Batumelebi

ბატონო ალვერდ, როგორც ვიცით, ქვეყანაში 63 არასტანდარტული ნაგავსაყარი ფუნქციონირებს. კოდექსის ამუშავებიდან დაახლოებით რა ვადაში უნდა უზრუნველყოს ქვეყნის მთავრობამ მისი მოთხოვნების დაცვა?

კანონპროექტი ძალაში შევა მისი მიღებიდან გამოქვეყნებისთანავე. არის მთელი რიგი მუხლები, რომლებიც მოგვიანებით შევა ძალაში, ეს ყველაფერი მოცემულია გარდამავალ დებულებაში. კანონმდებლობა ითვალისწინებს მთელი რიგი კანონქვემდებარე აქტების მიღებას. გარდა ამისა, არსებობს საკითხები, რომელთა მოგვარებასაც დასჭირდება გარდამავალი პერიოდი.

რას ითვალისწინებს კანონპროექტი?

კანონპროექტი ითვალისწინებს ქვეყანაში არსებული ნაგავსაყარების ფუნქციონირების  ვალდებულებებსა და მოთხოვნებს. ახალი ნაგავსაყარების აშენების მოთხოვნებსა და სტანდარტებს; სახიფათო ნარჩენებთან დაკავშირებით სპეციფიკურ ვალდებულებებს; სხვადასხვა კატეგორიის სპეციფიკური ნარჩენებისა და სახიფათო ნარჩენების მართვის საკითხებს, ასევე ნარჩენების საქმიანობასთან დაკავშირებული ნებართვების რეგულაციებსა და რეგისტრაციას, ნარჩენების აღრიცხვის ანგარიშგებისა და  მონაცემთა ბაზის შექმნას და ასე შემდეგ. 

კოდექსი ითვალისწინებს ასევე ადმინისტრაციულ სამართალდარღვევებს, რაც დაკავშირებულია ნარჩენების კანონპროექტით გათვალისწინებული ვალდებულებისა და მოვალეობის შეუსრულებლობის შემთხვევაში.

ანუ კოდექსის ძალაში შესვლიდან სამართალდარღვევაზე რეაგირება ამ კოდექსით მოხდება?

დიახ, იურისტების გადაწყვეტილებით მას დაერქმევა კოდექსი. შესაბამისად, ყველა სამართალდარღვევა  ამ კოდექსით დარეგულირდება. ხაზი მინდა გავუსვა იმას, რომ კოდექსში გაწერილია ნარჩენებთან დაკავშირებული ყველა პირის ვალდებულებები, მათ შორის სახელმწიფო სტრუქტურების, ადგილობრივი თვითმმართველობის, ფიზიკური პირების, კერძო სექტორის წარმომადგენლებისა და ასე შემდეგ.

კანონპროექტი საერთაშორისო მოთხოვნებთან შესაბამისობაშია?

კანონპროექტი მაქსიმალურად ითვალისწინებს საერთაშორისო ნორმებს და მისი მიზანია იმ საერთაშორისო სტანდარტების დანერგვა, რაც ხელს შეუწყობს ქვეყანაში ნარჩენების მართვის პოლიტიკას. ჯანმრთელობისთვის საფრთხის შემცველი  ნარჩენები, როგორც მეორადი ნედლეული უნდა გადამუშავდეს. ამ სფეროში მაქსიმალურად უნდა ჩაერთოს ბიზნესსექტორი, რაც ხელს შეუწყობს ბიუჯეტის შემოსავლების ნაწილში გარკვეულ შენატანს. კანონპროექტი პასუხობს ევროკავშირის მოთხოვნებს და შესაბამისობაშია საქართველოს ევროკავშირთან ასოცირების ხელშეკრულების მოთხოვნებთან. ნარჩენების მართვასთან დაკავშირებული ძირითადი მოთხოვნები გათვალისწინებულია კანონპროექტში.

როდის იმსჯელებს პარლამენტი კანონპროექტზე?

სავარაუდოდ, საგაზაფხულო სესიაზე. ამ კანონპროექტის მიღება ხელს შეუწყობს საქართველოში ნარჩენების მართვის მაღალი სტანდარტების შემოღებას და დაწესებას. 

ბათუმის შოთა რუსთაველის სახელმწიფო უნივერსიტეტს  სასწავლო და სამეცნიერო კვლევის საქმიანობის 80 წლიანი გამოცდილება გააჩნია. გამოცდილება, როგორც სოციალური ფენომენი მნიშვნელოვანი ფაქტორია იმისათვის, რომ უნივერსიტეტმა სწორი ორიენტაცია გააკეთოს საზოგადოებისა და სახელმწიფოს მოთხოვნებზე. შესთავაზოს აბიტურიენტებს მაღალი ხარისხის განათლება და მისცეს პროფესიის ფართო არჩევანი. ჩვენი უნივერსიტეტი იყო და დღესაც რჩება განათლების სფეროში ერთ-ერთ ფლაგმანად. მას ზოგადად ქვეყნის  და განსაკუთრებით   სამხრეთ–დასავლეთ საქართველოს განათლების, კულტურული აღორძინებისა და ეკონომიკურ–პოლიტიკურ წინსვლის საქმეში დიდი წვლილი მიუძღვის.

უნივერსიტეტში აქტიურ და წარმატებულ  სასწავლო და სამეცნიერო-კვლევით საქმიანობას ახორციელებს სოციალურ მეცნიერებათა, ბიზნესისა და სამართალმცოდნეობის ფაკულტეტი.

ეს ფაკულტეტი თავისი მასშტაბებით ყველაზე დიდია და იგი 1800-მდე სტუდენტს აერთიანებს. ფაკულტეტი მაღალი რეიტინგით და  მოთხოვნადობით გამოირჩევა, რასაც განაპირობებს საგანმანათლებლო პროგრამები, რომელიც ამ ფაკულტეტზე ხორციელდება და ასევე, ლექტორ-მასწავლებელთა პროფესიონალიზმი, მათი დაუღალავი შრომა და ფიქრი წარსულზე და მომავალზე. 

სოციალურ მეცნიერებათა, ბიზნესისა და სამართალმცოდნეობის ფაკულტეტზე ამჟამად ფუნქციონირებს:

9 საბაკალვრო პროგრამა,
4 სამაგისტრო პროგრამა, 
3 სადოქტორო პროგრამა.

პატივცემულო აბიტურიენტებო, ბაკალავრიატის საფეხურზე განაცხადის გაკეთებისას,   მომავალი წარმატებისათვის საკმაოდ თავბრუდამხვევი და  მეტად სარფიანი არჩევანი გელოდებათ.

თქვენ შეგიძლიათ ისწავლოთ : სამართალმცოდნეობის, ფინანსების, მენეჯმენტის, საბუღალტრო და საგადასახადო საქმის, მარკეტინგის, ეკონომიკის, საერთაშორისო ურთიერთობის, ევროპისმცოდნეობის და ფსიქოლოგიის საბაკალავრო საგანმანათლებლო პროგრამაზე.

კვლევების საფუძველზე დადგენილია, რომ ჩვენი ფაკულტეტის კურსდამთავრებულთაგან უკვე 4-5 წლის შემდეგ   დასაქმების პროცენტი 80 %–მდე მერყეობს, ამასთან ხშირ შემთხვევაში დასაქმება არის ძალიან კარგი ანაზრაურებით. ჩამოთვლილი საბაკალავრო პროგრამები საკმაოდ მაღალი რეიტინგის პირობებში კომპლექტდება. მაგალითად, სამართალმცოდნეობის საგანმანათლებლო პროგრამაზე ბოლო ორი წელია პირველი ადგილის განაცხადით ერთ ადგილზე მოდის 5,6 სტუდენტი, ფინანსებზე -3,3 სტუდენტი, ფსიქოლოგიაზე 3,8- სტუდენტი და ა. შ. 

საგანგებოდ უნდა აღინიშნოს, რომ  სამართალმცოდნეობის საგანმანათლებლო პროგრამა აბიტურიანტთა პირველ ადგილიანი განაცხადების მიხედვით ბათუმის უნივერსიტეტის მასშტაბით პირველ ადგილს იკავებს და ის ამ რეიტინგში ტოლს არ უდებს საქართველოს მოწინავე უნივერსიტეტებს, მათ შორის თბილისის ივ. ჯავახიშვილის სახელობის უნივერსიტეტსაც კი.

ფაკულტეტი სწავლების პროცესში აკადემიური განათლების გარდა დიდ ყურადღებას უთმობს პრაქტიკული უნარ-ჩვევების შეძენას სტუდენტებისათვის. ამ მიზნით ფაკულტეტზე ფუნქციონირებს სასამართლო საიმიტაციო დარბაზი, იურიდიული კლინიკა, ფსიქოლოგიის ლაბორატორია, კომპიუტერული კლასი, იგეგმება და მალე გაიხსნება კრიმინალისტიკის კაბინეტი,  ბიზნესადმინისტრირების კონსალტინგური ცენტრი.

ფაკულტეტის ცხოვრებაში აქტიურ მონაწილეობას იღებენ სტუდენტები, რომლებიც ხშირად ჩართულნი არიან კვლევით, კულტურულ, დასაქმების, ინტელექტუალურ, შემოქმედებით თუ სპორტულ ღონისძიებებში.

ფაკულტეტი მაქსიმალურად ცდილობს შეინარჩუნოს ძველი ტრადიციები და ამასთან, უპასუხოს იმ ურთულეს გამოწვევებს, რომელიც ცივილური საზოგადოების სწრაფი განვითარებისა და გლობალიზაციის ურთულესი პროცესით არის განპირობებული.  განათლებული საზოგადოება არის მყარი გარანტი მშვიდობის შენარჩუნების, დემოკრატიის, ჰუმანურობის და სამართლიანობის პრინციპების განუხრელი გატარებისათვის.

იმისათვის, რომ იყოთ წარმატებულები და გაითავისოთ ეს მეტად მნიშვნელოვანი ღირებულებები, რომელიც განათლების გარეშე მიუღწეველია,  საუკეთესო არჩევანი ნამდვილად იქნება ბათუმის შოთა რუსთაველის სახელმწიფო უნივერსიტეტი და ჩვენი ფაკულტეტი.

გისურვებთ წარმატებებს!

ფაკულტეტზე შემუშავებულია ისეთი საგანმანათლებლო პროგრამები, რომლებიც აკმაყოფილებს დასაქმების ბაზრის მზარდ მოთხოვნებს. ჩვენთან ხორციელდება საბაკალავრო, სამაგისტრო, სადოქტორო და პროფესიული აკრედიტებული საგანმანათლებლო პროგრამები. მათ თავისებურებას განაპირობებს ძირითად სასწავლო კურსებთან ინტეგრირებული მართვის ავტომატიზებული სისტემების ისეთი საინჟინრო კომპიუტერული პროგრამები, როგორიცაა: AUTOCAD, LIRA, MATHCAD, MATLAB, C++, SAP 2000 და სხვა, რომლებიც პასუხობენ ტექნიკისა და ტექნოლოგიების თანამედროვე მოთხოვნებს. 

ფაკულტეტს გაფორმებული აქვს თანამშრომლობის მემორანდუმი რეგიონის წამყვან საინჟინრო და აგრარული მიმართულების კომპანიებთან, რომლის საფუძველზეც სტუდენტები გადიან საწარმოო პრაქტიკასა და სტაჟირებას შემდგომი დასაქმების პერსპექტივით.

ფაკულტეტს საინჟინრო და აგრარული ტექნოლოგიების მიმართულებით მჭიდრო ურთიერთობა აქვს ევროპის წამყვან უნივერსიტეტებთან: 1. ბრანდენბურგის ტექნოლოგიური უნივერსიტეტი; 2. ებერსვალდეს მდგრადი განვითარების უმაღლესი სასწავლებელი; 3. ტურინის პოლიტექნიკური უნივერსიტეტი; 4. სტოკჰოლმის სამეფო ტექნოლოგიური უნივერსიტეტი.

ტექნოლოგიური ფაკულტეტის საგანმანათლებლო პროგრამები ორი მიმართულებით _ ინჟინერიისა და აგრარული მიმართულებით ხორციელდება. სტუდენტთა განათლების სრულყოფას ემსახურებიან კვალიფიციური კადრები, რომლებიც წარმოდგენილი არიან 37 პროფესორისა და დაახლოებით ამდენივე მოწვეული სპეციალისტის სახით.

ტექნოლოგიურ ფაკულტეტზე ფუნქციონირებს ოთხი დეპარტამენტი:

– ინჟინერიისა და მშენებლობის დეპარტამენტი 
– ტექნოლოგიებისა და საინჟინრო მენეჯმენტის დეპარტამენტი 
– აგროეკოლოგიისა და სატყეო საქმის დეპარტამენტი
– აგროტექნოლოგიისა და აგროინჟინერიის დეპარტამენტი

თანამედროვე ყოფა თავის ტემპებს და ცხოვრების მაღალ კრიტერიუმებს გვთავაზობს. საინჟინრო და აგრარული დარგი საქართველოში სახელმწიფო პრიორიტეტთა რიგშია. ჩვენი უპირველესი მიზანია, ტექნიკისა და ტექნოლოგიების თანამედროვე მოთხოვნათა შესაბამისად მოვამზადოთ ამ დარგებისათვის მაღალკვალიფიციური კადრები. ტექნოლოგიური ფაკულტეტი, რომელსაც დიდი ხნის ისტორია აქვს, ყოველთვის იზიდავდა აქტიურ, საფუძვლიანი ცოდნის მიღების მსურველ ახალგაზრდებს. ჩვენს ფაკულტეტს დიდი შესაძლებლობა აქვს იმისა, რომ სტუდენტებს მისცეს არა მხოლოდ თანამედროვე განათლება, არამედ ჩამოუყალიბოს მათ ისეთი უნარ-ჩვევები, რაც მნიშვნელოვნად გაზრდის მათ კონკურენტუნარიანობას საინჟინრო და აგრარული საქმიანობის სფეროში.

იმ აბიტურიენტებს, რომლებსაც მიზნად აქვთ ტექნიკური და ტექნოლოგიური უმაღლესი განათლების მიღება, მინდა ვუსურვო, წარმატებით ჩაებარებინოთ ერთიანი ეროვნული გამოცდები და გამხდარიყვნენ ბათუმის შოთა რუსთაველის სახელმწიფო უნივერსიტეტის სტუდენტები, რაც გახდება ცხოვრებაში მათი წარმატების საფუძველი.

ბავშვობიდან ლიდერის თვისებით გამოირჩეოდა, სკოლის ასაკიდან არაერთ პროექტში თუ თამაშში მიუღია მონაწილეობა. „ბავშვობაში რამდენჯერმე შემეცვალა აზრი პროფესიასთან დაკავშირებით, თავიდან ბიოლოგობა მინდოდა, შემდეგ დავიწყე ლექსების წერა, ჩანახატებსაც ვაკეთებდი, მსურდა მწერალი გამოვსულიყავი. სკოლის დამთავრების შემდეგ კი სრულიად განსხვავებულ სფეროში მოვხვდი, სამართალმცოდნეობის ფაკულტეტზე ჩავაბარე. დღეს კვალიფიციური იურისტი ვარ. უნივერსიტეტის დამთავრების შემდეგ სხვადასხვა პროფესიით მომიწია მუშაობა. საბოლოოდ კი მოვხვდი ტურისტულ კომპანიაში, სადაც ყველაზე კარგად ვიგრძენი თავი. თავიდან ძალიან მიმიზიდა, შემდეგ შემიყვარდა. სიამოვნებას მანიჭებს სხვადასხვა ტიპის ადამიანებთან ურთიერთობა და მათზე გარკვეულწილად ზრუნვა, საუკეთესო არჩევანის შეთავაზება, დაუღალავი შრომა, რაც საბოლოოდ მათშივე თავისთავად წარმოქმნის კმაყოფილების გრძნობას და შედეგად უფრო მაახლოვებს ამ ადამიანებთან.” – გვიამბობს ირმა.

ტურიზმის სიყვარულმა დიდი როლი იქონია მის ცხოვრებაში, სწორედ ამიტომ, რაღაც ეტაპზე ის თავის დროს მხოლოდ ამ სფეროს უთმობს. თუმცა არ ფიქრობს, რომ სამუდამოდ ასე იქნება. ამბობს, რომ სულ ძიების პროცესშია: „შემოვრჩი ტურიზმს, ამ ეტაპზე ჩემი ყველაზე დიდი საზრუნავია ამ ბიზნესის განვითარება. მაქსიმალურად ვცდილობ გამოვიყენო დრო, მაგრამ ის მაინც არ მყოფნის. ტრამპი წერდა: „დრო ფულზე უფრო ღირებულია, რადგან ფულის გამომუშავება სხვადასხვა გზით ყოველთვის შესაძლებელია, მაგრამ დროის უკან დაბრუნება შეუძლებელი.” მთავარი მაინც ისაა, რომ დროს გაასწრო, სულაც ვერ იგრძნო ის, განსაკუთრებით კი მაშინ, როდესაც შენი საქმე ასე გიყვარს და არ ზოგავ თავს და ყველაფერ ამას სიამოვნებით აკეთებ.

საზღვარგარეთ მომისმენია ადამიანებისგან, რომლებიც მუშაობენ, რომ ისინი თავს უმუშევრებად მიიჩნევენ. ამას იმიტომ ამბობენ, რომ არ აკეთებენ იმ საქმეს, რაც მათ გულითა და სულით სურთ. მუშაობენ მხოლოდ და მხოლოდ ფინანსური სარგებლის გამო. მე თამამად შემიძლია ვთქვა, რომ დღეს მე ვმუშაობ და ვაკეთებ იმას, რაც მიყვარს.”

საკუთარი ტურისტული კომპანია რამდენიმე წლის წინ ირმასაც ჰქონდა: „ამბიციური ვიყავი, მეგონა, რომ ყველაფერი ზუსტად მქონდა გათვლილი და გამომივიდოდა, მაგრამ ცოტა ვიჩქარე, ერთი წელი ვიმუშავე. ახლა ვნანობ კიდეც, მაგრამ მაშინ საკმაო გამოცდილება არ მქონდა. შეცდომებზე არ ვწუხვარ, თუ არ შეცდი, ისე წინ ვერ წახვალ, საკუთარ შეცდომებზე როცა სწავლობ, უფრო ძლიერი ხდები.”
ყველაზე რთული პერიოდი ინგლისს უკავშირდება, როცა ჩვილი ბავშვით უცხო ქვეყანაში დამხმარეს გარეშე აღმოჩნდა: „მე და ჩემს მეუღლეს ენის შემსწავლელი კურსების გავლა გვინდოდა, რამდენიმე თვის დაქორწინებული ვიყავით, რომ წავედით. კოლეჯი დავამთავრე ინგლისში. ისე მოხდა, რომ იქ გამიჩნდა ჩემი პირველი შვილი, მარი. დიდი ბედნიერებაა დედობა, თუმცა როცა არავინ გეხმარება და ხარ მარტო ამდენი პრობლემის წინაშე, რთულია. ჩემი მეუღლე მუშაობდა, მე კი მთელი დღე ბავშვთან მიწევდა ყოფნა მარტოს, ეს, რა თქმა უნდა, რთული იყო. თუმცა საზღვარგარეთ ცხოვრებამ მომცა დიდი გამოცდილება და განსხვავებული ხედვის უნარი.”

ყველაზე ფასეული ირმასთვის ოჯახია. ამბობს, რომ მისი ყველაზე დიდი მხარდამჭერი მეუღლეა: „ჩემი პროფესიული წარმატება გარკვეულწილად მეუღლის დამსახურებაა, ის მე მხარს მიჭერდა, გულშემატკივრობდა. ჩემი მეუღლე დავითი, პროფესიით ეკონომისტია, ახლა თავის ბიზნესს უძღვება. სტუდენტი ვიყავი, როცა გავიცანი, მას შემდეგ დაიწყო ჩვენი ურთიერთობა. ორივეს გადატვირთული გრაფიკი გვაქვს, ამიტომაც ამ მხრივ პრეტენზიები ერთმანეთთან არ გვაქვს. ერთადერთი რასაც ვაკეთებ, ჩემს შვილებს ვეხმარები უცხო ენების მომზადებაში. ცოტა განაწყენებულები არიან ბავშვები, ძირითადად ბებია და ბაბუა ზრუნავს მათზე. ჩემს მეუღლეს დაჰყავს ბავშვები სკოლაში, სპორტზე, ცეკვაზე. მარი 12 წლისაა, საბა – 9 წლის.”

ირმას 12 წლის ქალიშვილს მშობლების მაგალითი ხიბლავს, ის თავის დღიურში ბიზნესგეგმას ადგენს: „რასაც სახლში ვსაუბრობთ და გარჩევის საგანია, ბავშვები საგულდაგულოდ ისმენენ და ცდილობენ თავიანთი ბიზნესიდეების შემუშავებას. მარის ბავშვთა გასართობი ცენტრის გაკეთება სურს, ბიზნესგეგმაში კი ეწერა, რომ პირველ რიგში გამოკითხვას ჩაატარებდა და ასე გაიგებდა, თუ რა სურთ ბავშვებს, რადგანაც ზუსტად ის შეეთავაზებინა შემდგომ მათთვის. ძალიან მახარებს ჩემი შვილის ეს დამოკიდებულება და ასეთი მიდგომა. საბას სურდა არქიტექტორობა, ახლა კი უნდა გახდეს გამომგონებელი, ვკითხე, რა უნდა გამოიგონო-მეთქი? – კალამი, რომელიც თავისით წერსო. ეს სურვილი აქვს, იმიტომ, რომ წერა ეზარება, თუმცა რატომაც არა?! თუ უნდა რაღაცის გაკეთება, გააკეთოს. ყველა დიდ გამოგონებას სიცილით ხვდებოდნენ თავიდან. მე არ დავცინი, უბრალოდ, ვურჩიე ფურცელზე გადაიტანოს თავისი აზრები, შედეგ ისწრაფოს ამ იდეების განხორციელებისკენ. ჩემს შვილებს ვაძლევ თავისუფლებას, მათ უნდა მივცეთ იმის საშუალება, რომ თავად გააკეთონ არჩევანი და განვითარდნენ იმ კუთხით.” – ამბობს ირმა.

რაზე ოცნებობ? – ამ კითხვაზე პასუხის გასაცემად დიდხანს ფიქრი არ სჭირდება. ოცნებობს დიდ სახლზე, ტერასითა და აუზით: „განსაკუთრებით ყურადღებას ვაქცევ ეზოს. ლამაზი ეზო მინდა მქონდეს, ეზოში კი დიდი, ფუმფულა ძაღლი დარბოდეს. ძალიან მიყვარს ძაღლები. სახლში ახლაც გვყავს ინგლისური სეტერი, თუმცა ბინაში რთულია მოვლა და აივანზე უწევს ცხოვრება.” – ამბობს ირმა.

ამ მიმართულებით სწავლებასა და კვლევას ტრადიციულად ემსახურება ფაკულტეტზე მოქმედი საბაკალავრო, სამაგისტრო და სადოქტორო საგანმანათლებლო პროგრამები. ფაკულტეტი ქართულ საგანმანათლებლო სივრცეში ერთ-ერთი ლიდერია ბიომრავალფეროვნების, ეკოლოგიური სისტემების, შავი ზღვის ეკოქიმიური მონიტორინგის, გენეტიკური პოპულაციების კვლევისა და სწავლების თვალსაზრისით.

საბუნებისმეტყველო და ჯანდაცვის  მიმართულებას ირჩევს ადამიანი, რომელსაც ლაბორატორიული კვლევა აინტერესებს, მოგზაურობა ხიბლავს ან ადამიანის ჯანმრთელობის დაცვის სამსახურში ყოფნის სურვილი აქვს.

თითქმის ყველა საბუნებისმეტყველო დარგი ექსპერიმენტულია და აქედან გამომდინარე, საგანმანათლებლო პროგრამების მნიშვნელოვანი წილი პრაქტიკულ კურსებს უკავია. ბიოლოგიისა და ქიმიის სასწავლო კურსების ათვისება ფაკულტეტის სასწავლო ლაბორატორიებში მიმდინარეობს. სტუდენტები უშუალოდ მონაწილეობენ ლაბორატორიულ კვლევაში. სამაგისტრო და სადოქტორო პროგრამების ნაწილი კი უნივერსიტეტის სამეცნიერო კვლევით ინსტიტუტებში და რეგიონში მოქმედ სხვა სამეცნიერო დაწესებულებებში სრულდება, რომლებთანაც ფაკულტეტს გაფორმებული აქვს მემორანდუმები.

გეოგრაფიის, ეკოლოგიისა და ბიოლოგიის სპეციალობების დაუფლება მოგზაურობის გარეშე წარმოუდგენელია, შესაბამისად, საგანმანათლებლო პროგრამები მოიცავს საველე პრაქტიკებსა და ექსპედიციებს. შავი ზღვის პრობლემების შესწავლის მიზნით ტარდება პრაქტიკები შავი ზღვის აკვატორიაში გასვლით.

მედიცინის, სტომატოლოგიისა და ფარმაციის სპეციალობების სტუდენტები დარგობრივ კომპეტენციებსა და უნარ-ჩვევებს საუნივერსიტეტო კლინიკებში იძენენ. ფაკულტეტზე შეიქმნა სამედიცინო განათლებისა და მედიკოსთა პროფესიული განვითარების ცენტრი, სადაც სტუდენტებს საშუალება აქვთ, პრაქტიკული უნარ-ჩვევები მულაჟებისა და სიმულაციების მეთოდების გამოყენებით ჩამოუყალიბდეთ. ჯანდაცვის მიმართულებით კურსდამთავრებულებს საშუალება აქვთ სწავლა გააგრძელონ ფაკულტეტზე მოქმედ სარეზიდენტო პროგრამებზე სხვადასხვა სპეციალობით.

წარჩინებული და სოციალურად დაუცველი სტუდენტები უზრუნველყოფილნი არიან სხვადასხვა სახის სახელობითი სტიპენდიით.

საინტერესოა ფაკულტეტზე სტუდენტური ცხოვრება. სასწავლო პროცესი წარიმართება სტუდენტებთან მჭიდრო ურთიერთობით. ისინი აქტიურად თანამშრომლობენ სასწავლო და სამეცნიერო კვლევით პროცესებში, მონაწილეობენ სკოლა–სემინარების, საზაფხულო სკოლების, ვორკ-შოპების, სტუდენტური სამეცნიერო კონფერენციების მუშაობაში, გარემოსდაცვით ღონისძიებებში, შემეცნებით, კულტურულ და სოციალურ პროგრამებში. ეწყობა გამოფენები. სტუდენტები მონაწილეობენ ადგილობრივ და საერთაშორისო სამეცნიერო საგრანტო პროექტებში, სტუდენტურ გამოკითხვებში, აფიქსირებენ სურვილებსა და მოლოდინებს.

ფაკულტეტის სტუდენტები და ახალგაზრდა მეცნიერები გაცვლითი პროგრამებით იმყოფებიან საზღვარგარეთის უმაღლეს სასწავლებლებში (ნორვეგიაში, თურქეთის რესპუბლიკაში, საბერძნეთში, გერმანიაში, პორტუგალიაში, უკრაინაში).

სტუდენტები აქტიურად არიან ჩართულნი საუნივერსიტეტო ცხოვრებაში. ფაკულტეტს ჰყავს წარმომადგენლები უნივერსიტეტის სტუდენტურ თვითმმართველობასა და წარმომადგენლობით საბჭოში. სტუდენტები მონაწილეობენ საქველმოქმედო აქციებში. ეწყობა ექსკურსიები და დებატები. დაინერგა საზღვარგარეთის უნივერსიტეტების პროფილურ საზაფხულო სკოლებში სტუდენტების მონაწილეობა.

როგორც ჯანდაცვის, ასევე საბუნებისმეტყველო მიმართულების  სპეციალობათა   კურსდამთავრებულები დასაქმებულები არიან:

სამეცნიერო-კვლევით ლაბორატორიებში, ბოტანიკურ ბაღებში, აკვარიუმში, დელფინარიუმში, ზოოპარკში, ბუნების დაცვის ორგანიზაციებში, ნაკრძალებში, ეროვნულ პარკებში, დაცულ ტერიტორიებში, წარმოება-დაწესებულებების ეკოლოგიური უსაფრთხოების უზრუნველყოფის სამსახურებში, ეკოლოგიური მონიტორინგის სამსახურებში,  სამედიცინო კლინიკებში, აფთიაქებში, ფარმაცევტულ კომპანიებში, პროფილაქტიკური მედიცინის მიმართულებით, საბაჟო-საკარანტინო სამსახურებში, საზოგადოებრივი ჯანდაცვის სფეროში.

ჩვენი ფაკულტეტის კურსდამთავრებულთა კომპეტენციები აღიარებულია უცხოეთშიც. ისინი პროფილის შესაბამისად დასაქმებული არიან უკრაინაში, გერმანიაში, საბერძნეთში, რუსეთში, თურქეთში, გაერთიანებულ ემირატებში.

„ჩემ თავს მუსიკოსს ვერ ვუწოდებ, მუსიკოსი ბევრად მეტია, ის რაღაც ახალს ქმნის, მე კი ჯერ ისეთი არაფერი შემიქმნია. ქავერ შემსრულებელი ვარ, სიმღერის პროცესი დიდ სიამოვნებას მანიჭებს, ალტერნატიული როკი მომწონს, ბევრს ვერ წარმოვუდგენივარ როკშემსრულებლად, ალბათ ჩემი გარეგნობის გამო, თუმცა ეს ისაა, რისი შესრულებაც ყველაზე მეტად მსიამოვნებს. თავად “ბითლზების” ფანი ვარ, ჩემთვის მათი მუსიკა ყველაფერია. მეუბნებიან, რომ კონკურსებში უნდა მივიღო მონაწილეობა, მაგრამ მე ვფიქრობ, რომ ამისთვის ჯერ მზად არ ვარ, ჯერ გავლენების ქვეშ ვარ, ერთადერთი ხმის ტემბრი მომწონს ჩემი, სხვა ყველაფერში დახვეწა მჭირდება, მუსიკას ინდივიდუალიზმი უყვარს.” – ამბობს მარიამ ქიქავა.

დიდი ხანია ეძებს პასუხს კითხვაზე, “ვინ ვარ?” ფიქრობს, რომ ბევრნაირი მარიამი არსებობს, ამბობს, რომ საკუთარი თავის ძიების პროცესშია. საკუთარი გრძნობების გამოხატვა არ უყვარს, ამის გამო ბევრი მეგობარი არ ჰყავს, უფრო მეტს ფიქრობს, ვიდრე ლაპარაობს: „იმათ რომ ჰკითხოთ ჩემზე, ვისაც არ ვიცნობ ახლოს, გეტყვიან: მარიამი ერთი უჟმური გოგოაო. ამაყი ვარ და საკუთარი თავიც ძალიან მიყვარს, იმისთვის, რომ განვვითარდე მუდმივად სიახლეებს ვეძებ, ყველა აქტივობაში ვერთვები, რომლის შესახებაც ვგებულობ, ყველაფრიდან მაქსიმალურის მიღება მინდა.” – ამბობს მარიამი.

