აპელაციის საბჭო არ იზიარებს ავტორიზაციის საბჭოს გადაწყვეტილებას უნივერსიტეტისთვის პირობითი ავტორიზაციის მინიჭების თაობაზე.
ახლა ავტორიზაციის საბჭო ვალდებულია ხელახლა განიხილოს ილიაუნის ავტორიზაციის საკითხი.
შეგახსენებთ, რომ მიმდინარე წლის ოქტომბერში ილიას სახელმწიფო უნივერსიტეტს ავტორიზაციის საბჭომ პირობითი ავტორიზაცია მიანიჭა, ერთი წლის თავზე მონიტორინგის პირობით. მიუხედავად იმისა, რომ ავტორიზაციის ექსპერტთა ჯგუფმა – როგორც ადგილობრივმა, ასევე უცხოელმა ექსპერტებმა ყველა სტანდარტში უმაღლესი შეფასება მისცეს.
უნივერსიტეტის რექტორი, ნინო დობორჯგინიძე ამბობდა, რომ იყო გაოგნებულები და გაბრაზებული ავტორიზაციის საბჭოს გადაწყვეტილებით, რადგან ილიაუნის უმაღლესი შეფასებები აქვს ყველა სტანდარტში. ავტორიზაციის საბჭოს გადაწყვეტილება კი არ ეფუძნება დოკუმენტაციას და მთელ რიგ შეფასებებს, რაც მათ ხელთ ჰქონდათ.
ამის მიუხედავად, ავტორიზაციის საბჭომ მაინც პირობითი ავტორიზაცია მიანიჭა ილიაუნის ერთ წელიწადში მონიტორინგის პირობით.
საბჭო ამბობდა, რომ მათ გარკვეულ სტანდარტებში შეფასების კრიტერიუმები შეცვალეს, რის შესახებაც არ უცნობებიათ უნივერსიტეტისთვის. „ეს არის სწორედ ყველაზე დიდი დარღვევა“, – ამბობს ნინო დობორჯგინიძე „ბათუმელებთან“.
განათლების სპეციალისტები მიიჩნევდნენ, რომ ილიაუნისთვის პირობითი აკრედიტაციის მინიჭება პოლიტიკური გადაწყვეტილებაა, რადგან ილიაუნის რექტორი ერთ-ერთი პირველი იყო, რომელმაც ღია განცხადებები გააკეთა რუსული კანონის წინააღმდეგ, ასევე აქტიურად მონაწილეობდა ანტირუსულ აქციებში.
„ქართული ოცნების“ პროპაგანდისტებმა კი ნინო დობორჯგინიძის წინააღმდეგ კამპანია ააგორეს, რითაც მის პიროვნული დისკრედიტაცია სცადეს. კამპანიას მეცნიერები გამოეხმაურნენ და რექტორს სოლიდარობა გამოუცხადეს. „ეს ჰგავს საბჭოთა რეპრესიულ მეთოდებს“ – აცხადებდნენ პროფესორები.
