Batumelebi

საქართველოს სასჯელაღსრულებისა და პრობაციის სამინისტროს სისტემის სტატისტიკის 2018 წლის იანვრის მონაცემების მიხედვით, პენიტენციურ სისტემაში მყოფ მსჯავრდებულებს შორის გამოვლენილ დაავადებათა საერთო რაოდენობა 9 842-ს გაუტოლდა. სასჯელაღსრულების სისტემაში გავრცელებულ დაავადებებს შორის, 2018 წლის იანვრის მონაცემებით, ყველაზე ხშირად ფსიქიკურ და ქცევით აშლილობას ვხვდებით. კვლევაში წარმოდგენილ დიაგრამაზე  ნაჩვენებია პენიტენციურ სისტემაში გავრცელებულ დაავადებათა ხვედრითი წილი:

ამავე ანგარიშში წარმოდგენილი მონაცემების მიხედვით, გაუარესებული ჯანმრთელობის მდგომარეობის გამო საპატიმრო სასჯელისგან გათავისუფლების მიზეზი უმრავლეს შემთხვევებში (75% ) იძულებითი ფსიქიატრიული მკურნალობა იყო:

გაუარესებული ჯანმრთელობის მდგომარეობა ერთ-ერთი ძირითადი პრობლემაა, რაც ყოფილ პატიმრებს აწუხებთ.

დემოკრატიის ინსტიტუტი პარტნიორ ორგანიზაციებთან ერთად  2017 წლის თებერვლიდან ახორციელებს „ყოფილი პატიმრების გაძლიერების პროექტს“, რომლის ერთ-ერთი ძირითადი მიმართულებაც ყოფილი პატიმრების ჯანმრთელობის მდგომარეობის გაუმჯობესებაა. „ყოფილი პატიმრების გაძლიერების პროექტში“ ჩართვა შეუძლიათ როგორც ყოფილ პატიმრებს, ასევე მათ ოჯახის წევრებსა და პრობაციონერებს.

ბენეფიციარებს პროექტის სხვადასხვა სერვისით სარგებლობა ოთხ რეგიონში: აჭარაში, გურიაში, სამეგრელო-ზემო სვანეთსა და იმერეთში შეუძლიათ.

პროექტის ბენეფიციართა საჭიროებები თავიდან მათი გამოკითხვისა და ჯანმრთელობის პრობლემების შემთხვევაში მაღალსტანდარტული გამოკვლევებით დგინდება. შემდეგ კი ინდივიდუალური შესაძლებლობებისა და მათივე სურვილის გათვალისწინებით ისინი სხვადასხვა სარეაბილიტაციო  სერვისით სარგებლობენ.

„ყოფილი პატიმრების გაძლიერების პროექტი“ ჯანმრთელობის მდგომარეობის გასაუმჯობესებლად  ბენეფიციარებს შემდეგნაირად  ეხმარება:

• ამისამართებს მათ შესაბამისი პროფილის სამედიცინო დაწესებულებაში;
• ბენეფიციარებს ეხმარება (თუ საჭიროა ადვოკატირების პროცესშიც), რომ ისარგებლონ კუთვნილი სამედიცინო შეღავათებით და შესაბამისი სახელმწიფო პროგრამებით;
• ბენეფიციარებს, რომლებსაც არ აქვთ ფინანსური შესაძლებლობა – პროექტის ფარგლებში უფასოდ გადაეცემათ მედიკამენტები.

სოციალური მუშაკების ინფორმაციით, საპატიმროს დატოვების შემდეგ ყოფილ პატიმართა უმრავლესობას გაუარესებული აქვს ჯანმრთელობის მდგომარეობა. ლოგიკურია, რომ „პატიმართა გაძლიერების პროექტის“ სამედიცინო მხარდაჭერის მიმართულება განსაკუთრებით აქტუალურია და ამ მხრივ მაღალია ყოფილ პატიმართა ინტერესი პროექტის მიმართ.

პროექტის განხორციელებისას დაკვირვებამ აჩვენა, რომ სამედიცინო მხარდაჭერის პროგრამაში ჩართვის შემდეგ ბენეფიციართა ჯანმრთელობის მდგომარეობა შესამჩნევად გაუმჯობესდა. ისევე, როგორც მნიშვნელოვანი ძვრებია ყოფილი პატიმრებისა და მათი ოჯახების ეკონომიკურ გაძლიერებაშიც. ეს იმის შედეგია, რომ გარდა სამედიცინო მიმართულებისა ყოფილი პატიმრების გაძლიერების პროექტი ბენეფიციარებს სთავაზობს შემდეგ სარეაბილიტაციო სერვისებს:

 • სოციალური საწარმოების ამოქმედება და ყოფილი პატიმრების, პატიმართა ოჯახის წევრებისა და პრობაციონერების დასაქმების ხელშეწყობა;
• ბენეფიციარების სტაჟირება დასაქმების პირობით;
• ბენეფიციართა თვითდასაქმება – საოჯახო ბიზნესის ჩამოყალიბების გზით;
• ყოფილ პატიმართა განათლება და პროფესიული გადამზადება;
• ყოფილ პატიმართა ჯანმრთელობის მდგომარეობის გაუმჯობესების ხელშეწყობა; 
• იურიდიული დახმარება.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

აჭარიდან საქართველოს პარლამენტში რვა დეპუტატია. მათგან  ქალი მხოლოდ ორია – ფატი ხალვაში [მაჟორიტარი] და სვეტლანა კუდბა [პარტიული სია]. 23 მარტს კაცი დეპუტატებისგან განსხვავებით, კვოტირების შესახებ კანონპროექტს მხარი ორივე ქალმა დეპუტატმა დაუჭირა. კანონპროექტი „საქართველოს ორგანულ კანონში „საქართველოს საარჩევნო კოდექსში“ ცვლილების შეტანის შესახებ“ ითვალისწინებდა, რომ პარტიების პროპორციულ სიებში ყოველი მეორე კანდიდატი განსხვავებული სქესის ყოფილიყო.  ორი დეპუტატი ამბობს, რომ ფორმულირება – „განსხვავებული სქესი“ არ მოეწონათ და ამასთან არ იციან რას ნიშნავს ეს განსაზღვრება.

23 მარტს სხდომას არ ესწრებოდნენ დეპუტატები: ლევან ბეჟანიძე, ანზორ ბოლქვაძე, არჩილ ხაბაძე და ილია ნაკაშიძე. პარლამენტის სხდომას ესწრებოდა მუხრან ვახტანგაძე, თუმცა დეპუტატმა თავი შეიკავა ხმის მიცემისგან. კანონპროექტის წინააღმდეგ კი ხმა მისცა ქობულეთის მაჟორიტარმა დეპუტატმა, კობა ნაკაიძემ.

რატომ არ დაუჭირეთ მხარი პარლამენტში გენდერული კვოტირების კანონპროექტს? – „ბათუმელებმა“ ეს კითხვა პარლამენტარ კობა ნაკაიძეს დაუსვა. ის ამბობს, რომ ამისთვის ორი მიზეზი ჰქონდა:

„პირველი – ტექსტთან მიმართებაში იყო გაუგებრობა და ამიტომ ჩემი თხოვნა იყო, რომ დაზუსტებულიყო ქალი და კაცი ტექსტში. იმიტომ, რომ იქ იყო განსხვავებული სქესი და ეს განსხვავებული სქესი ცოტა სხვა თემებში გადადიოდა. ქალი და კაცი რომ ყოფილიყო, კიდევ შეიძლება დეტალებში და სიღრმეებში არ ჩავსულიყავი. აი, ეს განსხვავებული სქესი, ჩემთვის ცოტა სხვა ასოცირებას იწვევს.

ნებისმიერი ადამიანი, რომელი სქესისაც არ უნდა იყოს, თავისი იმიჯით, თავისი ცხოვრებით, თავისი მიღწევებით, წარმატებულობით და ასე შემდეგ, უნდა იყოს საკანონმდებლო ორგანოში. ხელოვნური ჩარევა ყოველთვის  აფუჭებს საქმეს.

ქალბატონების საწინააღმდეგო არაფერი მაქვს, მაგრამ მე ვთქვი, რომ ქალბატონებისთვის ეს არის შეურაცხმყოფელი, იმიტომ, რომ საქართველოში ქალის კულტი ყოველთვის იყო. მეთორმეტე საუკუნეში გვყავდა ქალი მეფე, თბილისის სიმბოლო არის ქართლის დედა… მე მქონდა შეხვედრა ქალბატონებთან, გუშინ მქონდა შეხვედრა სტუდენტურ პარლამენტთან და, უბრალოდ, აზრი ვკითხე მათ. ყველა მეუბნება, როდესაც ტექსტს ეცნობიან, ეს არის მათი შეურაცხყოფა. მე თვითონაც შეურაცხყოფილი ვიყავი, იმიტომ, რომ მე არ ვარ იმ ქვეყნის წარმომადგენელი, სადაც ქალბატონი იჩაგრება, რაღაც ნიშნით.

მოცემულობა თავად ჩემთვის არის მიუღებელი. რატომ ყოველი მეორე უნდა იყოს ქალი? შეიძლება ხვალ მოცემულობა იყოს, რომ 50% კი არა,  60% და 70% იყოს ქალბატონი. ხელოვნური ჩარევა ჩემთვის არის მიუღებელი. ყველა წარმატებული ადამიანი, ქალი იქნება თუ კაცი, უნდა მოხვდეს იგივე საკანონმდებლო ორგანოში. მე ვფიქრობ, ჩემი პირადი აზრია, რომ ეს თავად ქალბატონების შეურაცხყოფაა“.

კითხვაზე, რას გულისხმობს თვითონ განსხვავებულ სქესში, კობა ნაკაიძე ამბობს:

„ვიღაცები ითხოვენ მესამე სქესს… კვოტირება მაშინ პირველი – მეორე კი არ უნდა იყოს, შეიძლება პირველი, მეორე, მესამე იყოს.“

კითხვაზე, ვინ შეიძლება იყოს მესამე, კობა ნაკაიძე პასუხობს:

„არ ვიცი ეს, ტელევიზიით ალბათ უყურებთ ხომ, ვიღაცები ითხოვენ… ესაა ტრანსგენდერები და ა.შ… მე ვამბობ, რომ ყველას უფლებაა იყოს პარლამენტში, მაგრამ ქალბატონები, რომლებიც პრეტენზიას გვიცხადებენ, რომ ყოველი მეორე უნდა ვიყოთ, შეიძლება ყოველი მესამე იყვნენ.

…დღის წესრიგში დგას ეს თემა, ითხოვენ ვიღაცები, ამიტომ მათი უფლებებიც ხომ უნდა დავიცვათ, არა? მაშინ კვოტირებაში უნდა იყოს ერთი ორი სამი და არა ერთი – ორი.
ხვალ შეიძლება ეს მოცემულობა იყოს. ამიტომ დღეს უნდა განვსაზღვროთ, ჩვენ თუ დღეს გვაქვს ქალი-კაცი, მდედრი-მამრი, მაშინ ასე უნდა ჩავწეროთ. თუ არადა განსხვავებული რას ნიშნავს?
ხვალ შეიძლება განსხვავებული ვიღაცამ მოითხოვოს მესამე კი არა მეოთხე, შემდეგ მეხუთე, ამიტომ კონკრეტიკა არ იყო იქ და ამას გიზუსტებთ.  დღეს არის კატეგორია ადამიანების, რომელიც ითხოვენ მესამეს, არც ქალი არც კაცი. ეს არის და ეს.“

პარლამენტის წევრი, მაჟორიტარი ხელვაჩაურიდან, პროფესიით ექიმი ილია ნაკაშიძე ამბობს, რომ მას კანონპროექტთან დაკავშირებით ეჭვები აქვს:

„სიმართლე რომ გითხრათ, მე საკმაოდ ეჭვებში ვარ, რომ ეს კანონი საერთოდ მისაღები არის, მაგრამ სწორად უნდა გაიგოთ. კვოტირება  ნიშნავს რაღაც ხელოვნურ მიდგომას ამ პრობლემაზე, ეს არის სიმპტომატური მიდგომა. თუ ქალბატონები არ შედიან აქტიურად პოლიტიკაში, პრობლემა ალბათ სხვა რაღაცაშია. კვოტირებით ამ  პრობლემას ვერ გადაწყვეტ. ალბათ ოჯახური პრობლემაა, ანუ დიასახლისობის პრობლემა. ჯობია, რომ ვისაუბროთ სხვა პრობლემებზე, რაც ქალბატონებს აწუხებთ – საკეისრო კვეთის ვაუჩერებზე, სამუშაო დღის ხანგრძლივობაზე, სადეკრეტო შვებულების გახანგრძლივებაზე და ა.შ. და არა კვოტირებაზე.

