაგების, დაპროექტების, მშენებლობის ან ექსპლუატაციის დროს უსაფრთხოების წესების დარღვევას, რასაც მოჰყვა ჯანმრთელობის ნაკლებად მძიმე ან მძიმე დაზიანება ან რამაც მნიშვნელოვანი ზიანი გამოიწვია“.

ეს მუხლი სასჯელის სახით ითვალისწინებს ჯარიმას, ან შინაპატიმრობას ვადით ექვსი თვიდან ორ წლამდე, ანდა თავისუფლების აღკვეთას ვადით ორ წლამდე.

შსს-ს პრესცენტრის ინფორმაციით, ამ საქმეზე გამოძიება დაიწყეს, თუმცა ჯერ ბრალი არავისთვის არ წარუდგენიათ.

რაც შეეხება „ენერგო-პრო ჯორჯიას“, რომელსაც ეს სატრანსფორმატორო პუნქტი ეკუთვნის, აქ გვითხრეს, რომ მოკვლევა დაიწყეს და მის დასრულებამდე ვერაფერს გვეტყვიან. კომპანიაში ასევე აღნიშნეს, რომ ამ სატრანსფორმატორო პუნქტში ისევ არის ძაბვა და ის გამორთული არ არის.

___

ამ თემაზე:

ფინანსთა სამინისტროს შემოსავლების სამსახურის ცნობით, მებაჟე ოფიცრებმა შსს-ს საავიაციო უშიშროების სამმართველოს თანამშრომლებთან ერთად ჩატარებული ღონისძიების შედეგად, ბათუმის აეროპორტში დიდი ოდენობით არადეკლარირებული ოქროსა და ვერცხლის უკანონო გატანის 2 ფაქტი აღკვეთეს.

სამსახურის ცნობით, უცხო ქვეყნის მოქალაქეების ხელბარგის საავიაციო უსაფრთხოების კონტროლის/შემოწმების გავლისას, სამგზავრო ჩანთაში ოქროსა და ვერცხლის ზოდები აღმოაჩინეს.

გამოვლენილი იქნა საერთო ჯამში 133 125,24 ლარის ღირებულების ოქროსა და ვერცხლის ზოდები, ასევე შენადნობის სახით დამზადებული ოქროს ფირფიტები (ოქროს საერთო წონა 560,78 გრამი, ხოლო ვერცხლის 6 230 გრამი). საქმის მასალები, შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა.

„უცხო ქვეყნის მოქალაქეებმა მწვანე დერეფნის გავლით ისე დატოვეს საბაჟო გამშვები პუნქტი – „ბათუმის აეროპორტის“ საბაჟო კონტროლის ზონა, რომ არ მიუმართავთ უფლებამოსილი მებაჟე-ოფიცრისთვის და არ განუხორციელებიათ სავალდებულო დეკლარირება“ – იუწყება შემოსავლების სამსახური.

ივლისის ბოლოს ტრადიციულად იზრდება მოთხოვნა მთის კურორტებზე და სულ უფრო ხშირად ისმის კითხვა – რა თანხად შეიძლება თანამედროვე კოტეჯის თუ უფრო ძველი აშენებული სახლის დაქირავება? – „ბათუმელები“ შეეცადა გაერკვია, რა ღირს დასვენება აჭარასა და გურიაში ყველაზე პოპულარულ საზაფხულო კურორტებზე – გომის მთაზე, ბახმაროსა და ბეშუმში.

ბეშუმი აჭარის ყველაზე პოპულარული მთის კურორტია. აქ ხშირად მიდიან დასასვენებლად ბავშვებით. სეზონი, სხვა კურორტების მსგავსად, პიკს აგვისტოში აღწევს, როცა ბათუმში ჰაერის ტემპერატურა და ჰაერის ტენიანობა იზრდება.

ბეშუმში ამბობენ, რომ სწორედ აგვისტოში ელოდებიან დამსვენებლების რაოდენობის გაზრდას.

რაც შეეხება ფასებს ბეშუმში, ისევე, როგორც სხვა კურორტებზე, ეს დამოკიდებულია იმაზე, თუ რამდენად კეთილმოწყობილია კონკრეტული სახლი.

„ახლა არის ხალხი, მაგრამ ძალიან ცოტა. შარშან უფრო მეტი იყო, წელს არ არის. შესაძლოა ამინდის გამოც. ცუდი ამინდები იყო აქამდე. კოტეჯი ერთი ღამით 50 – 60 ლარი ღირს, გააჩნია პირობებს”, – გვითხრა ერთ-ერთი კოტეჯის მფლობელმა.

ფეისბუქჯგუფებში ბეშუმში დასვენების ფასებს თუ გადავხედავთ, ვნახავთ, რომ კეთილმოწყობილი კოტეჯების ფასი დღეში 100-160 ლარი და მეტიც შეიძლება იყოს. ჩვეულებრივ, ასეთ კოტეჯებში 4-6 ადამიანის განთავსებაა შესაძლებელი, სახლები აღჭურვილია აუცილებელი ტექნიკით, არის სველი წერტილები.

სხვა ფასებია, თუ ნაკლებად კეთილმოწყობილი სახლის დაქირავებაზეც ხართ თანახმა.

მაგალითად, შედარებით ძველი ხის სახლი, რომელშიც 3 ოთახია და 6 ადამიანის განთავსებაა შესაძლებელი, აგვისტოში დღეში 50 ლარადაც შეგიძლიათ დაიქირაოთ, მაგრამ ასეთ სახლებში ძირითადად არ არის შეყვანილი წყალი და მისი ამოტანა სახლში ეზოდან მოგიწევთ.

„ბათუმელები“ ესაუბრა კურორტ „ბეშუმის“ დირექტორს, ემზარ ბოლქვაძეს. მან გვითხრა, რომ ივლისის ბოლო დღეებში ბეშუმში უკვე მოიმატა დამსვენებლების რაოდენობამ და კიდევ ელიან ზრდას.

ემზარ ბოლქვაძე ამბობს, რომ ბეშუმს 24-საათის განმავლობაში მიეწოდება წყალი და ელექტროენერგია. მისი თქმით, მოკლე დროით შუქი ქრება მხოლოდ მაშინ, როცა „ენერგო-პრო“ სამუშაოებს აწარმოებს.

კურორტის დირექტორმა გვითხრა, რომ წელს ბეშუმს 4 უბანი შემოემატა, ეს აქამდე არსებული უბნებია, რომელიც მუნიციპალიტეტის გადაწყვეტილებით კურორტს შემოუერთდა.

ბეშუმში 1, 2 და 3 აგვისტოს გასართობ ღონისძიებასაც გეგმავენ, ცენტრში ტერიტორია ტენტით გადაიხურება და აქ ბათუმიდან ბენდს ელოდებიან, ხოლო 4 აგვისტოს, შუამთობაზე, ტრადიციული დოღი და სხვა სპორტული ღონისძიებები იგეგმება.

დამსვენებლების რაოდენობის ზრდას აგვისტოში ელიან გომის მთაზეც. კეთილმოწყობილი კოტეჯების ფასები აქ ოდნავ უფრო მაღალია.

„ბათუმელები“ გომის მთაზე რამდენიმე კოტეჯის მფლობელს დაუკავშირდა. საშუალო ფასი ერთ ადამიანზე 30-35 ლარია. ასეთ კოტეჯებში არის წყალი, ელექტროენერგია და საშუალოდ 10-14 ადამიანის განთავსებაა შესაძლებელი.

„რვა კაცს იტევს სულ ჩემი სახლი, ორი ოთახია. მისაღებში მაქვს გასაშლელი დივანიც. სახლს აქვს აივანიც. ცხელი წყალი, გაზი, დენი, სველი წერტილი – ეს ყველაფერი მაქვს, როგორც გომის მთას შეეფერება ისეთ მდგომარეობაში. ყველაფერი სუფთა და ლამაზია. ერთი საწოლი, ანუ ერთი ადამიანის დარჩენა 30 ლარი ღირს.

აგვისტოს თვის იმედი გვაქვს და გვგონია, რომ აგვისტოში უფრო იქნება ხალხი, რადგან ახლა ნაკლებადაა. ახლა გზაც მოწესრიგდა ჩვენთან, მაგრამ რატომღაც ხალხის ნაკადი ნაკლებია. კოტეჯების მფლობელებიც ნაკლებად არიან წელს ამოსულები. აგვისტოში თუ ამოვლენ და გახსნიან დაკეტილ კოტეჯებს, არ ვიცი”, – გვეუბნება ერთ-ერთი გამქირავებელი გომის მთაზე და დასძენს, რომ აქ კოტეჯების ფასი მზარდია.

მისი თქმით, ძირითადად დამსვენებელი  ჰყავთ თბილისიდან და ქუთაისიდან. არიან უკრაინელები, რუსები და ასევე, თბილისში მცხოვრები სტუდენტები ევროპის სხვადასხვა ქვეყნიდან.

დამსვენებლების სიმცირეს უჩივიან ჯერ ბახმაროშიც.

აქ გვითხრეს, რომ დამსვენებლების რიცხვის გაზრდას აგვისტოსთვის ელოდებიან.

„კარგი ამინდებია, ძირითადად ამ თვის 20-ს შემდეგ ველოდებით ხალხს. აგვისტოშია მთავარი სეზონი.

მე მაქვს კოტეჯი, ორსართულიანი, 6 ადამიანს შეუძლია მოთავსება. გვაქვს აივანი, აღჭურვილია ყველანაირი ტექნიკით, ჭურჭლით და მთლიანი კოტეჯის ერთი დღის ფასი 250 ლარია”, – გვითხრა ერთ-ერთი კოტეჯის მფლობელმა ბახმაროში. მისი თქმით, კოტეჯების ფასი აქ ძირითადად დღეში 200-დან 250 ლარამდე [დღეში] მერყეობს, თუმცა შეიძლება უფრო იაფად დაქირავებაც.

ბახმაროში ბევრია ძველი სახლი, რომელშიც არ არის სველი წერტილები და ნაკლებად კეთილმოწყობილია. ასეთი სახლები გაცილებით იაფია და 20-25 დღით დაქირავება აგვისტოში საშუალოდ 500-600 ლარი ღირს, ფასი მოლაპარაკების საგანია.

ბახმაროში სეზონი პიკს 19 აგვისტოს აღწევს, როცა კურორტზე, ტრადიციულად, დოღი იმართება. ამის შემდეგ ბახმაროში დამსვენებლების რაოდენობა იკლებს, თუმცა ბოლო წლებში ტენდენცია იცვლება, ბახმაროში დამსვენებლებს სექტემბერშიც შეხვდებით.

________________

სტატიაზე მუშაობდნენ: ნინო ართმელაძე, ნანა კვაჭაძე 

მიხეილ სარჯველაძე უკვე წლებია გერმანიაში ცხოვრობს ოჯახთან ერთად. ის გერმანიის პარლამენტის ერთ-ერთი დეპუტატის მრჩევლია საგარეო და უსაფრთხოების პოლიტიკის საკითხებში. მიხეილის თქმით, მისთვის მტკივნეულია, რაც დღეს ხდება საქართველოში, როცა „ოცნების“ მმართველობის პირობებში მისი სამშობლო შორდება დასავლურ ალიანსებს და ცდილობს გახდეს ავტორიტარული სახელმწიფოების კლუბის წევრი“.

„არამხოლოდ უკრაინის ან მოლდოვას, არამედ სომხეთის და აზერბაიჯანისგან განსხვავებითაც კი, გამქრალია საქართველო პოლიტიკური დღის წესრიგიდან. ამას მიზანმიმართული სტრატეგიის ნაწილად მივიჩნევ“, – დასძენს ექსპერტი „ბათუმელებთან“ და იქვე ამატებს, რომ ინტერვიუ გამოხატავს მხოლოდ პირად მოსაზრებებს.

• მიხეილ, მოკლედ რომ მოგვივეთ, ვინ ხარ და რას აკეთებ ბერლინში?

პროფესიით ვარ გერმანისტი, ისტორიკოსი და პოლიტოლოგი. დავიბადე და სკოლა დავასრულე ლანჩხუთის მუნციპალიტეტის სოფელ ლესაში. სხვადასხვა დროს ვსწავლობდი თბილისის ჯავახიშვილის უნივერსიტეტში, გისენის, იენის და კიოლნის უნივერსიტეტებში. კიოლნის უნივერსიტეტში დისერტაციის დასრულების შემდეგ სხვადასხვა დროს ვმუშაობდი რეფერენტის პოზიციაზე ბერლინში საქართველოს საელჩოში და ვიყავი მიწვეული მკვლევარი უსაფრთხოების და საგარეო პოლიტიკის გერმანულ ინსტიტუტში (SWP). ამჟამად ვმუშაობ გერმანიის პარლამენტში,  ქრისტიან-დემოკრატიული პარტიის (CDU) ერთ-ერთი წევრის მრჩევლის პოზიციაზე საგარეო და უსაფრთხოების პოლიტიკის საკითხებში.

• თქვენ პირადად, როგორც საქართველოს მოქალაქეს, რა მოგიტანათ ევროპულმა გზამ?

თავის დროზე ჩემი არჩევანი – მესწავლა გერმანიაში განპირობებული იყო იმ ფაქტით, რომ ჩემი პოტენციალის გამოყენების შანსები გერმანიაში ბევრად მაღალი იყო. ეს არ ყოფილა მარტივი გზა, რადგან გერმანიაში მეორედ, როგორც სხვა ბევრი ქართველი ახალგაზრდა au-pair-ის პროგრამით ჩამოვედი, რაც გერმანულ ოჯახში ცხოვრებას და მუშაობას გულისხმობდა.

ეს გამოცდილება დამეხმარა ვყოფილიყავი მიზანდასახული, ბრძოლისუნარიანი და შედეგზე ორიენტირებული. შეიცვალა ჩემი, როგორც მოქალაქის დამოკიდებულება სახელმწიფოსთან, პოლიტიკასა თუ საზოგადოებასთან მიმართებაში. გავხდი უფრო კრიტიკული, აქტიური და სოლიდარული მოქალაქე. უფრო მეტად დავაფასე სამართლებრივი თუ სოციალური სახელმწიფოს მნიშვნელობა.

• ზოგადად რაში სჭირდება საქართველოს ევროკავშირი?

ევროკავშირი და ნატო საქართველოს ირგვლივ არსებული გეოპოლიტიკური მდგომარეობის გათვალისწინებით, ამჟამად ერთადერთი ალტერნატივაა ქვეყნის გადარჩენისა და განვითარებისთვის. იმ სისტემური კონფლიქტის პირობებში, როცა ერთ მხარეს ლიბერალური დემოკრატია და მეორე მხარეს ტოტალიტარული ავტოკრატია დგას, მე პირველის სასარგებლოდ ვაკეთებ არჩევანს, რადგან არ მსურს ჩემმა ქვეყანამ თუ მე დავკარგოთ თავისუფლება.

რუსული პროპაგანდა და თავის მოტყუებაა, რომ საქართველოს მისი შეზღუდული რესურსების და გეოგრაფიული მდებარეობის პირობებში შეუძლია იყოს ნეიტრალური სახელმწიფო.

ევროკავშირი ჩემთვის ნიშნავს, პირველ რიგში, საერთო ღირებულებებზე დამყარებულ გაერთიანებას, საკუთარი იდენტობის შენარჩუნებისთვის უსაფრთხო სივრცეს, ცხოვრების ღირსეულ პირობებს ნებისმიერ ასაკში, ღირსეულ საშუალო და მინიმალურ ანაზღაურებას, სოციალურ უზრუნველყოფას, ხელმისაწვდომ და მაღალი ხარისხის ჯანდაცვას, თანაბარ წვდომას მაღალი ხარისხის განათლებაზე და ა.შ. რა თქმა უნდა, არც ევროკავშირია იდეალური სივრცე და მათ შორის გერმანიაშიც, მისი ეკონომიკური სიძლიერის მიუხედავად, ბევრი სოციალური პრობლემა არსებობს, მაგრამ ეს ყველაფერი შედარებითია.

• აქედან როგორც აღიქვამთ საქართველოში მიმდინარე პროცესებს?

ძალიან მტკივნეულად აღვიქვამ, რადგან ვხედავ, რომ ქვეყანა „ქართული ოცნების“ მმართველობის პირობებში შორდება დასავლურ ალიანსებს და ცდილობს გახდეს ავტორიტარული სახელმწიფოების კლუბის წევრი.

უკრაინის წინააღმდეგ ომმა საქართველოსთვის შექმნა უნიკალური შესაძლებლობების ფანჯარა, რომელსაც მმართველი გუნდი არათუ იყენებს, პირიქით მიზანმიმართულად ახდენს ქვეყნის ნატოში და ევროკავშირში ინტეგრაციის საბოტაჟს.

დაუშვებელია ქვეყნის საგარეო პოლიტიკური ინტერესები, რომლებიც კონსტიტუციაშია გაწერილი, ერთი ადამიანის ან ადამიანთა ვიწრო ჯგუფის მძევალი იყოს. ხელისუფლება ორიენტირებული უნდა იყოს საზოგადოების ნების აღსრულებაზე და არა ბიძინა ივანიშვილის კერძო ინტერესებზე.

შესაბამისად, მომავალი საპარლამენტო არჩევნები განსაზღვრავს, თუ რომელი მიმართულებით გააგრძელებს ჩვენი ქვეყანა სვლას. სამწუხაროდ, არც ქართული ოპოზიცია იძლევა ოპტიმიზმის საფუძველს. არჩევნებამდე მცირე დრო დარჩა და განსაკუთრებული ისტორიული მომენტის მიუხედავად, ოპოზიცია ჯერ კიდევ ვერ ახერხებს საზოგადოებისთვის კონცეფციის შეთავაზებას, თუ როგორ აპირებს „ქართული ოცნების“ დამარცხებას და გამარჯვების შემთხვევაში ქვეყნის მართვას.

ყველასთვის ცხადი უნდა იყოს, რომ „ქართული ოცნების“ გამარჯვების შემთხვევაში მივიღებთ ავტორიტარულ სახელმწიფოს, რომელსაც მიიტაცებს ადამიანთა ვიწრო ჯგუფი. შესაბამისად, ის არ და ვერ იქნება ორიენტირებული საზოგადოების კეთილდღეობაზე.

• როგორ ხედავს ბერლინი საქართველოში მიმდინარე პროცესებს. განსაკუთრებით მაშინ, როდესაც გერმანიის ელჩმა ასეთი მკაცრი სიტყვებით მოგვამრთა. როგორ იცვლება გერმანია-საქართველოს ურთიერთობები და რა შედეგები შეიძლება მოჰყვეს ამას?

გერმანია კეთილგანწყობილი ქვეყანაა საქართველოსთან მიმართებაში, თუმცა ბერლინი 2008 წლის ნატოს ბუქარესტის სამიტზე საქართველოსთვის გაწევრიანებისთვის საჭირო სამოქმედო გეგმის მინიჭების წინააღმდეგი იყო. ბერლინი არც ევროკავშირის აღმოსავლეთ პარტნიორობის პროგრამას მიიჩნევდა ევროკავშირში გაწევრიანების წინა ეტაპად, თუმცა უკრაინაში მიმდინარე ომმა რადიკალურად შეცვალა გერმანიის პოზიცია.

„აგენტების კანონის“ მიღებამდე აქტიურად უჭერდა მხარს საქართველოს ევროკავშირში გაწევრიანებას, რაც გერმანიის საგარეო საქმეთა მინისტრმა საქართველოში ვიზიტის დროს, 2023 წლის მარტში დაადასტურა. „ქართული ოცნების“ მიერ „უცხოური გავლენის გამჭვირვალობის შესახებ“ კანონის მიღებამ და ქვეყნის დასავლური კურსის საბოტაჟმა, ბერლინში სრული გაუგებრობა გამოიწვია, რაც პოზიციის ცვლილებაში გადაიზრდა.

გერმანიის ელჩის მკაცრი განცხადებაც სწორედ შეცვლილი პოზიციის გამოძახილი იყო. საქართველო „ოცნების“ მმართველობის გამო კარგავს ევროკავშირის ერთ-ერთი უმთავრესი ლიდერი სახელმწიფოს – გერმანიის მხარდაჭერას. ეს, სავარაუდოდ, მმართველი გუნდის მიზანია. ამ არგუმენტს ამყარებს საქართველოს უაღრესად პასიური საგარეო პოლიტიკა გერმანიასთან მიმართებაში.

არამხოლოდ უკრაინის ან მოლდოვას, არამედ სომხეთის და აზერბაიჯანისგან განსხვავებითაც კი, გამქრალია საქართველო პოლიტიკური დღის წესრიგიდან. ამას მიზანმიმართული სტრატეგიის ნაწილად მივიჩნევ.

• რა ნაბიჯები უნდა გადაიდგას, რომ აღდგეს ევროკავშირის ერთ-ერთი ყველაზე დიდი ქვეყანასთან – გერმანიასთან მეგობრული ურთიერთობები.

„ქართული ოცნების“ მმართველობის პირობებში შეუძლებელ ამოცანად მიმაჩნია, ქართულ-გერმანული ურთიერთობების გაძლიერება პოლიტიკურ ნაწილში. დამოუკიდებლობისადმი მიძღვნილ საზეიმო მიღებას ბერლინში, რომელიც საქართველოს მოქალაქეების პროტესტის პირობებში მოეწყო, ფაქტობრივად ბოიკოტი გამოუცხადეს გერმანელმა პოლიტიკოსებმა. ზოგადად კი, შემოდგომაზე არჩევნების შემდეგ, აუცილებელი იქნება იმ ზიანის აღდგენა, რაც საქართველოს მმართველმა გუნდმა მიაყენა ქართულ-გერმანულ ურთიერთობებს.

ვფიქრობ, საჭიროა გერმანიასთან ორმხრივი სტრატეგიული დიალოგის დაწყება, რომელიც ფოკუსირებული იქნება თანამშრომლობაზე საგარეო და უსაფრთხოების პოლიტიკის საკითხებში.

საჭიროა ჩამოყალიბდეს ქმედუნარიანი პლატფორმა გერმანიის პარლამენტში, რომელიც აქტიური გერმანელი პარლამენტარების ჩართულობით ინტენსიურ რეჟიმში გამართავს ბუნდესტაგში საქართველოსთვის საჭირბოროტო საკითხებზე შეხვედრებს.

ასევე აუცილებელია პლატფორმის ჩამოყალიბება, რომელიც საქართველოს საშუალებას მისცემს მოახდინოს გერმანული ანალიტიკური ინსტიტუტების ინფორმირება რუსული ოკუპაციაზე, ქვეყნის საგარეო პოლიტიკურ პრიორიტეტებზე, ეკონომიკურ პოტენციალსა თუ სხვა გამოწვევებზე.

• აპირებთ ოქტომბრის არჩევნებში მონაწილეობის მიღებას და საერთოდ როგორი მოლოდინები გაქვთ ამ არჩევნებზე?

რა თქმა უნდა, ვაპირებ საპარლამენტო არჩევნებში მონაწილეობის მიღებას, რადგან ჩემთვის აუცილებელია გამოვიყენო ხმის მიცემის უფლება. ამ გადამწყვეტ მომენტში, მოვუწოდებ გერმანიაში და სხვა ქვეყნებში მცხოვრებ ქართველებს, დადგნენ საკონსული აღრიცხვაზე და აუცილებლად დააფიქსირონ საკუთარი პოზიცია.

„ქართული ოცნება“ ყველა გზას მიმართავს ძალაუფლების შენარჩუნების მიზნით და ამ უთანასწორო კონკურენციის პირობებში ოპოზიციური პარტიების სამოქმედო არეალი არჩევნების მოახლოვებასთან ერთად კიდევ უფრო შეიზღუდება. შესაბამისად, ორმაგად მნიშვნელოვანია, რომ ოპოზიციურმა სპექტრმა ამომრჩეველს შემოგვთავაზოს არა ეგოისტური და ცალკეულ ლიდერებზე მორგებული გეგმები, არამედ საზოგადოებრივი ინტერესების გათვალისწინებით შედგენილი მოკლე და გრძელვადიანი სტრატეგიები, არჩევნებში გამარჯვებასთან და გამარჯვების შემდგომ პერიოდთან დაკავშირებით.

თუ ოპოზიცია ვერ შეძლებს გახდეს უფრო დამაჯერებელი და პრაგმატული, „ქართულ ოცნებას“ მხოლოდ გაუადვილდება გამარჯვება და ქვეყანაში ავტორიტარული ტიპის მმართველობის გამყარება.

• რას ეტყოდით სტუდენტებს ქვეყანაში მიმდინარე პროცესების ფონზე?

ევროპაში უსაფრთხოების ახალი არქიტექტურის ჩამოყალიბების პროცესი და საზღვრები დამოკიდებული იქნება შედეგზე, თუ როგორ დასრულდება რუსეთის მიერ უკრაინის წინააღმდეგ მიმდინარე ომი. „ქართული ოცნების“ მმართველობის პირობებში ჩვენ არამხოლოდ აღმოვჩნდებით ისტორიის არასწორ მხარეს, არამედ მივიღებთ ქვეყანას, რომელშიც შეიზღუდება ჩვენი თავისუფლება, რადგან სახელმწიფოს მიტაცების ხარისხი ადამიანთა ვიწრო ჯგუფის მიერ კიდევ უფრო გაიზრდება.

ამ ეტაპზე გადამწყვეტია, რომ ჩვენ, როგორც მოქალაქეებმა, კანონის ფარგლებში, არ დავუშვათ საქართველოს გადაიქცევა ავტორიტარულ სახელმწიფოდ.

• და ბოლოს, რითია აქაური გარემო საქართველოს გარემოსგან განსხვავებული, სტუდენტების ან თუნდაც იმ ადამიანებისთვის ვინც აქ მუშაობენ?

განსხვავება პირველად 2006 წელს ვიგრძენი, როცა გერმანიის აკადემიური გაცვლითი სამსახურის (DAAD) სტიპენდიით ვეწვიე დუისბურგ-ესენის უნივერსიტეტს. უპირველეს ყოვლისა, თვალში მომხვდა სტუდენტებზე მორგებული ინფრასტრუქტურა და დამოკიდებულება პროფესორებს და სტუდენტებს შორის.

