მთავარი,სიახლეები

გრიბოედოვის ქუჩისთვის ტატუნაშვილის სახელის დარქმევის განხილვაზე საკრებულომ უარი თქვა

30.03.2018 • 3467
გრიბოედოვის ქუჩისთვის ტატუნაშვილის სახელის დარქმევის განხილვაზე საკრებულომ უარი თქვა

ბათუმის საკრებულოს დღევანდელი სხდომა წუთიერი დუმილით დაიწყო – საკრებულოს წევრებმა ცხინვალში გარდაცვლილ არჩილ ტატუნაშვილს მიაგეს პატივი. საკრებულომ ამავე სხდომაზე უარი თქვა განეხილა ინიციატივა, ბათუმში, გრიბოედოვის ქუჩისათვის არჩილ ტატუნაშვილის სახელის დარქმევის შესახებ.

„ჩემთვის გაუგებარია, რატომ არ ჩასვა ბიურომ დღის წესრიგში ეს საკითხი. სიმბოლურია, ზუსტად გრიბოედივის ქუჩას დაერქვას ტატუნაშვილის სახელი. გრიბოედოვი იყო მეფის რუსეთის სიმბოლო. თუ ისაა პრობლემა, რომ ჩვენ დავაყენეთ ეს ინიციატივა, ახლავე გავიტანთ უკან და თქვენ დააყენეთ ეს ინიციატივა,”- მიმართა საკრებულოს მირდატ ქამადაძემ, საკრებულოს ფრაქცია „ერთიანი ნაციონალური მოძრაობის” თავმჯდომარემ.

ოპოზიციის წარმომადგენელს პასუხი ომარ მახარაძემ გასცა, საკრებულოს იურიდიული კომისიის თავმჯდომარემ. მან განმარტა, რომ ქუჩისთვის სახელის გადარქმევის საკითხზე ჯერ იურიდიულმა კომისიამ უნდა იმსჯელოს, ხოლო შემდეგ სამთავრობო კომისიამ.

„რატომ არ იმსჯელა აქამდე იურიდიულმა კომისიამ ამ საკითხზე? თქვენ სპეციალურად ჩააგდეთ ამ საკითხის განხილვა,”- აღნიშნა მირდატ ქამადაძემ.

კამათში საკრებულოს თავმჯდომარე, სულიკო თებიძე ჩაერთო: „თქვენ არ დაუჭირეთ მხარი რეზოლუციას ოკუპაციური რეჟიმის წინააღმდეგ”.

საკრებულოს თავმჯდომარეს ოპოზიციამ უთხრა, რომ ეს მანიპულაციაა.

საკითხი კენჭისყრაზე დადგა, თუმცა საკრებულომ მხარი არ დაუჭირა ამ საკითხის დღის წესრიგში ჩასმას.

კენჭისყრის შემდეგ საკრებულოს თავმჯდომარემ თქვა, რომ ამ საკითხის გამოკვლევა მოხდება:

„გამოიკითხება შემთხვევითი პრინციპით გრიბოედოვის ქუჩის მოსახლეობა. ასე უცებ ამ საკითხის გადაწყვეტა ვერ მოხერხდება”.

გადაბეჭდვის წესი