ისტორიული ზონის ახალი საზღვრები ბათუმში – მის დამტკიცებაზე საკრებულო ხვალ იმსჯელებს

კულტურული მემკვიდრეობის დამცავი ზონების დამტკიცებაზე ხვალ, 30 მარტს, ბათუმის საკრებულოს სხდომაზე იმსჯელებენ. პროექტი „გეოგრაფიკის“ მიერ მომზადებული დოკუმენტის მოწონებას და ბათუმში ისტორიული ზონის შესახებ განკარგულების დამტკიცებას ითვალისწინებს. ეს განკარგულება ქალაქის ისტორიულ ნაწილის საზღვრებს და შესაბამის ზონებს დაადგენს.

ბათუმის მერიის ინფორმაციით, საჯარო წარმოების შემდეგ დადგინდა, რომ საჭიროა ,,გეოგრაფიკის“ მიერ  წარმოდგენილი ისტორიული განაშენიანებისა და განაშენიანების რეგულირების დაცვის ზონების საზღვრების კორექტირება.

მერის იდეაა „გეოგრაფიკის“ მიერ შეთავაზებული საზღვრებიდან ამოიღონ გორგილაძის ქუჩის ნაწილი და ე.წ. წითელი ზოლი მელიქიშვილის ქუჩაზე გავიდეს, გორგილაძის ქუჩის ნაწილი კი, მელიქიშვილის ქუჩიდან ზღვის სანაპირომდე ისტორიულ ზონაში მოექცევა.

მერმა ინიციატივა ქუჩის დანარჩენ ნაწილში უკვე არსებული მაღლივი შენობებითა და მიმდინარე პროექტებით ახსნა: „იქ, ისედაც მაღლივი შენობებია და სირთულეებს შევუქმნით მოსახლეობას“.

ლაშა კომახიძის თქმით, მერიის მიზანია, ქალაქს მიეცეს განვითარების სწორი მიმართულება ისტორიული ზონის გარეთ. მან იმედი გამოთქვა, რომ მენაშენეები ახლა უფრო მეტი ინტერესით შეხედავენ ქალაქის სხვა ზონებს.

ამის შესახებ ლაშა კომახიძემ „დემოკრატიული ჩართულობის ცენტრში“ გამართულ შეხვედრაზე ისაუბრა.

ახალ პროექტში ისტორიული განაშენიანების დაცვის ზონის საზღვრის საწყისი წერტილი ემთხვევა ლერმონტოვის ქუჩის, დელფინარიუმის მიმდებარე ტერიტორიისა და რუსთაველის ქუჩის გადაკვეთას. საზღვარი მიყვება ნურიგელის ტბის მიმდებარე ტერიტორიას მელიქიშვილის ქუჩამდე, მელიქიშვილის ქუჩა ფარნავაზ მეფის ქუჩის გადაკვეთამდე, ფარნავაზ მეფის ქუჩა – 26 მაისის ქუჩის გადაკვეთამდე, 26 მაისის ქუჩა – ჭავჭავაძის ქუჩის გადაკვეთამდე, ჭავჭავაძის ქუჩა – წერეთლის ქუჩის გადაკვეთამდე, წერეთლის ქუჩა – ბერიძის ქუჩის გადაკვეთამდე, ბერიძის ქუჩა – ჭავჭავაძის ქუჩის გადაკვეთამდე, ჭავჭავაძის ქუჩა მის ღერძზე მდებარე ზღვის სანაპირო ზოლის გადაკვეთამდე, სანაპირო ზღვის ზოლი საზღვაო ვაგზლის მიმდებარე ტერიტორიის ჩათვლით გოგებაშვილის ქუჩამდე, გოგებაშვილის ქუჩა სასტუმრო რედისონის მიმდებარე ტერიტორიის ჩათვლით ნონეშვილის ქუჩის გადაკვეთამდე, ნინოშვილის ქუჩა შოთა რუსთაველის სახელობის უნივერსიტეტის მიმდებარე ტერიტორიის ჩათვლით რუსთაველის ქუჩის გადაკვეთამდე, რუსთაველის ქუჩა დელფინარიუმის მიმდებარე ტერიტორიის გადაკვეთამდე.

ბათუმის განაშენიანების რეგულირების ზონის საზღვრის საწყისი წერტილი ემთხვევა მელიქიშვილისა და ფარნავაზ მეფის ქუჩის გადაკვეთას, მელიქიშვილის ქუჩა პუშკინის ქუჩის გადაკვეთამდე, პუშკინის ქუჩა ბერიძის ქუჩის გადაკვეთამდე, ბერიძის ქუჩა წერეთლის ქუჩის გადაკვეთამდე, წერეთლის ქუჩა შავშეთის გადაკვეთამდე, შავშეთის ქუჩა სარკინიგზო ლიანდაგების გაყოლებით გოგებაშვილის ქუჩის გადაკვეთამდე, გოგებაშვილის ქუჩა ჭავჭავაძის ქუჩის გადაკვეთამდე და შემდგომ მიყვება ისტორიული განაშენიანების დაცვის ზონის საზღვარს მელიქიშვილისა და ფარნავაზ მეფის ქუჩის გადაკვეთამდე.

ნეტგაზეთის მასალების სხვა გამოცემებში გადაბეჭდვის წესი
ავტორი