ოდნავ მოგვიანებით, როცა კონრად ადენაუერის ფონდის სტიპენდიის ფარგლებში საქართველოსთან მიმართებაში გერმანიის საგარეო პოლიტიკაზე ვწერდი დისერტაციას, გავაცნობიერე, რომ გერმანიაში ყოფნის მიუხედავად, აუცილებელია უფრო აქტიურად დავეხმარო საქართველოს. 2015 წელს გავხდი საქართველოს ახალგაზრდა ელჩი გერმანიაში და აქტიურ ქართველ სტუდენტებთან ერთად ბევრი კარგი პროექტი განვახორციელე სხვადასხვა გერმანულ უნივერსიტეტში საქართველოს პოპულარობის გაზრდის მიზნით.

ზოგადად კი, გერმანულ უნივერსიტეტებში სწავლის პროცესმა დამანახა, თუ რამდენად მნიშვნელოვანია პიროვნული განვითარებისთვის დისკუსიის კულტურა, საკუთარი პოზიციის გამოხატვა და ზოგადად კრიტიკული აზროვნება.

ჩემ თაობას, რომელიც ტოტალიტარულ იმპერიაში დაიბადა და დამოუკიდებელ, მაგრამ რთულ მდგომარეობაში მყოფ ქვეყანაში გაიზარდა, ალბათ მაინც მოგვწვდა ტოტალიტარიზმის კლანჭები.

გერმანია სოციალური სახელმწიფოა და ძირითადად მაინც ადამიანზეა მორგებული, მაშინ როცა საქართველოში მხოლოდ ადამიანთა ვიწრო ჯგუფს აქვს წვდომა არსებულ რესურსებზე, მაღალი ხარისხის განათლებაზე თუ სხვა სიკეთეებზე.

შესაბამისად, გერმანიისგან განსხვავებით ქართველ ახალგაზრდებს, როგორც წესი, არათანაბარი შანსების პირობებში უწევთ ბრძოლა საკუთარი მომავლისთვის.

სამუშაო გარემოს რაც შეეხება, დაცულია დასაქმებულების უფლებები. მაგალითად, სამსახურში მიღებული დაზიანების შემთხვევაში, დაუშვებელია დასაქმებულის დაჩაგვრა დამქირავებლის  მიერ, ან ჩვეულებრივი მოვლენაა მამების მიერ ანაზღაურებადი დეკრეტული შვებულებით სარგებლობა.

ხვალ, 24 ივლისს, ბათუმის სტადიონზე „დინამო ბათუმი“ კონფერენს ლიგის მეორე საკვალიფიკაციო ეტაპზე მონტენეგოს „დეჩიჩს“ შეხვდება.

განმეორებითი შეხვედრა 30 ივლისს, მონტენეგროში შედგება. გამარჯვებული კი ორი მატჩის ჯამის შედეგად გამოვლინდება.

თამაში ბათუმში საღამოს, 21:00 საათზე დაიწყება.

„დეჩიჩი“ მონტენეგროში მდებარე პატარა ქალაქის, ტუზის გუნდია. ტუზში ბოლო აღწერით 13 000 -მდე ადამიანი ცხოვრობს. საფეხბურთო კლუბი „დეჩიჩი“ 1926 წელსაა დაფუძნებული. გუნდი „ტუსკოს“ სტადიონზე თამაშობს, რომელიც 2000-მდე მაყურებელს იტევს. მიუხედავად იმისა, რომ გუნდი 98 წლისაა, ქვეყნის ჩემპიონი პირველად, გასულ წელს გახდა. ევროტურნირების საკვალიფიკაციო ეტაპზე „დინამოს“ მსგავსად, ჩემპიონთა ლიგის პირველ საკვალიფიკაციო ეტაპზე ჩაერთო, სადაც უელსურ გუნდთან „ტნს“-თან დამარცხდა და შემდეგ გადაერთო კონფერენს ლიგის მეორე ეტაპზე.

უეფას კონფერენს ლიგის მესამე საკვალიფიკაციო ეტაპის წილისყრა უკვე გაიმართა და ცნობილია რომ „დინამო ბათუმსა“ და ტუზის „დეჩიჩს“ შორის გამარჯვებულის მეტოქე ფინეთის ჩემპიონი, „ჰიკ-ი“ იქნება.

კონფერენს ლიგის მესამე საკვალიფიკაციო ეტაპის მატჩები 8 და 15 აგვისტოს გაიმართება.

ბათუმის სახელმწიფო უნივერსიტეტის რექტორის მოვალეობას მერაბ ხალვაში შეასრულებს. ის აქამდე ბსუ-ს მოქმედი რექტორი იყო.

უნივერსიტეტის რექტორობისთვის გამოცხადებულ კონკურსში მონაწილეობა არავინ მიიღო. ბსუ-ში მერაბ ხალვაშის გარდა არც მოვალეობის შემსრულებლის მსურველი გამოჩნდა. მერაბ ხალვაშს ამ ეტაპზე რექტორის კონკურსში მონაწილეობის უფლება აღარ ჰქონდა, რადგან ის უკვე ორი ვადით იყო რექტორი.

„ბათუმელებს“ უნივერსიტეტში უთხრეს, რომ „ოცნების“ ხელისუფლებას ამ პოზიციაზე ისევ მერაბ ხალვაშის დატოვება სურდა, განსაკუთრებით წინასაარჩევნო პერიოდში, ხელისუფლების მხარდაჭერის გარეშე კი, აკადემიური საბჭო, რომელიც დამოუკიდებლად და უნივერსიტეტის ავტონომიურობის პრინციპის გათვალისწინებით უნდა იღებდეს გადაწყვეტილებას, ვერ იმოქმედებს.

„აკადემიური საბჭოს ათივე წევრმა მხარი დაუჭირა პროფესორ მერაბ ხალვაშის კანდიდატურას.

კენჭისყრის დაწყებამდე კანდიდატმა მერაბ ხალვაშმა უმაღლესი საგანმანათლებლო დაწესებულების მართვის ორგანოს წევრებს მოკლევადიანი [ექვსთვიანი] სამოქმედო გეგმა გააცნო.

ბსუ-ს რექტორის არჩევნები 19 ივლისს იყო ჩანიშნული. რადგან რექტორობის მსურველი არ დარეგისტრდა, ამიტომ აკადემიურმა საბჭომ დროებით მოვალეობის შემსრულებელი აირჩია 6 თვის ვადით,“ – ვკითხულობთ ბათუმის სახელმწიფო უნივერსიტეტის მიერ გავრცელებულ განცხადებაში.

6 თვის შემდეგ ბათუმის შოთა რუსთაველის სახელმწიფო უნივერსიტეტში რექტორის არჩევნები ხელახლა გამოცხადდება.

ამ თემაზე:

„ტრამპი თუ გაიმარჯვებს, უკრაინაში ომი უფრო მალე დასრულდება და შესაბამისად უფრო მალე დამშვიდდება ჩვენი რეგიონი,“ – განაცხადა ირაკლი კობახიძემ ხაშურში, იუსტიციის სახლის გახსნის შემდეგ ჟურნალისტებთან საუბრისას.

საქართველოს პრემიერ-მინისტრის თქმით, ის „რა თქმა უნდა ვერავის არჩევნებში ვერ ჩაერევა, მაგრამ ტრამპის გამარჯვება რეგიონში დამოკიდებულებებს შეცვლის“.

„[ტრამპის გამარჯვება] შეცვლის დამოკიდებულებას კონკრეტულად საქართველოს მიმართაც. თუ იქნება მშვიდობა რეგიონში, საქართველოს მიმართ დამოკიდებულებაც შეიცვლება. ამიტომ ეს არის ერთადერთი, რაც შეიძლება ითქვას ამასთან დაკავშირებით. დანარჩენი არის ამერიკელი ხალხის არჩევანი. ამერიკელმა ხალხმა უნდა გადაწყვიტოს, ვინ იქნება ამერიკელი ხალხის პრეზიდენტი,“ – თქვა ირაკლი კობახიძემ.

კობახიძის თქმით, არჩევნებში ტრამპის გამარჯვების შემთხვევაში, „იქნება მეტი სამართლიანობა საქართველოს მიმართ“.

ირაკლი კობახიძემ გააკრიტიკა ოპოზიციაც.

„ოპოზიცია არამხოლოდ აკრიტიკებდა ტრამპს, გახსოვთ როგორი უხეში, შეურაცხმყოფელი ტერმინებით მოიხსენიებდნენ ამერიკის ყოფილ პრეზიდენტს. დღეს მათი რიტორიკა შეიცვალა იმის გამო, რომ მათი გათვლებით ტრამპი დიდი ალბათობით იგებს არჩევნებს. თუმცა ვერავინ ვერ დაივიწყებს იმ უხეშ რიტორიკას, რომელსაც ისინი იყენებდნენ წლების განმავლობაში,“ – თქვა პრემიერ-მინისტრმა.