ორგანიზაცია „აქტიური მოქალაქეები“ ძალადობის წინააღმდეგ აქტიურ კამპანიას იწყებენ. ღონისძიება ბათუმში ხვალ, 18:00-ზე დაიწყება. „ჩვენ ვაპირებთ „სიკეთის ჯაჭვით“ გავაპროტესტოთ ქალთა მიმართ და ზოგადად ყველა ტიპის ძალადობა. გვინდა, რომ რაც შეიძლება ბევრი ადამიანი ჩაერთოს ამ კამპანიაში და გამოხატოს მისი პოზიცია“- ამბობს აქციის ორგანიზატორი თამარ ბაუჟაძე.
„აქტიური მოქალაქეების“ შეხვედრა დემოკრატიული ჩართულობის ცენტრშიორგანიზატორების განცხადებით, აქცია ორიენტირებულია არა მხოლოდ ქალთა მიმართ ძალადობაზე, არამედ ზოგადად ძალადობის და სიძულვილის ენის წინააღმდეგ:
„კარგი იქნება თუ აქციაში საზოგადოების სხვადასხვა სფეროს წარმომადგენლები ჩაერთვებიან. მაგალითად, გვინდა რომ სპორტსმენებმა ერთი თამაში მიუძღვნან ქალთა მიმართ ძალადობას და ა.შ ამ ტიპის აქციებით საზოგადოებაში პოზიტივი გაძლიერდება და მეტი ადამიანი დაფიქრდება“ – ამბობს თამარ ბაუჟაძე.
„სიკეთის ჯაჭვის“ შესახებ ორგანიზაციამ განცხადება „დემოკრატიული ჩართულობის ცენტრში“ გააკეთა. შეხვედრას სკოლის პედაგოგებიც ესწრებოდნენ. მეათე საჯარო სკოლის პედაგოგმა აქცენტი სახელმწიფოს პასუხისმგებლობაზეც გააკეთა.
„დღეს არა მხოლოდ ფიზიკური ძალადობა ხდება ამ ქვეყანაში, ადამიანებზე ძალადობს სახელმწიფოც. მე პედაგოგი ვარ და მიმაჩნია რომ დღეს ყველა პედაგოგი ძალადობის მსხვერპლია, რადგან მათი შრომა სათანადოდ არ არის დაფასებული სახელმწიფოს მხრიდან“- განაცხადა მან.
სიკეთის ჯაჭვი 11 ნოემბერს, ევროპის მოედანზე, 18:00 საათზე გაკეთდება. ძალადობის წინააღმდეგ კამპანიის სიმბოლო – თეთრი გულსაბნევები, აქციის ყველა მონაწილეს დაურიგდება.