ქალები ახლაც  არიან პარლამენტში და ქალბატონის პრობლემებზე რომ ვისაუბროთ, აუცილებელი არ არის მაინც და მაინც სააპარლამენტო ტრიბუნა. თუ საპარლამენტოც იქნება, ცუდი არ არის. ყველა დონეზე საქართველოში ქალბატონს აქვს უფლება გამოვიდეს და გამოთქვას მისი აზრი, როგორც ნებისმიერ სხვა ადამიანს.

მედიცინაში არის ასეთი გამოთქმა, ან პათოგენეზური მკურნალობაა, ან სიმპტომატური. აუწევს ადამიანს ტემპერატურა – დაუწევს ტემპერატურა. ეს კვოტირება მაგას ჰგავს. მაგრამ რატომ აუწია ტემპერატურამ, რა პროცესები მიმდინარეობს, რა დაავადებაა, რით ვუმკურნალოთ, რა პროგნოზი გვაქვს, ეს უკვე პათოგენეზურია და ამას სჭირდება სერიოზული მიდგომა,“ – ამბობს ილია ნაკაშიძე.

მისივე თქმით, კანონპროექტში კითხვის ნიშნებს აჩენს ჩანაწერი „განსხვავებული სქესის შესახებ“:

„[კანონპროექტის ტექსტში] ჩანაწერი არის ცოტა არალოგიკური, რომ განსხვავებულ სქესზეა საუბარი და არა ქალბატონებზე. ეს განსხვავებული სქესი რას ნიშნავს, მე არ ვიცი, სიმართლე გითხრათ. მე ორი სქესი ვიცი, მაგრამ  ამბობენ, მესამეც არისო. იქ საუბარი რომ ყოფილიყო ქალბატონებზე კომპლექსურად, შეიძლება კიდევ უფრო მისაღები ყოფილიყო, მაგრამ ეს განსხვავებული სქესი, ცოტა ეჭვებს იწვევს,“ – ამბობს ილია ნაკაშიძე.

მისივე თქმით, საბოლოო გადაწყვეტილებას გუნდთან ერთად მიიღებს.

„უჭერთ თუ არა მხარს პარლამენტში გენდერული კვოტირების კანონპროექტს? – „ბათუმელებმა“ ამის შესახებ #24 მაჟორიტარული ოლქის (ქედა, შუახევი,ხულო) მაჟორიტარ, ანზორ ბოლქვაძესაც ჰკითხა. ის პარლამენტის სხდომას არ დასწრებია. ანზორ ბოლქვაძე „ბათუმელებთან“ ამბობს, რომ სხდომაზე დაუსწრებლობის მიზეზი შუახევში მომხდარი უბედური შემთხვევა იყო.

„მე არ გამივლია კონსულტაციები ამ საკითხთან დაკავშირებით. ორშაბათიდან უმრავლესობასთან გავივლი კონსულტაციებს და შევთანხმდებით. ალბათ დავუჭერ მხარს კანონპროექტს,“ – ამბობს ანზორ ბოლქვაძე.

„უშუალოდ კვოტირებას, რომ განსაზღვრული რაოდენობა იყოს და თუ ქალი არ იქნა, პარტიასაც არ მიიღებენ რეგისტრაციაზე, ეგ ცოტა  გადამეტებულია, ჩემი აზრით. მექანიკურ კვოტირებას არ ვუჭერ მხარს. საერთო ჯამში მაინც მხარს დავუჭერ,“ – ამბობს ნუკრი [ლევან]  ბეჟანიძე, ბათუმის ოლქის მაჟორიტარი.

სხდომას ესწრებოდა კიდევ ერთი მაჟორიტარი ბათუმიდან მუხრან ვახტანგაძე. დეპუტატი ამბობს, რომ მან ხმის მიცემისგან თავი შეიკავა.

„ამ მიმართულებით არანაირი პრობლემა არ გვაქვს არც მე და არც ჩვენს გუნდს. გუნდურად ჩვენ მივესალმებით იმას, რომ მომავალ პარლამენტში უფრო მეტი ქალი იყოს. უბრალოდ, ამ კვოტირებასთან დაკავშირებით ჩვენს გუნდში აზრთა სხვადასხვაობაა. მე ვარ დეპუტატი, რომელიც გუნდური პრინციპებით მოქმედებს. ამიტომაც  შევიკავე თავი. იმედი მაქვს, რომ ძალიან მალე ჩამოვყალიბდებით ერთ აზრზე და მივიღებთ ძალიან კარგ გადაწყვეტილებას ჩვენი ქვეყნისთვის“.

ბათუმის ახალ ბულვართან ასლან აბაშიძის უშიშროების მინისტრის, სოსო გოგიტიძისთვის ჩამორთმეულ ქონებასთან დაკავშირებით, დღეს კომენტარი გააკეთა აჭარის ფინანსთა და ეკონომიკის მინისტრმა, რამაზ ბოლქვაძემ. საქმე ეხება მორიგების საფუძველზე სახელმწიფოს მიერ შერიფ ხიმშიაშვილის ქუჩის ბოლოში გოგიტიძისთვის ჩამორთმეული ქონების მისი დისშვილისთვის – ენვერ ცეცხლაძისთვის გადაცემას.

აჭარის ფინანსთა და ეკონომიკის მინისტრის, რამაზ ბოლქვაძის კომენტარი სამინისტროს პრესსამსახურმა გაავრცელა, რომელსაც უცვლელად გთავაზობთ:

„მინდა ხაზგასმით აღვნიშნო, რომ 2014 წელს ორი ინსტანციის ბათუმისა და ქუთაისის სასამართლოს გადაწყვეტილებით დადასტურებული იქნა, რომ აღნიშნული ქონება ენვერ ცეცხლაძისთვის არ ჩამოურთმევიათ და შესაბამისად წარმოადგენდა მის საკუთრებას. 2016 წელს ქუთაისის სააპელაციო სასამართლოში შედგა მხარეთა შორის მორიგება, რის საფუძველზეც ენვერ ცეცხლაძემ უარი თქვა ქონების ნაწილზე, კერძოდ, სახელმწიფოს უსასყიდლოდ გადასცა ახალ ბულვარში მდებარე 4 796 კვ/მ მიწა და ასევე აიღო ვალდებულება საკუთარებაში არსებული მიწის საავტომობილო გზის მხარეს მოაწყოს ტროტუარი. ჩვენთვის უმნიშვნელოვანესია პირველ რიგში კანონის უზენაესობა, რა თქმა უნდა მეტი ინვესტიციის განხორციელება, ამ გზით ახალი სამუშაო ადგილების შექმნა, რაც ზოგადად რეგიონის განვითარებას უწყობს ხელს“.

მინისტრის კომენტარში აღნიშნულია: „ქუთაისის სასამართლოს გადაწყვეტილებით დადასტურებული იქნა, რომ აღნიშნული ქონება ენვერ ცეცხლაძისთვის არ ჩამოურთმევიათ და, შესაბამისად, წარმოადგენდა მის საკუთრებას“. თუმცა, სასამართლო დოკუმენტით დგინდება, რომ ქუთაისის სააპელაციო სასამართლო საქმის შინაარსობრივ განხილვაში არ შესულა და მან მხოლოდ ის მორიგების აქტი დაამტკიცა, რომელიც მხარეებს შორის [მთავრობა და ენვერ ცეცხლაძე] სააპელაციო სასამართლოს სხდომის გამართვამდე შედგა.

ქუთაისის სააპელაციო სასამართლოს განჩინებაში ხაზგასმით წერია, რომ „ქუთაისის სააპელაციო სასამართლოს ადმინისტრაციულ საქმეთა პალატაში 2016 წლის 29 დეკემბერს სააპელაციო საჩივრების განხილვისას გამართულ სასამართლო სხდომაზე მხარეებმა წარადგინეს მორიგების აქტი და იშუამდგომლეს მისი დამტკიცება“.

ენვერ ცეცხლაძისთვის გადაცემულ მიწის ნაკვეთზე ასნომრიანი სასტუმროსა და საცხოვრებელი ბინების, კაზინოს, საცურაო აუზისა და სხვა გასართობი ობიექტების აშენებას „ეიჩ გრუპ კონსტრაქშენი“ გეგმავს. ამ კომპანიას k2 კოეფიციენტის გაზრდაზე [სიმაღლეში ზრდა დასაშვებზე მეტად] აჭარის მთავრობის თავმჯდომარემ, ზურაბ პატარაძემ, უშუამდგომლა ბათუმის მერიაში. კომპანიას მშენებლობის ნებართვის მისაღებად ბათუმის მერიისთვის ჯერ არ მიუმართავს. კომპანიაში წილებს ფლობს ასლან აბაშიძის მთავრობის უშიშროების მინისტრის, სოსო გოგიტიძის დისშვილი, ენვერ ცეცხალაძე.

რატომ გადაწყვიტა აჭარის მთავრობამ  სოსო გოგიტიძისთვის 2005 წელს ჩამორთმეულ ქონებაზე მორიგებოდა მის დისშვილს, ენვერ ცეცხლაძეს; რა ჩაწერეს მორიგების აქტში? – „ბათუმელებმა“ სცადა ამ კითხვებზე პასუხი აჭარის მთავრობისგან მიეღო. შესაბამისი წერილით მივმართეთ კიდეც აჭარის ფინანსთა და ეკონომიკის სამინისტროს, თუმცა უწყებამ ოფიციალურად მოგვწერა, რომ დოკუმენტი, რომელსაც ვითხოვდით, საიდუმლოა.

„ბათუმელებმა“ ადმინისტრაციული საჩივრით სამინისტროს ზემდგომს, აჭარის მთავრობას მიმართა, რათა მან დაავალდებულოს სამინისტრო, გასცეს საჯარო ინფორმაცია. აჭარის მთავრობამ „ბათუმელების“ საჩივარი წარმოებაში მიიღო და მისი განხილვისთვის ორთვიანი ვადა განსაზღვრა. საჩივრის ზეპირი მოსმენა აჭარის მთავრობის აპარატში სწორედ დღეს, 29 მარტსაა ჩანიშნული. ვიდრე მთავრობა ჩვენს საჩივარზე მსჯელობს, „ბათუმელებმა“ ყველა ის დოკუმენტი მოიძია, რაც სამინისტრომ არ მოგვაწოდა.

ამავე თემაზე:

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

გარემოს დაცვისა და სოფლის მეურნეობის სამინისტროს განცხადებით, დაშვებულია ეროვნულ საშენ მეურნეობასა და კერძო სანერგეებში გამოყვანილი ბზის რეალიზაცია.

„ბოლო წლების სტატისტიკის მიხედვით, მხოლოდ ერთხელ მიუსაჯეს პატიმრობა სექსმუშაკზე მოძალადეს ქუთაისში. ამ შემთხვევაში პირმა სექსმუშაკის მომსახურებით ისარგებლა, შემდეგ სცემა და მდინარეში გადააგდო. მსხვერპლი მოკვდა,“ – აღნიშნა საია-ს იურისტმა, თამარ დეკანოსიძემ შეხვედრაზე „მართლმსაჯულების ხელმისაწვდომობა სექსმუშაკი და წამალდამოკიდებული ქალებისთვის“.

შეხვედრას, რომელიც ბათუმში, სასტუმრო „რედისონში“ გაიმართა, სექსმუშაკი ქალებიც ესწრებოდნენ.

„ახალგაზრდა იურისტთა ასოციაციის“ მონაცემებით, სექსმუშაკზე მოძალადე ძირითადად ჯარიმით ისჯება ან მასთან საპროცესო შეთანხმება ფორმდება. „მაგალითად, 2016 წელს ზუგდიდში სექსმუშაკის გაუპატიურებისთვის პირს საპროცესო შეთანხმება გაუფორმეს. არსებული პრაქტიკის მიხედვით შეიძლება ითქვას, რომ თავისუფლების აღკვეთა მხოლოდ მაშინ გამოიყენება, თუკი სექსმუშაკი გარდაიცვლება,“ – ამბობს თამარ დეკანოსიძე.

შეხვედრაზე საია-ს იურისტმა „სტამბულის კონვენციაზე“ ისაუბრა, რომელიც საქართველოში 2017 წლის პირველი ივლისიდან ამოქმედდა. საია-ს შეფასებით, დაცვის მექანიზმები სექსმუშაკებისთვისაც ამოქმედდა, თუმცა სამართლებრივი სიკეთით სექსმუშაკები ვერ სარგებლობენ.

თამარ დეკანოსიძე: „დღეს არსებობს დაცვის მექანიზმები, რაც აქამდე არასდროს ყოფილა კანონმდებლობაში, მაგრამ სამართლებრივი სიკეთით საერთოდ ვერ სარგებლობენ სექსმუშაკები. მთავარი პრობლემა არის ის, რომ სექსმუშაკები არ ენდობიან პოლიციას. მათ აქვთ განცდა, რომ მიმართვას სათანადო რეაგირება არ მოჰყვება. ისინი ასახელებენ კონკრეტულ მაგალითებს, როცა მიმართეს პოლიციას და მოძალადის ნაცვლად, სექსმუშაკი დასაჯეს.

აუცილებელია საკანონმდებლო ცვლილებები და სამართალდამცველების გადამზადება. სამართალდამცველებმა იციან, რომ შესაძლოა დაეკისროთ პასუხისმგებლობა, თუკი სათანადო რეაგირება არ ექნებათ, მაგრამ თუკი დანაშაულს ჩაიდინენ სექსმუშაკის მიმართ, არაფერი მოხდება. ეს დამოკიდებულება უნდა შეიცვალოს. ჩვენი მიზანია, სექსმუშაკებისთვის სამართლებრივი დაცვის მექანიზმები ხელმისაწვდომი გავხადოთ“.

შეხვედრაზე მყოფმა სექსმუშაკებმა თქვეს, რომ პოლიციელების მხრიდან დამოკიდებულებაში არაფერი შეცვლილა. „პოლიციელები ითხოვენ თანამშრომლობას, ან უფასო სექსს. უარის შემთხვევაში პოლიციელებისთვის წინააღმდეგობის გაწევისთვის გვაჯარიმებენ,“ – ამბობენ ისინი.

ერთ-ერთმა სექსმუშაკმა საკუთარი შემთხვევის შესახებ ისაუბრა. მან მობილური ტელეფონი დაკარგა და დახმარებისთვის პოლიციას მიმართა. ნინოს თქმით, მას პოლიციის განყოფილების უფროსმა კაბინეტში სექსი შესთავაზა. უარის მიღების შემდეგ კი, სექსმუშაკის ჩვენება შეიცვალა და ნინოს მიედავა გამოძიება ჩვენების შეცვლის მუხლით. ნინომ ოთხლწიანი პირობითი მსჯავრი მოიხადა.

„სტამბულის კონვენციის“ამოქმედების შემდეგ, შემაკავებელი ორდერი პოლიციელმა იმ შემთხვევაშიც უნდა გააფორმოს, თუკი ვინმე სექსმუშაკზე იძალადებს. რამდენი შემაკავებელი ორდერი გამოიწერა, ან დაიწერა თუ არა საერთოდ სექსმუშაკზე ფსიქოლოგიური, ან ფიზიკური ძალადობის გამო – ზუსტი ციფრი არ არსებობს, რადგან სახელმწიფო სტატისტიკას ამ კუთხით არ აწარმოებს.

საია-ს ინფორმაციით, სექსმუშაკები სხვადასხვა სახის ძალადობას განიცდიან. ძირითადად ესაა კლიენტების მხრიდან ძალადობა, პოლიციელების მხრიდან შეურაცხყოფა და უფასო სექსის მოთხოვნა, ოჯახში ძალადობა – ცემა, დაბმა, თავის გადაპარსვა, სახლიდან გაგდება, საზოგადოებიდან გარიყვა, კონფიდენციალობის უფლების დარღვევა სამედიცინო დაწესებულებებში, ან სამედიცინო მომსახურებაზე უარის თქმა.

საია-მ სულ 26 სექსმუშაკი გამოკითხა. ეს ორგანიზაცია უახლოეს მომავალში საკონსტიტუციო სასამართლოს მიმართავს და პროსტიტუციის კუთხით არსებული სამართლებრივი რეგულაციის ანტიკონსტიტუციურად ცნობას მოითხოვს.