უკანონო ნაგავსაყრების შესახებ ინფორმაცია შემდგომი რეაგირებისათვის ბათუმის მერიას და მუნიციპალიტეტების გამგეობებს გაეგზავნა. „ბათუმელები“ დაინტერესდა რას აპირებს ბათუმის მერია და ხუთი მუნიციპალიტეტის გამგეობა იმისათვის, რომ რეგიონში უკანონო ნაგავსაყრები მოწესრიგდეს.
ბათუმის მერიაში ამბობენ, რომ მერიის ზედამხედველობის სამსახური და შპს „სანდასუფთავება“ მუდმივ რეჟიმში უწევენ მონიტორინგს ქალაქის ტერიტორიის დანაგვიანებას. თუმცა, ის ფაქტი, რომ ქალაქის ტერიტორიაზე სამშენებლო ნარჩენებს ღამის საათებში ტოვებენ, ართულებს კანონდამრღვევის გამოვლენას.
„კერძო თუ იურიდიული პირების მხრიდან სამშენებლო თუ სხვა სახის ნარჩენების ქალაქის გარკვეულ ტერიტორიებზე დაყრამ გამოიწვია უკანონო ნაგავსაყრების გაჩენა. არაერთ გამოვლენილ ფაქტზე მოხდა რეაგირება, ადმინისტრაციულ სამართალდარღვევათა კოდექსის 146-ე პრიმა და 148-ე მუხლების შესაბამისად. შედგა ადმინისტრაციულ სამართალდარღვევათა ოქმები და განსახილველად სასამართლოს გადაეგზავნა. მიმდინარე წლის განმავლობაში შპს `სანდასუფთავებამ“ ქალაქის ტერიტორია არაერთი უკანონო ნაგავსაყარისგან გაათავისუფლა. სამშენებლო თუ სხვა სახის ნარჩენები გაიტანეს ახალი ბულვარის ტერიტორიაზე არსებული უკანონო ნაგავსაყარიდან, გოროდოკში – ჭონქაძის ქუჩიდან, ყოფილი ელექტრომექანიკური ქარხნის ტერიტორიიდან. გარდა ამისა, ყოველდღიურად ხდება ხელოვნურად შექმნილი პატარა ნაგავსაყრების მონიტორინგი და დასუფთავება. მიუხედავად ამისა, ქალაქის ტერიტორიაზე მაინც რჩება უკანონო ნაგავსაყრები. ბათუმის მერია მოუწოდებს მოსახლეობას, გაუფრთხილდნენ გარემოს და თავი შეიკავონ ქალაქის ტერიტორიაზე სამშენებლო თუ სხვა სახის ნარჩენების დატოვებისგან,“ _ განუცხადეს „ბათუმელებს“ ბათუმის მერიის პრესსამსახურში.
გარემოსდაცვის სამმართველოს ინფორმაციით, ხელვაჩაურის მუნიციპალიტეტში 113 უკანონო ნაგავსაყარია. ხელვაჩაურის მუნიციპალიტეტის გამგებლის მოადგილის, ანზორ ფერცელიძის თქმით კი, მუნიციპალიტეტში პრობლემა თითქმის აღმოფხვრილია.
„თითქმის მოწესრიგებულია და აღმოფხვრილია ეგ პრობლემა. მიმდინარეობს სერიოზული მუშაობა და ძალისხმევა, რომ არც ერთ სოფელში არ იყოს უკანონო ნაგავსაყარი. მხედველობაში მივიღეთ გარემოს დაცვის სამმართველოს დადებული დასკვნა და იმ დღიდანვე დავიწყეთ ამ მიმართულებით მუშაობა. თუ რელიეფი გვაძლევს საშუალებას, ადგილზე ვმარხავთ. ბევრგან ადგილზე ამოვჭერით ორმოები, დავწვით და მერე მიწით გადავფარეთ. საიდანაც შეიძლებოდა გატანა გავიტანეთ,“ – ამბობს ანზორ ფერცელიძე.
ქობულეთში, სადაც 87 უკანონო ნაგავსაყარია აღრიცხული, პრობლემის მოგვარებას მომავალი წლისთვის გეგმავენ. როგორც ქობულეთის მუნიციპალიტეტის გამგეობაში გაგვიცხადეს, ჯერ უნდა შედგეს სტრატეგიული გეგმა, მოიზიდონ ფინანსური რესურსები და შემდეგ დაიწყება სამუშაოები. პრესსამსახურის ცნობით, შესაბამისი სახსრები 2015 წლის ბიუჯეტში იქნება გათვალისწინებული.
ქედაში, სადაც 32 უკანონო ნაგავსაყარია აღრიცხული, ორშაბათიდან აპირებს მათ მოწესრიგებაზე ზრუნვას ქედის მუნიციპალიტეტის გამგებლის მოადგილე. აქამდე საკითხის მოუგვარებლობას კი იმით ხსნის, რომ ცალკეულ სოფლებში მუნიციპალიტეტს რწმუნებულები არ ჰყავდა.
„ორშაბათიდან დანიშნული იქნება გამგებლის ყველა წარმომადგენელი, რომელთაც დაევალებათ აღნიშნული ნაგავსაყრების მოწესრიგება, სპეციალური ადგილის გამოყოფა. ორშაბათიდან ზედამხედველებთან ერთად რწმუნებულები მიხედავენ მაგ საქმეს,“ – უთხრა „ბათუმელებს“ ქედის მუნიციპალიტეტის გამგებლის მოადგილემ გურამ ბერიძემ.
ხულოს მუნიციპალიტეტში არსებული 25 უკანონო ნაგავსაყარი სოფლებშია განთავსებული. ნაგვის მანქანა კი მხოლოდ დიოკნისის თემსა და კურორტ ბეშუმს ემსახურება.
„დანარჩენ სოფლებს ვერ გავწვდით. ნარჩენების ტრანსპორტირება მაღალმთიანი სოფლებიდან ჭირს. მოსახლეობა გაფრთხილებულია, რომ ნაგვის დაყრით ისინი უკანონო ქმედებას ჩადიან. იქ, სადაც ნაგავსაყარი არ არის, დაუშვებელია ნაგვის დაყრა. რთული თემაა. ვერ გეტყვით, რომ ერთ დღეში ან ერთ წელიწადში მოგვარდება, მაგრამ ვცდილობთ მაგისტრალურ ზოლში თემის ცენტრები მაინც ჩავრთოთ,“- ამბობს ხულოს მუნიციპალიტეტის გამგებელი ბესიკ ბაუჩაძე.
23 უკანონო ნაგავსაყარია შუახევის მუნიციპალიტეტის ტერიტორიაზე.
„ეს ნაგავსაყრები არის სოფლებში და არა დაბის ტერიტორიაზე. არაერთხელ ჩავატარეთ აქცია სოფლებში, გავაფრთხილეთ ხალხი, რომ აღარ მოეწყოთ ნაგავსაყრები. დავალაგეთ, ადგილზე დავწვით ნაგავი, მაგრამ ისევ მეორდება. თვითონ მოსახლეობა არ ერიდება,“ – ამბობს შუახევის მუნიციპალიტეტის ეკონომიკისა და ინფრასტრუქტურის განვითარების სამსახურის უფროსი ედნარ შარაშიძე.
მისივე თქმით, ჯერჯერობით სოფლებიდან ნაგვის გატანას ვერ ახერხებენ: „ვაპირებთ ყველა სოფელში მოეწყოს ნაგავსაყარი. შევთავაზეთ სოფლებს, აერჩიათ ისეთი ადგილი, სადაც მოეწყობოდა ნაგავსაყარი და არ იქნებოდა სოფლისთვის საზიანო. მაგრამ მოსახლეობამ გააგრძელა ისევ უსისტემოდ დაყრა. არანაირად არ მოხერხდა, რომ შერჩეულ ადგილზე დაეყარა. ამჯერად ვაპირებთ კიდევ ერთხელ ჩავატაროთ აქცია სოფლებში და მკაცრად გავაფრთხილოთ – თუ ნაგავს დაყრიან, დაჯარიმდებიან“.
„აქტიური მოქალაქეების“ შეხვედრა დემოკრატიული ჩართულობის ცენტრში
„სამი წუთი სამი ლარი ეღირება. ავტოდრომზე სულ შვიდი მანქანა გვყავს. ამდენივეს დამატებას კიდევ ვაპირებთ. მანქანები იტალიიდან არის ჩამოტანილი და საკმაოდ კარგი ხარისხისაა“- ამბობს საბავშვო ავტოდრომის ხელმძღვანელი მამუკა კონცელიძე.
ლეონიძის ქუჩის #6-ში მცხოვრები ნათია ელბაქიძე ამბობს, რომ საბავშვო ატრაქციონი, რომელიც მათ ეზოში რამდენიმე წელია დაამონტაჟეს, ახლა დაზიანებულია და ერთი წელია ატრაქციონით ბავშვები ვერ სარგებლობენ. „დაზიანების გამო ბავშვებიც ხშირად შავდებიან“, – ამბობს ის. იმავე ქუჩაზე მცხოვრები მანანა ახმედოვა ამბობს, რომ საქანელების მწყობრიდან გამოსვლის მიზეზი ძირითადად ახალგაზრდები არიან. „სრულწლოვანი ბიჭები სხდებიან საქანელებზე, რის გამოც მწყობრიდან გამოდის ატრაქციონი. ჩემმა შვილმა მცირედი დაზიანება მიიღო, გატეხილი სასრიალოდან ჩამოვარდა და ფეხი გაიკაწრა“, – ამბობს მანანა.
დღეისთვის ამ ქონების მოვლა და შენახვა ბათუმის მერიის მუნიციპალური ორგანიზაციის ა(ა)იპ „ბათუმის კორპუსის“ მოვალეობაა. ორგანიზაციის დირექტორი, არმაზ ვარშალომიძე ამბობს, რომ ბოლო ორი წლის განმავლობაში მათთან ასამდე განცხადებაა შესული დაზიანებული ატრაქციონების შესახებ. საბავშვო ატრაქციონების, სპორტული მოედნებისა და ფანჩატურების შესანახად ბათუმის ბიუჯეტიდან 70 ათასი ლარია გამოყოფილი. დღეის მონაცემებით, „ბათუმის კორპუსმა“ უკვე შეაკეთა ოთხი ატრაქციონი, გამოცვალა 62 საქანელა და გაამაგრა ათამდე სავარჯიშო ტრენაჟორი. არმაზ ვარშალომიძის თქმით, საბავშვო ატრაქციონების სრულად აღდგენა ვერ ხერხდება: `რადგან ატრაქციონები ისეთი მასალებისგან არის გაკეთებული, რომლის აღდგენაც არ ხერხდება, სათადარიგო ნაწილები კი საქართველოში არ იყიდება, ამას სპეცდაკვეთა სჭირდება, რაც საკმაოდ რთულია. ჩვენი დაანგარიშებით, სათადარიგო ნაწილის შეძენა ახალი ატრაქციონის ფასი ჯდება.“ 
ასევე ხშირად ზიანდება ის 48 სავარჯიშო ტრენაჟორი, რომლებიც მერიამ სამი წლის წინ დაამონტაჟა ქალაქში. ტრენაჟორები მოზრდილი ადამიანებისთვისაა განკუთვნილი და მიუხედავად იმისა, რომ ინსტრუქციის ნახატი ვერსიები თითოეულ მათგანზე დაკრულია, ბავშვები და მოზარდები ტრენაჟორებს მაინც არასწორად იყენებენ და მწყობრიდან გამოჰყავთ მექანიზმი: „ჩვენ გვაქვს ფოტოები, სადაც მოზრდილები სპეციალურად აზიანებენ ტრენაჟორებს, კერძოდ, უკიდებენ ცეცხლს. გვაქვს ისეთი ფოტოც, როცა ტრენაჟორის დასაჯდომ პლასმასზე დაჭედებულია ლურსმანი. საბავშვო ატრაქციონების პლასმასებს კი უმეტესად ფეხითა და ქვებით აზიანებენ“, – ამბობს არმაზ ვარშალომიძე.
ბათუმის მერიის საფინანსო საბიუჯეტო სამსახურის ხელმძღვანელის მოადგილის, არჩილ ვანაძის თქმით, როცა სამომავლოდ ბიუჯეტიდან ახალი ატრაქციონებისა თუ ტრენაჟორების შესაძენად თანხას გამოყოფენ, პასუხისმგებლობას მათ მოვლაზე უშუალოდ ამხანაგობებს დააკისრებენ: „სამომავლოდ აუცილებლად იქნება გათვალისწინებული პასუხისმგებლობის საკითხი, თუ ვინ უნდა დაიცვას ეს ქონება. სავარაუდოდ, მათზე პასუხისმგებელი ამხანაგობა იქნება, მიუხედავად იმისა, რომ მათ ამის სურვილი არ აქვთ. როცა მატერიალურად იქნებიან პასუხისმგებლები, უფრო მოუფრთხილდებიან“.
„ყველა ეტაპს აქვს კარგი მოსაგონარი, ამიტომაც არაფერზე მწყდება გული გარდა იმისა, რომ მგონია დრო გამირბის და ვერაფერს ვასწრებ. ახლა 23 წლის ვარ და ჯერ კიდევ დოქტორანტი, ჩემთვის ეს არის ძალიან დიდი უბედურება, იმიტომ, რომ ორი წლის წინ შემეძლო ვყოფილიყავი. მეცხრე კლასში მინდოდა სკოლა ექსტერნად დამემთავრებინა, მაგრამ ვერ მოვახერხე. სკოლა 16 წლისამ დავასრულე და იმავე წელს ფილოსოფიის ფაკულტეტზე ჩავირიცხე, მერე დაიხურა ეს მიმართულება და გადავედი ფილოლოგიურზე. 15 წლიდან მყავდა მოსწავლეები ინგლისურში. ხუთი წლიდან ვსწავლობ ენას, არასოდეს მიფიქრია, რომ ამ ენას ვასწავლიდი, ენის ცოდნა არაფრად მიმაჩნდა. 17-18 წლის ვიყავი, როცა ხიჭაურის სკოლა-გიმნაზიაში შემომთავაზეს ინგლისურის მასწავლებლობა“ – გვიყვება თამარი, რომელიც ინგლისურსა და ანტიკურ ლიტერატურას ახლა სტუდენტებს ასწავლის ბათუმის სახელმწიფო უნივერსიტეტში. ჯერ მოწვეული პედაგოგია, თუმცა იმედოვნებს რომ მომავალ წელს შეძლებს აკადემიურ კონკურსში მონაწილეობის მიღებას: „ლექტორი უნდა იყოს ძალიან მომთხოვნი და ამავე დროს მოტივატორი სტუდენტის, უნდა შეაყვარო ის, რასაც ასწავლი. თითქმის ჩემი თანატოლები არიან ვისაც ახლა ვასწავლი, არასოდეს მქონია დისტანციის დაცვის პრობლემა, როცა შევდივარ აუდიტორიაში, იქ ყველაფერი ლაგდება. უბრალოდ ვუხსნი სტუდენტებს, რომ თუ არ ისწავლიან, ვერაფერს მიაღწევენ“ – ამბობს თამარი.
თამარი ოთხ ცოცხალ ენას: ინგლისურს, რუსულს, ფრანგულსა და ივრითს (მხოლოდ ამ უკანასკნელს სწავლობდა პედაგოგის დახმარებით) ფლობს, ახლა სწავლობს ესპანურს და ცდილობს გერმანულის გახსენებას. იცის მკვდარი ენებიც: ძველი ბერძნული, ლათინური, შუმერული და სანსკრიტი. ამბობს, რომ ეს ყველაფერი ინტერესებიდან გამომდინარეობს: „ძალიან მინდოდა ქუმრანის ხელნაწერების წაკითხვა ორიგინალში, ის რაც კანონიკურ სახარებებში გვხვდება სახეშეცვლილია, ისევე როგორც არაკანონიკურის თარგმნისას. ივრითის სწავლა იმიტომ დავიწყე, რომ არამეული მესწავლა, მერე გადავედი პალეო ივრითში. ამ ყველაფრის შედეგი ის არის, რომ ვეღარავინ მოგატყუებს და ვერ გეტყვის, რომ იქ ისე წერია, ხშირად მაქვს აქტიური დებატები ამაზე, არ მომწონს როცა ვიღაცას ატყუებენ და აპელირებენ ამ ყველაფრით“ – ამბობს თამარი, რომელიც ამბობს, რომ მისთვის ყველანაირი იდეოლოგია მიუღებელია: „არასოდეს მოუტანია კარგი იდეოლოგიებს, კაცობრიობისთვის კარგი მოაქვს თავისუფლებას და სიყვარულს. თუ ვიქნებით იდეოლოგიებისგან თავისუფალი, უფრო ბედნიერები ვიქნებით“.
ამბობს, რომ ხანდახან რთულად ასატანია, ამის მიზეზი ის არის, რომ ბავშვობაში ათამამებდნენ. საერთოდ ყველაზე მეტად უყვარს ბავშვობის გახსენება, ამ პერიოდს ჯადოსნურს უწოდებს, სიყვარულით საუბრობს სახლზე, სადაც გაიზარდა და მეგობარ ძაღლზე, რომელიც სკოლაში აცილებდა: „ძალიან ლამაზი სახლი გვქონდა, უზარმაზარი ბაღით, სულ ამ ბაღში ვთამაშობდი. ორი წლისას მაჩუქეს ძაღლი, ულამაზესი იყო, ნაგაზისა და მგლის ნაჯვარი, გრაფი ერქვა. ჩემი ერთ-ერთი საუკეთესო მეგობარი იყო, მასთან ურთიერთობის შედეგად ვისწავლე სიყვარული ცხოველების მიმართ, ამ სიყვარულის წყალობითაა, რომ ხორცს არ ვჭამ“ – ამბობს თამარი.
