ნეტგაზეთი • RU

„ბათუმის ავტოტრანსპორტი“ეკოლოგიურად სუფთა და ადაპტირებულ ავტობუსებს შეიძენს

ბათუმის საკრებულოში დღეს გამართულ საფინანსო და ეკონომიკური განვითარების კომისიის სხდომაზე საკრებულოს წევრებმა ბათუმის ავტობუსების პროექტთან დაკავშირებით საგრანტო ხელშეკრულების თაობაზე წარმოდგენილ განკარგულების პროექტზე იმსჯელეს.

განკარგულების პროექტი ბათუმის ავტობუსების პროექტის ფარგლებში, შპს „ბათუმის ავტოტრანსპორტის“ კორპორატიული განვითარების პროგრამის და საზოგადოებასთან ურთიერთობის გეგმის მომზადებისა და გახორციელების მიზნით, ევროპის რეკონსტრუქციისა და განვითარების ბანკიდან (EBRD) გრანტის სახით 209,950 ევროს მიღებას ითვალისწინებს.

„ბათუმის ავტოტრანსპორტი“ მინიმუმ 10 ელექტრო და 40 ახალი ევრო 5 სტანდარტის ავტობუსს შეიძენს - განკარგულების პროექტს საკრებულო ხვალ რიგგარეშე სხდომაზე განიხილავს.

„ბათუმის ავტოტრანსპორტი“ მინიმუმ 10 ელექტრო და 40 ახალი ევრო 5 სტანდარტის ავტობუსს შეიძენს – განკარგულების პროექტს საკრებულო ხვალ რიგგარეშე სხდომაზე განიხილავს.

ბათუმის ავტობუსების პროექტი,რომელიც მიზნად ისახავს ბათუმის მუნიციპალური ავტოპარკის განახლებას – შპს „ ბათუმის ავტოტრანსპორტის“ მიერ ეკოლოგიურად სუფთა და ადაპტირებული ავტობუსების შეძენას, ევროპის რეკონსტრუქციისა და განვითარების ბანკის ფინანსური მხარდაჭერით (EBRD) მიმდინარეობს.

განკარგულების პროექტის მიხედვით, ევრობანკმა საქართველოს გამოუყო 5.5 მილიონი  ევროს ოდენობის სესხი, რომლის ფარგლებშიც შპს „ბათუმის ავტოტრანსპორტი“ შეიძენს მინიმუმ 10 ელექტრო და 40 ახალი ევრო 5 სტანდარტის ავტობუსს, რაც ხელს შეუწყობს გარემოს დაცვასა და მუნიციპალური ტრანსპორტის სისტემის გამართულ მუშაობას. პროექტი, ასევე, ხორციელდება ევრობანკის მიერ მართული აღმოსავლეთ ევროპის ენერგო ეფექტურობის და გარემოს დაცვითი თანამშრომლობის ფონდის (E5P) ფარგლებში. E5P გრანტი, რომელიც შეადგენს 1.5 მილიონ ევროს, მოხმარება ათი ახალი ელექტრო ავტობუსის შეძენას.

ბათუმის საკრებულოს საფინანსო და ეკონომიკური განვითარების კომისიის თავმჯდომარე - ზურაბ ნაკაიძე და ბათუმის მერიის საფინანსო სამსახურის უფროსი - არჩილ ვანაძე.

ბათუმის საკრებულოს საფინანსო და ეკონომიკური განვითარების კომისიის თავმჯდომარე – ზურაბ ნაკაიძე და ბათუმის მერიის საფინანსო სამსახურის უფროსი – არჩილ ვანაძე.

მერიის საფინანსო სამსახურის უფროსის არჩილ ვანაძის ინფორმაციით, „ავტობუსები გააუმჯობესებს მომსახურებას როგორც ადგილობრივი მოსახლეობისთვის,ასევე, ტურისტებისთვის ტრანსპორტის მუშაობის სანდოობის, უსაფრთხოებისა და ეფექტურობის კუთხით. ამავდროულად, დაიცავს გარემოს ნამწვი აირების ემისიის შემცირების გზით. ახალი დაბალძირიანი ავტობუსები ადაპტირებული იქნება როგორც შეზღუდული შესაძლებლობების მქონეპირებისათვის, ასევე მარტივად გამოსაყენებელი იქნება საბავშვო ეტლებით მოსარგებლე მშობლებისა და ხანდაზმული მოქალაქეებისთვის“.

ევროპის რეკონსტრუქციისა და განვითარების ბანკსა (EBRD) და შპს „ბათუმის ავტოტრანსპორტს“ შორის ბათუმის ავტობუსების პროექტის განხორციელების ხელშეკრულებას, რომელიც ითვალისწინებდა შპს „ბათუმის ავტოტრანსპორტის„ მიერ ეკოლოგიურად სუფთა და ადაპტირებული ავტობუსების შეძენას, ხელი 2017 წლის 13  ივლისს მოეწერა. ამავე დღეს მოეწერა ხელი ევროპის რეკონსტრუქციის და განვითარების ბანკსა (EBRD) და ქ. ბათუმის მუნიციპალიტეტს შორის პროექტის მხარდაჭერის ხელშეკრულებასაც, რომელიც  პროექტის განხორციელებასთან დაკავშირებული ცალკეული საკითხებისა და დეტალების მოწესრიგებას ითვალისწინებდა.

როგორც არჩილ ვანაძემ კომისიის სხდომაზე აღნიშნა, ბათუმის ავტობუსების პროექტის შემადგენელი ნაწილია შპს „ბათუმის ავტოტრანსპორტის“ კორპორატიული განვითარების პროგრამის და საზოგადოებასთან ურთიერთობის გეგმის მომზადება და განხორციელება,რომელსაც ევროპის რეკონსტრუქციისა და განვითარების ბანკი (EBRD), საქართველოს პარლამენტის  მიერ 2017 წლის 20 სექტემბერს N1291-1ს დადგენილებით რატიფიცირებული საქართველოს  საერთაშორისო ხელშეკრულების საფუძველზე, გრანტის სახით აფინანსებს 209,950 ევროს ფარგლებში.

„ბათუმის ავტოტრანსპორტი“ ეკოლოგიურად სუფთა და ადაპტირებულ ავტობუსებს შეიძენს

„ბათუმის ავტოტრანსპორტი“ ეკოლოგიურად სუფთა და ადაპტირებულ ავტობუსებს შეიძენს

საქართველოს კანონმდებლობის შესაბამისად,თუკი გრანტი საქართველოს პარლამენტის მიერ რატიფიცირებული საქართველოს საერთაშორისო  ხელშეკრულების საფუძველზე  მიიღება, საგრანტო ხელშეკრულებას აფორმებს მუნიციპალიტეტის აღმასრულებელი ორგანო საკრებულოს წინასწარი თანხმობით.  შესაბამისად, ბათუმის საკრებულოს მიერ განკარგულების პროექტის მიღების შემთხვევაში, ქ. ბათუმის მუნიციპალიტეტის მერი, უფლებამოსილი იქნება ხელი მოაწეროს ევროპის რეკონსტრუქციისა და განვითარების ბანკსა (EBRD) და ქ. ბათუმის მუნიციპალიტეტს შორის საგრანტო ხელშეკრულებას განკარგულების პროექტით გათვალისწინებული თანხის ფარგლებში.

განკარგულება, ხვალ, 30 მარტს, საკრებულოს რიგგარეშე სხდომაზე მიღების შემთხვევაში, ძალაში ხელმოწერისთანავე შევა.

ნეტგაზეთის მასალების სხვა გამოცემებში გადაბეჭდვის წესი
ავტორი