პატიმარმა სასამართლო დარბაზში ვენები გადაიჭრა – მას ოჯახში ძალადობას ედავებიან


ბათუმის სასამართლო დარბაზში ბრალდებულმა ირაკლი კ.-მ ორივე ხელის მაჯა დაიზიანა. ირაკლიმ ეს მას შემდეგ გააკეთა, როცა მოსამართლემ წინასწარი პატიმრობა შეუფარდა. ბრალდებულს ოჯახში ძალადობას ედავება გამოძიება. შემთხვევა დაახლოებით ერთი თვის წინ მოხდა.

გამოძიების ვერსიით, ირაკლი კ.-მ თავისი 5 წლის შვილის დედასა და მის მეგობარ ქალზე იძალადა. პოლიციაში დაზარალებული ქალების მეზობლებმა დარეკეს. საქმეში უკვე დევს ექსპერტიზის დასკვნა, რომლის მიხედვითაც ქალებს სახის არეში მსუბუქი ხასიათის დაზიანებები ჰქონდათ. ჩვენების მიხედვით, ბრალდებული ჯერ მათთან ერთად ალკოჰოლს სვამდა, შემდეგ კი მათ სახეში დაუწყო ცემა.

ირაკლი ოზურგეთიდანაა, მან თავისი შვილის დედა ბათუმში გაიცნო და მასთან ერთად ცხოვრობდა ნაქირავებ ბინაში. ბრალდებული შვილის დედასთან ქორწინებაში არ იმყოფება. ადვოკატის, ჯიმშერ არობელიძის თქმით, ბავშვს კონფლიქტამდე და ახლაც ბებია – ირაკლის დედა ოზურგეთში ზრდის.

ბრალდებულს, რომელმაც სასამართლო დარბაზში ვენები სავარაუდოდ ლამინატის მასალით დაიზიანა, ადგილზევე გაუწია სამედიცინო დახმარება სასწრაფო დახმარების სამსახურმა, იგი სასჯელაღსრულების დაწესებულებაში დააბრუნეს.

„ბათუმელებს“ სასამართლოს მენეჯერმა უთხრა, რომ სასამართლოს ამ შემთხვევის გამო არავისთვის მიუმართავს, რადგან სასამართლო დარბაზში ბრალდებული პოლიციელებმა მიიყვანეს, დარბაზში ასევე იმყოფებოდა პროკურორი.

ირაკლი კ. სასამართლო დარბაზში წინასწარი დაკავების იზოლატორიდან ბათუმის პირველი განყოფილების პოლიციელებმა მიიყვანეს. რა ნივთით მიიყენა თვითდაზიანება ბრალდებულმა ან როგორ აღმოჩნდა კანონსაწინააღმდეგო ნივთი ბრალდებულის ხელში? – ამ თემაზე საუბარი ადვოკატს არ სურს.

შინაგან საქმეთა სამინისტროს ინფორმაციით, შემთხვევაზე გამოძიება დაიწყო სისხლის სამართლის კოდექსის 115-ე მუხლის შესაბამისად, რაც თვითმკვლელობამდე მიყვანას გულისხმობს.

ქალი, რომელზეც ბრალდებული ძალადობდა, უზბეკეთის მოქალაქეა.

ნეტგაზეთის მასალების სხვა გამოცემებში გადაბეჭდვის წესი
ავტორი