განათლება,მთავარი,სიახლეები

სამინისტრო სკოლებისთვის ახალ პროექტს იწყებს 

29.03.2018 • 3787
სამინისტრო სკოლებისთვის ახალ პროექტს იწყებს 

განათლების სამინისტრო მცირეკონტინგენტიან საჯარო სკოლებში „თავისუფალი აქტივობების პროგრამას“ იწყებს.  პროექტის განხორციელება პირველი აპრილიდან უნდა დაიწყოს. როგორც პროგრამის მენეჯერმა, ქეთი კურცხალიამ „ბათუმელებს“ უთხრა, ქვეყნის მასშტაბით  650 სკოლა უკვე შერჩეულია. პროგრამაში მონაწილეობის მიღება მხოლოდ იმ სკოლას შეუძლია, სადაც 20-იდან 50-მდე მოსწავლე სწავლობს.

„სკოლებს შეუძლიათ ორი ტიპის პროექტების განხორციელება. ერთია გამარტივებული წესით, როცა სკოლას სამინისტრო სთავაზობს უკვე შერჩეულ პროექტებს, მეორე შემთხვევაში კი, ინდივიდუალური პროექტების სახით სკოლას თვითონ შეუძლია წარმოადგინოს აქტივობების პროექტი, რომლებსაც კომისია შეისწავლის და არჩევის შემთხვევაში დააფინანსებს,“ – ამბობს ქეთი კურცხალია.

ერთი პროექტის ბიუჯეტი მაქსიმუმ 1000 ლარი უნდა იყოს. ქეთი კურცხალიას თქმით, „თავისუფალი აქტივობების პროგრამა“ გათვალისწინებულია მე-7, მე-8 და მე-9 კლასის მოსწავლეებისთვის.

აქტივობები შეიძლება დაიგეგმოს როგორც სპორტის, ასევე ხელოვნების, კულტურის მიმართულებითაც.

„ჩვენ ვთანამშრომლობთ ეროვნულ კინოცენტრთან  და გარემოს დაცვით ორგანიზაციებთან,  რომლებმაც ასევე მოგვაწოდეს თავიანთი ჩარჩოპროექტები ინტელექტუალურ-შემეცნებითი, ჯანსაღი ცხოვრების წესზე, სამართლებრივ კულტურაზე და ა.შ“-ამბობს პროექტის მენეჯერი.

მისი ინფორმაციით, პროექტში ჩართული მასწავლებლები საათში 10 ლარს მიიღებენ. პროექტი მთლიანობაში 20-საათიანია. სკოლებს შერჩეული პროექტების განხორციელება დაფინანსების მიღების შემდეგ შეეძლებათ.

„თავისუფალი აქტივობების პროგრამის“ ბიუჯეტი 400 ათასი ლარია. ამ პროექტამდე სამინისტრო სკოლებში „თავისუფალი გაკვეთილების“ პროექტს ახორციელებდა. როგორც სამინისტროში გვითხრეს, „თავისუფალი გაკვეთილები“ წარმატებული პროექტი იყო, თუმცა ის აღარ გაგრძელდება.

 

 

 

გადაბეჭდვის წესი


ასევე: