Batumelebi | გამოასახლებენ თუ არა ბარაკებში მცხოვრებლებს იძულებით? გამოასახლებენ თუ არა ბარაკებში მცხოვრებლებს იძულებით? – Batumelebi
RU | GE  

გამოასახლებენ თუ არა ბარაკებში მცხოვრებლებს იძულებით?

 

ბათუმის საკრებულომ დღევანდელ, 10 ნოემბერს გამართულ სხდომაზე „იაფი სახლის“ პროექტი განიხილა. გიორგი ერმაკოვის განცხადებით, „იაფი სახლი“ თამარის დასახლებაში არსებული ბარაკების ადგილზე უნდა აშენდეს, ბარაკებში მაცხოვრებელი პირები კი კომპენსაციის გადახდის შემდეგ ტერიტორიას დატოვებენ.

 

 

 

 

 

 

დღეს საკრებულოს სხდომაზე იაფი სახლის საკითხი პირველად გაიტანეს და პირველივე კენჭისყრაზე მიიღეს. სამი თორმეტის წინააღმდეგ – ასე გადანაწილდა ხმები.   

 

„უნდა მოხდეს ბარაკული ტიპის დასახლების აღება და იმ ტერიტორიაზე პროექტის განხორციელება. მერია ბარაკებში მცხოვრებ ოჯახებს გადაუხდის ფულად კომპენსაციას,  1კვ/მ 400 დოლარის ექვივალენტი ლარის შეთავაზება მოხდება“- განაცხადა გიორგი ერმაკოვმა.

 

მერის წინადადება სხდომაზე საკამათო გახდა.  ერთ-ერთი მოქალაქის, მარინა ასკურავას განცხადებით, შემოთავაზებული თანხა არაადეკვატურია:

 

„მე 28 კმ/მ ფართს ვფლობ, ამიტომ კომპენსაციის სახით სადღაც 35 ათასი ლარი გამომივა, რაც ახალი ბინის შესაძენად საკმარისი არ იქნება. მიმაჩნია, რომ საკითხი უნდა იქნეს გადაწყვეტილი, თუმცა კომპენსაციის საკითხზე მსჯელობა აუცილებელია“- განაცხადა მან.

 

გიორგი ერმაკოვის განცხადებით, თუ ბარაკებში მცხოვრები მოსახლეობა მერიის შეთავაზებას არ დათანხმდება, მერია ალტერნატიული ადგილის მოძიებას დაიწყებს:

 

„იაფი სახლის აშენებით ჩვენ ორ კურდღელს დავიჭერთ. გარდა იმისა, რომ იქ მცხოვრები ადამიანების სოციალური მდგომარეობა გაუმჯობესდება, გამოთავისუფლებული მიწით დაინტერესდება ინვესტორიც და   მოხდება კვარტალის განვითარებაც“.

 

საკრებულოს თავმჯდომარის ირაკლი ჭეიშვილის განცხადებით, თუკი ბარაკებში მცხოვრები მოსახლეობის უმეტესი ნაწილი მერიის პირობებს მიიღებს, უმცირესობა კი არ წინააღმდეგი წავა,  მაშინ მათი გამოსახლება იძულების წესით მოხდება.

 

„ჩვენ სწორედ  ამიტომ გვაქვს ექსპროპრიაციის კანონი.  თუმცა, ეს იმას არ ნიშნავს რომ  ამ საკითხის გადაწყვეტის შემდეგ, ბარაკებიდან ოჯახებს გამოვყრით და ეს საკითხი არ იქნება განხილვის საგანი. მთავარია კენჭისყრაზე გავიდეს და ფასებთან დაკავშირებით  შემდეგ მოხდება მოქალაქეებთან შეთანხმება“.

 

თამარის დასახლებაში არსებულ ბარაკულ დასახლებაში 60-მდე ოჯახი ცხოვრობს. 

  

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე