დღეს ათ ნოემბერს, საქართველოს დევნილთა და განსახლების მინისტრი, სოზარ სუბარი, ჩაქვში მცხოვრებ დევნილებს შეხვდება. როგორც აჭარის ჯანდაცვის პრესსამსახურში აცხადებენ, მინისტრი ჩაქვში მცხოვრებ დევნილებს საცხოვრებელ ფართებს საკუთრებაში გადასცემს.
დევნილთა და განსახლების სამინისტროს ახალი პროექტის მიხედვით, საცხოვრებელი ფართი 10 000 – მდე დევნილ ოჯახს დაუკანონდება.
იძულებით გადაადგილებულ პირთა, დევნილთა მართლზომიერ მფლობელობაში არსებული საცხოვრებელი ფართების საკუთრებაში გადაცემის პროექტი, რომელიც მთავრობის განკარგულებით დამტკიცდა, 1-ლი ნოემბრიდან დაიწყო და 10 თვის განმავლობაში გაგრძელდება. პროექტის ფარგლებში შესწავლილ იქნება 815-მდე დევნილთა ჩასახლება.
პროექტი ორ ეტაპადაა დაყოფილი. პირველ ეტაპზე, ორი თვის განმავლობაში, მოხდება დევნილთა ჩასახლებების შესწავლა. მეორე ეტაპი, რომელიც რვა თვე გაგრძელდება, დევნილებისთვის საცხოვრებელი ფართების საკუთრებაში გადაცემას ითვალისწინებს.
