საქართველოს სახალხო დამცველის ანგარიშის მიხედვით, საქართველოში 189 საჯარო სკოლა ავარიულია. ანგარიშის მიხედვით, 2016 წელს ავარიულ მდგომარეობაში 209 სკოლა ფუნქციონირებდა. „მათგან 42 არ ექვემდებარებოდა აღდგენა -გამაგრებით სამუშაოებს.
ავარიულ და სარეაბილიტაციო საჯარო სკოლებში 42 394 მოსწავლე ირიცხება, მათ შორის არის აჭარის ავტონომიური რესპუბლიკის მონაცემებიც,“ – წერს სახალხო დამცველი.
„მოწოდებული ინფორმაციით, ავარიულ სკოლებში მოსწავლეთა უსაფრთხოების მიზნით ტარდება აუცილებელი ღონისძიებები, თუმცა, მსგავსი ღონისძიებები რიგ შემთხვევებში სათანადოდ ვერ უზრუნველყოფს მოსწავლეთა უსაფრთხოების ჯეროვან დაცვას,“ – ნათქვამია ანგარიშში.
სკოლების ავარიული მდგომარეობის შესახებ სახალხო დამცველმა საქართველოს მთავრობასa და განათლებისა და მეცნიერების სამინისტროს 2017 წლის 16 აგვისტოს აცნობა. კვლევა სკოლების მდგომარეობის შესახებ 2016-2017 წლებს მოიცავს.
„შესწავლის შედეგად გამოიკვეთა, რომ ზოგადსაგანმანათლებლო დაწესებულებების მნიშვნელოვანი ნაწილი ფუნქციონირებს ავარიულ და მოსწავლეთათვის საფრთხის შემცველ პირობებში. მდგომარეობა განსაკუთრებით მძიმეა მაღალმთიან რეგიონებსა და სოფლად მდებარე საჯარო სკოლებში“.
სახალხო დამცველის ანგარიშის მიხედვით, სხვადასხვა რეგიონში ახალი საჯარო სკოლებიც შენდება, თუმცა ეს რიცხვი ძალიან მცირეა.
„2015–2017 წლების გეგმების ფარგლებში დაიწყო 22 საჯარო სკოლის მშენებლობა და დასრულდა 8 საჯარო სკოლის მშენებლობა.
დადებითად უნდა ჩაითვალოს, რომ „საგანმანათლებლო და სამეცნიერო ინფრასტრუქტურის განვითარების 2017 წლის სამოქმედო გეგმის ფარგლებში“ დაგეგმილია 35 საჯარო სკოლის გამაგრებითი სამუშაოები და 518 საჯარო სკოლის ნაწილობრივი რეაბილიტაცია“.
ანგარიშში საქართველოს სახალხო დამცველი მიუთითებს, რომ აუცილებელია აქტიურად განხორციელდეს საჯარო სკოლებში მოსწავლეთა უფლებრივი მდგომარეობის გაუმჯობესება. განსაკუთრებული ყურადღება უნდა გამახვილდეს განათლების ხელმისაწვდომობასა და ზოგადსაგანმანათლებლო დაწესებულებებში უსაფრთხო ფიზიკური გარემოს უზრუნველყოფაზე.
„ასევე, უნდა გაუმჯობესდეს ზოგადსაგანმანათლებლო დაწესებულებების ინფრასტრუქტურული მდგომარეობა და განახლდეს სასწავლო ინვენტარი, განსაკუთრებით, სოფლად და მაღალმთიან რეგიონებში. მნიშვნელოვანია, უფრო ინტენსიური გახდეს ახალი საჯარო სკოლების მშენებლობა“.
