ნეტგაზეთი • RU

მელიქიშვილის ქუჩაზე ქალს თავში ქვის ნატეხი დაეცა

ბათუმში, მელიქიშვილის 36-თან, ქუჩაში მიმავალ სტუდენტ გოგოს თავში ქვის ნატეხი დაეცა. შემთხვევა გუშინ, 28 მარტს, საღამოს მოხდა.

სასწრაფო-სამედიცინო სამსახურის ინფორმაციით, გოგო მშენებლობიდან ჩამოვარდნილმა ნარჩენმა დააზიანა, დაშავებულს თავზე ჰქონდა დაზიანებები და იგი ბათუმის რესპუბლიკურ საავადმყოფოში გადაიყვანეს.

კლინიკაში „ბათუმელებს“ უთხრეს, რომ ახალგაზრდა გოგოს თავზე მსუბუქი ჭრილობა ჰქონდა, რომელიც დაამუშავეს.

„გაკერვა არ დასჭირდა, დამუშავდა ჭრილობა და გავწერეთ უკვე. როგორც პაციენტი ამბობს, მას მშენებლობიდან ჩამოვარდნილი ქვის ნატეხი დაეცა,“ – ამბობს გია კიკაბიძე, ბათუმის რესპუბლიკური საავადმყოფოს დირექტორის მოადგილე.

შინაგან საქმეთა სამინისტროს ინფორმაციით, გოგოს მშენებლობიდან ჩამოვარდნილი ნარჩენი არ დასცემია და ის საცხოვრებელი კორპუსის წინ იმყოფებოდა, როცა დაშავდა. დაწყებულია გამოძიება სისხლის სამართლის კოდექსის 124-ე მუხლის მიხედვით, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით. დანაშაული ისჯება ჯარიმით ან გამასწორებელი სამუშაოთი ვადით ორ წლამდე.

 

ნეტგაზეთის მასალების სხვა გამოცემებში გადაბეჭდვის წესი
ავტორი