Batumelebi | კომპრომატები საკრებულოში ევროპული ვოიაჟების გამო კომპრომატები საკრებულოში ევროპული ვოიაჟების გამო – Batumelebi
RU | GE  

კომპრომატები საკრებულოში ევროპული ვოიაჟების გამო

 

ბათუმის საკრებულოში სხდომა ხმაურით მიმდინარეობს.  „ნაციონალური  მოძრაობის“ წარმომადგენელმა  გიორგი კირთაძემ  ქალაქის მერს გიორგი ერმაკოვს  გერმანული პროექტის  KFW პროექტის შეფერხების  და მერიის სამსახურებიდან სპეციალისტების გათავისუფლების გამო უსაყვედურა. პროექტის ფარგლებში ბათუმის წყლისა და კანალიზაციის რეაბილიტაცია ხორციელდება.   მერი და საკრებულოს წევრები ერთმანეთს ევროპული ვოიაჟების გამო საყვედურობენ.

 

 

 

 

„თქვენ გერმანიაში ვოიაჟების გამო იყავით წასული და არა საქმის გასაკეთებლად“- ასე შეაფასა „ნაციონალმა“ გიორგი კირთაძემ ბათუმი მერის ევროპული ვიზიტი.  

 

 

„ჩვენ იმ შემთხვევაში ვითანამშრომლებთ თქვენთან, თუ იქნებით კონსტრუქციული ოპოზიცია. თქვენ კი ყოველთვის ცდილობთ, ვიღაცის ავტორიტეტი გააფუჭოთ.  მე შეუძლოდ ვიყავი გერმანიაში და ასეთ დროსაც კი ვიღებდი სტუმრებს სასტუმროში, რომ ამ პროექტით დაწყებული საკითხები გადამეწყვიტა“- განაცხადა გიორგი ერმაკოვმა.

 

 

„ბატონო გია, რაღაც ცუდად მოგხვდათ ყურში გერმანიაში ვიზიტის ხსენება.  ჩვენ არ გვიკვირს ვიზიტები, მეც და  ყოფილი მერი რობერტ ჩხაიძეც ხშირად დავდიოდით, მაგრამ ჩვენ გვაინტერესებს შედეგი.   ჩვენ  ვართ თქვენთან თანამშრომლობისთვის განწყობილი, თქვენ დანიშნეთ სამსახურის უფროსები იმისთვის, რომ გყოლოდათ ერთიანი გუნდი,  მაგრამ ვფიქრობთ, არ უნდა შეეხოთ იმ სპეციალისტებს, რომლებიც კომპეტენტურები არიან და ყოველთვის პატიოსნად მუშაობდნენ“- განაცხადა გიორგი კირთაძემ.   

 

 

საკრებულოს თავმჯდომარის მოადგილე ირაკლი ჩავლეიშვილი კი გიორგი კირთაძის კომენტარს ასე გამოეხმაურა: „ნაციონალების დანერგილი მეთოდია, ის რომ თანამშრომლებს სუს-ისა და „ოდეერის“ წარმომადგენლები ნიშნავდნენ საჯარო სამსახურებში.   თქვენ ეს მავნე ჩვევა გადმოიღეთ  და  ეს მანერაა შესაცვლელი. რაც შეეხება ვოიაჟებს, თქვენ დროს იყო, რომ ბალტიისპირეთში ოჯახებით დადიოდით, პირადად თქვენ იყავით ოჯახით იტალიაში ქორწილში და ამაზე ისაბრეთ“.

 

 

გიორგი კირთაძემ ირაკლი ჩავლეიშვილს ჭორვილა შეახსენა: „ბატონო ირაკლი, ჩვენ ვერონას დასამეგობრებლად ვიყავით იტალიაში და არა ქორწილში. თქვენსავით ჭორვილას დასამეგობრებლად არ ვყოფილვართ.   თუ არ დაამტკიცებთ იმას, რომ მე იტალიაში ქორწილში ვიყავი, იქნებით უსინდისო და მატყუარა“. 

 

 

საკრებულოს თავმჯდომარე ირაკლი ჭეიშვილი კი კადრების გათავისუფლების თემას ასე გამოეხმაურა:  „მე ვარ ის ადამიანი, ვინც კომპეტენტურ კადრებს სთავაზობს ბატონ გიას და ის წყვეტს შემდეგ – დანიშნოს თუ არა“.     

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე