მთავარი,სიახლეები

ბათუმში საბავშვო ბაღის აღმზრდელებს ხელფასი გაეზრდებათ

30.03.2018 • 4773
ბათუმში საბავშვო ბაღის აღმზრდელებს ხელფასი გაეზრდებათ

ბათუმში საბავშვო ბაღის აღმზრდელებს ხელფასი 20 პროცენტამდე გაეზრდებათ – საკრებულომ ამ საკითხს რამდენიმე წუთის წინ დაუჭირა მხარი.

„აქამდე თუ არ შეიძლებოდა და ამბობდით, კანონის შეცვლა სჭირდება ამასო, ახლა როგორ ზრდით?”- იკითხა სხდომაზე რაულ თავართქილაძემ, “ევროპული საქართველოდან”.

საბავშვო ბაღების აღმზრდელებისთვის ხელფასის გაზრდას ბოლო რამდენიმე თვეა ოპოზიცია აქტიურად ითხოვდა.

„ეს იყო დაკავშირებული საბიუჯეტო რესურსთან. როგორც კი გამოჩნდა რესურსი, ჩვენ ეს მივმართეთ აღმზრდელების ხელფასებისთვის,”- უპასუხა საკრებულოს წევრებს არჩილ ვანაძემ, ბათუმის მერიის საფინანსო სამსახურის უფროსმა.

საბავშვო ბაღების აღმზრდელების, აღმზრდელების თანაშემწეებისა და ტექნიკური პერსონალის შრომის ანაზღაურება ახალი სასწავლო წლიდან გაიზრდება.

შრომის ანაზღაურების გაზრდა ადმინისტრაციული ხარჯების შემცირებისა და ტენდერის ეკონომიის ხარჯზე მოხერხდა.

ბათუმის ბიუჯეტი ცვლილების შეტანის შემდეგ ჯამში 437 ათასი ლარით გაიზარდა.

საბავშვო ბაღების გარდა შრომის ანაზღაურება გაიზრდება „ბათუმის ავტოტრანსპორტშიც”, რაც „ნაციონალურმა მოძრაობამ“ გააპროტესტა.

„შპს-ში შრომის ანაზღაურება არ უნდა იზრდებოდეს ბიუჯეტის ხარჯზე,“ – მიიჩნევს ლევან ანთაძე, საკრებულოს წევრი „ნაციონალური მოძრაობიდან”.

 

 

გადაბეჭდვის წესი


ასევე: