ფინანსთა სამინისტროს შემოსავლების სამსახურის ცნობით,  13-16 დეკემბერს, ბათუმისა და ქუთაისის აეროპორტებში ნარკოტიკული და ფსიქოტროპული ნივთიერებების შემცველი მედიკამენტების ქვეყნის საზღვარზე უკანონოდ შემოტანის 3 ფაქტი აღიკვეთა.

შემოსავლების სამსახურის ცნობით, ფინანსთა სამინისტროს შემოსავლების სამსახურის მებაჟე ოფიცრებმა, ეჭვის საფუძველზე, საქართველოს, ისრაელისა და რუსეთის ფედერაციის მოქალაქეების ბარგის დათვალიერების შედეგად, ნარკოტიკული (20 ამპულა და 43 აბი) და ფსიქოტროპული (245 აბი და 2 ბოთლი ,,HISTAFED SYRUP“ – PSEVDOEFEDRINE 30 მგ./5მლ) ნივთიერებების შემცველი მედიკამენტები გამოავლინეს.

უწყების ცნობით, საქმეთა მასალები შემდგომი რეაგირებისთვის შინაგან საქმეთა სამინისტროს გადაეცა.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის ინფორმაციით, 2018 წლის განმავლობაში,  უკანონო თევზჭერის 336 ფაქტი გამოვლინდა. მათ შორის, 145 ფაქტი სისხლის სამართლის დანაშაულის ნიშნებს შეიცავს.

უკანონო თევზჭერის ყველაზე მეტი, 66 ფაქტი, გამოვლინდა აღმოსავლეთის რეგიონული სამმართველოს სამოქმედო ტერიტორიაზე;  ქვემო ქართლის რეგიონული სამმართველოს მასშტაბით 57 ფაქტი დაფიქსირდა, ხოლო დასავლეთის რეგიონული სამმართველოს თანამშრომლებმა 50 ფაქტი გამოავლინეს.

კახეთის რეგიონული სამმართველოს მასშტაბით გამოვლინდა 42 ფაქტი, სამეგრელო ზემო-სვანეთის რეგიონული სამმართველოს სამოქმედო ტერიტორიაზე – 39 ფაქტი, სამცხე-ჯავახეთის რეგიონული სამმართველოს მასშტაბით – 22.

აჭარისა და გურიის რეგიონული სამმართველოს თანამშრომლებმა გამოავლინეს 29 ფაქტი, შავი ზღვის დაცვის კონვენციური სამმართველოს თანამშრომლებმა – 12 ფაქტი, ხოლო თბილისში – 19 ფაქტი დაფიქსირდა.

მედიასივრცეში ქართულმა რეკლამამ დიდი ევოლუცია განიცადა, თუმცა შეიძლება ითქვას, რომ ძირითადი წინსვლა რეკლამის ტექნიკურ ნაწილს შეეხო, შინაარსობრივად კი რეკლამებში კვლავ დიდი დოზითაა სექსიზმი და გენდერული სტერეოტიპი.

ბოლო დროს გახშირდა შემთხვევები, როდესაც კომპანიები პროდუქტის რეკლამირებისთვის გენდერული სტერეოტიპების გარდა, პროდუქციას სქესის მიხედვით ასხვავებენ. სწორედ ამიტომ სახალხო დამცველის აპარატმა რეკლამაში სექსტისტური სტერეოტიპების თავიდან ასაცილებლად ვიდეორგოლი მოამზადა, სადაც კიდევ ერთხელ ახსენებს რეკლამის დამკვეთებს, რომ პროდუქტები და ნივთები არ იყოფა სქესის მიხედვით: “საყოფაცხოვრებო ნივთებს კაცებიც იყენებენ, შოკოლადს, საღეჭ რეზინს, სასმელსა და ნებისმიერ სხვა პროდუქტს სქესი არ აქვს. თუ უცნაურად გეჩვენება, ეს გენდერული სტერეოტიპია. ნუ გამოიყენებ დისკრიმინაციულ სტერეოტიპებს შენი პროდუქტის რეკლამირებისთვის!“

არასამთავრობო ორგანიზაციის „პარტნიორობა ადამიანის უფლებებისთვის“ წარმომადგენელი ანა არგანაშვილი ამბობს, რომ დისკრიმინაციის წახალისებასა და ქალთა მიმართ ძალადობას შორის მჭირდო კავშირია. ის სექსისტური რეკლამის ორ სახეს განიხილავს: რეკლამები, სადაც გვაქვს აშკარა ვიზუალიზაცია, რომელიც ძალადობას ან/და ქალთა უთანასწორო მდგომარეობას განამტკიცებს და, შედარებით შეფარული, რთულად ამოსაცნობი სექსიზმი რეკლამაში – ქალთა ობიექტივიზაცია, როცა ქალები გამოყენებულნი არიან რაიმე მარკეტინგული ნიშნით, რომ საქონელი გაიყიდოს, რა დროსაც  ქალს აკნინებენ.

„ვფიქრობ, ჩვენ პირველ ეტაპზე ვართ, როცა დავა გვიწევს აშკარად უთანასწორობის მესიჯის მატარებელ რეკლამებზე. სამწუხაროა, რომ სანამ სახალხო დამცველი არ იტყვის – “ქმარი არ არის ბანკომატი“, იქამდე ჩვენ ვერ ვამტკიცებთ ამას. ნელა იცვლება ეს სტანდარტი, ერთი და იგივე შეცდომები არ უნდა მეორდებოდეს. მაგალითად, ყოველ ახალ წელს ჩვენ ვხედავთ, რომ ქალი რეკლამაში გამოყვანილია როგორც სამზარეულოს ტექნიკაზე დახარბებული ადამიანი, რადგან, თურმე სამზარეულოში ქალი უნდა იყოს,” – ამბობს ანა არგანაშვილი.

თუ ადრე რეკლამებში ქალები პირდაპირი მნიშვნელობით სექსის ობიექტებად იყვნენ წარმოჩენილნი,

ლუდის სექსტისტური რეკლამა. გადაღებულია დაახლოებით 10 წლის წინ:

დღეს ეს სურათი შეიცვალა და ფაქტი დღევანდელ სარეკლამო სივრცეში უფრო შეინიღბა. მაგალითად, გამოჩნდა სექსისტური რეკლამები სოციალური ქსელისთვის, სადაც რეკლამების ეთიკურობას მხოლოდ ცალკეული ჯგუფები აკვირდებიან და აპროტესტებენ:

საქმე ის არის, რომ რეკლამას ძირითადად კერძო სექტორი აკეთებს, სახალხო დამცველის გავლენა კი, კერძო სექტორზე მცირეა.

„კანონი არ შეცვალა პარლამენტმა და კერძო სექტორი, უნდა გაითვალისწინებს ომბუდსმენის რეკოენდაციას, უნდა – არა. სანქციაც არ არის დაწესებული. ჩვენთან ეს რეპუტაციური დავები არ არის გადამწყვეტი და მნიშვნელოვანი ისე, რომ მათ ყოველთვის უღირდეთ თავიანთი რეპუტაცია. ამიტომ თუ სანქცია არ არის, ისინი, უბრალოდ, არ ითვალისწინებენ რეკომენდაციას. პარლამენტმა უნდა შეცვალოს კანონი და უფრო მკაცრი ზომები უნდა იყოს გათვალისწინებული“, – ამბობს ანა არგანაშვილი.

არის შემთხვევები, როცა ფეისბუქში საზოგადოების მხრიდან ამა თუ იმ კომპანიის მიერ სექსისტური რეკლამის საპასუხოდ გაკეთებულ ნეგატიურ კომენტარებს დადებითი შედეგი აქვს და ესა თუ ის ორგანიზაცია რეკლამას ცვლის ან საჯარო განმარტებას აკეთებს და ბოდიშსაც იხდის.

თუმცა ანა არგანაშვილი ამბობს, რომ არ შეიძლება ასეთი მნიშვნელოვანი საკითხი საზოგადოების რეაქციის იმედად დავტოვოთ:

„ჩვენს რეაქციას აქვს მნიშვნელობა, მაგრამ ხანდახან საზოგადოებაც არ არის მზად იმისთვის, რომ რეაქცია სწორი იყოს. პირობითად, საზოგადოებაში თუ ჰომოფობიური განწყობა ჭარბობს, ამის გამო ხომ ვერ დავუშვებთ ჰომოფობიურ რეკლამას. საზოგადოების რეაქციაზე მაღალი სტანდარტი უნდა გვქონდეს, რადგან საზოგადოების რეაქცია იცვლება მაშინ, როცა ტრაგედიები ხდება და ამას ვერ დაველოდებით. სახელმწიფო იმიტომ გვაქვს, რომ გავიზიაროთ, რას მიაღწიეს სხვა ქვეყნებმა და ჩვენ გვქონდეს ჩამოყალიბებული ინდიკატორები. უკვე გამოხატვის თავისუფლების მიღმა არის სიძულვილის ენა, მოწოდება ძალადობისკენ და ა.შ… ამიტომ საზოგადოების იმედად ვერ ვიქნებით, რადგან ზოგჯერ უმრავლესობა დიდ აგრესიას იჩენს უმცირესობის მიმართ.”

გლობალური გარემოსდაცვითი ფონდის (GEF) დაფინანსებით, მაჭახლის ეროვნულ პარკსა და მიმდებარე სოფლებში 1.3 მილიონი დოლარის ღირებულების პროექტი განხორციელდა.  პროექტის შედეგად ეროვნული პარკის მიმდებარე სოფლებში გამოიცადა და დაინერგა განახლებადი ენერგიის გამოყენება.

„ამ პროექტის მთავარი აზრი იყო ის, რომ პარკის განვითარებით კონკრეტული ეკონომიკური სარგებელი ენახა ადგილობრივ მოსახლეობას,“ – ამბობს გაეროს განვითარების პროგრამის საქართველოს წარმომადგენლობის პრესსამსახურის ხელმძღვანელი, სოფო ჭიჭინაძე.
მისი თქმით, როდესაც პარკი გაიხსნა, მოსახლეობა არ იყო კმაყოფილი, რადგან ისინი პარკის ტერიტორიას შეშის მოსაპოვებლად იყენებდნენ.

„ჩვენი პროექტიც ამისთვის დაიწყო, რომ აქ მცხოვრები ადამიანები ჩართულიყვნენ არა მარტო პარკის მართვაში, არამედ დაენახათ ახალი ეკონომიკური შესაძლებლობებიც.

განახლებადი ენერგიების დანერგვით ჩავანაცვლეთ ხეების ჭრა. 2018 წელს რამდენიმე ოჯახს მივეცით მზის პანელები, ენერგოეფექტური ღუმელები და ვასწავლეთ ბიომასის გამოყენება, რომლის შეძენაც შეეძლოთ გორში, სადაც არის ბიომასის საწარმო. ნახერხისგან და თხილის ნაჭუჭისგან კეთდება ბრიკეტები, რომლებსაც შეშის მაგივრად იყენებს მოსახლეობა“.

სოფო ჭიჭინაძის თქმით, საპილოტე პროგრამამ კარგად იმუშავა  და მოსახლეობამ თავად დაინახა ამ პროექტის ეფექტურობა.

„გვეუბნებოდნენ, რომ თუ ადრე შეშაზე 700 ლარი ეხარჯებოდათ სეზონზე, ნაჭუჭის გამოყენების შედეგად, პრაქტიკულად, გაუნახევრდათ ეს ხარჯი. ანალოგიურად, ცხელი წყალი და გათბობა მზის ენერგიაზე გაცილებით ეკონომიურია.“

სოფო ჭიჭინაძის თქმით, პილოტირების შედეგად ასზე მეტი ოჯახი ჩაერთო ამ ენერგიის გამოყენებაში. „2019 წლიდან კი ხეობის მოსახლეობის უფრო დიდი ნაწილი გადავა განახლებადი ენერგიების მოხმარებაზე“.

პროექტის ფარგლებში დამონტაჟდა ელექტრონული ღობეები, რომლებიც საკარმიდამო ნაკვეთებს ცხოველებისგან იცავს.

„ეს ნაკვეთები სახლებისგან მოშორებითაა, სადაც დათესილია სიმინდი და სხვა სასოფლო-სამეურნეო კულტურები, ხეობაში არის მგელი და დათვი, რომელიც ამ ნაკვეთებს ერჩის.

ამიტომ რამდენიმე ადგილას დავაყენეთ ელექტროღობე. ვიწრო, წვრილი მავთულები, რომლებშიც გადის ისეთი დენი, რომელიც არ წარმოადგენს საფრთხეს ცხოველებისთვის და არც ადამიანისთვის. აქვს გარკვეული იმპულსი, რომელიც ცხოველს აფრთხობს,“ – გვეუბნება სოფო ჭიჭინაძე.

პროექტის ფარგლებში განხორციელდა მაჭახლის ეროვნული პარკის საზღვრების დემარკირება, ადმინისტრაციული შენობისა და ვიზიტორთა ცენტრის სრული რეაბილიტაცია. ეროვნულ პარკსა და მიმდებარე სოფლებში მოეწყო რამდენიმე ტურისტული ბილიკი.

სოფო ჭიჭინაძის თქმით, როცა პირველი დემარკირება გაკეთდა, მაშინ საკარმიდამო ნაკვეთების ნაწილი მოჰყვა პარკის საზღვრებში და ამის გამო მოსახლეობა უკმაყოფილი იყო, ამიტომ დემარკირება თავიდან განხორციელდა.

„პარკი განაგრძობს განვითარებას. ახლა ყველაზე მნიშვნელოვანია, რომ დაწყებული ინიციატივები და პარკის მდგრადი მართვა გაგრძელდეს, არ შეწყდეს მოსახლეობასთან აქტიური კონტაქტი.“

ჭიჭინაძის თქმით, მნიშვნელოვანია, პარკის ტერიტორიაზე არსებულ საოჯახო სასტუმროებში მომსახურების სტანდარტები გაიზარდოს და გაგრძელდეს მუშაობა უფრო მეტი ტურისტის მოზიდვაზე.

პროექტის ფარგლებში ჩატარდა რამდენიმე მნიშვნელოვანი კვლევა, რომლებიც ეროვნული პარკის შემდგომ განვითარებას შეუწყობს ხელს. „მათ შორის, ტყის ინვენტარიზაცია და ტყის მართვის გეგმა, ეროვნული პარკის საბაზისო კვლევა და ეროვნული პარკის ტერიტორიაზე შემოსავლის მომტანი საქმიანობის ტექნიკურ-ეკონომიკური შეფასება“.

მთავარი ფოტო: ბათუმელების არქივი

შს სამინისტროს საინფორმაციო-ანალიტიკური დეპარტამენტის მიერ მომზადებული სტატისტიკის თანახმად, 2018 წლის ნოემბერში ყველაზე პოპულარული მიმართულება გერმანია იყო.

2018 წლის ნოემბერში საქართველოს 6 353 მოქალაქე გაემგზავრა გერმანიაში, მათგან 19-ს კი უარი ეთქვა ქვეყანაში შესვლაზე.

სტატისტიკის თანახმად, შენგენის ზონის მიმართულებით ყველაზე მეტი, საქართველოს 7 646 მოქალაქე, გერმანიაში გაემგზავრა ოქტომბერში და სექტემბერშიც – ოქტომბერი – 7 646 [მათგან 19-ს უარი ეთქვა შესვლაზე], სექტემბერი – 6 470 [მათგან 13-ს უარი ეთქვა შესვლაზე].

მეორე ადგილზეა იტალია – ამ ქვეყანაში ნოემბერში საქართველოს 5 936 მოქალაქე გაემგზავრა, მათგან 51 მოქალაქეს უარი ეთქვა იტალიაში შესვლაზე. 2018 წლის ოქტომბერში იტალია ასევე პოპულარული მიმართულება იყო, სულ 5 888 საქართველოს მოქალაქე გაემგზავრა იტალიაში და მათგან 26-ს უარი ეთქვა შესვლაზე.

მესამე ადგილზეა საბერძნეთი – 3 458 საქართველოს მოქალაქე გაემგზავრა ნოემბერში საბერძნეთის მიმართულებით და მათგან 12 ქვეყანაში არ შეუშვეს. ოქტომბერში საბერძნეთი, ასევე, მესამე ადგილზე იყო – 3 569 მოქალაქე [მათგან 14-ს უარი ეთქვა შესვლაზე] და სექტემბერშიც – 4 379  [მათგან 13-ს უარი ეთქვა შესვლაზე].

მეოთხე ადგილზეა პოლონეთი – აქ სულ საქართველოს 3 289 მოქალაქე გაემგზავრა ნოემბერში და მათგან 18-ს უარი ეთქვა ქვეყანაში შესვლაზე. პოლონეთის მიმართულება პოპულარული იყო ოქტომბერშიც – 3 059 [მათგან 19 პოლონეთში არ შეუშვეს].

მეხუთე ადგილზე კი საფრანგეთია – ამ ქვეყანაში საქართველოს 2 882 მოქალაქე გაემგზავრა ნოემბერში და მათგან 33 საფრანგეთში არ შეუშვეს. ოქტომბერში საფრანგეთში საქართველოს 2 990 მოქალაქე გაემგზავრა და მათგან 11-ს ქვეყანაში შესვლაზე უარი ეთქვა.

ბოლო სამი თვის სტატისტიკის თანახმად, საქართველოს მოქალაქეები შენგენის ზონის ქვეყნებიდან ხშირად მიემგზავრებიან ესპანეთში, ავსტრიაში, უნგრეთში, ჩეხეთში და კვიპროსზე.

სტატისტიკის თანახმად ნოემბერში ყველაზე ნაკლებად საქართველოს მოქალაქეები ისლანდიის მიმართულებით გაემგზავრნენ – სულ 4 მოქალაქე.

_____________

მთავარი ფოტო: pexels.com

დღეს, 16 დეკემბერს გაერთიანებული ოპოზიციის მხარდამჭერებმა ბათუმში საპროტესტო აქცია გამართეს. „არა სალომეს“ – ეს იყო აქციის მთავარი სლოგანი. აქცია ბათუმში „ერთიანი ნაციონალური მოძრაობის“ ოფისთან დაიწყო მსვლელობით და აჭარის მთავრობის სახლთან გაგრძელდა

ოპოზიცია ბათუმში ამ აქციით გამოეხმაურა თელავში დაგეგმილ საპროტესტო აქციას.

„ვაპროტესტებთ მოპარულ არჩევნებს, რომელიც მოიპარა ქართულმა ოცნებამ და ბიძინა ივანიშვილმა, ვაპროტესტებთ იმას, რომ სალომე ზურაბიშვილი, ადამიანი, რომელიც ქართულ ჯარს აბრალებს ომის დაწყებას, უნდა გახდეს მთავარსარდალი. ის არასდროს არ იქნება ჩვენი პრეზიდენტი. ვაპროტესტებთ იმ ქაჯობას, რომელიც მოდის საქართველოს პარლამენტის სკიპერიდან, აჭარის მთავრობის თავმჯდომარიდან, საკრებულოს თავმჯდომარიდან, რომლებიც აგრესიაზე არიან გადასული“ – განაცხადა „ბათუმელებთან“ „ერთიანი ნაციონალური მოძრაობის“ წევრმა ლევან ანთაძემ.

„ხელისუფლებას მოუწევს მოლაპარაკების მაგიდასთან დაჯდომა, უფრო მეტიც, მოუწევს საკანონმდებლო ცვლილებების შეტანა და აუცილებლად მოუწევს ქვეყანაში ვადამდელი საპარლამენტო არჩევნების დანიშვნა, იმიტომ რომ წარმოდგენილი პოლიტიკური ვითარება არ შეესაბამება იმ რეალობას, რაც გვაქვს ჩვენ. ამიტომ დაიწყოს ხელისუფლებამ ფიქრი ამაზე. ეს არის ჩვენი მოთხოვნა და ჩვენ უნდა გავაგონოთ ეს ხმა“ – განაცხადა აქციაზე მირდატ ქამადაძემ, რომელიც ბათუმის საკრებულოში ფრაქცია „ნაციონალურ მოძრაობას“ ხელმძღვანელობს.

გაერთიანებული ოპოზიციის ლიდერის, პრეზიდენტობის კანდიდატის, გრიგოლ ვაშაძის განცხადებით, საქართველოში არ ჩატარებულა საპრეზიდენტო არჩევნები. მისი შეფასებით, არჩევნების ნაცვლად, კორუმპირებული ჩინოვნიკების ზედამხედველობის ქვეშ ჩატარდა სპეცოპერაცია, რომლის მიზანი იყო ქართველი ამომრჩევლის აზრის გაყალბება.

დღეს, 16 დეკემბერს ოპოზიცია აქციას გეგმავს თელავში, სადაც სალომე ზურაბიშვილის ინაუგურაცია უნდა გაიმართოს, თუმცა ჩუმლაყთან შს სამინსიტრომ გურჯაანი-თელავის ცენტრალური გზა გადაკეტა და ცენტრალურ გზაზე ავტობუსები დააყენა.

საპატრულო პოლიცია ოპოზიციის წარმომადგენლებს სთავაზობს, თელავში ყვარლის გავლით ან ფეხით ჩავიდნენ.

დღესვე ცნობილი გახდა, რომ

ჟურნალისტებს არ ექნებათ საშუალება, უშუალოდ გააშუქონ სალომე ზურაბიშვილის ინაუგურაცია თელავში. ადგილზე მყოფი ჟურნალისტები ღონისძიებას ერეკლე მეორეს ციხის ეზოში განთავსებული მონიტორიდან გააშუქებენ. რაც შეეხება უშუალოდ იმ ადგილს, სადაც სალომე ზურაბიშვილმა ფიცი უნდა დადოს, ამ ტერიტორიაზე მხოლოდ პირად ფოტოგრაფებსა და ვიდეოოპერატორებს შეუშვებენ.

ამავე თემაზე: 

https://netgazeti.ge/news/328643/

მთავრობა კურორტ გოდერძიზე მოქმედ სასტუმრო „მეტეოს“ პირობიანი აუქციონთ ყიდის. ამ სასტუმროში ნომრები დეკემბრის ბოლოდან აპრილის ბოლომდე დაჯავშნილია. გაყიდვის ერთ-ერთი პირობა ამ ჯავშნების შენარჩუნებაა. სასტუმროსთან ერთად იყიდება ასევე ექვსი კოტეჯი, ერთი ე.წ. ხიჟინა და რამდენიმე მიწის ნაკვეთი [ჯამში 14 762 კვადრატული მეტრი].

აუქციონის პირობების მიხედვით, მყიდველმა 2019 წლის 30 ნოემბრამდე საკუთრებაში  გადაცემულ შენობებში სარემონტო სამუშაოები უნდა დაასრულოს, რისთვისაც 1 მილიონი ლარი უნდა დახარჯოს – ესეც აუქციონით განსაზღვრული პირობაა.

აუქციონის პირობების მიხედვით, მყიდველს  ასევე დაევალება:

სარემონტო სამუშაოების დასრულების შემდეგ, საქართველოს არანაკლებ ოცი მოქალაქის დასაქმება.

კურორტ გოდერძიზე მდებარე 948 კვ.მეტრ არასასოფლო-სამეურნეო დანიშნულების მიწის ნაკვეთზე არსებულ შენობა-ნაგებობაში [ე.წ. „ხიჟინა“] საზოგადოებრივი კვების ობიექტის პროფილის 2019 წლის 31 მაისამდე შენარჩუნება.

შპს „Goderdzi Resorts“-ის მიერ მიწოდებული სახელობითი სიის შესაბამისად, ხელშეკრულების გაფორმებიდან  ოთხ სამუშაო დღეში საქართველოს თოთხმეტი მოქალაქის დასაქმება და 2019 წლის 31 მაისამდე ვადით მათი შენარჩუნება. [შეიძლება ითქვას, რომ ეს არის გამონაკლისი, როცა მთავრობა ინვესტორს კონკრეტული პირების დასაქმებას სთხოვს. სავარაუდოდ, ეს პირები უკვე მუშაობენ ამ ობიექტებში – პირობების დანართში მათი თანამდებობები და თითოეულის ხელფასების ოდენობაცაა მითითებული].

კოტეჯებსა და სასტუმროში სამინისტრო პროფილის შენარჩუნებას ხელშეკრულების გაფორმებიდან ხუთი წლის ვადაში ითხოვს.

გარდა ამისა, მყიდველმა უნდა აიღოს ვალდებულება, რომ 2023 წლის 30 ნოემბრამდე გოდერძის უღელტეხილზე გადაცემულ არასასოფლო-სამეურნეო დანიშნულების მიწის ნაკვეთზე არანაკლებ 50-ნომრიან  სასტუმრო კომპლექსს ააშენებს და აამოქმედებს კიდეც. ამოქმედებიდან არანაკლებ ოცდაათი წლის განმავლობაში კი, შენობას სასტუმროს პროფილს შეუნარჩუნებს.

მყიდველს ასევე დაევალება ხულოს მუნიციპალიტეტის სოფელ დანისპარაულში არსებული ადმინისტრაციული შენობის რეკონსტრუქციის არქიტექტურული პროექტის მომზადება და სამინისტროსთან შეთანხმება. „2020 წლის 30 ნოემბრამდე ე.წ. ადმინისტრაციული ახალი შენობა-ნაგებობის მშენებლობის დასრულების მიზნით, არანაკლებ 1 000 000 ლარის სამუშაოების განხორციელება და აჭარის ავტონომიური რესპუბლიკისათვის უსასყიდლოდ გადაცემა“.

ქონების საწყისი ფასი 3 მილიონ 633 000 ლარია, ბიჯი 75 000 ლარი, აუქციონი 27 დეკემბერს უნდა დასრულდეს.

„Goderdzi Resorts“-ი აჭარის მთავრობის შპს-ა.

კურორტ გოდერძიზე სეზონის გახსნა 22 დეკემბერს იგეგმება, იმ შემთხვევაში თუ თოვლი მოვა. მთის კურორტების კომპანიის ინფორმაციით კურორტი გახსნისთვის მზადაა, თუმცა ამ დროისთვის კურორტზე თოვლის საფარი მხოლოდ 20-30 სანტიმეტრს აღწევს, რაც საკმარისი არ არის, ამიტომაც თუ 22 დეკემბრამდე თოვლი არ მოვა, შესაძლოა სეზონის ოფიციალური გახსნა ისევ გადაიდოს:

„ პირველად ხდება, როცა დეკემბერში გოდერძიზე თოვლის საფარის პრობლემა გვაქვს, ის რაც არის არ არის საკმარისი იმისათვის, რომ ტექნიკამ იმუშაოს. ახლა რომ დავიწყოთ ტკეპნა ატალახდება, ამიტომ აზრი არ აქვს.“ – ამბობს მთის კურორტების მენეჯერი გიორგი ლომაია.

რაც შეეხება საბაგიროს, საბაგირო ამ დროისთვის ტესტურ რეჟიმში მუშაობს და ტურისტებისთვის ის გახსნილი არ არის: „ სეზონის გახნისთანავე იგეგმება საბაგიროს გახსნაც.“

მთის კურორტების კომპანიას ჯერჯერობით არ აქვს დაზუსტებული ინფორმაცია იმაზე საკურორტო სეზონის გახსნას დაესწრება თუ არა საქართველოს პრემიერი, მამუკა ბახტაძე დღეს  კურორტ გუდაურის გახსნას ესწრებოდა , სადაც მან გამოსვლისას აქცენტი ზამთრის კურორტების უსაფრთხოების საკითხებზე გააკეთა.

პრემიერი თქმით მთავრობამ წარსულის გამოცდილება გაიზიარა და წელს საქართველოს ზამთრის კურორტებზე, მათ შორის აჭარის მაღალმთიანეთში „ახლად ეკიპირებული პატრული , სულ 82 ადამიანი იმუშავებს“  პრემიერის ინფორმაციით მათ სპეციალური გადამზადება გაიარეს.

კურორტის გახსნა წელს 8 დეკემბერს იგეგმებოდა, თუმცა იგივე მიზეზით ის ერთხელ უკვე გადაიდო.

მთავარი ფოტო: კურორტ „გოდერძის“ პრესსამსახური.

14 დეკემბერს „დემოკრატიის ინსტიტუტმა“ ბენეფიციართა შვილებისთვის წინასაახალწლო დღესასწაული მოაწყო. ბავშვებს საახალწლო საჩუქრები, ნაძვის ხეები, თოვლის ბაბუები, სათამაშოები და ტკბილეული გადასცეს, შემდეგ კი მათ გართობასა და გამასპინძლებაზე გორგილაძის ქუჩაზე მდებარე „მაკდონალდსმა“ იზრუნა.

აქცია „ყოფილი პატიმრების, პატიმართა ოჯახის წევრებისა და  პრობაციონერების მხარდაჭერის პროექტის“ ფარგლებში ჩატარდა. პროექტს „დემოკრატიის ინსტიტუტი“ ოთხ პარტნიორ ორგანიზაციასთან ერთად ახორციელებს აჭარაში, გურიაში, იმერეთსა და სამეგრელო – ზემო სვანეთში.

„ბავშვებისთვის ბედნიერი დღეა, მშობელმა შეიძლება შვილი სადმე გაიყვანოს გასახალისებლად, მაგრამ როცა ამდენი ბავშვი იკრიბება ერთად და მოულოდნელ სიურპრიზებს იღებენ, სხვა სიხარულია. ქობულეთიდან ჩამოვედით ღონისძიებაზე, სასკოლო საჩუქრებიც გადმოგვცა სწავლის დასაწყისში დემოკრატიის ინსტიტუტმა. უკვე მეორედ ვართ ბავშვებისთვის დაგეგმილ ღონისძიებაზე“, – ამბობს ერთ-ერთი პატიმრის მეუღლე, რომელიც „მაკდონალდსში“ შვილთან ერთად მოვიდა, მაგრამ გვთხოვა სახელი არ გაგვემჟღავნებინა.

გარდა „მაკდონალდსისა“, ყოფილი პატიმრების გაძლიერების პროექტის 14 დეკემბრის აქციაში ჩაერთო მაღაზიათა ქსელი „ვილმარტი“. მათ რამდენიმე კვირის განმავლობაში სამყოფი საკვები პროდუქტი გადასცეს სამ ოჯახს, რომლებისთვისაც მსგავსი ხელშეწყობა მნიშვნელოვანი და აუცილებელი იყო – ზოგ მათგანს სოციალურად არასახარბიელო პირობები აქვს, ზოგიც მრავალშვილიანია.

ყოფილი პატიმრების გაძლიერების პროექტის კოორდინატორი, ნინო ხაჩიძე მსგავს აქციებში ბიზნესის ჩართულობის მნიშვნელობასა და მათ სოციალურ პასუხისმგებლობაზე საუბრობს.

„ჩვენ შევთავაზეთ „ვილმარტის“ წარმომადგენლებს ჩართულიყვნენ ამ აქციაში და ისინიც სიამოვნებით დაგვთანხმდნენ. „მაკდონალდსმა“ კი დღეს პატარებს გასართობი პროგრამა შესთავაზა უფასოდ. „ვილმარტის“ წარმომადგენლები გამოგვყვნენ ოჯახებში, მათ შორის მოვინახულეთ მრავალშვილიანი ოჯახები. ვფიქრობ, ასეთი უშუალო კავშირები ძალიან მნიშვნელოვანია.

ნელ-ნელა საქართველოში ბიზნესი მიდის იმ დასკვნამდე, რომ სოციალური პასუხისმგებლობა ძალიან ბევრ რამეს ცვლის შეჭირვებული ოჯახებისთვის.

ყველა უნდა ეცადოს ჩართოს ბიზნესი მსგავს აქტივობებში. ეს უნდა ჩამოყალიბდეს ხედვად, არაფორმალურ პოლიტიკად და მიდგომად, რომ ერთჯერადი აქციები არ დარჩეს მხოლოდ ერთჯერად აქციებად. ასე იზრდება ბრენდის ცნობადობაც და მომხმარებლებსაც მეტი ნდობა უჩნდება მათ მიმართ. როცა ვიცი, რომ „მაკდონალდსი“ უსასყიდლოდ მასპინძლობს ბავშვებს, მე, როგორც მოქალაქე, მადლიერების ნიშნად ხშირად მივიყვან შვილს სწორედ „მაკდონალდსში“ და არა სხვაგან.

უცხოეთში თითქმის ყველა ბიზნესს აქვს საქველმოქმედო ბიუჯეტი. ჩვენს ქვეყანაშიც ფეხს იკიდებს ეს მიდგომა, მაგრამ, ჯერჯერობით, არ შეიმჩნევა ისეთი აქტიურობა, როგორიც სასურველი იქნებოდა. ვიზრდებით, თუმცა ნელა“, – ამბობს ნინო ხაჩიძე.

წინასაახალწლო აქცია ყოფილი პატიმრების გაძლიერების პროექტში ჩართულ ბენეფიციართა პატარებისთვის მოეწყობა იმერეთში, გურიასა და სამეგრელო – ზემო სვანეთშიც. აქციას რეგიონებში „დემოკრატიის ინსტიტუტთან“ ერთად პარტნიორი ორგანიზაციები: ,,აფხაზინტერკონტი“, გურიის ახალგაზრდული რესურსცენტრი და „ფონდი აფხაზინტერკონტი” უზრუნველყოფს.

ამჯერად მიმდინარეობს მოლაპარაკება ბიზნესის წარმომადგენლებთან, რეგიონებში გასამართ აქციებში ჩასართავად. აქციაში შესაძლოა ჩაერთოს ტანსაცმლის მაღაზიათა ქსელი „ვაიკიკიც“, რომ პატარები ზამთრის თბილი სამოსით იყვნენ უზრუნველყოფილი.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

დღე ბავშვები სულ უფრო მეტ დროს ატარებენ ინტერნეტში, სადაც საკმაოდ  მარტივად შეიძლება გახსნან ისეთი ვებგვერდები, სადაც პორნოგრაფიული ან ეროტიკული შინაარსის შემცველი ვიდეო ან ფოტომასალაა გამოქვეყნებული. როგორ უნდა მოიქცეს ამ დროს მშობელი? – „ბათუმელები“ ამ თემაზე ფსიქოლოგ თინანო ჯავახიშვილს ესაუბრა.

• როგორ უნდა მოიქცეს მშობელი, თუ კი ამჩნევს, რომ ბავშვი პორნოვიდეოებს უყურებს? როგორი უნდა იყოს ამ დროს მისი რეაქცია, თვალი აარიდოს, დაუშალოს, გაუბრაზდეს, რაიმე აუხსნას…

ბავშვის მიერ პორნოგრაფიის ნახვა, განსაკუთრებით პირველად ნახვის შემთხვევა, შეიძლება განვიხილოთ, როგორც მეტ-ნაკლებად მატრამვირებელი მოვლენა. ბავშვს არ ესმის რა ხდება, მან შეიძლება ეკრანზე ნანახი აღიქვას, როგორც ძალადობა და მისთვის ეს იყოს ტრავმა.

რაც შეეხება უფროსის რეაქციას, მშობელი ბავშვს ამის გამო არ უნდა გაუჯავრდეს, მით უმეტეს არ შეიძლება ბავშვის დასჯა. ასეთ დროს მშობელმა მშვიდად და არა ყვირილით, უნდა აუხსნას ბავშვს, რომ ის, რაც ნახა, არ არის ბავშვებისთვის განკუთვნილი. ეს ძალიან საფრთხილო თემაა, რადგან მნიშვნელოვანია შემდგომში ბავშვისთვის ეს არ იყოს რაიმე ძალიან ცუდთან დაკავშირებული.

ზოგადად, მშობლები უნდა იყვნენ ფრთხილად. ბავშვი შეიძლება სულ არ ეძებდეს პორნოგრაფიული შინაარსის ვიდეოს და შემთხვევით წააწყდეს. ამიტომაც მშობელმა უნდა აკონტროლოს ბავშვის აქტივობა ინტერნეტში და რა თქმა უნდა, ეს უნდა მოხდეს პირადი ინფორმაციის პატივისცემით. შეიძლება კოდების დაყენება, რომ მხოლოდ უსაფრთხო ვებგვერდები იყოს ხელმისაწვდომი ბავშვისთვის, არსებობს მარტივი და ეფექტური ხერხები იმის შესამოწმებლად, თუ რა ვებგვერდებზე შედის ბავშვი… ამის კონტროლი აუცილებელია, ოღონდ არა ჩხრეკა, შევარდნები, უცებ თავზე დადგომა – „აბა, მაჩვენე რას აკეთებ“ და ა.შ. უნდა იცოდეს ბავშვმა, რომ კომპიუტერში მშობელიც შედის, ეს წინასწარ სჯობს იყოს შეთანხმებული.

საინფორმაციო ბუკლეტებიც კი შეიძლება გაკეთდეს ამასთან დაკავშირებით და მშობლებს დაურიგდეთ სკოლაში, თუ როგორ აკონტროლონ ბავშვები ინტერნეტ სივრცეში, იმიტომ რომ ეს ძალიან მნიშვნელოვანია.

• როგორ შეიძლება აისახოს ბავშვზე პორნოგრაფიული შინაარსის მქონე ვიდეოების/ფოტოს ნახვა?

შეიძლება ბავშვმა მიიღოს ტრავმა, წუხდეს ამაზე და ვერ მოახერხოს ამის თქმა. როგორც წესი, ბავშვები ვერ ინახავენ საიდუმლოს და იწყებენ ამის გაზიარებას სხვა ბავშვებთან, რადგან თვითონ არ იცის როგორ მოექცეს ამ გამოცდილებას და უნდა, რომ სხვებს გაუზიაროს, აჩვენოს. უფროსებთან შეიძლება შეეშინდეს, რადგან იფიქროს, რომ რაღაც ისეთს აკეთებს, რაც უფროსებს არ მოეწონებათ, ამიტომ თანატოლებს უზიარებენ ხოლმე.

ამიტომაც არის მნიშვნელოვანი ბავშვს ამ და ზოგადად, ყველა გამოცდილებაზე საუბარი შეეძლოს მშობელთან და მშობელმა ყველაფერი უნდა გააკეთოს, რომ ეს შესაძლებელი იყოს.

• თუ კი მშობელი ამჩნევს, რომ ბავშვს აქვს ინტერესი და ხშირად უყურებს პორნო ან ეროტიკულ ვიდეოებს, ასეთ დროს რა უნდა ქნას?

როცა მშობელი ბავშვს ამჩნევს ასაკთან შეუსაბამო ქცევას, ვთქვათ სექსუალური შინაარსის, აქ მხოლოდ  პორნოგრაფიის ყურებაზე არ არის საუბარი, ეს ზოგადად ყურადსაღები უნდა იყოს მისთვის. ეს შეიძლება მიანიშნებდეს იმაზე, რომ შეიძლება ბავშვმა რაღაც ნახა, რაც არ უნდა ენახა, ან ვიღაცამ მოუყვა რაღაც, რაც არ არის მისი ასაკისთვის შესაფერისი.

ყვირილსა და გაბრაზებას შედეგი არ ექნება, პირდაპირ მკაცრ აკრძალვას შეიძლება მოჰყვეს ის, რომ ბავშვი კიდევ უფრო დაინტერესდება. ეს უნდა იყოს განხილული, როგორც ქცევა, რომელიც მიზანშეწონილი არ არის.  სჯობს მშობელმა უთხრას  ბავშვს, რომ მოვა დრო, როცა ამაზე ილაპარაკებენ. თუ მშობელი ხედავს, რომ ბავშვი რეგულარულად უყურებს პორნოგრაფიულ ვიდეოებს, ფსიქოლოგის დახმარება არ იქნება ურიგო, სადაც ბავშვი სპეციალისტთან, დაცულ გარემოში შეძლებს დაალაგოს ეს გამოცდილება.

არ არის აუცილებელი ბავშვთან ნანახის შინაარსობრივი განხილვა, საუბარია ქცევის განხილვაზე. უნდა ვუთხრათ ბავშვს, რომ ეს არის უფროსებისთვის განკუთვნილი ფილმები, გაბრაზება – „არ ნახო, არ შეიძლება“ – არ არის საკმარისი.

სამწუხაროდ, კონკრეტული რეცეპტი არ არსებობს, ყველა შემთხვევა ინდივიდუალურია, ისევე როგორც ყველა ბავშვი და ყველა მშობელი.

• ასეთ ვიდეოებში ხშირად არის ძალადობის შემცველი სცენები. როგორ შეიძლება ეს აისახოს ბავშვზე? იქონიებს თუ არა ეს გავლენას მის წარმოდგენაზე, თუ როგორია სექსი და როგორი უნდა იყოს ქალის ან მამაკაცის როლი?

რა თქმა უნდა, გავლენა შეიძლება იქონიოს და ეს არის სწორედ პრობლემა. სექსი პატარა ბავშვმა შეიძლება აღიქვას როგორც ძალადობა. სწორედ ამიტომ არის საჭირო ამის კონტროლი და ამისთვისაა საჭირო, რომ მშობელი ყოველთვის ღია იყოს ბავშვისთვის, რომ მან შეძლოს მშობელთან საუბარი და ეს არ იყოს სტრესთან და სირცხვილთან დაკავშირებული.

• ზოგადად რა ასაკიდან აქვთ ბავშვებს სექსის მიმართ ინტერესი? როდიდან იწყება საკუთარი სექსუალობის აღქმა?

ბავშვები საკმაოდ პატარა ასაკიდან  იწყებენ საკუთარი სხეულის შესწავლას. ეს შეიძლება 2-3 წლის ასაკიდან მოხდეს, როცა ბავშვები იწყებენ სქესის განსხვავებების აღმოჩენას. საბავშვო ბაღში ხდება შემთხვევები, როცა ბავშვები ერთმანეთს აჩვენებენ სასქესო ორგანოებს, ერთმანეთს შეისწავლიან. ამაში საგანგაშო არაფერია, უბრალოდ ეს უნდა ხდებოდეს ნორმირებულად და მშობელმა საჭიროა მიაქციოს ყურადღება, როგორ მიდის განვითარება ამ მიმართულებით და თუ არის რაიმე საყურადღებო, უნდა მიმართოს სპეციალისტს.

• თქვენ საბავშვო ბაღი ახსენეთ. რეაქცია აღმზრდელების, მშობლების მხრიდან ისეთ შემთხვევაში არის საკმაოდ მკაცრი. არის შემთხვევები, როცა არცხვენენ ბავშვს. ეს რამდენად სწორია?

არ არის სწორი. ეს არ უნდა იყოს დაკავშირებული ასეთ სირცხვილთან და „ცუდ რამესთან“. თქმა – „ცუდი გოგო ხარ, ან ცუდი ბიჭი ხარ“ – არასწორია, რადგან ბავშვს არ ესმის, რატომ, ეს ხომ მისი სხეულის ნაწილია. ამაზე რეაქცია უნდა იყოს მშვიდი საუბარი, ახსნა, რომ ეს არის ადამიანის სხეული, რომელიც არის ძალიან პირადი, დაფარული. უნდა ავუხსნათ ბავშვს მისთვის გასაგებად, მარტივად, თუ რატომ არ უნდა აჩვენოს სხვას სასქესო ორგანოები. ეს არის უნდა გახდეს ბავშვის შერცხვენის და დასჯის მიზეზი.

• ჩვენ ვცხოვრობთ საზოგადოებაში, სადაც მშობლები ხშირად არიდებენ თვალს ბავშვების და ასევე მოზარდების ინტერესსაც სექსის მიმართ. იგივე ხდება სკოლაშიც, სადაც ბავშვი დიდ დროს ატარებს. ბიოლოგიის გაკვეთილზე მასწავლებლები შეძლებისდაგვარად გვერდს უვლიან ამ თემას და ხშირად გაკვეთილიც კი არ ტარდება სქესობრივი აღზრდის შესახებ. ასეთ პირობებში ბავშვი, შემდგომში მოზარდი, რჩება ფილმების, პორნოვიდეოების და თანატოლებისგან მიღებული ინფორმაციის ამარა. ეს არის პრობლემა თქვენი აზრით?

ეს არის ძალიან მნიშვნელოვანი პრობლემა. მოზარდობის ასაკში ბავშვს უნდა ჰქონდეს წვდომა სექსუალურ განვითარებასთან დაკავშირებულ ინფორმაციასთან, უნდა არსებობდეს მასალა, ლიტერატურა, ვებგვერდები, სადაც კვალიფიციურად მომზადებული ინფორმაცია იქნება უსაფრთხო სექსზე და არა მითები. აუცილებელია ამ საკითხზე მოზარდს ესაუბროს მშობელი, ეს არ უნდა იყოს ტაბუდადებულ თემა. ცნობისმოყვარეობა არსად არ მიდის, ეს არის ადამიანის ერთ-ერთი მთავარი ინსტინქტი და ამ თემაზე არსებობს ათასი მითი, კითხვები, რაზეც მოზარდებს არ აქვთ პასუხი.

ჩემი აზრით, სქესობრივი აღზრდის საკითხები უნდა იყოს ჩართული განათლების სისტემაში, მაგრამ როგორ, რა ფორმით – ეს კარგად მოსაფიქრებელია, რომ კლასში, სადაც 30-40 ამ ამბით მოცული თინეიჯერია, ეს არ გახდეს დაცინვის, აგდების თემა.

ზოგადად მშობლებმა უფრო მეტი ნდობა უნდა გამოუცხადონ შვილებს. საჭიროა მათთან მშვიდი საუბარი და ღიად განხილვა, თუნდაც საკუთარი ემოციების, რომ ბავშვმა იცოდეს რატომ განიცდის, რაზე ნერვიულობს მშობელი. ეს ბევრად უფრო მომგებიანია, ვიდრე ყვირილი და დასჯა, ბავშვებს ბევრად მეტი ესმით, ვიდრე უფროსებს ჰქონიათ.

_______________

მთავარ ფოტოზე: თინანო ჯავახიშვილი