მთავარი

დღეს რა ვჭამოთ?

04.01.2018 • 6954
დღეს რა ვჭამოთ?

ავტორი: თამარა მირიანაშვილი

ჩემთვის ბავშვობიდან რიტუალი იყო სასუსნავების მომზადება, თუნდაც ყველაზე მოკლე მანძილზე, სახლიდან ბაღჩაში გასვლა, იქ თამაში და შემდეგ შესვენებისას სუფრის გაშლა. არადა, სახლი ორ ნაბიჯში იყო. სადაც არ უნდა წავსულიყავი, სოფელში, ზოოპარკში თუ ვენახში, თან ყოველთვის მქონდა საგზალი. ყველაზე ტკბილად მახსენდება ის დრო, როდესაც ბაბო უმზადებდა პაპას ხურჯინს ვენახისთვის, არდადეგების დროს, როდესაც მეც სოფელში ვიყავი. მივყვებოდი ხოლმე პაპას ვენახში და ერთი სული მქონდა, როდის გავხსნიდი ჯადოსნურ ხურჯინს და იქიდან მწვანე მოლზე საოცრებებს გადმოვალაგებდი.

დიდი დრო გავიდა, ბევრი რამე შეიცვალა და განვითარდა. მიუხედავად იმისა, რომ არც იმდენი დრო აღარ მაქვს, ძველი რიტუალები ისევ შემომრჩა დღესაც, და ვცდილობ ამ პროცესით მიღებული სიამოვნება არ მოვიკლო ხოლმე.

დღესაც, როგორც კი სახლიდან გარეთ აღმოვჩნდებით, სამსახური იქნება, უნივერსიტეტი, ბიბლიოთეკა თუ სხვა რამ, ჩვენს დღის წესრიგში აუცილებლად შემოდის კითხვა – დღეს რა ვჭამოთ? ერთი შეხედვით მარტივი კითხვაა და თითქოს მარტივად მოსაგვარებელიც, თუმცა მთელი რიგი ნიუანსების გათვალისწინებით, საკითხი სულ უფრო და უფრო რთულდება.

სამსახურის შემთხვევაში შესვენება ერთი საათია, ზოგჯერ შეიძლება ამის ფუფუნებაც არ იყოს. არსებული რეალობის გათვალისწინებით კი, რამდენიმე ალტერნატივა გვაქვს:

[checklist]

  • ახლომდებარე კაფე/რესტორნები;
  • სამუშაო დაწესებულების
  • სამზარეულო/თვითმომსახურების სივრცე;
  • ადგილზე მოტანის სერვისი;
  • საოჯახო სამზარეულოები;
  • ლანჩბოქსი სახლიდან.

[/checklist]

ყოველდღე კაფეში გასვლა მნიშვნელოვან დანახარჯებთან არის დაკავშირებული, ამას დაუმატეთ დრო, რომელიც კაფეში მისასვლელად, უკან დასაბრუნებლად და შეკვეთის ლოდინისთვის გჭირდებათ. თუმცა გასვლას აქვს ერთი დადებითი მხარე, როდესაც მთელი დღე ოფისში, ერთსა და იმავე სივრცეში ხართ, გინდათ, რომ ეს ერთი საათი გამოიყენოთ, გახვიდეთ გარეთ, ჰაერზე და გარემო გამოიცვალოთ, რასაკვირველია, ცოტა ზედმეტი ხარჯის სანაცვლოდ.

ადგილზე მოტანის სერვისიც არანაკლებ პრობლემატურია. ასეთი სერვისების დიდი ნაწილი პირდაპირ დამოკიდებულია სხვადასხვა კაფე-რესტორნის მუშაობის სისწრაფესა და კერძების ხარისხზე, ანუ თუ იგვიანებს რესტორანი, იგვიანებს ადგილზე მიტანის სერვისიც, და თუ ეს ყველაფერი პიკის საათებს დაემთხვა, კიდევ დიდხანს მოგიწევთ ლოდინი და ნერვიულობა.

პირველ-ორ ვარიანტთან შედარებით, დროის და ფინანსების თვალსაზრისით, ადამიანები ახლომახლო მდებარე საოჯახო სამზარეულოებს ანიჭებენ უპირატესობას, სადაც სწრაფად აირჩევ უკვე მომზადებულ კერძს, რასაც შემდეგ ან ადგილზე მიირთმევ, ან სამსახურში.

თუმცა, როდესაც ჯანსაღად კვების სურვილი გაქვს, კაფე-რესტორნების მსგავსად, საოჯახო სამზარეულოებსაც მწირი არჩევანი აქვთ, რადგან აქ ათიდან ცხრა სალათი მაიონეზით არის მომზადებული, ზეთში მრავალგზის შემწვარი ხორცპროდუქტები და ცომეული შეგხვდებათ უფრო მეტად.

საუკეთესო გამოსავალი სახლიდან, ლამაზ ლანჩბოქსებში ჩაწიკწიკებული საკვები უნდა იყოს, მაგრამ აქაც ვაწყდებით გარკვეულ პრობლემებს.

პირველ რიგში, სახლიდან წამოღებული საკვები ჯერ კიდევ „ტეხავს“ მთელ რიგ წრეებში და უსახსრობის, დაბალი სოციალური სტატუსის მაჩვენებელია, ბევრისთვის წარმოუდგენელია უნივერსიტეტის კაფეტერიაში ან სამსახურის საერთო სასადილო სივრცეში საკუთარი საკვებით შესვლა. თუმცა ნელ-ნელა ყინულმა დნობა დაიწყო, მაღაზიის დახლებზე ლამაზი ლანჩბოქსები და ლანჩის ჩანთებიც კი გამოჩნდა, მაგრამ საწყისი ეტაპისთვის მიზეზად ჯერ კიდევ დიეტას ან/და სპეციალურ კვებას ასახელებენ.

ფილმებში, გადაცემებში თუ მოგზაურობის დროს გვინახავს, შესვენების დროს როგორ გამოდიან გარეთ სტუდენტები, თანამშრომლები და ღია სივრცეში, თუ კარგი ამინდია გარეთ მიირთმევენ საკვებს ერთად ან გადიან დაწესებულების საერთო კაფეტერიაში. საზღვარგარეთ ეს ძალიან მიღებული და გავრცელებული ფორმაა.

ჩვენ შემთხვევაში, პირველი პრობლემა, რასაც სამსახურში ვაწყდებით, შესაბამისი სივრცის არარსებობაა. თუ თქვენ რაიმე დიდ დაწესებულებაში, საერთაშორისო ორგანიზაციაში და ა.შ. არ მუშაობთ, სადაც დიდი სივრცის საშუალებაა, გამოყოფილია ცალკე სამზარეულო-სასადილო სივრცე, მაშინ განწირული ხართ იმისთვის, რომ ან მუდმივად გარეთ იაროთ საკვებად, თუ გაქვთ ამის დრო და ფული, ან პაწაწუნა ოფისში მიირთვათ თანამშრომლების და ხშირად კლიენტების თანდასწრებითაც კი.

მარტო კაცი ჭამაშიაც ცოდვააო, მეორე პრობლემად სწორედ ჭამის დროს პარტნიორის არარსებობა სახელდება. სავსებით შესაძლებელია, რომ ლანჩბოქსი სხვას არ მოჰქონდეს ოფისში ან არც გარეთ გასვლა მოუნდეს ვინმეს და ჭამაც მარტო გიწევდეთ, ამიტომ ხშირად დღე გადაგაქვთ რძის პროდუქტებით, სასუსნავებით და ცხელი სასმელებით, რაც გრძელვადიან რეჟიმში ჯანმრთელობისთვის მავნებელია.
კიდევ ერთი უხერხულობა, რაც საკვების სახლიდან წამოღებისას სახელდება, ეს არის საკუთარი ტრანსპორტის არ ქონა, რადგან ბევრისთვის ლანჩბოქსის საზოგადოებრივი ტრანსპორტით ტარება მოუხერხებელია, ასევე, თუ საღამოს სადმე „გაშრიალებას“ დააპირებთ, ლანჩბოქსი, უბრალოდ, საით მოისროლოთ არ იცით.

ვიღაცისთვის ჭამა ერთ-ერთი მორიგი ბიოლოგიური მოთხოვნილების დაკმაყოფილებაა, ვიღაცისთვის კი – მთელი რიტუალი, რაზეც დიდხანს ფიქრობს, ემზადება და ყურადღებით ეკიდება. შესვენების დროს კაფეში გასვლის და შეკვეთის ლოდინის დრო გაქვთ? მე დარწმუნებული ვარ, რომ საღამოს, ნახევარ საათს აუცილებლად გამონახავთ ქორფა სალათის დასაჭრელად, ბოსტნეულის, ყველისა და ხორცის ბუტერბროდების, შემწვარი ან მოხარშული ხორცის (რომელიც სალათის მომზადების პარალელურად იხარშება ან იწვება) და ხილის ლანჩბოქსში ჩასაწყობად.

ყოველთვის, როდესაც მთელი დღის ოფისში გატარებას ვგეგმავ, აუცილებლად თან დამაქვს ლანჩბოქსი, ლანჩის ლამაზი ჩანთით. კაფე-რესტორნების მენიუ, ძირითადად, ერთნაირია, ერთნაირი სალათები, ცომეული, წვნიანები. ამიტომ, სახლში მომზადებით, ბოსტნეულისა და ხორცეულის გადათამაშებით უფრო მეტად გავანებივრებთ საკუთარ თავს. თუ სადმე გაიჭედეთ, ინტერნეტში უამრავ საინტერესო და რაც მთავარია, სწრაფად მომზადების იდეას წააწყდებით.

რამდენიმე იდეა ლანჩისთვის

 

[red_box]

სენდვიჩები

გახუხული პური, ყველი, შემწვარი კვერცხი, ლორი, კიტრის მწნილი ან ცოცხალი ბოსტნეული, ესეც, როგორც როლების შემთხვევაში, შეგიძლიათ მიირთვად ცივადაც და ცხლადაც.

[/red_box]

როლები

სომხურ ლავაშში გადაახვიეთ წვრილად დაჭრილი, შეკმაზული ბოსტნეული (თქვენი სურვილის მიხედვით), შეგიძლიათ შეურიოთ ყველი ან/და ხორცი, გაჭრათ ორ ნაწილად და მოათავსოთ კონტეინერში.
ასევე შეგიძლიათ მხოლოდ ხორცი ან/და ლორი და ყველი გადაახვიოთ და მიკროტალღურში შეაცხელოთ.

[red_box]

სოუსები

მწვანილით და სუნელებით შეკმაზული არაჟანი ან მაწონი;
ძმრის და ზეითუნის ზეთი ბაზილიკოთი (სალათებისთვის).

[/red_box]

პასტა/ბრინჯი

მოხარშულ პასტას ან ბრინჯს შეურიეთ ნებისმიერი მოშუშული ბოსტნეული, ყველი ან/და ხორცი, შეგიძლიათ მიირთვათ ცივად როგორც სალათა, თუ გაცხელების საშუალება არ გაქვთ.

გადაბეჭდვის წესი


ასევე: