„ბათუმელების“ მიერ დღემდე მოპოვებული დოკუმენტები და სახელმწიფო დაწესებულებების მიერ ბოლო დროს გავრცელებული განცხადებები კიდევ უფრო ბუნდოვანს ხდიდა, რატომ გადაწყვიტა სახელმწიფომ მსჯავრდებულ სოსო გოგიტიძის დისშვილისთვის დაებრუნებინა ბიძისთვის ჩამორთმეული ქონება. მით უფრო, რომ თავდაპირველად სწორედ აჭარის ფინანსთა და ეკონომიკის სამინისტრო სთხოვდა სასამართლოს, არ დაეკმაყოფილებინა ცეცხლაძის მოთხოვნა.
ბათუმის საქალაქო სასამართლომ 2006 წელის 15 აგვისტოს სოსო გოგიტიძეს ადამიანის გატაცების ნაწილში 9-წლით თავისუფლების აღკვეთა მიუსაჯა, ხოლო სხვა დანაშაულებისთვის – 15-წლიანი პატიმრობა. სოსო გოგიტიძეს განაჩენი არ გაუსაჩივრებია.
რატომ გადაწყვიტა აჭარის მთავრობამ სოსო გოგიტიძისთვის 2005 წელს ჩამორთმეულ ქონებაზე მორიგებოდა მის დისშვილს, ენვერ ცეცხლაძეს; რა ჩაწერეს მორიგების აქტში? – „ბათუმელებმა“ სცადა ამ კითხვებზე პასუხი აჭარის მთავრობისგან მიეღო. შესაბამისი წერილით მივმართეთ კიდეც აჭარის ფინანსთა და ეკონომიკის სამინისტროს. უწყებამ კი ოფიციალურად მოგვწერა, რომ დოკუმენტი, რომელსაც ვითხოვდით, საიდუმლოა.
„ბათუმელებმა“ ადმინისტრაციული საჩივრით სამინისტროს ზემდგომს, აჭარის მთავრობას მიმართა, რათა მან დაავალდებულოს სამინისტრო, გასცეს საჯარო ინფორმაცია. აჭარის მთავრობამ „ბათუმელების“ საჩივარი წარმოებაში მიიღო და მისი განხილვისთვის ორთვიანი ვადა განსაზღვრა. საჩივრის ზეპირი მოსმენა აჭარის მთავრობის აპარატში სწორედ დღეს, 29 მარტსაა ჩანიშნული. ვიდრე მთავრობა ჩვენს საჩივარზე მსჯელობს, „ბათუმელებმა“ ყველა ის დოკუმენტი მოიძია, რაც სამინისტრომ არ მოგვაწოდა.
ამ დოკუმენტებიდან გთავაზობთ ენვერ ცეცხლაძის მინდობილი პირის წერილს, რომელიც აჭარის მთავრობის თავმჯდომარემ, ზურაბ პატარაძემ 2016 წლის ივლისში მიიღო. ამ წერილის მიღებიდან 5 თვეში, აჭარის მთავრობა და ენვერ ცეცხლაძე იმ პირობებზე მორიგდნენ, რა პირობებიც ცეცხლაძის მინდობილმა პირმა მთავრობის თავმჯდომარეს შესთავაზა.
ამ წერილის ბოლოს მთავრობის თავმჯდომარეს ასე მოუწოდებენ: „… ბოლომდე ვიმოქმედებთ პრინციპით – „დაე აღსრულდეს მართლმსაჯულება, თუნდაც ქვეყნიერება დაიღუპოს“.
აჭარის მთავრობის გადაწყვეტილების საფუძველზე ქუთაისის სააპელაციო სასამართლომ მორიგების აქტი დაამტკიცა. სწორედ ამ მორიგების აქტით დაუბრუნეს სოსო გოგიტიძისთვის ჩამორთმეული ქონება მის დისშვილს – ენვერ ცეცხლაძეს.
სახელმწიფომ ენვერ ცეცხლაძის არგუმენტები გაიზიარა, მოურიგდნენ და მას ქონება, ბათუმში, ახალ ბულვართან, შერიფ ხიმშიაშვილის ქუჩის ბოლოში, დაუბრუნეს, ოღონდ ერთი ძირითადი დათქმით: სახლს, რომელშიც აბაშიძის ხელისუფლების უშიშროების მინისტრი პერიოდულად ცხოვრობდა, სუს-მა იქამდე უნდა განკარაგოს, ვიდრე ენვერ ცეცხლაძე ამ ტერიტორიაზე 100-ნომრიანი სასტუმროს მშენებლობას არ დაასრულებს [ამ სახლს, ჩამორთმევის შემდეგ, ყოველთვის სუს-ი განკარგავდა. შენობას სახელმწიფო დაცვა იცავდა და იცავს].
ენვერ ცეცხლაძე დაბრუნებულ მიწის ნაკვეთზე, ახალ ბულვართან სასტუმროს რომ ააშენებს, ესეც ხელისუფლებასთან აქვს შეთანხმებული. 2018 წლის დასაწყისში ენვერ ცეცხლაძემ აჭარის მთავრობის თავმჯდომარის, ზურაბ პატარაძის რეკომენდაციის მოპოვებაც მოახერხა, დადგენილ ნორმაზე მეტი სიმაღლის [კ2] სასტუმრო რომ ააშენოს.
ამავე თემაზე:
https://batumelebi.netgazeti.ge/news/118531/
https://batumelebi.netgazeti.ge/news/117817/
