Batumelebi | ქედის მერი: ადამიანური რესურსების თვალსაზრისით კრიტიკულ ზღვარზე ვართ ქედის მერი: ადამიანური რესურსების თვალსაზრისით კრიტიკულ ზღვარზე ვართ – Batumelebi
RU | GE  

ქედის მერი: ადამიანური რესურსების თვალსაზრისით კრიტიკულ ზღვარზე ვართ

ქედის მერმა, ლევან გორგილაძემ, მედიას, სამოქალაქო მრჩეველთა საბჭოსა და მესამე სექტორს ანგარიში წარუდგინა და მუშაობის 100-დღიანი პერიოდი შეაფასა.

მთავარ პრიორიტეტად ლევან გორგილაძემ ინფრასტრუქტურა და ტურიზმი დაასახელა, თუმცა აქვე ისიც აღნიშნა, რომ ქედაში ასული ტურისტი ადგილზე დიდხანს არ ჩერდება.

შეხვედრაზე არასამთავრობო ორგანიზაცია „სამართლიანი არჩევნების“ წარმომადგენელმა, ვლადიმერ თებიძემ მერს ჰკითხა, თუ რას აკეთებს მერია იმისთვის, რომ მუნიციპალიტეტის ტურისტული პოტენციალი მხოლოდ მახუნცეთით არ შემოიფარგლოს და ტურისტები მის ფარგლებს გასცდნენ.

„ბიზნესმენები, ვინც მოდიან, მე მათთან ასეთი შეთავაზება მაქვს, ყველა მიმართულებით გავიყვან გზას, ბილიკს, თუ ისინი ტურისტულ ობიექტს შექმნიან. ცალმხრივად ვერ და არ მოხდება ტურისტული პოტენციალის ზრდა,“ – განაცხადა მერმა.

შეხვედრაზე ლევან გორგილაძემ მუშაობის პერიოდში განხორციელებულ მნიშვნელოვან პროექტად ზუნდაგის ბაღის რეაბილიტაცია, დაბა მახუნცეთში საზაფხულო თეატრის მშენებლობა და სოფლებიდან ნარჩენების გამოსატანად ავტომობილის შესყიდვა დაასახელა. აქვე მერმა ისიც აღნიშნა, რომ წელს პირველად მუნიციპალიტეტი პარკინსონით დაავადებული პაციენტებისთვის მიზნობრივ პროგრამას ახორციელებს, ასევე პირველად მუნიციპალიტეტი მსხვილფეხა საქონელს „ემკარის“ დაავადებაზე აცრის.

„ბათუმელების“ კითხვაზე რის გაკეთება ვერ შეძლო? ლევან გორგილაძე პასუხობს:

„ისე ჩქარა ვერ ხორციელდება პროექტები და იდეები, მე  რომ ვფიქრობდი. უფრო მეტი ადამიანური რესურსი, მეტი დახმარება და მეტი მუშაობა სჭირდება ამას. ერთადერთი, რაც შეიძლება ვთქვათ, ის ტემპი რაც აქამდე არსებობდა, არ არის საკმარისი, თუმცა გარკვეულწილად ამის მიზეზიც ზამთრის პერიოდია.

კადრებში კრიტიკულ ზღვარზე  ვართ, 2012 წელს, როდესაც ქედის ბიუჯეტი  5 მილიონ ლარს შეადგენდა, ხარჯვით ნაწილს მერიის დაახლოებით 55 თანამშრომელი განაგებდა, 2018 წელს, როდესაც ბიუჯეტი 10 მილიონამდეა და იმავე ოდენობის ადამიანი განაგებს ამ ბიუჯეტს, ეს იმას ნიშნავს, ჩვენ ადამიანური რესურსების თვალსაზრისით კრიტიკულ ზღვარზე ვართ,“ – განაცხადა მერმა და აღნიშნა, რომ რეორგანიზაციას ჯერ არ გეგმავს.

„ეს არის ჩემთვის ახალი სფერო, ჯერ მე უნდა ჩამოვიყალიბო სწორი ხედვები და მერე ვიფიქროთ სტრუქტურაზე. რაც შეეხება პროექტებს, ვმუშაობდით იმ პროექტებზე, რომლებიც 2017 წელს დამუშავდა, საკმაოდ წარმატებულად ვასრულებთ პირველ კვარტალს. ჩვენი ხედვები უფრო 2019 წელზე იქნება გათვლილი,  ყველა მიმართულებით გვაქვს ხედვები, თუმცა  ჩვენი მთავარი მიზანია ჩვენი ხედვები მოსახლეობის ინტერესებს დავამთხვიოთ, იგივე პროექტები, რომლებიც ითვლებოდა, რომ საჭიროებდა დოტაციას, ვცდილობთ ინფრასტრუქტურულ და მომგებიან პროექტებად გადავაქციოთ, მაგალითად,  ჩვენი კულტურული და სახელოვნებო შესაძლებლობა იმდენად კარგია და ძლიერია, რომ შესაძლებელია გამოვიყენოთ განსაკუთრებით ტურიზმში, შოუბიზნესის თვალსაზრისით“.

დავით ანანიძე, ქედის მუნიციპალიტეტის მრჩეველთა საბჭოს წევრი: „მრჩეველთა საბჭოს სახელით შემიძლია დადებითად შევაფასო იმ 100 დღის სამუშაოები, რაც მერიამ ჩაატარა და ის სამუშაოები, რის განხორციელებაც მერიამ დაისახა ეტაპობრივად თუ შესრულდება, ქედისთვის წინგადადგმული ნაბიჯია“.

ვლადიმერ თებიძე, არასამთავრობო ორგანიზაცია „სამართლიანი არჩევნების“ წარმომადგენელი:

„ზოგადად კარგია თვითმმართველობისგან ანგარიშის ჩაბარება, გამომდინარე იქედან, რომ ადგილობრივი მოსახლეობა უნდა იცნობდეს პრიორიტეტებს და ისმენდეს ანგარიშებს, მაგრამ მუშაობის 100 დღე ვერ გამოდგება საზომად, ამას მუშაობის ოთხწლიანი პერიოდი გვიჩვენებს, რომელიც მოსახლეობისგან მერმა ნდობის სახით მიიღო“.

ლევან გორგილაძემ თავისი მუშაობის 100-დღიანი პერიოდი გუშინ, 29 მარტს, შეაფასა.

 

ნეტგაზეთის მასალების სხვა გამოცემებში გადაბეჭდვის წესი
ავტორი