ექვსი წლის იყო, როცა მხატვრულ ტანვარჯიშში აჭარის ჩემპიონის ტიტული მოიპოვა: „თერთმეტი წელი დავდიოდი მხატვრულ ტანვარჯიშში, თუმცა მერე უარის თქმა მომიწია. სპორტს რომ გაყვე, სხვა არაფერი აღარ უნდა აკეთო, დიდი დრო და ენერგია სჭირდება. ფრენბურთზე მაინც დავდივარ. სკოლის პერიოდში მუსიკაზეც დავდიოდი, საფორტეპიანო სკოლა დავამთავრე, ამას გარდა – ცეკვაზეც. ბათუმში იყო პერიოდი, როცა ყველა მხარზე გიტარაგადაკიდებული დადიოდა, მეც მომინდა, პრაქტიკულია გიტარა, შეგიძლია კონკურსებზეც წაიღო.”

მის ცხოვრებას მაინც ორ ეტაპად ჰყოფს, სკოლამდელი და სკოლის შემდეგ: „სკოლის პერიოდში ჩაკეტილი ვიყავი, რამეში რომ მიმეღო მონაწილეობა, უნდა გებიძგა, ჩემი ჩაკეტილობის მიზეზი სათვალე იყო, სათვალის გამო არ უნდა მერბინა, ხეზე არ უნდა ავსულიყავი, იყო ქილიკიც… დედა მეუბნებოდა, რომ ამაზე არ უნდა მედარდა. რა თქმა უნდა, ახლა არ ვფიქრობ, რომ სათვალე მაუშნოებს, პირიქით.
უნივერსიტეტში ჩაბარების შემდეგ მივხვდი, რომ ცვლილებები მჭირდებოდა, ავდექი და თმები შევიჭერი ბიჭურად. მერე ვცდილობდი ხასიათის ცვლილებასაც, მგონი გამომივიდა.” – გვიყვება მარიამი.

მარიამი წყნეთში არსებულ ბაქსვუდის საზაფხულო სკოლაში ლიდერად მუშაობს, მანამდე ფრანგულის ოლიმპიადაში გაიმარჯვა და ლონდონში წავიდა, სადაც ოცნება აისრულა – “სტოუნჰენჯი” ნახა: „ფრანგული სკოლა მაქვს დამთავრებული, ოლიმპიადაში გამარჯვების შემდეგ გამარჯვებულები წყნეთში, ბაქსვუდის საზაფხულო სკოლაში წაგვიყვანეს. 150 ბავშვიდან ათი შეგვარჩიეს, სამი კი, ლონდონში გაგვიშვეს. საოცარი ისტორიები გადაგვხდა, სტოუნჰენჯში გადავწყვიტეთ წასვლა, ავტობუსის ბილეთი ავიღეთ და წავედით, აღმოჩნდა, რომ იქამდე მისასვლელად თანხის დამატება იყო საჭირო, ჩვენ ვიფიქრეთ ახლოს იქნება, ფეხითაც გავალთო, მაგისტრალზე მივდიოდით ფეხით, გზას კი დასასრული არ ჰქონდა. სამი საათის შემდეგ ბენზინგასამართ სადგურს მივადექით, სადაც გვითხრეს, ფეხით სად მიდიხართ. ოთხი საათის გზააო, ავტოსტოპით გაგვიჩერეს მანქანა, ჩვენ გვეშინოდა, ავტოსტოპზე იმდენი საშინელი ფილმი გვქონდა ნანახი. პოლონელი ბიჭი იყო მძღოლი, მიგვიყვანა, დაგველოდა, ჩვენთან ერთად პირველად მოინახულა სტოუნჰენჯი, მერე უკან წამოგვიყვანა.”

მარიამის მომავალი გეგმები სპეციალური საჭიროების მქონე ბავშვებს უკავშირდება, მომავალი ფსიქოლოგი ფიქრობს, რომ ამ მხრივ ბევრი პრობლემა დღემდე აქტუალურია: „უკვე ვმუშაობ ამ მხრივ, საქველმოქმედო კონცერტებში ვმონაწილეობ, უნივერსიტეტში ფსიქოლოგიის კლუბის ხელმძღვანელი ვარ, 21 მარტს დაუნის სინდრომით დაავადებულთა საერთაშორისო დღეა, ვაპირებთ ამ ბავშვებს ვესტუმროთ და მათთან ერთად აღვნიშნოთ ეს დღე. სამწუხაროდ, ნაკლები სპეციალისტი გვყავს ამ სფეროში. მინდა ღრმად შევისწავლო ამ ბავშვების პრობლემები. გაცვლით პროგრამაში ვმონაწილეობ, სწავლის საზღვარგარეთ გაგრძელებაზე ვფიქრობ, საბუთები უკვე შევიტანე, ამ მხრივ უფრო დიდი გეგმები მაქვს, სარეაბილიტაციო სკოლის დაარსებაც მინდა.”

ფაკულტეტის მიზანია ტურისტული მომსახურების საერთაშორისო სტანდარტების დამკვიდრების ხელშეწყობა და ტურიზმის დარგისათვის მაღალკვალიფიციური, შესაბამისი კომპეტენციების მქონე სპეციალისტების მომზადება.

შემუშავდა და დაინერგა თანამედროვე მოთხოვნების შესაბამისი „ტურიზმის“ საბაკალავრო და „სასტუმრო საქმისწარმოების“ პროფესიული პროგრამები, სწავლება დაიწყო თანამედროვე მეთოდების გამოყენებით, თანამედროვე ტექნიკით აღჭურვილ აუდიტორიებში.

ტურიზმის ფაკულტეტი ინტენსიურად მუშაობს უცხოეთის უმაღლეს სასწავლებლებთან თანამშრომლობის გაფართოებისათვის. ფაკულტეტი აქტიურად თანამშრომლობს და გაცვლით პროგრამებს ახორციელებს შვერინის (გერმანია), ტელემარკის (ნორვეგია) და ებერსვალდის (გერმანია) უნივერსიტეტებთან, ჰამბურგის ევროპის ბიზნესკოლეჯთან (გერმანია).

გაცვლითი პროგრამებით შესაძლებელი გახდა სწავლების ხარისხის ამაღლება, მაღალკვალიფიციური სპეციალისტების მომზადება. საგანმანათლებლო პროგრამები მთლიანად შეესაბამება საერთაშორისო სტანდარტებს.

მჭიდრო თანამშრომლობა გვაქვს გერმანიისა და ამერიკის შეერთებული შტატების უნივერსიტეტებთან.  მოწვეული გვყავს და ფაკულტეტზე პედაგოგიურ საქმიანობას ეწევიან ტურიზმის უცხოელი ექსპერტები.

სერიოზული პრეტენზია გვაქვს ვიყოთ პირველები. ჩვენი მიზანია სტუდენტებს მივცეთ ტრანსფერული ცოდნა, რათა შეძლონ საზღვარგარეთის ქვეყნებში თავიანთი სპეციალობით დასაქმება.

აქ ყველა პირობაა იმისათვის, რომ მომზადდეს კონკურენტუნარიანი სპეციალისტები. კერძოდ, გამოიყენება თანამედროვე მენეჯმენტის სისტემა. ტურიზმის ფაკულტეტმა სასტუმროს მენეჯმენტის მაღალხარისხოვნად სწავლებისათვის შეიძინა სასტუმროს მართვის პროგრამა „Opera“. ამ სისტემით სარგებლობენ სასტუმროების ისეთი ცნობილი ბრენდები, როგორებიცაა: „Sheraton“, „Radisson“, „Hilton“ და სხვა.

ვასწავლით რესტორნის მენეჯმენტის პროგრამულ სისტემას „Micros“. ფაკულტეტზე მოქმედებს ტურისტული სააგენტო „UNItour“ -ი, სტუდენტებს ადგილზე შეუძლიათ დაეუფლონ ტუროპერეიტინგს.

მიუხედავად იმისა, რომ ტურიზმის ფაკულტეტი არსებობის მხოლოდ სამ წელს ითვლის,  ის ერთიანი ეროვნული გამოცდების განაცხადში ერთ-ერთი ყველაზე მოთხოვნადი ფაკულტეტია საქართველოში.

ტურიზმის ფაკულტეტი წარმატებით ახორციელებს მნიშვნელოვან პროგრამებს და პროექტებს:

ტურიზმის ფაკულტეტის 43-მა სტუდენტმა სასწავლო და საწარმოო პრაქტიკა გაიარა მიუნხენის, ბერლინის და კუნძულ უზედომის 5-ვარსკვლავიან სასტუმროებში.

ტურიზმის ფაკულტეტის 9 პროფესორ-მასწავლებელმა სტაჟირება გაიარა ბერლინისა და ნორვეგიის უნივერსიტეტებში.

ტურიზმის ფაკულტეტის 27 სტუდენტი სხვადასხვა გაცვლითი პროგრამით სწავლობდა ნორვეგიის, გერმანიის, პოლონეთისა და თურქეთის უნივერსიტეტებში.

 ტურიზმის ფაკულტეტის ორგანიზებით, ყოველწლიურად იმართება საერთაშორისო სამეცნიერო-პრაქტიკული კონფერენცია „ტურიზმი: ეკონომიკა და ბიზნესი~, რომელშიც მონაწილეობას იღებენ 20-ზე მეტი ქვეყნის უნივერსიტეტების პროფესორ-მასწავლებლები და ტურიზმის ინდუსტრიის წარმომადგენლები.

ტურიზმის ფაკულტეტის წარმატებულ სტუდენტებს საშუალება აქვთ სამთვიანი ანაზღაურებადი პრაქტიკა გაიარონ გერმანიის ტურიზმის ინდუსტრიის ორგანიზაციებში.

 ტურიზმის ფაკულტეტის სტუდენტების უმრავლესობა წარმატებით საქმიანობს  ცნობილ საერთაშორისო კომპანიებში.

 ტურიზმის ფაკულტეტის სტუდენტების დიდი ნაწილი ზაფხულში ახლაგახსნილ სასტუმრო „Hilton“ – ში დასაქმდებიან.

გერმანელი პარტნიორების მონაწილეობით, ახალი სასწავლო წლიდან ამოქმედდება ინგლისურენოვანი „ტურიზმისა და მასპინძლობის მენეჯმენტის“ სამაგისტრო პროგრამა, რაც საშუალებას მისცემს სტუდენტებს რამდენიმე სემესტრი უცხოეთში ისწავლონ.

ფაკულტეტი აგრძელებს ინოვაციურ საქმიანობას და მაქსიმალურად ცდილობს უზრუნველყოს სტუდენტებისათვის მიმზიდველი სასწავლო გარემო.