Batumelebi | ესტონელი ექსპერტები ქედაში ადგილობრივ მეწარმე ქალებს შეხვდნენ ესტონელი ექსპერტები ქედაში ადგილობრივ მეწარმე ქალებს შეხვდნენ – Batumelebi
RU | GE  

ესტონელი ექსპერტები ქედაში ადგილობრივ მეწარმე ქალებს შეხვდნენ

ესტონელი ექსპერტები ქედაში მეწარმე ქალებს, გენდერისა და ქალთა უფლებების თემაზე მომუშავე საჯარო მოხელეებს შეხვდნენ. შეხვედრაზე მცირე წარმოების მნიშვნელობაზე, სწორ მენეჯმენტსა და არსებული რისკების გათვლის საჭიროებაზე ისაუბრეს.

საინფორმაციო შეხვედრაზე ესტონელმა ექსპერტმა სირია კუუსიკმა თქვა, რომ სწორი მარკეტინგი და რეკლამირება ერთ-ერთი საუკეთესო გზაა პროდუქციის რეალიზაციისთვის, არ აქვს მნიშვნელობა, რას აწარმოებს ფერმერი – ხილს თუ ბოსტნეულს.

„ბიოპროდუქციაზე მოთხოვნა ყოველდღიურად იზრდება. შემიძლია მაგალითისთვის ესტონეთი მოვიყვანო, სადაც ბიოპროდუქციაზე მოთხოვნა არა მარტო ადგილობრივ ბაზარზეა, არამედ საზღვარგარეთიდან მოდის. იაპონიაშიც კი გადის ექსპორტზე ჩვეთან წარმოებული პროდუქტი. ნებისმიერ მოქალაქეს შეუძლია დაიწყოს მცირე წარმოებით პროდუქტის გამოყვანა და ეტაპობრივად დიდი მწარმოებელი გახდეს, შექმნას კომპანიები, რომლებიც რეალიზაციას უზრუნველყოფენ. პროდუქციის წარმოებაში დიდი მნიშვნელობა აქვს სწორ რეკლამირებასაც…

აქ აღნიშნეს, რომ აქვთ საოჯახო სასტუმროები, მათ ვურჩევ, რომ ინფორმაცია საოჯახო სასტუმროს შესახებ გამოაქვეყნონ დეტალურად და ინფორმაცია არ იყოს ზოგადი, ვთქვათ, მხოლოდ მთლიანი შენობის ფოტო ან საძინებლის, ფოტოები უნდა იყოს კონკრეტული და ზუსტად უნდა აღწერდეს გარემოს, ის რაც მე მომწონს, შეუძლებელია სხვასაც მოეწონოს, რამდენიმე ფოტოზე აღწერილი კონკრეტული გარემოთი კი მნახველი უფრო ინტერესდება.

ყველაზე მნიშვნელობვანი, რაც წარმოებაში არის გასათვალისწინებელი, ეს ბიზნესგეგმა და პროექტია, გრძელვადიანი ბიზნესგეგმა უნდა ჰგქონდეს გაწერილი ნებისმიერ მწარმოებელს, რაც შესაძლებლობას მისცემს, ნახოს როგორ ვითარდება მისი ბიზნესი ან რა პრობლემები იჩენს თავს,“ – ამბობს სირია კუუსიკი.

მანანა დუმბაძე: „საოჯახო სასტუმრო გვაქვს სოფელ მერისში, ათი წლის წინ დავიწყეთ ეს საქმიანობა და დღეს ტურისტების ნაკლებობას არ ვუჩივით. ვფიქრობ მნიშვნელოვანია ასეთი შეხვედრები მოეწყოს, მოხდეს ინფორმაციის გაცვლა, ასევე უცხო ქვეყნის გამოცდილების გაზიარება, რაც განსაკუთრებით მნიშვნელოვანია დამწყები მეწარმეებისთვის“.

„პროექტის ფარგლებში ვატარებთ შეხვედრებსა და სემინარებს მუნიციპალიტეტებში, ეკონომიკის ექსპერტები აწვდიან ინფორმაციას, თუ როგორ უნდა მოხდეს სოფლად ტურიზმისა თუ ზოგადად, სასტუმროების და სხვადასხვა ბიზნესის განვითარება. ჩვენ შეხვედრა გვქონდა ხელვაჩაურის მუნიციპალიტეტშიც, შეხვედრები ასევე სხვა მუნიციპალიტეტებშიც გაიმართება,“  – ამბობს ორგანიზაცია „ერთმანეთისთვის“ თავმჯდომარე, სოფიო ბაკურიძე.

შეხვედრა ქედაში / ეკა ბარამიძის ფოტოები

 

 

ნეტგაზეთის მასალების სხვა გამოცემებში გადაბეჭდვის წესი
ავტორი