რუსეთის სახელმწიფო დუმის დეპუტატებმა მეორე და მესამე მოსმენით მიიღეს კანონპროექტი, რაც რუსეთის ხელისუფლებას საშუალებას მისცემს ადმინისტრაციული წესით დასაჯოს ის პირები, რომლებმაც ქვეყანა უკვე დატოვეს, მაგრამ „რუსეთის ფედერაციის ინტერესების“ საწინააღმდეგო ქმედებაში არიან „ეჭვმიტანილები“.
ამის შესახებ რუსული დევნილი მედია წერს.
მედიის თანახმად, ერთ-ერთი მუხლი იმ ადამიანების დასჯას ითვალისწინებს, ვინც „ხელისუფლებისა და საზოგადოების უპატივცემულობა“ გამოხატა. კიდევ ერთი მუხლის საფუძველზე ქონებას დაუყადაღებენ იმ ადამიანებს, „ვინც წააქეზებს სიძულვილს, სანქციების შემოღებისკენ მოუწოდებს“ ან „არმიის დისკრედიტაციას“ მოახდენს.
ქონებას დაუყადაღებენ მათაც, ვისაც „ყალბი ინფორმაციის“ გავრცელებას და მედიის თავისუფლების ბოროტად გამოყენებაში წაუყენებენ ბრალს“.
ჩამონათვალი ამით არ სრულდება და ძალიან ბევრ „დანაშაულს“ ეხება.
კანონის თანახმად, თუ დანაშაული ჩადენილია საზღვარგარეთ, მაგრამ ზემოთ ჩამოთვლილი მუხლების ჩამონათვალში ხვდება, ეს წარმოადგენს საქმის წარმოების დაწყების ოფიციალურ საფუძველს.
26 მაისიდან თბილისსა და ბაქოს შორის სამგზავრო მატარებელმა მიმოსვლა განაახლა.
„საქართველოს რკინიგზაში“ აცხადებენ, რომ ფასები დინამიურია და მხოლოდ ერთი მიმართულებით 135 ლარიდან 370 ლარამდე მერყეობს.
„ბილეთის ფასის კონკრეტული ოდენობა ფიქსირდება შეძენის მომენტში. ბილეთები იყიდება სალაროებში, სადაც ემატება საკომისიო 7 ლარი. ბილეთების შეძენა შესაძლებელი იქნება ასევე ონლაინ [tkt.ge-ზე].“ – გვითხრეს „საქართველოს რკინიგზაში“.
„საქართველოს რკინიგზის“ ინფორმაციით, რეისები სრულდება ყოველდღიურად. თბილისიდან მატარებელი გადის 21:00 საათზე და ბაქოში ჩადის 06:25 საათზე; ბაქოდან კი მატარებელი გამოდის 23:10 საათზე და თბილისში ჩამოდის 08:40 საათზე.
აზერბაიჯანის რკინიგზის განცხადების თანახმად, ბაქო-თბილისი-ბაქოს მარშრუტზე აზერბაიჯანში გაჩერებები დაგეგმილია ბაქოს რკინიგზის სადგურზე, ბილაჯარიში, ევლახში, განჯაში, აღსტაფასა და ბოიუკ კესიკის სადგურებზე, ხოლო საქართველოში ორი გაჩერებაა – გარდაბნის სადგური და თბილისის რკინიგზის სადგური.
თბილისსა და ბაქოს შორის სარკინიგზო მიმოსვლის აღდგენის შესახებ ინფორმაცია ქართულმა მხარემ 18 მაისს გაავრცელა.
საქართველოსა და აზერბაიჯანს შორის სარკინიგზო მიმოსვლა, ჯერ კიდევ 2025 წლის მაისში უნდა აღდგენილიყო ოფიციალური შეთანხმებით. აზერბაიჯანს კოვიდპანდემიის გავრცელების საბაბით სახმელეთო საზღვრები 2020 წლის შემდეგ ჩაკეტილი აქვს.
„პროპაგანდას არ აქვს მორალი, ამიტომ ჩვენი ანტიდოტი არის სიმართლე. ჩვენ მოვყვეთ ნამდვილი ამბავი, ისენი მოყვებიან ტყუილებს. მერე ვნახოთ, რომელს ექნება უფრო დიდი ძალა. ისტორიულად, უფრო მეტი ძალა ყოველთვის აქვს სიმართლეს“- ამბობს მწერალი და დრამატურგი ლაშა ბუღაძე „ბათუმელებთან“.
დღეს, 26 მაისს, „ქართული ოცნების“ პროპაგანდისტულმა მედიამ, საქართველოს თავისუფლებისთვის მებრძოლი გმირები – მერაბ კოსტავა და ზვიად გამსახურდია, ბიძინა ივანიშვილთან ერთად გამოსახა 26 მაისის ქარდზე.
რა მიზანი აქვს „ოცნებას“, როცა საბჭოთა იმპერიის წინააღმდეგ მებრძოლ ადამიანებს ივანიშვილთან ერთად გამოსახავს ფოტოზე? – ამ თემაზე ესაუბრა „ბათუმელები“ ლაშა ბუღაძეს.
„აქ ისტორიაზე არ არის ლაპარაკი, ეს არის პროპაგანდა და მე ვფიქრობ, რომ არ არის სწორი არც ამ ქარდზე აქცენტის გაკეთება და მითუმეტეს, ამ ქარდის გადმოტანა სოციალურ ქსელებში, რადგან მათი მიზანი ეს არის. ადამიანები ხშირად აზრს არ ატანენ ხოლმე ამას, თუმცა შემდეგ, ეს როგორც ვიზუალური ხატი იბეჭდება მათ მეხსიერებაში და მიუხედავად იმისა, ჩვენ როგორ ვაფასებთ ამას, მაინც ხდება ხოლმე ჩვენი აღქმების ნაწილი. მათი მიზანია, რომ ეს ადამიანების თავში ჩაიბეჭდოს“- ამბობს ლაშა ბუღაძე.
მიუხედავად იმისა, რომ ეს ხშირად იწვევს სარკაზმს და, შესაძლოა, ბრაზსაც? – ვკითხეთ მას. ლაშა ბუღაძის შეფასებით, ამას უკვე არანაირი მნიშვნელობა აღარ აქვს პროპაგანდისთვის.
ლაშა ბუღაძე
„პროპაგანდამ შექმნა იმიჯი, ჩვენ კიდევ, ამ წლების განმავლობაში ვეღარ ვისწავლეთ ის, რომ არ უნდა ავყვეთ ამათ პროპაგანდისტულ ხრიკებს. ეს კიდევ ცალკე ღრმა პრობლემაა ჩვენი, რომელზედაც დისკუსიები მართლა საჭიროა.
ერთხელ და სამუდამოდ კარგად უნდა გავიაზროთ, რომ პროპაგანდას არ აქვს არანაირი ინტელექტუალური ამბიცია. ეს არ არის ღრმა მეცნიერება. პროპაგანდა არის ბრტყელი, ზედაპირული და მისი მიზანი არის მარტივი: აი ეს იმიჯი, ეს ხატი, უნდა ჩაიბეჭდოს ადამიანის აზროვნებაში. ეს ჩაბეჭდილი ხატი რაც უფრო გავრცელდება და რაც უფრო მეტად ციტირდება, მით უფრო კმაყოფილი დარჩება პროპაგანდისტი, რომელიც ამ ქარდს ავრცელებს.
რთულია ადამიანებს მოსთხოვო, რომ არ აღშფოთდნენ ამაზე იმიტომ, რომ კრეტინიზმია თავისთავად და ბუნებრივია, დაცინვის, აღშფოთების და დაგმობის სურვილს იწვევს, მაგრამ ეს არ აინტერესებს პროპაგანდას.
პროპაგანდას აინტერესებს ჩვენს მეხსიერებაში ჩარჩეს ეს ხატი. დარწმუნებულები იყავით, რომ ძალიან ბევრი ადამიანისათვის ეს გარკვეული მოდელი ძალიან ჩვეულებრივად იქნება აღქმული. ასეთი ხალხი შეიძლება უმრავლესობა არ არის საქართველოში, მაგრამ საკმარისია იმისათვის, რომ პროპაგანდამ გარკვეულ წრეში ან სოციუმში მიაღწიოს თავის მიზანს.
ზოგადად რომ ვთქვათ, პროპაგანდა ცხადია ცდილობს ისტორიის გაყალბებას. პარლამენტის ფასადზე ვნახეთ ხომ რა არის – 1700 წელი გაქრისტიანებიდან, ეს ბილბორდია და ილია მეორის პორტრეტია გამოფენილი. ერთი დროშაც არ არის ევროკავშირის და უბრალოდ ისტორიული უსამართლობა და უმსგავსობაა, საბჭოთა პროპაგანდის ტრადიციებში, რომ 26 მაისს არ არის ნახსენები საქართველოს პირველი რესპუბლიკა.
26 მაისს ჩვენ ვზეიმობთ 1918 წლის 26 მაისიდან, როცა დამფუძნებელმა კრებამ გამოაცხადა საქართველოს დამოუკიდებლობა.
ვთქვათ, ნოე ჟორდანიას არ ახსენებენ, მაგრამ, როგორ შეიძლება არ ახსენო ზვიად გამსახურდია, მერაბ კოსტავა, რომელიც საერთოდ 26 მაისს არის დაბადებული. 1700 წელია ხსენებული ქრისტიანობის, ხომ?! გასაგებია, რომ ილია მეორე ახლახანს გარდაიცვალა, მაგრამ ქრისტიანობა უკავშირდება წმინდა ნინოსაც, ქალს.
ანუ, აღარც წმინდა ნინო, აღარც პირველი რესპუბლიკა, აღარც ზვიად გამსახურდია… მარტო არის ივანიშვილი და მათი რაღაც სუროგატული ირანიზაცია, სადაც მარტო მღვდლები, თავიანთი პატრიარქი შიო მესამე და „ქართული ოცნებაა“, ეს უნდათ, რომ ჩაებეჭდოთ ადამიანებს გონებაში და ეს ძალიან სახიფათოა.
საჭიროა გარკვეული იმუნიტეტი და უნდა ვიცოდეთ, როგორ უნდა ვრეაგირებდეთ ასეთ პროპაგანდაზე, რომ უნებლიედ არ დავეხმაროთ ამის გავრცელებაში. ბუნებრივია, ამას სჭირდება ისევ და ისევ დაუღალავად საუბარი რეალურ, ნამდვილ ისტორიაზე. აუცილებლად უნდა მოვახერხოთ ის, რომ საზოგადოების ძალიან ფართო წრეებში იყოს მიტანილი ნამდვილი ამბავი, ნამდვილი ისტორია და არა ეს ტყუილი“- ამბობს ლაშა ბუღაძე.
მისი თქმით, ივანიშვილი და „ქართული ოცნება“ არის აგრესიული უმცირესობა, რომელთაც რეპრესიული, პოლიციური მექანიზმებით და ფულით მძევლად ჰყავთ აყვანილი საქართველოს უმრავლესობა.
„ამიტომ, ჩვენ ვილაპარაკოთ ჭეშმარიტ 26 მაისზე, რომელიც დაიბადა 1918 წელს და მისი აღდგენა მოხდა ეროვნული მოძრაობით 80-იან წლებში და რომ არ ყოფილიყო გერმანია, არ იქნებოდა 1918 წლის 26 მაისი.
გერმანია და გერმანიის ელჩი ფიშერი დღეს მტრად ჰყავს გამოცხადებული „ქართულ ოცნებას“. სინამდვილეში გერმანია იყო ჩვენი პირველი ზურგი დამოუკიდებლობის სხვა ქვეყნებთან ერთად.
ასევე, 90-იანი წლებიდან, უბრალოდ შიმშილისგან და სრული კატასტროფისგან გადაარჩინეს საქართველო. ჩვენ ვილაპარაკოთ ნამდვილი ამბავი მერაბ კოსტავაზე, გამსახურდიაზე, ჟორდანიაზე და ამათ იბოდონ რაც უნდათ. ჩვენ ნუ დავეხმარებით მათ ბოდვების გავრცელებაში.
ჩვენ დავდოთ ჩვენი ქარდები და როგორც ლევილში შეინახეს ემიგრანტებმა მთელი 70 წლის განმავლობაში 26 მაისის და დამოუკიდებლობის მეხსიერება საბჭოთა ოკუპაციის პირობებში, ასე შევინახოთ ჩვენც. ყველამ – ჟურნალისტებმა, მწერლებმა, მსახიობებმა, პედაგოგებმა უნდა შევინარჩუნოთ დამოუკიდებლობის იდეა და დავიცვათ ფალსიფიკაციისგან“ – ამბობს ლაშა ბუღაძე.
მისი შეფასებით, პროპაგანდა ცდილობს ქრისტიანობასთან დააკავშიროს ივანიშვილი.
„კობახიძემ კი რუსი გავრილოვი ჩამოიყვანა და ჩასვა პარლამენტის სავარძელში, მაგრამ პროპაგანდას არ აქვს მორალი, ამიტომ ჩვენი ანტიდოტი არის სიმართლე. ჩვენ მოვყვეთ ნამდვილი ამბავი, ესენი მოჰყვებიან ტყუილებს. მერე ვნახოთ, რომელს ექნება უფრო დიდი ძალა. ისტორიულად, უფრო მეტი ძალა ყოველთვის აქვს სიმართლეს“- ამბობს ლაშა ბუღაძე.
„უკრაინელების დარტყმების შედეგად ცენტრალურ რუსეთში განლაგებული ნავთობგადამამუშავებელი ქარხნების და საწარმოების 80% გაჩერებულია,“ – ამბობს გენერალ-მაიორი ვახტანგ კაპანაძე და დასძენს, მსგავსი საწარმოების დიდი ნაწილი ურალს აქეთაა 3 ათასი კილომეტრის ფარგლებში, უკრაინას კი უკვე შეუძლია 2 ათას კილომეტრამდე მანძილზე დაარტყას რუსეთში სამიზნეებსო.
გენერლის დაკვირვებით, რუსებს ფრონტის ხაზზე მნიშვნელოვანი წინსვლა არ აქვთ, თუმცა ამ ტემპით რუსეთს შეუძლია კიდევ რამდენიმე წელი იომოს.
ამასობაში, მისივე თქმით, მძიმე მდგომარეობაში აღმოჩნდა რუსების სამხედრო დაჯგუფება ყირიმში:
„ძალიან დიდი დაჯგუფებაა ყირიმში და მას მნიშვნელოვანი მომარაგება სჭირდება: საწვავი, საბრძოლო მასალები, საკვები და ასე შემდეგ. რუსეთის ხელმძღვანელი პირებს, თუკი ვინმე ჰყავთ იქ, გამოჰყავთ საკუთარი ოჯახები ყირიმიდან… მომარაგება უფრო და უფრო რთულდება. ბოლო მონაცემებით, უკრაინელებმა დაარტყეს ჯანკოის საწვავისა და საბრძოლო მასალის შემნახველ საწყობებს. იქ ახლაც სერიოზული ხანძარია. მუდმივად ხდება მელიტოპოლ-ჯანკოის მაგისტრალზე დარტყმები… ახლა რომ ნახოთ, გზა არის მოფენილი დამწვარი ცისტერნებით და სატვირთო მანქანებით,“ – გვიყვება გადამდგარი გენერალ-მაიორი.
„ბათუმელებმა“ ვახტანგ კაპანაძესთან ინტერვიუ ჩაწერა. ის სამხედრო მეცნიერებათა დოქტორია და საქართველოს გენერალური შტაბის უფროსი ორჯერ იყო. ვახტანგ კაპანაძე საზოგადოებრივი ინიციატივის „ჯერ საქართველოს“ თანადამფუძნებელია.
ბატონო ვახტანგ, რა იცვლება უკრაინის ფრონტის ხაზზე? ახერხებს რუსეთი ე.წ. ზაფხულის კამპანიის წამოწყებას და დონბასზე გასვლას?
რაც დროს გადის, უფრო და უფრო მცირდება რუსეთისთვის ეს შესაძლებლობა.
ფაქტია, რომ დიდი ცვლილებები კვლავ არ არის. სწორედ ამის მიზეზია ის, რომ მიდის ეს უმოწყალო დაბომბვები.
წარმოიდგინეთ, საბოლოოდ ორი წლის ომის შემდეგ დაუქვემდებარეს რუსებმა კონტროლს პოკროვსკი. სამაგიეროდ, პატარ-პატარა სოფლები დაკარგეს. რუსებს ნაბიჯ-ნაბიჯ წინსვლა აქვთ, თუმცა უკვე ანეკდოტის ფაზაში გადავიდა, მაგალითად, „მალა ტოკმაჩკა“ – ერთი ბეწო დასახლებული პუნქტი, რომელსაც რუსები უტევენ 1500-ზე მეტი დღეა. ისტორიას რომ გადავხედოთ, „გიბრალტარის ალყა“ გრძელდებოდა 1320 დღე, „კართაგენის ალყა“ – 1100 დღე, „ლენინგრადის ბლოკადა“ – 872 დღე. ჩვენ ვლაპარაკობთ ერთ სოფელზე, რომელსაც ამდენი დღეა იღებენ…. რომ აღარ ვახსენოთ თვითონ კუპიანსკის აღება – იმდენჯერ ახსენეს უკვე მისი აღება რუსებმა, თავად აღარ სჯერათ.
ასე რომ, რუსეთის საგაზაფხულო კამპანია ისე დასრულდა, არც კი დაწყებულა.
არაფერი განსაკუთრებული არ მომხდარა. მნიშვნელოვანი ცვლილებები, ან მასიური შეტევები რაღაც კონკრეტული მიმართულებით არ ყოფილა. რუსები ისევ ისე მონოტონურად იქცევიან, იგივე ტაქტიკით, იგივე ხორცის საკეპი მანქანით გრძელდება რუსების მოქმედებები. აბსოლუტურად არაფერი არ შეცვლილა. ვერ ვიტყვით, რომ შეტევები არ არის, მაგრამ ამ შეტევებს აღარ აქვს სიმძაფრე.
აქვს რესურსი რუსეთს გააქტიურებისთვის?
თქვენთან წინა ინტერვიუში აღვნიშნე სამი ასპექტი, რაც შეიძლება გაააქტიუროს რუსეთმა: ბირთვული იარაღი, საყოველთაო მობილიზაცია და ბელარუსი.
ალბათ იქნება მცდელობა, რომ ბოლოს და ბოლოს ბელარუსი ჩაითრიონ ამ ომში. ბელარუსს არც ძალები აქვს და არც საშუალებები მნიშვნელოვანი, რომ მნიშვნელოვანი როლი შეასრულონ, მაგრამ რუსეთს შეუძლია ბელარუსის ტერიტორიის გამოყენება. არსებობს ინფორმაცია, რომ თითქოს რუსები 100 ათას მობილიზებულს ამზადებენ ჩრდილოეთის მიმართულებაზე შეტევის დასაწყებად. ძნელია რუსების სამხედრო ხელმძღვანელობის თავში ჩახედვა, მაგრამ ყველაზე მოსალოდნელი შეიძლება იყოს ჩერნიგოვის მიმართულებაზე 15-20-კილომეტრიანი ბუფერული ზონის შექმნა. ამის მცდელობა სუმის მიმართულებაზეც ჰქონდათ რუსებს, მაგრამ დიდ წარმატებას ვერ მიაღწიეს.
შესაძლებელია, რომ რუსებმა ამ გზით დაქსაქსონ უკრაინის ძალები, ასევე კიევის მიმართულებაზე საფრთხის იმიტირებით უკრაინელებს გარკვეული ძალები გადაასროლინონ დონბასიდან ჩრდილოეთის მიმართულებაზე. ის, რომ შემოდგომისთვის დნეპრისპირეთი აღებული იქნება, ამის ძალიან არ მჯერა.
აკრობატულ დიპლომატიას ახორციელებს ლუკაშენკო: არ აწყობს ომში ჩართვა. ბოლო პერიოდში ლუკაშენკო ცდილობს დასავლეთთან ურთიერთობების გამოკეთებას, პროცესები დათბობასავით წავიდა. ამავე დროს, პუტინსაც აწონებს თავს და აცხადებს, რომ ბელარუსია ყოველთვის დაეხმარება რუსეთს. ერთობლივად ჩაატარეს ბირთვული შეიარაღების მზადყოფნის სწავლებები. ასევე, სწრაფი რეაგირების ძალები ბელარუსში გადაყვანილია უმაღლეს სამხედრო მდგომარეობაზე. ერთის მხრივ, რუსებს ბელარუსები ეუბნებიან, თქვენს გვერდით ვართო, მაგრამ აშკარად ეს არ აწყობს ბელარუსს. განაცხადა კიდეც ლუკაშენკომ, ჩვენ მხოლოდ მაშინ ჩავერთვებით დაპირისპირებაში, თუ უშუალოდ ბელარუსზე მოხდება თავდასხმაო.
რა თქმა უნდა, უკრაინასაც არ აწყობს ბელარუსზე თავდასხმა, თუმცა შესაძლებელია რუსეთმა ბელარუსიდან თავად გამოიწვიოს პროვოკაცია.
მოსალოდნელია რუსეთის თავდასხმა ნატოს წევრ რომელიმე ქვეყანაზე? წინა დღეებში იყო, მაგალითად, ლატვიის შემთხვევა, სადაც რამდენიმე დრონი ჩამოვარდა.
ეს დრონი არ არის გარკვეული, საიდან ჩამოვარდა… არ არის გამორიცხული სულაც ელექტრონული ბრძოლის საშუალებების ზემოქმედებით მართვადაკარგული უკრაინული დრონიც კი იყოს. რთულია, რუსებზე რაღაც გადაჭრით თქვა, მაგრამ ეჭვი მეპარება რუსეთმა თავისი შესაძლებლობებიდან გამომდინარე მნიშვნელოვანი სამხედრო მოქმედება განახორციელონ ბალტიისპირეთის მიმართულებაზე.
ეს არ გამორიცხავს გარკვეულწილად ჰიბრიდულ მოქმედებას, პროვოკაციას, სპეცოპერაციას, დივერსიულ მოქმედებას. შეეცდება რუსეთი, რაღაცნაირად არიოს იქ ვითარება, მაგრამ ის, რომ რაღაც მასშტაბური სამხედრო მოქმედება ჩაატაროს, ამისთვის მას არც ძალა შესწევს და არც რესურსი.
ეს კი არა, ძალიან მძიმე მდგომარეობაში შეიძლება აღმოჩნდეს უახლოეს მომავალში რუსეთის ყირიმის დაჯგუფება, ვინაიდან მისი მომარაგება უფრო და უფრო რთულდება. ბოლო მონაცემებით, უკრაინელებმა დაარტყეს ჯანკოის საწვავისა და საბრძოლო მასალის შემნახველ საწყობებს. იქ ახლაც სერიოზული ხანძარია. მუდმივად ხდება მელიტოპოლ-ჯანკოის მაგისტრალზე დარტყმები. ეს არის სახმელეთო დამაკავშირებელი ყირიმთან, ანუ მე-14 ტრასა, სადაც, ფაქტობრივად, ყველა დიდი მანქანა გადაადგილდება.
უკრაინამ აღმოაჩინა, რომ რუსებს სამოქალაქო, მაგრამ დიდი სატვირთო მანქანებით გადაჰქონდათ აღჭურვილობა და საბრძოლო დანიშნულების მასალები. ამიტომაც, ნებისმიერი დიდი მანქანას ხდება დარტყმის ობიექტი. ახლა რომ ნახოთ, გზა არის მოფენილი დამწვარი ცისტერნებით და სატვირთო მანქანებით. ამ მხარის გუბერნატორმა მხოლოდ საგანგებო დანიშნულების ტვირთების გადაზიდვის ნებართვა გასცა და მაქსიმალურად შეაჩერა სხვა მოძრაობები.
რა გამოსავალი რჩება რუსებს ყირიმში?
შეკითხვაა დღეს არა ის: აფეთქდება თუ არა ხიდი, არამედ როდის აფეთქდება ხიდი? ეს მოხდება გამომდინარე უკრაინელების საჭიროებიდან. დღეს ეს ხიდი დარტყმის ქვეშაა. ამიტომაც, იყენებენ რუსები სახმელეთო გზას, რომელიც მოწყვლადია. ჩონგარის საკონტროლო-გამშვები პუნქტი, მაგალითად, საერთოდ დაიხურა.
ძალიან დიდი დაჯგუფებაა ყირიმში და მას მნიშვნელოვანი მომარაგება სჭირდება: საწვავი, საბრძოლო მასალები, საკვები და ასე შემდეგ. რუსეთის ხელმძღვანელ პირებს, თუკი ვინმე ჰყავთ იქ, გამოჰყავთ საკუთარი ოჯახები ყირიმიდან – ეს ტენდენციაც კი შეიმჩნევა.
რა რესურსი დარჩა რუსებს ომის გასაგრძელებლად? The Economist წერს სადაზვერვო უწყებებზე დაყრდნობით, რომ რუსი სამხედროების საერთო დანაკარგები დაჭრილების ჩათვლით 1.1 – 1.5 მლნ-ს აღწევს, ხოლო „ომის შემსწავლელი ინსტიტუტის“ მონაცემებით, წელს რუსებმა უკრაინაში მხოლოდ 220 კვ. კმ დაიკავეს, რაც არის უკრაინის ტერიტორიის 0.04 %.
რუსეთს იმის რესურსები გააჩნია, რომ ამ ტემპით და ამ აქტიურობით, რაც ახლაა, კიდევ რამდენიმე წელი გააგრძელოს დაპირისპირებები. რუსეთს ჯერ კიდევ იმის ფული და რესურსი, რომ ძალების მობილიზება მოახდინოს. არა მგონია, რომ პუტინმა ამ ეტაპზე საყოველთაო მობილიზაცია გამოაცხადოს.
ფაქტია ის, რომ მნიშვნელოვანი დანაკარგი აქვს რუსეთს, მაგალითად, უკრაინელების დარტყმების შედეგად ცენტრალურ რუსეთში განლაგებული ნავთობგადამამუშავებელი ქარხნების და საწარმოების 80% გაჩერებულია, ან ამ საწარმოებმა შეამცირეს თავიანთი წარმოება. მსგავსი საწარმოების 70% ურალს აქეთაა სადღაც 3000-დან 4000 კილომეტრის ფარგლებში. დღესდღეობით უკრაინას სწვდება ამ სამიზნეებს, თითქმის 2000 კილომეტრამდე უკვე აქვს შესაძლებლობა, რომ განახორციელოს დარტყმები.
არ უნდა დაგვავიწყდეს, რომ უკრაინამ უკვე საკუთარი იარაღის წარმოება დაიწყო. უკვე ოფიციალურად გამოაცხადეს, რომ უკრაინელებმა შექმნეს ბალისტიკური რაკეტა. გარკვეული ტექნოლოგიური კომპონენტები, რა თქმა უნდა, დასავლეთის დახმარებითაა, მაგრამ უკრაინაშია აწყობილი.
ასევე, 18-თვიანი მუშაობის შემდეგ უკრაინელებმა შექმნეს კორექტირებადი საავიაციო ბომბი, რომელსაც 250 კილოგრამის გადატანა შეუძლია. მსგავს ბომბებს აწვდიდა უკრაინას ამერიკა, ასევე ბრიტანეთი, რომელიც შეიძლება გაეშვათ F-16-ებიდან და სხვა საჰაერო საშუალებებიდან. მნიშვნელოვანი აქ ისაა, რომ აქ უკვე მიზნის შერჩევაში აღარ სჭირდება ნებართვა უკრაინას პარტნიორისგან. აღნიშნული აშკარად აჩვენებს იმას, რომ ძალიან გაფართოვდა დარტყმების შესაძლებლობები უკრაინელების მხრიდან.
ჩინეთზე მინდა გკითხოთ, სადაც ბოლო დღეებში ჩავიდა ტრამპი და შემდეგ პუტინი. რა როლს იძენს ჩინეთი ამ კონფლიქტში?
ვერც ტრამპმა და ვერც პუტინმა მნიშვნელოვანი ვერაფერი ვერ წამოიღო ჩინეთიდან. ფაქტობრივად, ტრამპმა გაყიდა 200 ერთეული „ბოინგი“, ხოლო პუტინმა რაღაც სტრატეგიული თანამშრომლობის დოკუმენტზე მოაწერა ხელი. ასეთი დოკუმენტი უამრავია ხელმოწერილი ერთმანეთის მიყოლებით რუსეთსა და ჩინეთს შორის. ნიშანდობლივია რუსეთის წარუმატებლობის გამოხატვა – პუტინის გაბოროტება აისახება მშვიდობიანი ქალაქების დაბომბვებში.
რუსეთის წარუმატებლობა ჩინეთში გარკვეულწილად ასევე აისახება ამ გამწარებულ დარტყმებში.
54 ფრთოსანი რაკეტა იყო გაშვებული დასახლებულ პუნქტებზე, 30 „ისკანდერი“, ორი თუ სამი „კინჟალი“, რომელიც თვითმფრინავებიდან გაუშვეს, სამი „ცირკონი“, ანუ ჰიპერბგერითი ფრთოსანი რაკეტა. ამან აჩვენა ორი მნიშვნელოვანი რამ: უკრაინელებს ამჟამად აქვთ ჰაერსაწინააღმდეგო საშუალებების დეფიციტი. ეს ძირითადად „პატრიოტის“ რაკეტებს ეხება. რაკეტსაწინააღმდეგო თავდაცვა უჭირს ახლა უკრაინას. მეორე გამოჩნდა ის, რომ რუსების „ორეშნიკი“ აღმოჩნდა უბრალოდ შემაშინებელი „ჯართი“. ამით რუსებმა აჩვენეს ევროპას, რომ აი, „ორეშნიკს“ ვიყენებთ. ამ დროს ჩამოვარდა „ორეშნიკი“ ბელაია ცერკოვში და დააზიანა ავტომანქანის ფარეხის კოოპერატივი. არის ინფორმაცია, რომ მეორეც იქნა გაშვებული, რომელიც საერთოდ დონეცკში, ოკუპირებულ ტერიტორიაზე ჩამოვარდა.
წარმოიდგინეთ, 50-მილიონიანი რაკეტაა. გამოდის, რომ ვერ მართეს, ან არ იმართება, არაზუსტია, ტექნიკურად გაუმართავია, ერთი ჩამოვარდა ასეთ დანიშნულებაზე ადრე და მეორემ საერთოდ „უზუსტესი“ 80 კმ-იანი აცილებით დააზიანა კერძო მანქანების ფარეხები!
უკრაინელებს რატომ შეექმნათ ეს დეფიციტი, რამე შეიცვალა დასავლეთიდან სამხედრო აღჭურვილობის მიწოდებით კუთხით?
აშშ-მ ძალიან ბევრი „პატრიოტის“ რაკეტა გადააგზავნა ახლო აღმოსავლეთში. დეტალებზე, ცხადია, არ მაქვს ინფორმაცია და ეს არც გაცხადდება იოლად, მაგრამ გამოჩნდა, რომ ამ კუთხით დეფიციტი აქვს უკრაინას.
ბოლოს ირანზე რომ გვითხრათ: მოლაპარაკებებით მხარეები ვერ გავიდნენ შედეგზე. ელოდებით ომის განახლებას?
ჩემი აზრით, დიდი ალბათობით განახლდება საჰაერო დარტყმები, შეეცდებიან ისევ საჰაერო ზემოქმედებით აიძულონ ირანს მოლაპარაკება. ირანი აღმოსავლურ დიპლომატიას იყენებს, წელავს ამ მოლაპარაკებებს. ისიც კი გაჟღერდა, რომ ირანის წინადადებები პაკისტანის მიერ არ იქნა სწორად მიწოდებული ამერიკელებისთვისო. არაფრის დათმობაზე ირანი არ წამოსულა და არც აპირებს ამას.
უკვე პრესტიჟის საქმეა ეს ომი აშშ-თვის. ძალიან სასაცილო მდგომარეობაში აღმოჩნდა ტრამპი. ამიტომაც მაქვს დიდი ეჭვი, რომ განახლდება საჰაერო ზემოქმედების ფაქტორი.
ხულოში ახალგაზრდა ქალს ჩაგრავდა მთავრობა, რასაც ადგილობრივი საზოგადოება თვალს არიდებდა. ამ ქალის შესახებ ქვეყანას შევატყობინეთ. მისი ცხოვრება შეიცვალა.
ბათუმში ობოლ ბავშვებს ვერ ხედავდა სახელმწიფო. ისინი ვაჩვენეთ საზოგადოებას. მათი ცხოვრებაც შეიცვალა.
ზუგდიდში შშმ კაცს და დაუძლურებულ ქალს აბუჩად იგდებდა ის, ვისაც მათი დაცვა ევალებოდა. ისინი საკუთარ ტკივილთან მარტო არ დავტოვეთ – მათი ამბავი მთელ ქვეყანას შევატყობინეთ და მათი ცხოვრებაც შეიცვალა.
ამ ისტორიებს 25 წელია გიყვებით. იმ ადამიანების შესახებ გიამბობთ, ვისაც არ აქვს ძალაუფლება და გავლენა. ვისი ხმაც ყველაზე სუსტად ისმის.
ამ წლების განმავლობაში სახელმწიფო ინსტიტუტების მოშლაზეც ბევრჯერ გითხარით და იმაზეც, როგორ იქცა კორუფცია ყოველდღიურობად, როგორ ეჯიბრებიან მთავრობის წევრები თუ რიგითი მოხელეები ერთმანეთს ხალხის დოვლათის მითვისებაში.
როგორ იცვლება სამშობლო ფუფუნებაზე.
კიდევ რაზე გიამბობდით? – ციხეებზე. ადგილებზე, რომელთა კედლებს მიღმა ათასობით ჩუმი ტრაგედია იმალება… დღეს საქართველო ერთ-ერთი ლიდერია ევროპაში პატიმრების რაოდენობით. და ეს მხოლოდ სტატისტიკა არ არის. ეს არის ადამიანების სიცოცხლე, რომელიც სიჩუმეში იკარგება.
რუსთავის ციხეშია გამოკეტილი მზია ამაღლობელი – ქალი, რომელმაც გაბედა და უსამართლობას გააწნა სილა. მანამდე კი, 23 წლის განმავლობაში, საკუთარი ჯანმრთელობის ფასად შექმნა ისეთი მედია, როგორიცაა „ნეტგაზეთი“ და „ბათუმელები“.
დღეს ჩვენი გამოცემების დაბადების დღეა – 25 წელი შეგვისრულდა. იუბილეს მზიას გარეშე აღვნიშნავთ – მალე 17 თვე გახდება, რაც ის „ოცნებამ“ უკანონოდ გამოკეტა ციხეში. არც ეს გვაკმარა, მიიღო კანონები, რითაც საზღვრების დადგენა გადაგვიწყვიტა – ან ვიყოთ „მისი ხმა“, ან დავდუმდეთ.
ამის მიუხედავად, ჩვენ ისევ ვრჩებით. ისევ თქვენი ხმა ვართ.
და თქვენ – ისევ ჩვენი ძალა.
ჩვენი რწმენით, ხმა არ უნდა დადუმდეს, თუ სიჩუმე დაისადგურებს, სწორედ მაშინ გაიმარჯვებს უსამართლობა.
ჩვენ ერთმანეთი გვჭირდება.
ამიტომაც დაგვიდექით გვერდით, თუნდაც 1 ლარით. ეს თქვენთვის იქნება ძალიან მცირე, თითქმის შეუმჩნეველი წვლილი, მაგრამ ჩვენ მოგვცემს ძალას გავაგრძელოთ საქმე, რომელიც ყველას ერთად გადაგვარჩენს. გადაარჩენს ჩვენს სამშობლოს.
ფინანსურ მხარდაჭერაზე მეტად კი იმის ცოდნაა მნიშვნელოვანი, რომ მარტო არ ვართ და ჯერ კიდევ ვჭირდებით ადამიანებს, რომ საქართველოში ჯერ კიდევ არსებობს საზოგადოება, რომელსაც სჯერა ჰუმანიზმის და სიმართლის – მართალი სიტყვის ძალის.
2026 წლის 26 მაისს, ჩვენი გამოცემა, „ბათუმელები“, რომელიც ორ ონლაინ მედიას, „ბათუმელებსა“ და „ნეტგაზეთს“ აერთიანებს, 25 წლის გახდა.
გაზეთ „ბათუმელების“ პირველი ნომერი 2001 წლის 26 მაისს, საქართველოს დამოუკიდებლობის დღეს გამოვიდა.
დაარსებიდან 25 წლის შემდეგ ვიწყებთ კამპანიას „ბათუმელებისა“ და „ნეტგაზეთის“ გადასარჩენად.
დღეიდან ჩვენს ვებგვერდებზე ნახავთ მხარდაჭერის ღილაკს, რომლის საშუალებითაც შეგიძლიათ მხარი დაგვიჭიროთ თვეში 1, 5 ან 10 ლარით, ერთი წლის განმავლობაში.
მკითხველის მხარდაჭერა მოგვცემს მუშაობის გაგრძელების საშუალებას.
დაარსებიდან დღემდე „ბათუმელები“ და „ნეტგაზეთი“ არ ყოფილა არც ერთი პოლიტიკური ან ბიზნეს ჯგუფის საკუთრება, ჩვენ ყოველთვის ვეკუთვნოდით საზოგადოებას და რეპრესიული კანონმდებლობის პირობებში, ჩვენი გადარჩენის ერთადერთი გზა სწორედ საზოგადოების მხარდაჭერაა.
აშშ-ის სახელმწიფო მდივანი, მარკო რუბიო, ქართველ ხალხს დამოუკიდებლობის დღეს ულოცავს.
„ამერიკის შეერთებული შტატების სახელით, საქართველოს ხალხს გილოცავთ თქვენს ეროვნულ დღესასწაულს.
ეს წელი ახალ შესაძლებლობებს იძლევა ამერიკელ და ქართველ ხალხებს შორის მეგობრული კავშირების კიდევ უფრო გასაღრმავებლად და ჩვენი ორი ქვეყნის უსაფრთხოებისა და კეთილდღეობის ხელშესაწყობად.
შეერთებული შტატები კვლავაც მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში. ჩვენ ქართველი ხალხის გვერდით ვდგავართ მათი მდგრადი უსაფრთხოების, თავისუფლებისა და დამოუკიდებლობისკენ სწრაფვაში. ამერიკის შეერთებული შტატები ერთგულია პარტნიორობისა, რომელიც შეესაბამება საქართველოს მისწრაფებებს უსაფრთხო და წარმატებული მომავლისკენ“ – წერია განცხადებაში, რომელიც აშშ-ის სახელმწიფო დეპარტამენტის ვებგვერდზე გამოქვეყნდა.
ფოტო: ევროპის პრესფოტო სააგენტო. EPA/JOHAN NILSSON
საქართველოს დამოუკიდებლობის დღესთან დაკავშირებით, ევროკავშირის წარმომადგენლობა და წევრი ქვეყნების საელჩოები ერთობლივ განცხადებას ავრცელებენ.
„ევროკავშირი და მისი წევრი ქვეყნები გულითადად ულოცავენ საქართველოს დამოუკიდებლობის დღეს!
საქართველომ დამოუკიდებლობა 1918 წლის 26 მაისს გამოაცხადა, რითაც დაადასტურა სუვერენული და დემოკრატიული სახელმწიფოებრიობის შესახებ საკუთარი ხედვა. დამოუკიდებლობის შესახებ დეკლარაციის სულისკვეთება დღეს საქართველოს საზოგადოებაში ღრმა გამოძახილს ჰპოვებს.
საქართველოს ისტორიაში ვხედავთ ევროპასთან უფრო მჭიდრო კავშირებისკენ მუდმივ სწრაფვას. ბოლო სამი ათწლეულის განმავლობაში, ევროკავშირი და მისი წევრი სახელმწიფოები გვერდში უდგანან საქართველოს და საიმედო, გრძელვადიან პარტნიორებად რჩებიან.
პროგრესი დემოკრატიული რეფორმების, კანონის უზენაესობისა და ფუნდამენტური თავისუფლებების დაცვის მიმართულებით კვლავაც არსებითია ევროპულ გზაზე წინსვლისთვის.
ამ მნიშვნელოვან დღეს, კვლავ ვადასტურებთ ევროკავშირის ურყევ მხარდაჭერას საქართველოს დამოუკიდებლობის, სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საზღვრებში“,- ნათქვამია განცხადებაში.
„დინამო ბათუმის“ ცნობილი ფანკლუბი, Black Sea Pirates-ს, აცხადებს, რომ 25 მაისს გამართულ საიუბილეო მატჩზე, რომელზეც „დინამო ბათუმი“ „რუსთავს“ ხვდებოდა, სცადეს სტადიონზე განთავსებული ბანერის ჩამოხსნა, რომელიც დიუშენის კუნთოვანი დისტროფიის მქონე ბავშვების სოლიდარობის ნიშნად იყო გამოფენილი.
საუბარია ბანერზე წარწერით – „ბავშვებს ვჭირდებით“.
„სტადიონზე განთავსებული ბანერები ეძღვნებოდა როგორც საიუბილეო, მეასე მატჩს, საქართველოს დამოუკიდებლობის დღეს, ასევე დიუშენის სინდრომის მქონე ბავშვებს — ბავშვებს, რომლებსაც ჩვენი მხარდაჭერა და თანადგომა ყველაზე მეტად სჭირდებათ.
მატჩის დაწყებისთანავე მოხდა დაუჯერებელი ფაქტი — ვიღაცისთვის მიუღებელი აღმოჩნდა საქველმოქმედო ბანერი და მისი ჩამოხსნის მცდელობა განხორციელდა. იმ მომენტში ეს იყო არა უბრალოდ ბანერი, არამედ სოლიდარობის სიმბოლო.
რთულია სიტყვებით აღწერო ის განცდა, როცა ხედავ მსგავს დამოკიდებულებას იქ, სადაც ერთიანობა და ღირსება უნდა სუფევდეს. განსაკუთრებით მაშინ, როცა საქმე ბავშვებს ეხება.
ჩვენ, გულშემატკივრებმა, დროულად ვიმოქმედეთ და ბანერი კვლავ თავის ადგილას დავაბრუნეთ. ეს იყო მცირე, მაგრამ მნიშვნელოვანი ნაბიჯი — იმისთვის, რომ ხმა არ ჩაეხშოთ მათ, ვისაც ყველაზე მეტად სჭირდება მხარდაჭერა.
ამასთანავე, ჩვენი მხრიდან გაკეთდა მცირედი ფინანსური შემოწირულობა შესაბამის ფონდში — როგორც კიდევ ერთი ნაბიჯი ამ ბავშვების გვერდში დგომისთვის.
გვჯერა, რომ ფეხბურთი მხოლოდ თამაში არ არის. ის არის ემოცია, ერთიანობა და ადამიანობა. და სწორედ ეს უნდა იმარჯვებდეს ყოველთვის“ – წერს „დინამო ბათუმის“ ფანკლუბი, Black Sea Pirates-ს ფეისბუქზე.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 26 მაისამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 357 950 ადამიანი [გასულ დღე-ღამეში +1 010. ამ მონაცემებში შედის როგორც დაღუპულები, ასევე დაჭრილები]
ტანკი – 11 954 ერთეული [+1]
ჯავშანტექნიკა – 24 615 ერთეული [+7]
საარტილერიო სისტემა – 42 751 ერთეული [+64]
MLRS – 1 804 ერთეული [+2]
საზენიტო საბრძოლო სისტემა – 1 397 ერთეული [+1]
თვითმფრინავი – 436 ერთეული [+0]
ვერტმფრენი – 353 ერთეული [+0]
უპილოტო საფრენი აპარატის ოპერატიულ-ტაქტიკური დონე – 312 035 ერთეული [+1 790]
სახმელეთო რობოტიზებული კომპლექსი – 1 475 ერთეული [+10]
გემი/ნავი – 33 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 99 374 ერთეული [+374]
სპეცტექნიკა – 4 221 ერთეული [+3]
ფრთოსანი რაკეტა [ჩამოაგდეს] – 4 687 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
უკრაინის პრეზიდენტმა, ვოლოდიმირ ზელენსკიმ რუსული ძალების მიერ უკრაინაში 24 მაისის ღამით განხორციელებულ მასშტაბურ თავდასხმაზე ისაუბრა და განაცხადა, რომ სულ მცირე 83 ადამიანი დაშავდა.
2 წლის წინ ბათუმის მერია სპორტსმენებს რაგბის რაგბის სტადიონის განახლებას, 2 ახალი სტადიონის მოწყობასა და დამხმარე ინფრასტრუქტურის მშენებლობას დაჰპირდა, თუმცა დღემდე არ დაუწყია.
ახლა კი მერია საკრებულოს სწერს, რომ პროექტი ბიუჯეტიდან უნდა ამოიღოს და მუნიციპალური განვითარების ფონდს გადასცეს. წერს იმასაც, რომ პროექტი ხარვეზიანი და შესაცვლელია, ეს კი იმას ნიშნავს, რომ მისი განხორციელება დროში კიდევ გაიწელება.
პირველი ტენდერი შესაბამისი სამუშაოების შესყიდვის მიზნით მერიამ 2024 წელს, აპრილში გამოცხადა, საწყისი თანხით – 21 მილიონ 157 100 ლარი. თუმცა უშედეგოდ, ტენდერი იმის გამო ჩაიშალა, რომ მასში მონაწილეობა არავინ მიიღო. ჩაიშალა 2024 წლის აგვისტოში გამოცხადებული განმეორებითი ტენდერიც.
სტადიონი ბათუმში ლეონიძისა და გენერალ ასლან აბაშიძის ქუჩების კვეთაში მდებარეობს.
საპროექტო ტერიტორია
როგორც საკრებულოს განუმარტეს, მეორე შემთხვევაში საპროექტო-სახარჯთაღრიცხვო დოკუმენტაციის დამატებით შესწავლის შედეგად გამოავლინეს უზუსტობები, რის გამოც კომისიამ მისი შეწყვეტის გადაწყვეტილება მიიღო, თუმცა შესაბამისი ოქმი შესყიდვების პორტალზე ატვირთული არ არის.
„არსებული ვითარების გათვალისწინებით და აღნიშნული ღონისძიების სპეციფიკიდან გამომდინარე, სამმართველო გეგმავს არსებული საპროექტო-სახარჯთაღრიცხვო დოკუმენტაცია გადასცეს საქართველოს მუნიციპალური განვითარების ფონდს, შესაბამისად ღონისძიება ამოღებულ იქნება მიმდინარე წლის ბათუმის მუნიციპალიტეტის ბიუჯეტიდან. ასიგნება პირველ კვარტალში არ არის გათვალისწინებული“ – წერს მერია საკრებულოს.
ეს ნიშნავს იმას, რომ მერიამ პროექტში ხარვეზები 2024 წელს აღმოაჩინა, ტენდერებიც 2024 წელს ჩაიშალა, თუმცა 2026 წელსაც იმავე ამბავს უყვება საკრებულოს თავის გასამართლებლად.
ბათუმს სარაგბო სტადიონი აქვს 2016 წლიდან. ამ სტადიონის მშენებლობა დაახლოებით 3 წელი გრძელდებოდა. მშენებლობაზე 7 მილიონზე მეტი ლარი დაიხარჯა, აქედან 3,5 მილიონი ლარი – ბათუმის ბიუჯეტიდან.
ბათუმის მერიამ ბიუჯეტიდან ამოიღო კიდევ ერთი პროექტის, არდაგანის ტბის მიდებარე ტერიტორიის განახლების დაფინანსება. პროექტისთვის 2 მილიონი ლარი იყო გათვალისწინებული. რეაბილიტაციის პროექტი მოიცავდა ასევე საფეხმავლო ბილიკებისა და გარე განათების მოწყობას.
არდაგანის ტბა
ბათუმის მერიის ინფორმაციით, რომელიც მერიამ საკრებულოს ბიუჯეტის პირველი კვარტლის ანგარიშთან ერთად წარუდგინა, აუცილებელია პროექტის განახლება, მათ შორის „საპროექტო-სახარჯთაღრიცხვო დოკუმენტაციის გადაფასება“.
„აღნიშნულ ღონისძიებასთან დაკავშირებით განგიმარტავთ, რომ ვინაიდან არდაგანის ტბის ირგვლივ არსებული ინფრასტრუქტურა საჭიროებს განახლებას, აუცილებელია არსებული საპროექტო-სახარჯთაღრიცხვო დოკუმენტაციის გადაფასება, შესაბამისი ცვლილებების შეტანა ან ახლის მომზადება“ – წერს მერია საკრებულოს.
მერიამ საკრებულოს ასევე აცნობა, რომ ამ საქმეს მუნიციპალური განვითარების ფონდს გადააბარებს:
„არსებული ვითარების გათვალისწინებით, სამმართველო გეგმავს აღნიშნული ღონისძიების არსებული საპროექტო-სახარჯთაღრიცხვო დოკუმენტაცია გადასცეს საქართველოს მუნიციპალური განვითარების ფონდს, შესაბამისად ღონისძიება ამოღებული იქნება მიმდინარე წლის ქალაქ ბათუმის მუნიციპალიტეტის ბიუჯეტიდან“.
მერიის ინფორმაციით, პროექტი ორწლიანია და 2026-2027 წლებში უნდა განხორციელდეს.
არდაგანის ტბის მიმდებარე ტერიტორიასთან ახლოს მუნიციპალური განვითარების ფონდმა კიდევ ერთი მაღალბიუჯეტიანი პროექტი განახორციელა, რომელიც მისი გახსნიდან მალევე გამოვიდა მწყობრიდან, დახარჯულია 25 მილიონი ლარი. საუბარია გმირთა ხეივანზე.
ძველი ბათუმის რეაბილიტაციის პროექტზე კი 200 მილიონი ლარი იხარჯება და სამუშაოები ჯერ კიდევ მიმდინარეობს. ორივე შემთხვევაში მიმწოდებელი კომპანია შპს „საბა კონსტრაქშენია“.
„ჩაის კრეფის სეზონი წელს ამინდის გამო დაგვიანდა, ახლა ძლივს დაიწყო, მაისის ბოლოს,“ – ამბობს „ბათუმელებთან“ თურქეთში, დემირისარში მცხოვრები ერჰან ქოსიოღლუ. მას ჩაის პლანტაცია აქვს და მკრეფავებს წელსაც საქართველოდან ელოდება.
ჩაის და თხილის საკრეფად სეზონურად ასობით მოქალაქე გადადის საქართველოდან თურქეთში. სეზონური დასაქმება ბევრისთვის მთავარი შემოსავლის წყაროა.
როგორც ერჰან ქოსიოღლუ ამბობს, წელს ტონა ჩაის დაკრეფის საფასური 11-15 ათას ლირამდე [600-დან 800 ლარამდე] გაიზარდა. ფასებს შორის სხვაობა დამოკიდებულია იმაზე, რამდენად რთულ ტერიტორიაზე გიწევს მუშაობა. გასულ წელს ტონა ჩაის დაკრეფის ფასი კი, 8-12 ათასი ლირა იყო.
„ძირითადად დღიურ ანაზღაურებაზე არსებობს შეთანხმება. მე ჯერ არ ამიყვანია მკრეფავები. დღიური ანაზღაურების ფასი 4 ათასი ლირაა [220 ლარი], შარშან 3 ათასი ლირა იყო… გარდა ამისა, შეიძლება შეთანხმება კვებაზეც,“ – გვითხრა ერჰან ქოსიოღლუმ.
თურქეთში სეზონურად დასაქმების მსურველების რაოდენობა მას შემდეგ შემცირდა, როცა საქართველოს მოქალაქეებმა ძირითადად პოლონეთში დასაქმება შეძლეს. 2025 წლის ბოლოს პოლონეთმა საქართველო ამოიღო იმ ქვეყნების სიიდან, რომლის მოქალაქეებსაც გამარტივებული წესით შეუძლიათ პოლონეთის ტერიტორიაზე სამუშაო ნებართვის მოპოვება.
მას შემდეგ, რაც „ქართულმა ოცნებამ“ ევროინტეგრაციის პროცესი შეაჩერა, საქართველოს ბევრ მოქალაქეს მოუხდა ემიგრაციიდან უკან დაბრუნება, მათ შორის, პოლონეთიდან. ახლა მათ დიდ ნაწილს – საქართველოში არსებული უმუშევრობის გათვალისწინებით – ისევ სეზონურად მოუწევს ჩაის პლანტაციაში, ან თხილის ბაღში მუშაობა.
ჩაის კრეფის სეზონი თურქეთში, ერჰან ქოსიოღლუს ფოტოები
დიუშენის კუნთოვანი დისტროფიის მქონე ბავშვების მხარდამჭერ მარათონს მასწავლებლების ნაწილიც შეუერთდა.
როგორც მარათონის მხარდამჭერი ერთ-ერთი მასწავლებელი გურიიდან, ირმა გორდელაძე ამბობს, ბავშვების დასახმარებლად პედაგოგებმა 25 მაისისთვის 5 461 ლარის გადარიცხვა მოახერხეს.
დიუშენის დაავადების მქონე ბავშვების მხარდამჭერი მარათონი ილიაუნის სტუდენტებმა ორი დღის წინ წამოიწყეს და ორ დღეში, ორ მილიონამდე ლარის შეგროვება შეძლეს. თანხის ჩარიცხვები ბავშვების დასახმარებლად ისევ გრძელდება.
„მე და ლადო აფხაზავამ, ასევე, ეროვნული ჯილდოს ათეულმა, გადავწყვიტეთ მიგვეწვდინა ხმა მასწავლებელთა გარკვეული ნაწილისთვის და ერთობლივი ჩართულობით ორ დღეში 846-მა მასწავლებელმა ჩარიცხა თანხა ბავშვების დასახმარებლად მარათონის ანგარიშზე“, – ამბობს ირმა გორდელაძე.
საქართველოში ასამდე ბავშვია დიუშენის დაავადებით. მათ სიცოცხლისთვის აუცილებელი მედიკამენტები ესაჭიროებათ, რომელიც არ არის ხელმისაწვდომი საქართველოში, ამიტომ ბავშვები და მათი მშობლები ითხოვენ, რომ მედიკამენტები სახელმწიფომ შეისყიდოს.
„ქართული ოცნების“ ხელისუფლება ჯერჯერობით უარს ეუბნება მშობლებს მედიკამენტების შემოტანაზე იმ მოტივით, რომ წამლები არ არის ეფექტური და სარისკოცაა. მშობლები თითქმის ერთი თვეა საპროტესტო აქციას მართავენ კანცელარიის ეზოში და შვილების გადარჩენას ითხოვენ.
ბავშვებს და მშობლებს მხარდაჭერა გამოუცხადა საზოგადოებამ – გავრცელდა პეტიციებიც, სადაც 100 ათასზე მეტი მოქალაქე სთხოვს მმართველ ძალას, რომ ბავშვების სიცოცხლის გადასარჩენად წამალი შემოიტანონ, რადგან სახელმწიფო ბიუჯეტი ხალხს ეკუთვნის. შესაბამისად, ბავშვებმა უნდა მიიღონ წამალი.
Georgian Dream Prime Minister Irakli Kobakhidze acknowledged that the social employment programme paying 300 lari per month was, in reality, fictitious employment and did not address unemployment.
“The reduction in employment is entirely formal and has one specific reason: there was a programme replacing social assistance, and 30,000 people can be said to had been fictitiously employed. They were counted as employed, although in reality they were still receiving social assistance.
That was the situation. The programme was abolished, which was an absolutely right step because it was fictitious, and this led to a formal decrease in the number of employed people. We abolished an ineffective programme,” Kobakhidze said today, on 25 May, in comments to journalists.
The fact that the 300-lari employment programme was exploited by Georgian Dream as an administrative resource during the pre-election period was also discussed by citizens themselves. For example, in 2023, people employed under the social programme told Batumelebi that they were engaged in fictitious work and that it did not change their social conditions.
“I am in Georgian Dream, I work as a coordinator,” people “employed” under this programme were saying in various municipalities.
Georgian Dream first spoke about abolishing the social employment programme after the 2024 elections. By 2026, the programme was abolished.
Despite statistical data showing a decline in employment in Georgia, and the public speaking about poverty, unemployment, and difficult social conditions, Kobakhidze still attempts to convince society that the country’s economy has grown by several billion over the past 2–3 years.
“Today, the National Statistics Office published the 2025 poverty rate, which has been decreased to 7.1%. This means that in 2025, against the backdrop of 7.5% economic growth, 90,000 citizens escaped poverty.
Since 2020, Georgia’s economy in lari has grown from 50 billion to 105 billion, and in U.S. dollars – from 16 billion to 38 billion. We are not only first in the region, but also across Europe in terms of economic growth.
In 2020, our population’s net income was 13.3 billion lari, and today this figure exceeds 33 billion lari. These are the taxes our citizens have paid into the budget,” Kobakhidze says, adding that despite 7% economic growth in the country, 280,000 citizens still remain in poverty.
26 მაისს, საქართველოს დამოუკიდებლობის დღეს, თიბისი ტრადიციულად გამორჩეული კამპანიით აღნიშნავს და საზოგადოებას მთავარ გზავნილს უზიარებს – დამოუკიდებლობაშენიგადაწყვეტილებაა.
საქართველოს პირველი რესპუბლიკის დამოუკიდებლობის გამოცხადებიდან 108 წელი და დამოუკიდებლობის აღდგენიდან 34 წელი გავიდა. თიბისი დამოუკიდებელ საქართველოსთან ერთად დაიბადა 1992 წელს – ბრენდი, რომლის ისტორია ქვეყნის თანამედროვე განვითარების გზას მიჰყვება და დამოუკიდებლობის იდეას საკუთარ საქმიანობაში, ინიციატივებში და ადამიანებისთვის ცხოვრების გამარტივებაში ხედავს.
თიბისისთვის დამოუკიდებლობის იდეა ყოველთვის იყო ბრენდის იდენტობის განუყოფელი ნაწილი – რწმენა, რომ ქვეყნის განვითარებას ის ადამიანები ქმნიან, რომლებსაც საკუთარი შესაძლებლობების, იდეებისა და მომავლის სჯერათ. სწორედ ამ ღირებულებების გარშემო თიბისი უკვე 33 წელია ქმნის ბიზნესის, ტექნოლოგიურ, საგანმანათლებლო და კულტურულ გამოცდილებას, რომლებიც ადამიანებს უმარტივებს ყოველდღიურობას, ეხმარება მიზნების მიღწევაში და აძლიერებს რწმენას, რომ დამოუკიდებლობა პირადი გადაწყვეტილებით იწყება.
„26 მაისი ჩვენთვის განსაკუთრებულად მნიშვნელოვანი თარიღია, რადგან თიბისი დამოუკიდებელ საქართველოსთან ერთად შეიქმნა და განვითარდა. ეს დღე არის მუდმივი შეხსენება, რომ დამოუკიდებლობა ყოველდღიური არჩევანია – გჯეროდეს საკუთარი თავის, შენი საქმის და ქვეყნის მომავლის. გილოცავთ საქართველოს დამოუკიდებლობის დღეს“ – გიორგი თხელიძე, თიბისის გენერალური დირექტორი.
წლების განმავლობაში, თიბისი 26 მაისს არაერთი შთამაგონებელი კამპანიით აღნიშნავდა იქნებოდა ეს ანიმაცია, რადიოსპექტაკლი, „დამოუკიდებლობის სკოლა“, „გმირები“, „მომავალი ჩვენია”, „დამოუკიდებლობა იწყება შენით”, „ყველაზე ჯიუტი ადამიანების ქვეყანა“ და სხვა დასამახსოვრებელი კამპანიები, რომლებიც ადამიანებს ახსნებს, რომ დამოუკიდებლობა საკუთარ თავში დაჯერება, პასუხისმგებლობა, არჩევანი და გადაწყვეტილებაა. თიბისის წლევანდელი კამპანია ამ ამბის გაგრძელებაა.
ქობულეთის შემოვლით გზაზე მსუბუქი ავტოტრანსპორტის მოძრაობა 2026 წლის 26 მაისის დღის 14:00 სთ-დან აღდგება, ხოლო სატვირთო, მისაბმელიანი და ნახევრადმისაბმელიანი ავტოტრანსპორტის მოძრაობა – 28 მაისიდან. ინფორმაციას საავტომობილო გზების დეპარტამენტი ავრცელებს.
სახიდე გადასასვლელის სადეფორმაციო ნაკერების შეცვლის სამუშაოების გამო ქობულეთის შემოვლითი გზა 14 მაისიდან 27 მაისის ჩათვლით ჩაიკეტა.
22 მაისს სახიდე გადასასვლელზე, სადაც სადეფორმაციო ნაკერები შეცვალეს, სამონტაჟო სამუშაოები დასრულებული იყო და მხოლოდ ბეტონის ჩასხმა იყო დარჩენილი.
„კლუბი სინერგია“, რომელიც 14-25 წლის ახალგაზრდებს უფასო ფსიქოლოგიურ დახმარებას უწევდა, მიმდინარე წლის ივნისიდან უფასო მომსახურებას წყვეტს.
„სინერგია“ უფასო მომსახურების შეწყვეტას, იმ რეპრესიულ კანონმდებლობას უკავშირებს, რომელიც „ქართული ოცნების“ ხელისუფლებამ სამოქალაქო ორგანიზაციების წინააღმდეგ მიიღო.
„სამწუხაროდ, საკანონმდებლო ცვლილებებთან დაკავშირებული მიზეზების გამო, 2026 წლის ივნისიდან „კლუბი სინერგია“ ვეღარ შეძლებს უფასო მომსახურების გაგრძელებას. ეს ძალიან მძიმე და გულდასაწყვეტი რეალობაა მთელი გუნდისთვის.
შვიდი წლის შემდეგ, კლუბი „სინერგიის“ გუნდი ფასიან სერვისზე გადადის, თუმცა ჩვენი მისია და ღირებულებები უცვლელი რჩება – ხარისხიანი, გულისხმიერი მომსახურება უკეთესი ფსიქიკური ჯანმრთელობისთვის.
მადლობას ვუხდით ყველა მოზარდსა და ახალგაზრდას, ოჯახს და პარტნიორს ნდობისა და თანამშრომლობისთვის. თითოეულ თქვენგანთან ურთიერთობა ჩვენთვის მნიშვნელოვანი. იმედს ვიტოვებთ, რომ თანდათან შევძლებთ, საფასურის გარეშე – კლიენტების შეზღუდულ რაოდენობას მაინც მოვემსახუროთ“-აღნიშნული განცხადება „სინერგიამ“ დღეს, 25 მაისს გააკეთა, ფეისბუქის გვერდზე.
ორგანიზაციის ცნობით, „სინერგია“ ბოლო შვიდი წლის განმავლობაში წელიწადში დაახლოებით 400 ადამიანს უწევდა უფასო ფსიქოლოგიურ მომსახურებას.
„ქართული ოცნების“ ხელისუფლებამ ბოლო ერთ წელიწადში არაერთი რეპრესიული კანონი მიიღო, მათ შორის „გრანტების შესახებ კანონი“, რომელიც საქართველოში არსებულ სამოქალაქო ორგანიზაციებს და კერძო პირებსაც კი, უკრძალავს უცხოური დაფინანსების მიღებას. აღნიშნული საკანონმდებლო ცვლილების საფუძველზე არაერთი ორგანიზაციის მუშაობა შეფერხდა ან შეწყდა.
მოქალაქეები უკვე ხშირად ვეღარ ახერხებენ უფასოდ მიიღონ იურიდიული ან სხვა სახის მომსახურება, რომელსაც სხვადასხვა საერთაშორისო ორგანიზაცია აფინანსებდა.
არასამთავრობო ორგანიზაცია „საერთაშორისო გამჭვირვალობა-საქართველოს“ ინფორმაციით, 2026 წლის იანვარ-მარტში „ქართულ ოცნებას“ 73-მა შემომწირველმა 2.6 მილიონი ლარი გადაურიცხა.
შემომწირველებთან დაკავშირებულმა 37-მა კომპანიამ 2015 წლიდან დღემდე 521 მილიონი ლარის ტენდერები მოიგეს, აგრეთვე 49.7 მილიონი ლარის გამარტივებული შესყიდვები, 4 მილიონი ლარის აგროსუბსიდია, 169 ათასი კვ.მ-ის სამშენებლო ნებართვა და წიაღისეულის მოპოვების 12 ლიცენზია მიიღეს.
მაგალითად, სამშენებლო-დეველოპერულ კომპანია „ალიანს ჯგუფთან“ დაკავშირებულმა პირებმა – ბესიკ ჟღენტმა, თემურ ბიწაძემ და ნიკოლოზ თევზაძემ, 2026 წლის 26-30 მარტს „ქართულ ოცნებას“ ჯამში 150,000 ლარი შესწირეს.
ორგანიზაციის ინფორმაციით, ჯგუფს ჯამურად პარტიისთვის 913 000 ლარი აქვს გადარიცხული.
ასევე, „გამჭვირვალობის“ ცნობით, შემომწირველებთან დაკავშირებულ კომპანიებს მიღებული აქვთ:
2024 წელს შპს „ალიანს ლისს“ ლისის ტბის მიმდებარედ 27,431 კვ.მ-ის სამშენებლო ნებართვა;
2021-2023 წლებში შპს „გონიო 2020“-ის მიერ ქობულეთში 21 ათასი კვ.მ სახელმწიფო მიწის პრივატიზაციით შესყიდვა უკონკურენტო აუქციონებზე;
2021 წელს აჭარის მთავრობის მიერ პირდაპირი მიყიდვის ფორმით, 1 ლარად, 600 კვ.მ ნაკვეთი გონიოში და 2022 წელს შპს „ჯეობლუბერის“ – 1 მილიონი ლარის აგროსუბსიდია.
„გამჭვირვალობა-საქართველოს“ ინფორმაციით, „ქართულ ოცნებას“ სხვა შემწირველებიც ჰყავს.
მაგალითად, 2026 წლის 10 თებერვალს, პარტიას 60 000 ლარი შესწირა (ჯამში შეწირული აქვს 416,000 ლარი) რომან აბრამიშვილმა. მისმა კომპანიამ, შპს „გ&კ ტექნოლოგმა“ 2015 წლიდან რეგიონული განვითარებისა და ინფრასტრუქტურის სამინისტროსა და შპს „საქართველოს მელიორაციისგან“ 58,2 მილიონი ლარის სახელმწიფო ტენდერები მოიგო (აქედან 14 მილიონი – 2025 წლის შემდეგ).
ამავე კომპანიამ 2020 წელს მარნეულში სახელმწიფოსგან პრივატიზაციით (ელექტრონული აუქციონი) 106 ათასი კვ.მ ფართობის ტერიტორია 674 ათას ლარად – კვ.მ 6.40 ლარად – შეიძინა.
აბრამიშვილის კომპანიები აგრეთვე ფლობენ ქვიშა-ხრეშის მოპოვების 10 ლიცენზიას. აბრამიშვილს 2012 წელს ნაციონალური მოძრაობისთვისაც აქვს შეწირული 7 000 ლარი.
„ქართული ოცნების“ პრემიერ-მინისტრმა, ირაკლი კობახიძემ განაცხადა, რომ 300-ლარიანი სოციალური დასაქმების პროგრამა, რეალურად ფიქტიური დასაქმება იყო და არ ემსახურებოდა უმუშევრობის პრობლემების აღმოფხვრას.
„დასაქმებულთა შემცირება არის მთლიანად ფორმალური და ამას აქვს ერთი კონკრეტული მიზეზი, ეს არის ის, რომ არსებობდა სოციალური დახმარების ჩანაცვლების პროგრამა და 30 000 ადამიანი, შეიძლება ითქვას, იყო ფიქტიურად დასაქმებული. ისინი ითვლებოდნენ დასაქმებულად, თუმცა სინამდვილეში, ისინი ისევ იღებდნენ სოციალურ დახმარებას.
ასეთი იყო მდგომარეობა. ეს პროგრამა გაუქმდა, რაც აბსოლუტურად სწორი ნაბიჯი იყო იმიტომ, რომ ფიქტიური იყო და ამან გამოიწვია ფორმალურად დასაქმებულთა რაოდენობის შემცირება. გავაუქმეთ უსარგებლო პროგრამა“, – განაცხადა კობახიძემ დღეს, 25 მაისს, ჟურნალისტებთან.
ის, რომ 300-ლარიან დასაქმების პროგრამას „ქართული ოცნება“ წინასაარჩევნოდ იყენებდა, როგორც ადმინისტრაციული რესურსს, ამაზე თავად მოქალაქეებიც საუბრობდნენ. მაგალითად, 2023 წელს „ბათუმელებთან“ სოციალური პროგრამით დასაქმებულმა ადამიანებმა თქვეს, რომ ფიქტიურ სამუშაოებში იყვნენ ჩაბმული და ეს ვერ შეცვლიდა მათ სოციალურ მდგომარეობას.
„მე ქართულ ოცნებაში ვარ, კოორდინატორად ვმუშაობ,“ – ამბობდნენ აღნიშნული პროგრამით „დასაქმებული“ ადამიანები სხვადასხვა მუნიციპალიტეტში.
„ქართულმა ოცნებამ“ სოციალური დასაქმების პროგრამის გაუქმებაზე საუბარი 2024 წლის არჩევნების შემდეგ გააჟღერა პირველად. 2026 წლისთვის კი ეს პროგრამა გააუქმეს.
მიუხედავად იმისა, რომ სტატისტიკური მონაცემებით საქართველოში დასაქმება შემცირებულია, მოსახლეობა კი სიღარიბეზე, უმუშევრობასა და მძიმე სოციალურ ყოფაზე საუბრობს, კობახიძე მაინც ცდილობს დაარწმუნოს საზოგადოება, რომ საქართველოს ეკონომიკა რამდენიმე მილიარდით არის გაზრდილი ბოლო 2-3 წელიწადში.
„დღეს, სტატისტიკის ეროვნულმა სამსახურმა გამოაქვეყნა 2025 წლის სიღარიბის მაჩვენებელი, რომელიც 7.1%-მდე შემცირდა. ეს იმას ნიშნავს, რომ 2025 წელს, შვიდნახევრიანი ეკონომიკური ზრდის ფონზე, 90 000-მა მოქალაქემ დაძლია სიღარიბე.
2020 წლის შემდეგ, საქართველოს ეკონომიკა ლარში, 50 მილიარდიდან 105 მილიარდამდე, ხოლო დოლარში, 16 მილიარდიდან, 38 მილიარდამდე გაიზარდა. ჩვენ არა მარტო რეგიონში, ევროპის მასშტაბითაც ვარ პირველ ადგილზე ეკონომიკური ზრდით.
2020 წელს, ჩვენი მოსახლეობის ნეტო შემოსავალი იყო 13,3 მილიარდი ლარი და დღეს ეს მაჩვენებელი აჭარბებს 33 მილიარდ ლარს. ეს გადასახადები შეიტანეს ბიუჯეტში ჩვენმა მოქალაქეებმა“, – ამბობს კობახიძე და დასძენს, რომ ქვეყანაში 7 %-იანი ეკონომიკური ზრდის ფონზე, 280 000 მოქალაქე, ისევ სიღარიბეში რჩება.
დღეს, 25 მაისს, შინაგან საქმეთა სამინისტროს თარჯიმნებმა ბათუმში, აჭარის პოლიციის დეპარტამენტთან აქცია გამართეს. თარჯიმნები თავიანთი ნაშრომის ანაზღაურებას მოითხოვენ. ისინი საუბრობენ შრომითი უფლებების დარღვევაზე და დამსაქმებლის მხრიდან მუქარაზე.
თარჯიმნები ამბობენ, რომ კომპანია „ინტელექტ-მარკეტი“, რომელიც შსს-ს სათარჯიმნო მომსახურებას აწვდის, მათ რამდენიმე თვეა ხელფასებს არ უხდის.
„მარტოხელა დედა ვარ, 7 წლის შვილი შვილი მყავს და ხშირად მიწევდა ბავშვის მარტო დატოვება სამუშაოზე გამოსვლის დროს. ყოფილა შემთხვევები, როცა 48 საათიც კი მიმუშავია უწყვეტად. ამის მიუხედავად, შსს-ს ტენდერში გამარჯვებული კომპანია, რომელიც ვალდებულია აგვინაზღაუროს ჩვენი ნაშრომი, არ გვიხდის ხელფასს.
კომპანიის დირექტორი მაყენებს სიტყვიერ შეურაცხყოფას და ეს იყო ბოლო წვეთი, რამაც გადამადგმევინე ეს ნაბიჯი. მარტის თვიდან არ გადაუხდია ანაზღაურება, მივმართე პროკურატურასაც. დამსაქმებელმა იცის, რომ მაქვს ბანკის ვალი, ვარ მარტოხელა დედა და მჭირდება ჩემი შრომის ანაზღაურება,“ – ამბობს აქციის ერთ-ერთი მონაწილე, თეა გოქაძე.
მისი თქმით, თარჯიმნები ზეპირი ხელშეკრულებით არიან დასაქმებული.
„მე პირადად წელიწად-ნახევარი ვიმუშავე სალომე ცერცვაძესთან, [ის არის კომპანიის ხელმძღვანელი], სულ გვიგვიანებდა ხელფასს, თუმცა ვერ ვიღებდი ინფორმაციას – რატომ. ვიცით, რომ ხელფასის თანხები ირიცხება შსს-დან, მაგრამ ჩვენამდე არ აღწევს. თუმცა არანაირი რეაგირება ამაზე არ ჰქონია. მიუხედავად იმისა, რომ ყველამ ყველაფერი იცის“- ამბობს ის.
დამსაქმებლის მხრიდან მუქარაზე საუბრობს კიდევ ერთი თარჯიმანი, ზვიად მამულაძე.
„არის ზეწოლა, მუქარები, – „ხმას ამოიღებ გაგაქრობ“, „ვერ იცხოვრებ აქ“, ამიტომ ვერ გამოდის ბევრი, რომ არ აწყობთ კონფლიქტი. ასახელებს ვიღაც მფარველებს, მაგრამ მე ვერავინ შემაშინებს. არც დამუქრების მეშინია და არც არავისი, როცა მართალი ვარ. ვითხოვ იმას, რომ ჩვენი ნაოფლარი მივიღოთ. დღეს რომ არავინ მიგვიღო, ესეც არასწორია, გამოდის, დაუფასებელია ჩვენი შრომა და დაგვტოვეს უყურადღებოდ.
ერთი წელია ვმუშაობ შსს-ში, გასულია 3-4 თვე და არ ამიღია ანაზღაურება. ხან რას იმიზეზებენ და ხან რას.
ჩვენ ვიცით, რომ შსს თავის დროზე რიცხავს ხელფასებს, მათი თანამშრომლები თავის დროზე იღებენ და ჩვენ რატომ არ უნდა ავიღოთ, ჩვენც მათ თანამშრომლებად ვითვლებით.
გვინდა სამართალი, რომ ავიღოთ ის ანაზღაურება, რაც გვეკუთვნის. არაერთხელ გავსულვარ სასამართლოებში, საბაჟოზე, ციხეში შევსულვარ – ყველგან მიმუშავია, თუმცა არ გვაძლევენ ხელფასს“- ამბობს ზვიად მამულაძე
მთვარისა მანაგაძეც შრომითი უფლებების დარღვევაზე გვიყვება.
„6 წელია ვმუშაობ თარჯიმნად, თუმცა სალომე ცერცვაძის კომპანია გასული წლის 6 სექტემბრიდან შემოვიდა. რეალურად, ჩემგან გაიცნეს ეს ქალი, რადგან მე მივყვებოდი ხოლმე სამმართველოებში. ვირივით გვამუშავებდა, დასვენების უფლებას არ გვაძლევდა, გადაღლილს რომ ჩაგვეძინებოდა, რატომ გძინავთო, გვლანძღავდა. ფსიქოლოგიური ზეწოლის და ტრეფიკინგის მსხვერპლი ვარ,“- ამბობს მთვარისა მანაგაძე.
ნინო ინასარიძეც შრომითი უფლებების დარღვევაზე საუბრობს:
„სადღაც 1500 ლარი აქვს გადასახდელი, თუმცა არ მიხდის ხელფასს. ორი წელი ვიმუშავე მასთან, სულ ჰქონდა ჩვენთან პრობლემა. მაყენებდა სიტყვიერ შეურაცხყოფას, ძალიან ცუდი სიტყვები მითხრა ბოლოს. ისიც მითხრა, რომ ვერაფერს ვიზამ და ვერც ჩემს ნამუშევარს ვეღირსები.
ამბობდა, რომ კრიმინალური პოლიცია არ ურიცხავდა თანხას და ამიტომ ვერ გვიხდიდა ხელფასს, თუმცა ჩვენ ვიცით, რომ ეს თანხები ირიცხებოდა და დამსაქმებელი იქცევა არაკეთილსინდიერად“-ამბობს ნინო ინასარიძე.
ბათუმში, შშს-თან შეკრებილი თარჯიმნები დაახლოებით 12:00 საათისთვის პოლიციის შენობაში შევიდნენ. შეხვედრიდან გამოსულმა თარჯიმნებმა „ბათუმელებს“ უთხრეს, რომ სათარჯიმნო მომსახურეობაზე თანხა სრულად გაცემულია, უფლებების დარღვევაზე კი, მათ ამ დრომდე ინფორმაცია არ ჰქონდათ.
„ანაზღაურების პრობლემა ექმნებათ მხოლოდ იმიტომ, რომ ვალდებულებას არ ასრულებენ,“ – ამბობს „ბათუმელებთან“ კომპანია „ინტელექტ-მარკეტის“ ხელმძღვანელი, სალომე ცერცვაძე. ეს ის კომპანიაა, ვისგანაც შსს-მ სათარჯიმნო მომსახურება შეისყიდა. სალომე ცერცვაძის თქმით, თარჯიმნებთან შრომითი კი არა, ნარდობის ხელშეკრულება არსებობს, რაც კონკრეტული მომსახურების შესყიდვას გულისხმობს.
ეს ხელშეკრულებები დამსაქმებელს და თარჯიმნებს შორის წერილობით არ არსებობს. დამსაქმებლის თქმით, წერილობით ხელშეკრულება თარჯიმნებს თავად არ მოუთხოვიათ.
„ანაზღაურებას რაც შეეხება, ეს პირები, რომლებიც „ბათუმელების“ ჩართვაში საუბრობდნენ, ზოგ მათგანს სრულყოფილად აქვს ანაზღაურება მიღებული. არიან თარჯიმნები, რომლებსაც თვითონ ორგანიზაციის მიმართ აქვთ დავალიანება, იმიტომ რომ წინასწარ აიღეს ავანსი ორგანიზაციისგან და შემდეგ უკვე ტელეფონს არ უპასუხეს, ან არასწორი თარგმანის გამო მოხდა მათი ორგანიზაციიდან გაშვება და მომსახურების შეწყვეტა.
მათ შეუძლიათ სამართლებრივად იდავონ სასამართლოში და შესაბამისად თუ სასამართლო დაადგენს, რომ მათ ეს ანაზღაურება ეკუთვნით, სასამართლოს გადაწყვეტილებას წინ ვერავინ აღუდგება…
მე, როგორც შპს „ინტელექტ-მარკეტის“ დირექტორი, მათთან ვაფორმებ არა შრომითი ურთიერთობის ხელშეკრულებას, არამედ ნარდობის ურთიერთობის ხელშეკრულებას. ნარდობა არ ითვალისწინებს ზეგანაკვეთურ სამუშაოს. ეს არ არის შრომითი ურთიერთობა. ეს არის მომსახურების ხელშეკრულება შესაბამისი პირობებით. მათი ვალდებულებაა, გაუწიონ შპს „ინტელექტ- მარკეტს“ მომსახურება დღე-ღამის ნებისმიერ დროს, 24 საათის განმავლობაში და იყვნენ ყოველთვის კომუნიკაციაზე. იმ შემთხვევაში, როდესაც, ვთქვათ, არ არიან კონტაქტზე, ამაზე წინასწარ გვაფრთხილებენ ხოლმე.
აქ არის სახელმწიფო ინტერესები, რომ გაიწიოს სათარჯიმნო მომსახურება ქვეყნის ინტერესებისთვის. ჩვენ მათ [თარჯიმნებს] 24/7-ზე თავიდანვე ვუთანხმდებით… იმ შემთხვევაში, თუ დაარღვევენ ამ პირობას, ვერ მიიღებენ შესაბამის ანაზღაურებას. წარმოიდგინეთ, შინაგან საქმეთა სამინისტროს სჭირდება თარჯიმანი, დანაშაულია ჩადენილი და თარჯიმანი, რომელიც წინასწარ შეთანხმებული გყავს, ტელეფონზე არ გპასუხობს,“ – გვითხრა სალომე ცერცვაძემ.
რადგან თარჯიმნებმა ერთდროულად შეწყვიტეს თანამშრომლობა სათარჯიმნო მომსახურების კომპანიასთან, ვინ უწევს დღეს შსს-ს თარჯიმნის მომსახურებას?
„ჩვენ გვაქვს რესურსი. არიან თარჯიმნები, რომლებიც მუშაობენ და ახორციელებენ მომსახურებას,“ – გვითხრა სალომე ცერცვაძემ.
შსს-ს ინფორმაციით, დააკავეს ირანის ორი მოქალაქე, საქართველოს სახელმწიფო საზღვარზე მიგრანტის უკანონოდ გადაყვანის მცდელობის და საქართველოს სახელმწიფო საზღვრის უკანონოდ გადაკვეთისა და გადაკვეთის მცდელობის ფაქტებზე.
„გამოძიებით დადგინდა, რომ ერთ-ერთი დაკავებული თავისი მართვის ქვეშ არსებული სატვირთო ავტომანქანით, ბრალდებულის სახით მასთან ერთად დაკავებული მამაკაცის საქართველოს სახელმწიფო საზღვარზე გადაყვანას, სასაზღვრო საკონტროლო-გამტარი პუნქტის „სარფის” გვერდის ავლით, უკანონოდ და მალულად ცდილობდა.
პოლიციამ ორივე მათგანი სასაზღვრო გამშვები პუნქტის ტერიტორიაზე დააკავა“ – წერს შსს.
მათივე ინფორმაციით, გამოძიება სისხლის სამართლის კოდექსის 19 – 344-ე პრიმა, 19-344-ე და 344-ე მუხლებით მიმდინარეობს, რაც 5 წლამდე ვადით თავისუფლების აღკვეთას ითვალისწინებს.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 25 მაისამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 356 940 ადამიანი [გასულ დღე-ღამეში +1 020. ამ მონაცემებში შედის როგორც დაღუპულები, ასევე დაჭრილები]
ტანკი – 11 953 ერთეული [+3]
ჯავშანტექნიკა – 24 608 ერთეული [+5]
საარტილერიო სისტემა – 42 687 ერთეული [+47]
MLRS – 1 802 ერთეული [+2]
საზენიტო საბრძოლო სისტემა – 1 396 ერთეული [+0]
თვითმფრინავი – 436 ერთეული [+0]
ვერტმფრენი – 353 ერთეული [+0]
უპილოტო საფრენი აპარატის ოპერატიულ-ტაქტიკური დონე – 310 245 ერთეული [+1 924]
სახმელეთო რობოტიზებული კომპლექსი – 1 465 ერთეული [+14]
გემი/ნავი – 33 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 99 000 ერთეული [+302]
სპეცტექნიკა – 4 218 ერთეული [+2]
ფრთოსანი რაკეტა [ჩამოაგდეს] – 4 687 ერთეული [+55]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
უკრაინის პრეზიდენტმა, ვოლოდიმირ ზელენსკიმ რუსული ძალების მიერ უკრაინაში 24 მაისის ღამით განხორციელებულ მასშტაბურ თავდასხმაზე ისაუბრა და განაცხადა, რომ სულ მცირე 83 ადამიანი დაშავდა.
„ბინადრობაზე სრულიად დაუსაბუთებლად უარს გვეუბნებიან“, – ამბობენ უცხოელები, რომელსაც საქართველოში ბინადრობაზე უარს ეუბნებიან. იმიგრანტების თქმით, რომლებიც ბოლო რამდენიმე წელი საქართველოში ცხოვრობენ, სწავლობენ, ან მუშაობენ, ბინადრობის მიღება გართულდა.
„ოცნების“ მთავრობა ბინადრობაზე უარს ეუბნება, მაგალითად, უცხო ქვეყნის მოქალაქეს, რომელსაც ქართველი ცოლი ჰყავს, შვილიც საქართველოში შეეძინათ და უკვე რამდენიმე წელია ოჯახი ბათუმში ბიზნესითაა დაკავებული.
ბინადრობაზე უარი უთხრეს სუდანელ სტუდენტსაც, რომელსაც ბათუმში სამედიცინო განათლება მიუღია და ექიმის თანაშემწედ უკვე დასაქმდა. სუდანელმა სტუდენტმა გვითხრა, რომ წელს ასრულებს სწავლას, ამასობაში, ქართული ენა კარგად ისწავლა და აქ სურს რამდენიმე წლით ცხოვრება, მაგრამ ამის საშუალებას მთავრობა არ აძლევს.
ვის არ აძლევს მთავრობა ბინადრობის ნებართვას? – ამ სფეროში მომუშავე ადვოკატი, საბა სუთიძე „ბათუმელებთან“ ამბობს, რომ ბოლო პერიოდის სტატისტიკურ მონაცემებს სახელმწიფო უწყებები არ აწვდიან, ბინადრობის მიღმა დარჩენილი უცხოელების სხვადასხვა საქმეში კი, მაგალითად, ვერ ნახავთ რუსეთის მოქალაქის საქმეს.
„ბათუმელებმა“ საბა სუთიძესთან ინტერვიუ ჩაწერა, იგი „ტოლერანტობის და მრავალფეროვნების ინსტიტუტის“ ადვოკატია:
ჩვენ ყოველწლიურად ვითხოვთ სტატისტიკურ ინფორმაციას ბინადრობის ნებართვების გაცემის შესახებ. 2024 და 2025 წლების შესახებ ზოგადი სტატისტიკური მონაცემიც არ მოგვაწოდეს: რამდენ უცხოელს უთხრეს უარი ბინადრობაზე საქართველოში. 2023 წელს კი, ბინადრობა მოუთხოვია 39 442 უცხოელს, მათგან 32 845 დაკმაყოფილდა, 5159 არ დაკმაყოფილდა, 1244 – განუხილველი დარჩა.
სახელმწიფო სერვისების განვითარების სააგენტოს წარმომადგენელი სასამართლო პროცესებზე აცხადებს, რომ შესული განცხადებების დიდი ნაწილი კმაყოფილდება. ხშირ შემთხვევაში, როცა უცხოელებს უარს ეუბნებიან ბინადრობის ნებართვაზე, არის ეს ე.წ. უსაფრთხოების საფუძველი. სამწუხაროდ, არ გვაწვდიან ჩაშლილ სტატისტიკას, რათა გავიგოთ, რომელი ქვეყნების მოქალაქეებს ეუბნებიან უარს, რომ შედარების საშუალება გვქონდეს, რომელი ქვეყნების მოქალაქეები იღებენ ყველაზე ხშირად უარს.
ჩვენ ვიკვლევთ: რომელიმე კატეგორიის ქვეყნის მოქალაქეების მიმართ დისკრიმინაციული მიდგომა ხომ არ ხდება, რაღაც ნიშნით ხომ არ არის ათვალწუნებული რომელიმე ქვეყანა?
თქვენთანშემოსულისაქმეებირასაჩვენებს, რომელიქვეყნისმოქალაქეებსეუბნებიანყველაზეხშირადუარს, მაგალითად, რუსეთისმოქალაქეებსაქვთბინადრობისპრობლემა?
მე ბოლო 3 წელია ვმუშაობ TDI-ში და ბენეფიციარები, ძირითადად, გვყავს ახლო აღმოსავლეთისა და აფრიკის ქვეყნებიდან, ასევე ინდოეთიდან.
საბა სუთიძე
ძირითადად 2024 წელს დაიწყო ტენდენცია, როცა მასობრივად უუქმებდნენ უცხოელებს ბინადრობის ნებართვას. სტუდენტური და შრომითი ბინადრობის ნებართვებთან დაკავშირებით პრობლემები ჰქონდათ ახლო აღმოსავლეთიდან, ნიგერიიდან, ინდოეთიდან ჩამოსულ მოქალაქეებს.
2024 წლის აგვისტოში დაიწყო ტენდენცია, როცა სახელმწიფო უსაფრთხოების საფუძვლით ერთ დღეს გაუუქმეს, მაგალითად, 8 სტუდენტს ბინადრობა. ჩავეძიეთ ამ საკითხს და აღმოჩნდა, რომ თითოეული მათგანი მონაწილეობდა თბილისში, მუსლიმი სტუდენტების პარასკევის ლოცვაში. მაშინ ფეისბუკში გავრცელდა ლოცვის ამსახველი ვიდეო, როგორ ლოცულობენ „ნიუ ვიჟენ“ უნივერსიტეტის ტერიტორიაზე, ღია სივრცეში მუსლიმი სტუდენტები.
იქ დაიწერა ტექსტები, რომ „აი, შუაგულ თბილისში ეს ხდება.“
შეიძლება ითქვას, რომ სასამართლო პერსპექტივა არ არის მაინცდამაინც იმედის მომცემი.
მე რაც ვარ TDI-ში, ბოლო სამი წელია, ბინადრობის ნებართვასთან დაკავშირებით მოვიგეთ მხოლოდ ერთი საქმე, ისიც ნაწილობრივ. ეს იყო ინდოელი სტუდენტი გოგოს საქმე. დანარჩენი ყველა, ვისაც უარი უთხრეს, ბიჭები იყვნენ. გოგოსაც ჩაუწერეს „უსაფრთხოება“ და შრომითი ბინადრობის ნებართვაზე უარი უთხრეს. ეს გოგო იყო სამედიცინო ფაკულტეტის დოქტორანტი და პარალელურად მუშაობდა.
მოსამართლემ გააუქმა სააგენტოს გადაწყვეტილება, თუმცა ჩვენ ვითხოვდით ასევე სააგენტოს დავალდებულებას – გაეცა ბინადრობის ნებართვა, რაც სასამართლომ არ გააკეთა, არამედ მან სააგენტოს დაავალა საკითხის ხელახლა განხილვა. შემდეგ ამ გოგომ დატოვა საქართველო და სააგენტოს ხელახლა არ უმსჯელია ბინადრობის საკითხზე.
მთავარი პრობლემა არის ის, რომ უარს ძირითადად ედება საფუძველი „უსაფრთხოება“, რაც არის საიდუმლო ინფორმაცია: რის საფუძველზე მიიჩნია სუსმა კონკრეტულ შემთხვევაში, რომ არსებობს უსაფრთხოების გამო უარის თქმის საფუძველი? – ეს საფუძველი სააგენტომაც არ იცის, რომელიც ნებართვას გასცემს. სააგენტო ბინადრობის ნებართვის გაცემამდე ითხოვს ინფორმაციას სხვადასხვა უწყებიდან, მათ შორის, სუსიდან.
რეალურად, რას უთითებს სუსი კონკრეტულ შემთხვევაში, ამას მხოლოდ მოსამართლე ეცნობა. მოსამართლემ უნდა შეაფასოს, რამდენად კანონიერად უთხრეს უარი უცხოელს ბინადრობაზე.
მაგალითად, იმ საქმეზე, როცა მოსამართლემ ნაწილობრივ დააკმაყოფილა ჩვენი მოთხოვნა, პროცესის დასრულების შემდეგ მოსამართლემ არაფორმალურ საუბარში აღნიშნა, რომ, მოცემულ შემთხვევაში, სახელმწიფო უსაფრთხოებაზე საუბარი არასერიოზული იყო. არ გამოვრიცხავ იმას, რომ საერთოდ არანაირი ინფორმაცია არ არსებობს სუს-ში, უბრალოდ რაღაც კატეგორია შეიძლება ჰქონდეთ მონიშნული და შემდეგ იყენებენ შაბლონს, აი, სახელმწიფო უსაფრთხოების გამო გეუბნები უარს.
მე მუდმივად მიწევს სასამართლო პროცესებზე იმის თქმა, რომ საეჭვოა, ქვეყანაში სახელმწიფოსთვის საფრთხის გამომწვევი ამდენი ადამიანი იყოს. ამას იმიტომ ვამბობ, რომ კანონის მიხედვით, სახელმწიფო უსაფრთხოების ინტერესებთან წინააღმდეგობა მოიცავს მხოლოდ ისეთ შემთხვევებს, როდესაც:
პირის საქართველოში ყოფნა საფრთხეს უქმნის საქართველოს სხვა სახელმწიფოებთან ან/და საერთაშორისო ორგანიზაციებთან ურთიერთობას;
არსებობს ინფორმაცია, რომელიც ალბათობის მაღალი ხარისხით მიუთითებს პირის კავშირზე:
საქართველოს თავდაცვისა და უსაფრთხოებისადმი მტრულად განწყობილი ქვეყნის/ორგანიზაციის შეიარაღებულ ძალებთან;
სხვა სახელმწიფოს სადაზვერვო სამსახურებთან;
ტერორისტულ ან/და ექსტრემისტულ ორგანიზაციებთან;
ნარკოტიკების, შეიარაღების, მასობრივი განადგურების იარაღის ან მათი კომპონენტების უკანონო ბრუნვასთან, ადამიანით ვაჭრობის (ტრეფიკინგის) ან/და სხვა სახის დანაშაულებრივ ორგანიზაციებთან [მათ შორის, ტრანსნაციონალურ დანაშაულებრივ ორგანიზაციებთან].
ამიტომაც, ჩნდება ეჭვი, რომ ბოროტად იყენებენ სახელმწიფო უსაფრთხოების საფუძველს.
რეალურიმოტივაციარაშეიძლებაჰქონდეს „ოცნებას“?
შეიძლება ვივარაუდოთ, რომ ეს არის მიგრაციის კონტროლის ერთ-ერთი საშუალება – კონკრეტული, არასასურველი ქვეყნების წარმომადგენლები არ დარჩნენ ქვეყანაში.
არაა გამორიცხული კორუფციული ინტერესიც, რომ შესაბამისი უწყებების წარმომადგენლები, ბინადრობის ნებართვებთან დაკავშირებით შექმნილი პრობლემების „მოგვარების“ სანაცვლოდ, უცხოელებთან კორუფციულ გარიგებაში შესვლას ცდილობდნენ. რამდენადაც ვიცი, ერთ-ერთმა ადვოკატმა ასეთი საქმის გამოძიების მოთხოვნით განცხადება და შესაბამისი მტკიცებულებები პროკურატურასაც წარუდგინა.
კიდევ ერთი ტენდენცია მინდა გამოვყო: უცხოელი ჟურნალისტები. ეს ტენდენციაც 2024 წლიდან იკვეთება – ევროპელ ჟურნალისტებს არ უშვებენ საქართველოში, ან უუქმებენ ბინადრობას. მხოლოდ 7 ასეთი საქმეა ჩვენს ორგანიზაციაში.
ამ ჟურნალისტებს შორის არის შემთხვევა, როცა საფრანგეთის მოქალაქე, ასევე ლიეტუვის მოქალაქე დაოჯახებულია საქართველოს მოქალაქესთან. მათ გაუუქმეს მუდმივი ბინადრობის ნებართვა. საქართველოს მოქალაქესთან ქორწინების საფუძველზე ამ უცხოელ ჟურნალისტებს ჰქონდათ მუდმივი ბინადრობა. ეს საქმეები სასამართლო განხილვის ეტაპზეა.
საგრძნობია, რომ ჟურნალისტები და სამოქალაქო ორგანიზაციის წარმომადგენლები „ოცნების“ განსაკუთრებული სამიზნეა.
ერთადერთი სამართლებრივი გზა არის სასამართლოში გასაჩივრება. რა თქმა უნდა, სჯობს, რომ გაასაჩივრონ უარი. თუნდაც წარუმატებელი იყოს საქმე, სამართლებრივი გზა უნდა სცადონ ბოლომდე. საერთოდ რომ არ ასაჩივრებ, ეს იმას ნიშნავს, რომ პრეტენზია არც გაქვს.
ამასთან, უნდა იცოდნენ, რომ ჩვენს სასამართლოში არ არის კარგი სიტუაცია და სასამართლო მთავრობის მხარის დაჭერას არჩევს ყოველთვის. მით უმეტეს, ამ ტიპის საქმეებში, მარტივად შეიძლება „გამოძვრეს“ მოსამართლე – გეტყვის, რომ სუსმა თითქოს მიაწოდა დასაბუთება.
იცით დღეს არსებული პრობლემები, როგორ ქრებიან და სუსტდებიან დემოკრატიული ინსტიტუტები. ჩვენ ამ ეტაპზე მხოლოდ ერთი ადვოკატი გვყავს, ვინც მუშაობს სასამართლოში მსგავს საქმეებზე, თუმცა გვაქვს სამართლებრივი კონსულტაციების გაწევის საშუალება.
უკრაინის პრეზიდენტმა, ვოლოდიმირ ზელენსკიმ რუსული ძალების მიერ უკრაინაში 24 მაისის ღამით განხორციელებულ მასშტაბურ თავდასხმაზე ისაუბრა და განაცხადა, რომ სულ მცირე 83 ადამიანი დაშავდა. უკრაინის საჰაერო ძალების ცნობით, თავდასხმის დროს 90 რაკეტა, მათ შორის „ორეშნიკი“ და სხვადასხვა ტიპის 600 დრონი გამოიყენეს.
„პუტინს სიტყვა „ურა“-ს ნორმალურად წარმოთქმაც კი აღარ შეუძლია – ის ბუტბუტებს, მაგრამ მაინც ანადგურებს საცხოვრებელ სახლებს თავისი რაკეტებით.
თავდასხმის შედეგად სამი რუსული რაკეტა წყალმომარაგების ობიექტს მოხვდა, ბაზარი დაიწვა, ათობით საცხოვრებელი შენობა და რამდენიმე სკოლა დააზიანა. მან თავისი რაკეტა „ორეშნიკი“ ბელაიაცერკოვაზე გაუშვა. ნამდვილი სიგიჟეა“, – განაცხადა ზელენსკიმ.
ზელენსკიმ ხაზი გაუსვა უკრაინის საჰაერო თავდაცვის, განსაკუთრებით ბალისტიკური რაკეტებისგან უზრუნველყოფის მიზნით მუშაობის გაგრძელების მნიშვნელობას.
„რუსეთის სიახლოვეს ყოფნა – ეს არის მუდმივი საფრთხე. ჩვენი ხალხი უკრაინაში ამ საფრთხეს აკავებს, თუმცა, მსოფლიომ ნათლად უნდა დაინახოს, ვისთან გაქვთ საქმე. ეს სრულმასშტაბიანი ომის მეხუთე წელია და პირველივე წამებიდან ეს რუსეთის მიერ სიცოცხლის წინააღმდეგ წარმოებული არაპროვოცირებული ტერორისტული ომია.
ჩვენ ყველაფერს ვაკეთებთ მშვიდობის დასამყარებლად და ადამიანების დასაცავად, ყველაფერს, რაც შეგვიძლია. მნიშვნელოვანია, რომ უკრაინა მარტო არ დარჩეს. ჩვენ გვჭირდება ამერიკის შეერთებული შტატების, ევროპისა და სხვების მხრიდან გადაწყვეტილებები, რათა ამ მოხუცმა „ორეშნიკმა“ მოსკოვში სიტყვა „მშვიდობა“ წარმოთქვას“, – განაცხადა ზელენსკიმ.
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 24 მაისის 21 საათიდან 25 მაისის 21 საათამდე აჭარაში მოსალოდნელია დროგამოშვებით ღრუბლიანობის მომატება, უმეტეს რაიონში წვიმა, შესაძლებელია ელ-ჭექიც.
იქროლებს ცვალებადი მიმართულების ქარი 10-15 მეტრი წამში.
ჰაერის ტემპერატურა სანაპირო ზოლსა და მთიან მუნიციპალიტეტებში:
2026 წლის აპრილში ბათუმში 1 292 საცხოვრებელი ბინა გაიყიდა. მონაცემებს საინვესტიციო მენეჯმენტის კომპანია „კოლიერსი“ აქვეყნებს.
კოლიერსის მონაცემების მიხედვით გაყიდული ბინების რაოდენობა გასული წლის აპრილთან შედარებით 12.3%-ით გაიზარდა, ხოლო უძრავი ქონების ბაზრის ზომა 27.4%-ით და 85 მილიონ აშშ დოლარი შეადგინა.
რაც შეეხება ფასებს: 2026 წლის აპრილში ბათუმში ახალაშენებული ბინების საშუალო შეწონილი ფასი გასული წლის აპრილთან შედარებით 11.3%-ით გაიზარდა და კვ.მ-ზე 1 351 აშშ დოლარი შეადგინა.
პირველად ბაზარზე მაჩვენებელი 15.2%-ით გაიზარდა, ხოლო მეორეულ ბაზარზე 9.4%-იანი ზრდა დაფიქსირდა.
„კოლიერსის“ მონაცემებით, 2026 წლის აპრილში ბათუმში უფრო მეტი ახალაშენებული ბინა გაიყიდა, ვიდრე ძველი.
„ახალაშენებული ბინების ტრანზაქციების რაოდენობა 2025 წლის აპრილთან შედარებით 12.3%-ით გაიზარდა, ძველი ბინების ტრანზაქციებმა კი 5.4%-ით იკლო. ტრანზაქციების რაოდენობა გაიზარდა როგორც პირველად (+13.3%), ისე მეორეულ (+11.6%) ბაზრებზე. უცხოელი მყიდველების წილი ძველი და ახალი პროექტების ტრანზაქციებში გასული წლის აპრილთან შედარებით გაიზარდა და 47% შეადგინა.
ახალ და ძველ პროექტებში ტრანზაქციების რაოდენობის ზრდის 90% უცხოელ მყიდველებზე მოდის,“ – ნათქვამია გასული თვის ტრანზაქციების მიმოხილვაში.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 24 მაისამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 355 920 ადამიანი [გასულ დღე-ღამეში +1 110. ამ მონაცემებში შედის როგორც დაღუპულები, ასევე დაჭრილები]
ტანკი – 11 950 ერთეული [+1]
ჯავშანტექნიკა – 24 603 ერთეული [+4]
საარტილერიო სისტემა – 42 640 ერთეული [+61]
MLRS – 1 800 ერთეული [+1]
საზენიტო საბრძოლო სისტემა – 1 396 ერთეული [+2]
თვითმფრინავი – 436 ერთეული [+0]
ვერტმფრენი – 353 ერთეული [+0]
უპილოტო საფრენი აპარატის ოპერატიულ-ტაქტიკური დონე – 308 321 ერთეული [+1 843]
სახმელეთო რობოტიზებული კომპლექსი – 1 451 ერთეული [+7]
გემი/ნავი – 33 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 98 698 ერთეული [+292]
სპეცტექნიკა – 4 216 ერთეული [+4]
ფრთოსანი რაკეტა [ჩამოაგდეს] – 4 632 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
ბათუმში, ფრიდონ ხალვაშის გამზირზე ერთმანეთს სამი ავტომანქანა შეეჯახა, დაშავდა ერთი ადამიანი, ის საავადმყოფოში გადაიყვანეს.
ადგილზე მობილიზებული იყო პოლიცია და სასწრაფო დახმარების ჯგუფი. დაშავებული 40 წლამდე კაცია.
შინაგან საქმეთ სამინისტროს ინფორმაციით დაწყებულია გამოძიება სისხლის სამართლის კოდექსის 276-ე მუხლით, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.
სამ თვეში ჯარიმებისა და საურავების სახით ბათუმის ბიუჯეტში პროგნოზით გათვალისწინებულზე ორჯერ მეტი, 6 მილიონ 480 500 ლარი შევიდა, მერია 3 მილიონ 500 000 ლარის ამოღებას ვარაუდობდა. გეგმა 185. 2 პროცენტით შესრულდა.
პირველი კვარტლის ანგარიშში არ იძებნება დეტალური ინფორმაცია კონკრეტულად რა ჯარიმებმა გააორმაგა თანხა, თუმცა რთული გამოსაცნობი არ არის, რომ დიდი წილი საგზაო წესის დარღვევით გამოწვეულ ადმინისტრაციულ ჯარიმებზე მოდის. ამის დადასტურება სახელმწიფო ხაზინის ყოველთვიური ანგარიშიდანაც შეიძლება.
ფინანსთა სამინისტროს ხაზინის ანგარიშის მიხედვით 2026 წლის პირველ კვარტალში სახელმწიფო ბიუჯეტში „სხვა შემოსავლები“ მნიშვნელოვნად სწორედ ჯარიმებით გაზარდა. მათ შორის კი ყველაზედიდი შენატანი საგზაო წესის დარღვევით გამოწვეული და ადმინისტრაციული ჯარიმებისგან დაფიქსირდა.
საგზაო წესების დარღვევისთვის 2026 წლის პირველ კვარტალში, ქვეყნის მასშტაბით, 79,7 მილიონი ლარი ამოიღეს, რაც წინა წლის იგივე პერიოდის შედეგებთან შედარებით ორჯერ მეტია.
სახელმწიფო ხაზინას უკვე გამოქვეყნებული აქვს 4 თვის მონაცემებიც, რომლის მიხედვითაც ბიუჯეტში საინქციების, ჯარიმებისა და საურავების სახით ასახულია 154 მილიონ 912 789 ლარი. აქედან 108 მილიონ 264 051 ლარი საგზაო მოძრაობის წესების დარღვევის გამო გამოწერილმა ჯარიმებმა შეადგინა.
უბილეთოდ მგზავრობის გამო დაკისრებული ჯარიმებიდან კი ბიუჯეტში 1 მილიონ 111 632 ლარი შევიდა. ავტომობილის გაჩერების წესების გათვალისწინებული
მოთხოვნების დაუცველობისათვის ბიუჯეტში 14 მილიონ 202 485 ლარი გადაუხდიათ.
ჯარიმებიდან შესული თანხა ბიუჯეტში „სხვა შემოსავლების“ ნაწილში აისახება. პირველ კვარტალში ბათუმის ბიუჯეტის სხვა შემოსავლების ნაწილში 28 მილიონ 713 900 ლარი შევიდა, პროგნოზი 25 მილიონ 750 000 ლარი იყო.
სხვა შემოსავლების წილი ადგილობრივი ბიუჯეტის მთლიან შემოსულობებში 32.5%-ს შეადგენს.
საერთო ჯამში ბათუმის მუნიციპალიტეტის 2026 წლის 3 თვის ბიუჯეტის ფაქტიურმა შემოსულობებმა 88 მილიონ 296 500 ლარი შეადგინა.
შემოსულობებიდან 22 მილიონ 559 000 ლარი გადასახადების სახით მიღებულ შემოსავლებზე მოდის, ანუ შემოსულობების – 25.5%. 36 მილიონ 505 800 ლარი გრანტები და ფინანსური დახმარებაა. 28 მილიონ 713 000 ლარი კი არასაგადასახადო შემოსავლები.
ბათუმის მერიაში ჯერ ისევ არ აქვთ პასუხი კითხვაზე დაიწყება თუ არა 2026 წელს ე.წ. „იაფი სახლის“ მშენებლობა.
„2026 წლის ბიუჯეტის პროექტში 100 ათასი ლარი გათვალისწინებულია ე.წ. იაფი სახლის პროგრამისთვის. ამ ეტაპზე მიმდინარეობს მისამართების შერჩევა, რის შემდეგაც განხორციელდება პროექტის შესყიდვა“ – ეს პასუხი 2026 წლის აპრილში მივიღეთ.
ერთი თვის შემდეგ მერიაში ისევ არ იციან სად და როდის დაიწყება „იაფი სახლის“ მშენებლობა და არც პროექტის შესყიდვაზე გამოუცხადებიათ ტენდერი.
ამის პარალელურად ჯერ ისევ არ დაწყებულა ბიზნესმენ გალიფ ოზთურქითვის ჩამორთმეული კორპუსების საცხოვრებელ ბინებად გადაკეთების პროცესი, როგორც ამას მთავრობა დაჰპირდა უსახლკაროებს.
სხვადასხვა ჯგუფი, მათ შორის, უსახლკაროდ დარჩენილი ოჯახები პერიოდულად აქციებს მართავენ და ამ კორპუსებში არსებული ბინების სოციალურად დაუცველი ოჯახებისთვის გადაცემას ითხოვენ.
მერიის ინფორმაციით ამ კორპუსების საცხოვრებლად მომზადებისთვის განაშენიანების დეტალური გეგმის შესყიდვას გეგავენ, „რადგან კორპუსები აშენებულია ყოველგვარი წინასწარი კვლევების გარეშე, შესაბამისად განაშენიანების პარამეტრები არასტანდარტულია“.
2024 წელს მერიამ „იაფი სახლის“ მშენებლობის ადგილად ე.წ. გოროდოკის დასახლება დაასახელა, მერიის შესაბამისმა სამსახურმა, საქალაქო ინფრასტრუქტურისა და კეთილმოწყობის სამმართველომ, ბაზრის კვლევაც კი ჩაატარა.
დოკუმენტების მიხედვით, მერიას ვოლსკის ქუჩაზე, #13-ში, 200 ოჯახზე გათვლილი კორპუსი უნდა აეშენებინა, თუმცა მშენებლობა ამ დრომდე არ დაწყებულა.
„იაფი სახლის“ პროგრამის ფარგლებში ბინები ბოლოს მერიამ 2023 წელს გაანაწილა. ამის შემდეგ მოქალაქეებმა პროგრამაში მონაწილეობისთვის განაცხადების შეტანა დაიწყეს, ამის პარალელურად მერიამ შეცვალა პროგრამის კრიტერიუმები, ხოლო ზოგი დეტალი დააზუსტა.
თეთრიწყაროს რაიონული სასამართლოს მოსამართლე ვლადიმერ ხუჭუა პორტუგალიაში, ქალაქ ლისაბონში გამართულ ევროპის ადმინისტრაციული მოსამართლეების ასოციაციის [AEAJ] გენერალურმა ასამბლეამ ასოციაციის წევრად აირჩია, ის დამოუკიდებელი და ეფექტიანი სასამართლოების საკითხებზე არსებულ სამუშაო ჯგუფს შეუერთდება.
ღონისძიება დემოკრატიული ინსტიტუტებისა და ადამიანის უფლებათა ოფისის [OSCE-ODIHR] და სხვა საერთაშორისო ორგანიზაციების პარტნიორობით გაიმართა.
ასამბლეის ფარგლებში შეხვედრაში მონაწილეობდნენ სამართლის ექსპერტები და სხვადასხვა ქვეყნების მოქმედი მოსამართლეები.
ევროპელმა მოსამართლეებმა ვლადიმერ ხუჭუას კანდიდატურას ერთხმად დაუჭირეს მხარი.
მოსამართლის განცხადებით ეს გადაწყვეტილბა „დიდ პატივთან ერთად დიდი პასუხისმგებლობაა მისთვის და საერთშორისო ფორმატების საშუალებით, მნიშვნელოვან ძალისხმევას მიმართავს ქართული მართლმსაჯულების განვითარებისთვის.“
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 23 მაისამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 354 810 ადამიანი [გასულ დღე-ღამეში +950. ამ მონაცემებში შედის როგორც დაღუპულები, ასევე დაჭრილები]
ტანკი – 11 949 ერთეული [+5]
ჯავშანტექნიკა – 24 599 ერთეული [+5]
საარტილერიო სისტემა – 42 579 ერთეული [+68]
MLRS – 1 799 ერთეული [+1]
საზენიტო საბრძოლო სისტემა – 1 394 ერთეული [+4]
თვითმფრინავი – 436 ერთეული [+0]
ვერტმფრენი – 353 ერთეული [+0]
უპილოტო საფრენი აპარატის ოპერატიულ-ტაქტიკური დონე – 306 478 ერთეული [+1 819]
სახმელეთო რობოტიზებული კომპლექსი – 1 444 ერთეული [+4]
გემი/ნავი – 33 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 98 406 ერთეული [+201]
სპეცტექნიკა – 4 212 ერთეული [+5]
ფრთოსანი რაკეტა [ჩამოაგდეს] – 4 632 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
ქობულეთის შემოვლითი გზა, ქობულეთისა და ჩაქვის სატრანსპორტო კვანძებს შორის 14 მაისიდან ჩაკეტილია. გზაზე სახიდე გადასასვლელის დაზიანებულ სადეფორმაციო ნაკერებს ცვლიან. გზის ჩაკეტვის გამო საცობებია ციხისძირსა და ჩაქვი-მახინჯაურის გვირაბებს შორის მონაკვეთში.
გზების დეპარტამენტის ინფორმაციით, გზა 28 მაისს უნდა გაიხსნას. სამუშაოების მიმდინარეობის ადგილზე კი „ბათუმელებს“ უთხრეს, რომ ამ დროისთვის გზის გახსნა მოესწრება, თუმცა, ყველაფერი მაინც ამინდზეა დამოკიდებული.
სახიდე გადასასვლელის სადეფორმაციო ნაკერების შეცვლა ქობულეთის შემოვლით გზაზე / 22.5.2026
„სპეციალური მექანიზმი უკვე დამონტაჟებულია და დღეს [22 მაისს] ბეტონს ჩავასხამთ. ბეტონის გაშრობას 4 დღე დასჭირდება და 27-28 მაისისთვის გზის გახსნა მოესწრება, თუმცა, ეს მაინც ამინდზეა დამოკიდებული. უამინდობის [წვიმის] შემთხვევაში შესაძლოა გზის გახსნა გადავადდეს“, – გვითხრეს ადგილზე დასაქმებულებმა.
სადეფორმაციო ნაკერი აუცილებელი ელემენტია, რომელიც ხიდის/ესტაკადის ცალკეულ სექციებს შორის მოძრაობის საშუალებას იძლევა და ამით მის სტრუქტურულ მთლიანობას ინარჩუნებს. ასეთი ლითონის ელემენტები იცავს ბეტონის კონსტრუქციას დაბზარვისგან და ხიდს აძლევს მოქნილობას ტემპერატურის ან დატვირთვის ცვლილების დროს.
სახიდე გადასასვლელის სადეფორმაციო ნაკერების შეცვლა ქობულეთის შემოვლით გზაზე / 22.5.2026
ქობულეთის შემოვლითი გზაზე დაზიანებული სადეფორმაციო ნაკერები 2025 წლის ნოემბერში სქელი ლითონის ნაჭრით დაფარეს. ამ მონაკვეთში ტრანსპორტის მოძრაობის მაქსიმალური სიჩქარე კი, 50 კილომეტრ საათამდე შეზღუდეს.
ქობულეთის შემოვლითი გზის სახიდე გადასასვლელი / ჩაქვი, ზედა აჭყვა / 22.05.2026
ქობულეთის შემოვლით გზაზე სახიდე გადასასვლელის სადეფორმაციო ნაკერების შეცვლის სამუშაოები დაბა ჩაქვისა და სოფელ ზედა აჭყვის ადმინისტრაციულ საზღვართან მიმდინარეობს.
სადეფორმაციო ნაკერების შეცვლის სამუშაოები ქობულეთის შემოვლითი გზის სახიდე გადასასვლელზე / ჩაქვი / 22.05.2026
ამჯერად კი ქობულეთის შემოვლით გზაზე დაშვებული მაქსიმალური სიჩქარე 90 კმ/საათიდან 70 კმ/საათამდეა შემცირებული.
სადეფორმაციო ნაკერების შეცვლის სამუშაოები ქობულეთის შემოვლითი გზის სახიდე გადასასვლელზე / ჩაქვი / 22.05.2026
დაგეგმილია, რომ ქობულეთის შემოვლითი ორზოლიანი გზა ოთხზოლიან მაგისტრალად გადააკეთონ. გზის მოდერნიზებაზე მუშაობა გზების დეპარტამენტმა მისი სრულად გახსნიდან 5 წლის შემდეგ, 2023 წელს დაიწყო.
პროექტზე გარემოს ეროვნულმა სააგენტომ დადებითი გარემოსდაცვითი გადაწყვეტილება უკვე გასცა, რაც იმას ნიშნავს, რომ საავტომობილო გზების დეპარტამენტს შემდეგ ეტაპზე გადასვლის შესაძლებლობა უკვე აქვს.
პროექტის განხორციელების მიზნით, მშენებელი კომპანიის შესარჩევად, ტენდერი უნდა გამოაცხადონ.
სადეფორმაციო ნაკერების შეცვლის სამუშაოები ქობულეთის შემოვლითი გზის სახიდე გადასასვლელზე / ჩაქვი / 22.05.2026
ქობულეთის შემოვლითი გზის ჩაკეტვის გამო „ძველი“ გზა ჩაქვის ტერიტორიაზე მანქანებს თავისუფლად ვეღარ ატარებს, რის გამოც გზაზე საცობებია.
რა თანხა დაიხარჯება ქობულეთის შემოვლით გზაზე სადეფორმაციო ნაკერების შეცვლაზე ამ დროისთვის ინფორმაცია არ გვაქვს.
ქობულეთის შემოვლითი გზა დაბა ჩაქვში / გზა ამ დროისთვის ჩაკეტილია და მიმდინარეობს სადეფორმაციო ნაკერების შეცვლის სამუშაოები / 22.05.2026
ქობულეთის შემოვლითი გზა ქობულეთისა და ჩაქვის სატრანსპორტო კვანძებს შორის 28 მაისამდეა ჩაკეტილი. ჩაკეტილია ასევე ხუცუბნისა და კვირიკეს კვანძები.
დიუშენის კუნთოვანი დისტროფიით დაავადებული ბავშვების მხარდამჭერ კამპანიაში „მასწავლებლის ეროვნული ჯილდოს“ ათეულთა კლუბიც ერთვება.
ამის შესახებ ეროვნული ჯილდოს მფლობელი პედაგოგი, ლადო აფხაზავა წერს ფეისბუქზე.
„ჩვენ, მასწავლებლები ვზრდით მომავალ თაობებს – სიტყვით, ცოდნით, სიყვარულით, ოღონდ უფრო მეტად, მაგალითებით.
დღეს დიუშენის სინდრომით დაავადებულ ბავშვებს ყველაზე მეტად ჩვენი თანადგომა სჭირდება. თითოეულ ჩვენთაგანს შეუძლია თუნდაც მცირედ ხელის გაწვდენით, წვეთ-წვეთობით ავავსოთ სიკეთის ფიალა.
65 ათასამდე მოქმედი მასწავლებელია საქართველოში, გავიღოთ მცირედი ბავშვებისთვის,“- ნათქვამია განცხადებაში. იდეის და განცხადების ტექსტის ავტორი მასწავლებელი ირმა გორდელაძეა.
ათეულთა კლუბს მითითებული აქვს ანგარიშის ნომრებიც, სადაც ბავშვების დახმარების მსურველებს შეუძლიათ თანხა ჩარიცხონ.
საქართველოს ბანკი – GE04BG0000000470581300
მიმღები: ვ. ა.
ლიბერთი ბანკი – GE73LB0711104473817440
მიმღები: ვ.ა
დიუშენის კუნთოვანი დისტროფიით დაავადებული ბავშვების მხარდამჭერად 20 მაისს მარათონი დაიწყო ილიას სახელმწიფო უნივერსიტეტის სტუდენტთა კლუბმა, რომლებმაც ამ დროისთვის [22 მაისი, 20:00 საათი] ნახევარი მილიონი ლარის შეგროვება შეძლეს.
საქველმოქმედო კამპანია ისევ გრძელდება.
საქართველოში დიუშენის დაავადების მქონე ასამდე ბავშვი ცხოვრობს, რომლებსაც სასიცოცხლოდ მნიშვნელოვანი მედიკამენტები ესაჭიროებათ. ბავშვები და მშობლები ერთ თვეზე მეტია აქციას მართავენ თბილისში, მთავრობის კანცელარიის ეზოში და მოითხოვენ, სახელმწიფომ უზრუნველყოს ბავშვებისთვის საჭირო მედიკამენტების შემოტანა.
„ქართული ოცნების“ ხელისუფლება ჯერ-ჯერობით უარს ამბობს წამლების შემოტანაზე.
ბათუმში, გიორგი ბრწყინვალეს #63-ში, ორი ოჯახის კომერციული ფართობების შესასვლელები მერიამ ისე გაყიდა, რომ ამ შენობების მესაკუთრეებს არაფერი გაუგიათ. ამ კომერციული ფართობების მესაკუთრეები აცხადებენ, რომ მერიამ ისინი „ოცნების“ მთავრობის მინისტრის მოადგილის, გიორგი მანველიძის ოჯახის ბიზნესპარტნიორის სასარგებლოდ დაჩაგრა.
კომერციული ფართობების მესაკუთრეების თქმით, ამ მიწის ნაკვეთების დარეგისტრირებას თავადაც ცდილობდნენ, როცა პარლამენტმა დაამტკიცა კანონი თვითნებურად დაკავებული მიწის დაკანონების შესახებ, თუმცა უშედეგოდ – მერიამ არც უარი უთხრა და არც დაურეგისტრირა. 2024 წლის სექტემბერში კი მიწა სხვა პირს მიჰყიდეს.
დოკუმენტების მიხედვით, მერიამ სადავო მიწა ასმათ არძენაძეს მიჰყიდა. თუმცა, კომერციული ფართობების მესაკუთრეები ამბობენ, რომ ასმათ არძენაძე მათთან არასოდეს გამოჩენილა. ტელეფონით შეეხმიანა და ადგილზეც მივიდა მყიდველის სიძე, სამშენებლო ბიზნესის ერთ-ერთი მფლობელი, ბექა თვალაძე.
„გვემუქრება აქედან გაგყრით, გადაგწვავთ, იმდენ ჯარიმებს დავაწერინებ თქვენზე, დამიჩოქებთ, რომ თქვენი საკუთრება ვიყიდოო“, – გვიყვება ლამარა აბაშიძე, ერთ-ერთი მესაკუთრე და დასძენს, რომ მუქარა შეუსრულეს კიდეც.
მესაკუთრეებმა იციან ისიც, რომ ბექა თვალაძე ბათუმში სახელისუფლებო გავლენების მქონე ოჯახის, მანველიძეების პარტნიორია და ამიტომაც ახერხებს საჯარო სტრუქტურებში საქმის ისე მოგვარებას, როგორც თავად სურს.
ბექა თვალაძე აჭარის ფინანსთა და ეკონომიკის მინისტრის მოადგილის, გიორგი მანველიძის ძმის ბიზნესპარტნიორია. ოფიციალური დოკუმენტების მიხედვით, ბიზნესპარტნიორები არიან მინისტრის მოადგილის ძმის, ბექა მანველიძის და ბექა თვალაძის ცოლებიც – მათ სამშენებლო ბიზნესი აქვთ და წლებია კორპუსებს აშენებენ ბათუმსა და თბილისში.
ლამარა აბაშიძე
გიორგი ბრწყინვალეს #63-ში მდებარე მცირე ზომის მიწის ნაკვეთები ბათუმის მერიამ საპრივატიზებო ობიექტების ნუსხაში 2024 წელს შეიტანა, ფასი განსაზღვრა და საკრებულოს თანხმობაც მიიღო.
როცა მიწის ნაკვეთების საპრივატიზებო ობიექტების ნუსხაში შეტანასა და აუქციონის წესით მათ გასხვისებაზე საკრებულოს თანხმობა მოითხოვეს, მერიაში კარგად იცოდნენ, რომ ამ კონკრეტული ადგილით სარგებლობენ მოქალაქეები, რომლებსაც გასაყიდი მიწის ნაკვეთების გასწვრივ კომერციული შენობები აქვთ და კარგად იცოდნენ ისიც, რომ თუ ამ მიწას სხვა იყიდდა, ისინი საკუთარი ქონებას სათანადოდ ვეღარ გამოიყენებდნენ.
როგორც მოგვიანებით გაირკვა, სწორედ ეს უნდა ყოფილიყო მყიდველის უპირატესობაც, კერძო მესაკუთრეები კუთხეში უნდა მიემწყვდია, რომ უფრო მარტივად მიეღო თანხმობა შეთავაზებაზე, რომელიც მათთვის მომზადებული ჰქონდა. მისი გეგმა მესაკუთრეებისგან კომერციული ობიექტების სასურველ ფასად გამოსყიდვა და აქ კორპუსის მშენებლობაა.
როგორც ამ ოჯახებში გვიყვებიან, ეს კომერციული ფართობები არის მათი ერთადერთი საარსებო წყარო. ერთ ოჯახს მაღაზია აქვს, სადაც თავად მუშაობენ, მეორე მესაკუთრე კი კომერციულ ფართობს აქირავებს.
ბათუმი, გიორგი ბრწყინვალეს #63ბათუმი, გიორგი ბრწყინვალეს #63. წითელი ფერით მონიშნული ანზორ ძირკვაძის და ლამარა აბაშიძის საკუთრება, მწვანე ფერით კი 3 მცირე ზომის მიწის ნაკვეთი, რომელიც მერიამ გაყიდა.
საჯარო რეესტრის ამონაწერის მიხედვით, ლამარა აბაშიძის კომერციული ფართობის წინ მერიამ გაასხვისა 23 კვ.მეტრი, ანზორ ძირკვაძის საკუთრების წინ კი 41 კვ. მეტრი და 64 კვ.მეტრი მიწის ნაკვეთები.
მათივე მონათხრობით, ანზორ ძირკვაძემ და მისმა მეზობელმა ლამარა აბაშიძემ, როგორც ფაქტობრივმა მოსარგებლეებმა, მერიას არაერთხელ მიმართეს, რომ მათი შენობების წინ არსებული მიწის ნაკვეთები ისევე დაეკანონებინათ, როგორც ეს სხვებმა გააკეთეს. მათ კარგად იციან, რომ ქალაქში ასეთი მაგალითების პოვნა მრავლად შეიძლება.
ასეთი მაგალითების პოვნა, როცა თვითნებურად დაკავებული ფართობები უპრობლემოდ დაიკანონეს, მრავლად შეიძლება საჯარო მოხელეების, დეპუტატების ქონებრივ დეკლარაციებშიც. გიორგი ბრწყინვალეს #63-ში კომერციული ფართობების მესაკუთრეებმა იგივე უფლებით ვერ ისარგებლეს.
„მერიაში აგვიხსნეს, რადგან ორნი ხართ, ორი საკადასტრო ერთეულია საჭიროო. ნახაზები მოგვთხოვეს, ნახაზიც გავაკეთეთ. თუმცა, პროცესი მაინც გააჭიანურეს, ხან პანდემიის მიზეზით, ხან სხვა მიზეზით. ჩვენ ვაგროვებდით იმ დოკუმენტებს, რასაც მერია ითხოვდა. ყოველდღე ველოდით პასუხს მერიისგან“, – გვიყვება ანზორ ძირკვაძე.
ანზორ ძირკვაძე
2024 წელს, სექტემბერში ანზორ ძირკვაძეს უცნობმა პირმა დაურეკა:
„მოულოდნელად რეკავს ვიღაც ბექა თვალაძე და მეუბნება, შენი მაღაზია ვიყიდე, გვერდითა ტერიტორიაც ვიყიდე, მოვალ და გადავწვავ მაქაურობასო. გადავირიე კაცი, როგორ იყიდე ჩემი კერძო საკუთრება ისე, რომ მე არაფერი გამიგია-მეთქი. ავდექი და წავედი მერიაში, სადაც მანამდე არაერთხელ მივმართეთ მე და ჩემმა მეზობელმა, სწორედ იგივე ფართობების დაკანონების მიზნით“, – გვიყვება ანზორ ძირკვაძე.
ლამარა აბაშიძის თქმით, მუქარების შემდეგ მისი კომერციული ფართობის წინ ძველი მანქანა ჩააყენეს და შესასვლელი ჩაუკეტეს:
„ჩემი ფართობი გავაქირავე, როგორც კი დაინახა ბექა თვალაძემ, რომ დამქირავებელმა ავეჯის შეტანა დაიწყო, მოვიდა და შესასვლელი გადაკეტა. მანქანა ჩააყენა. ჩემი კლიენტი წავიდა, შეთანხმება გამიუქმა, რადგან ამ ფართობში ვერ იმუშავებდა“.
ლამარა აბაშიძის კომერციული ფართობი
მოქალაქეები გვიყვებიან ასევე, რომ ბექა თვალაძის ადგილზე მისვლისა და მუქარების შემდეგ, 30 წუთში მათთან მუნიციპალური ინსპექციის წარმომადგენლები მივიდნენ და ჯარიმები დაუწერეს.
მუნიციპალური ინსპექციის უფროსის, დავით მჭედლიძის 2026 წლის 20 აპრილის შეტყობინებით, ლამარა აბაშიძეს უნებართვო რეკონსტრუქციასთან დაკავშირებით ჯარიმა გამოუწერეს და მუნიციპალურ ინსპექციაში დაიბარეს. 15 მაისს კი მითითება მისცეს მის მეზობელს, ანზორ ძირკვაძეს.
ოფიციალური დოკუმენტის მიხედვით, ანზორ ძირკვაძეს მერიასთან 2019 წელს შეთანხმებული ესკიზი დაურღვევია და ამ დარღვევაზე მერია პასუხს ექვსი წლის შემდეგ სთხოვს. საინტერესოა, რას აკეთებდა მერია 2019 წლიდან დღემდე, რატომ არ მოსთხოვა პასუხი ანზორ ძირკვაძეს დარღვევაზე, ვიდრე ამ ადგილით ბექა თვალაძე არ დაინტერესდა?
რატომ დაიწყო მერიამ ადმინისტრაციული წარმოება 2019 წელს ჩადენილ სამართალდარღვევაზე 2026 წელს?
ასევე საინტერესოა, კიდევ ხომ არ დაურღვევია კანონი ვინმეს ამავე ქუჩაზე, ერთი კვარტლის მოშორებით, მაგალითად გიორგი ბრწყინვალის #42-ში? – საინტერესოა რა რეაგირება აქვს მერიას ამ საქმეზე? დაიბარეს დამრღვევი მერიაში ადმინისტრაციული წარმოების ფარგლებში ისევე, როგორც ლამარა აბაშიძე?
მითითებას, რომელიც ანზორ ძირკვაძეს სანებართვო პირობების დარღვევიდან [როგორც ამას მერიის წარმომადგენელი წერს] 6 წლის შემდეგ კომერციულ ობიექტზე მიაკრეს, ხელს აწერს ინსპექციის სპეციალისტი ასლან ბერიძე. მან მითითებაში დაწერა ისიც – მიწის ნაკვეთი დღესდღეობით კერძო საკუთრებას წარმოადგენსო.
ინსპექციამ იგივე მითითებით შეატყობინა ანზორ ძირკვაძეს, რომ 6000 ლარით დააჯარიმა.
ლამარა აბაშიძის დაჯარიმების უწყება
საჯარო რეესტრის ამონაწერის მიხედვით, სამი მიწის ნაკვეთი გიორგი ბრწყინვალეს #63-ში ბათუმის მერიამ 2024 წელს უპირობო აუქციონის წესით გაყიდა. ბათუმში არსებული პრაქტიკით, როცა მერიას მცირე ზომის ნაკვეთები გამოაქვს გასაყიდად, მათ ძირითადად მომიჯნავე ობიექტების მეპატრონეები ყიდულობენ. ამჯერად ასე არ მოხდა.
„ბათუმელების“ ინფორმაციით, სამი მცირე ზომის მიწის ნაკვეთი, ჯამში 120 კვ.მეტრი მერიამ, თითო ბიჯით, 227 650 ლარად გაყიდა.
ამ კონკრეტული ქონების გასხვისებასთან დაკავშირებით ბათუმის მერიაში კითხვებზე არ გვიპასუხეს. ვცადეთ ბექა თვალაძესთან დაკავშირებაც, თუმცა უშედეგოდ.
ვინ არის ბექა თვალაძე და რა კავშირი აქვს მას მანველიძეებთან?
ოფიციალური დოკუმენტების მიხედვით, ბექა თვალაძე ბათუმის ყოფილი ვიცე-მერის, ბაგრატ მანველიძის შვილის, ბექა მანველიძის ბიზნესპარტნიორია. ისინი აფუძნებენ სამშენებლო კომპანიებს და წილებს ინაწილებენ, ისევე, როგორც მათი ცოლები – თამთა ვერძაძე და ლანა აბალოიძე.
მანველიძეების ოჯახის კიდევ ერთი წევრია, აჭარაში „ოცნების“ მთავრობის ფინანსთა და ეკონომიკის მინისტრის მოადგილე, გიორგი მანველიძე, რომელიც 2025 წელს, ბათუმში, ექსპრემიერ გიორგი გახარიაზე თავდასხმის ერთ-ერთი ფიგურანტი იყო. მათი პარტნიორია ასევე მანველიძეების სამშენებლო ბიზნესთან დაკავშირებული კიდევ ერთი პირი, ანრი გეგუჩაძე.
საჯარო რეესტრის მონაცემებით, ბექა თვალაძე და ბექა მანველიძე შპს „ფორის დეველოპმენტის“ 50-50 პროცენტს ფლობენ, ეს კომპანია 2020 წელს ბექა თვალაძის მეუღლემ თამთა ვერძაძემ დააფუძნა. კომპანიის დირექტორი ბექა თვალაძეა. ეს კომპანია თბილისში, იალბუზის ქუჩაზე, კულტურული მემკვიდრეობის დაცვის ზონაში მრავალბინიან კორპუსს აშენებს.
ბექა თვალაძე და ბექა მანველიძე თანაბრად ინაწილებენ შპს „ფორის დეველოპმენტ 2“ – ის წილებს, ამ კომპანიამ თბილისში ქეთევან დედოფლის გამზირზე ააშენა საცხოვრებელი კორპუსი.
შპს „ბათუსი ჯგუფში“ ბექა თვალაძის პარტნიორი ანრი გეგუჩაძეა. ამ კომპანიამ ბათუმში, ფარნავაზ მეფის ქუჩა, N 120-124 – ში ააშენა კორპუსი.
ბექა თვალაძის მეუღლე თამთა ვერძაძე და ბექა მანველიძის მეუღლე ლანა აბალოიძე ფლობენ შპს „სმარტ ჰაუსს“. სხვათა შორის, ამ კომპანიამ ბათუმის ცენტრში, ზღვიდან ორ კვარტალში, მერიასთან შეთანხმებულ 15- სართულიან კორპუსის 2 სართული უკანონოდ დააშენა. ამაზე „ბათუმელები“ 2022 წელს წერდა.
დოკუმენტებით დგინდება, რომ მუნიციპალურმა ინსპექციამ შპს „სმარტ ჰაუსის“ მიერ სანებართვო პირობების დარღვევა მალევე დააფიქსირა, თუმცა ამით არაფერი შეცვლილა. კომპანიამ გაფრთხილება არ გაითვალისწინა და სამუშაოები კანონდარღვევით გააგრძელა.
დიდი ხნის განმავლობაში აჭარის ფინანსთა და ეკონომიკის მინისტრის მოადგილის, გიორგი მანველიძის მამა, ბათუმის ყოფილი ვიცე-მერი, ბაგრატ მანველიძე უარყოფდა, რომ ახვლედიანის ქუჩაზე, #3-ში, კორპუსის მშენებლობა სწორედ მის ოჯახთან დაკავშირებულმა კომპანიამ დაიწყო.
ყოფილი ვიცე-მერი აცხადებდა, რომ ამ მისამართზე საკუთრება მიჰყიდა მშენებლობით დაინტერესებულ კომპანიას. მშენებლობით კი მისი შვილის, ბექა მანველიძის პარტნიორის, ავთანდილ გეგუჩაძის კომპანია – „ელიტ ჰაუსი“ იყო დაინტერესებული, რომელმაც ააშენა კიდეც კორპუსი.
კომპანიამ მშენებლობის ნებართვა 2015 წელს ბაგრატ მანველიძის ვიცე-მერობის პერიოდში მიიღო.
ბექა მანველიძის ძმა გიორგი მანველიძე აჭარის ფინანსთა და ეკონომიკის მინისტრის მოადგილედ დანიშვნამდე აჭარის უმაღლეს საბჭოში „ოცნების“ ფრაქციას ხელმძღვანელობდა. 2021 წელს გიორგი მანველიძემ დეკლარაციაში მნიშვნელოვანი საჩუქრის შესახებ ჩაწერა, მაგრამ არ მიუთითა, ვინ აჩუქა მას 65,6 კვ.მეტრი ბინა ბათუმის ცენტრში, ახვლედიანის ქუჩაზე, #3-ში.
ამონაწერის მიხედვით, ამ კორპუსში გიორგი მანველიძეს ჩუქების ხელშეკრულების საფუძველზე კიდევ 2 ბინა, ჯამში 400 კვ მეტრამდე ფართობი აქვს დარეგისტრირებული.
სხვადასხვა დროს მანველიძეები ბათუმში არაერთი გახმაურებული სკანდალის მონაწილეები იყვნენ.
2025 წლის 15 იანვრის ღამეს „ოცნების“ დეპუტატი დიმიტრი სამხარაძე, ასევე აჭარაში „ოცნების ფინანსთა და ეკონომიკის მინისტრის მოადგილე, გიორგი მანველიძე ბათუმში, სასტუმრო „შერატონში“, ჯგუფურად ჯერ თავს დაესხნენ ჟურნალისტ ზვიად ქორიძეს, შემდეგ კი ყოფილ პრემიერ-მინისტრს, პარტია „საქართველოსთვის“ ლიდერს, გიორგი გახარიას, რომელსაც სახის არეში დაზიანებები მიაყენეს.
შემთხვევა 15 იანვარს, 00:00 საათის შემდეგ მოხდა. პოლიციას ამ დრომდე არავინ დაუკავებია.
2020 წელს არჩევნების წინ პარტია „ლელოს“ წევრებს, ალექსანდრე მილორავასა და მიშა ქავთარაძეს სცემეს. ინციდენტი 19 ნოემბერს მოხდა. გავრცელდა ინციდენტის ამსახველი კადრები, რომელშიც რამდენიმე პირის ჩხუბი ჩანს. მიშა ქავთარაძის თქმით, მას და ალექსანდრე მილორავას კომპანია „ელიტჰაუსის“ წარმომადგენელმა, ბექა თვალაძემ და მისმა მეგობრებმა სცემეს.
„აჭარა თაიმსის“ დამფუძნებელი, ჟურნალისტი სულხან მესხიძე ამბობს, რომ დღეს, 22 მაისს, აჭარის პროკურატურაში გამოკითხეს.
პროკურატურის პრესცენტრის ინფორმაციით, გამოძიება პროკურატურას არ დაუწყია ჟურნალისტის პროფესიული საქმიანობის ხელშეშლის მუხლით.
რაც შეეხება სავარაუდო მუქარის და ძალადობის შემთხვევებს – ამ ნაწილში გამოძიება შსს-ს უნდა დაეწყო. ამ უწყებაში ვერ გვითხრეს, დაიწყო თუ არა გამოძიება რომელიმე მუხლით.
საუბარია 2026 წლის 7 მაისს ხელვაჩაურში მომხდარ შემთხვევაზე – სინდისის პატიმრების მშობლები ხელვაჩაურის მერიის მიმდებარედ სინდისის პატიმრების შესახებ გაზეთებს არიგებდნენ, რასაც იქ მყოფი ხელვაჩაურის მერიის თანამშრომლებისგან აგრესია მოჰყვა. ისინი მერიის მიმდებარე ტერიტორიაზე სინდისის პატიმრების მშობლებს დაუპირისპირდნენ, მათ „ბათუმელებისა“ და „აჭარა თაიმსის“ ჟურნალისტებს შეუშალეს ხელი პროფესიულ საქმიანობაში.
„გამომძიებელს დეტალურად მივაწოდე ინფორმაცია ჩემზე განხორციელებული სიტყვიერი და ფიზიკური თავდასხმის შესახებ. ოქმის შედგენის შემდეგ არც ის განმიმარტეს, დაიწყო თუ არა გამოძიება და თუ დაიწყო, რა მუხლებით მიმდინარეობს საქმე. მოკლედ, ჩემი კითხვები უპასუხოდ დარჩა, შესაბამისად, ვერ გავიგე, რა იყო გამოკითხვაზე დაბარების რეალური მოტივი…,“ – წერს ჟურნალისტი სულხან მესხიძე.
გამოძიების დასაწყებად პროკურატურისთვის საკმარისი საფუძველი უნდა იყოს საჯაროდ გავრცელებული ინფორმაცია. სულხან მესხიძე ამბობს, რომ 112-შიც დარეკა და ასევე, წერილობით მიმართა შსს-ს.
