ქობულეთში, აღმაშნებელის ქუჩაზე, ინტერნეტის კაბელი მიწის ზემოთ გაჰყავთ. მოქალაქეების ნაწილი მიიჩნევს, რომ ეს ქალაქის იერ-სახეს ამახინჯებს და როცა კაბელების მიწისქვეშა საკომუნიკაციო სისტემაში განთავსება შეიძლებოდა, კომპანიებისთვის ამის უფლება არ უნდა მიეცათ.
„მიწის ქვემოთ რომ გასულიყო, მაშინ ტროტუარი უნდა გათხრილიყო, რაც მოსახლეობის უკმაყოფილებას გამოიწვევდა, დროც გაიწელებოდა. თქვენ რა პრობლემას ხედავთ იმაში, რომ კაბელები მიწის ზემოდანაა? იქ გადის ელექტროსადენები და იქვეა ინტერნეტის კაბელები,“ – გვითხრა ასლან ქათამაძემ, ქობულეთის მერიის არქიტექტურისა და სივრცითი მოწყობის სამსახურის უფროსმა.
ჰკითხა თუ არა მოსახლეობას აზრი ქობულეთის მერიამ? – ასლან ქათამაძემ გვიპასუხა, რომ ამ შემთხვევაში მოქალაქეებისთვის აზრი არ უკითხავთ.
არქიტექტურის სამსახურის განმარტებით, ინტერნეტის კაბელი მიწის ზემოთ კომპანია „სილქნეტმა“ გაიყვანა. მას ამ ფორმით საქმიანობის განხორციელების უფლება ქობულეთის საკრებულომ შესაბამისი განკარგულებით მისცა.
ასლან ქათამაძის თქმით, ქალაქ ქობულეთის მოსახლეობას საკაბელო ინტერნეტი აქამდე მიეწოდებოდა, თუმცა „კაბელები უსისტემოდ და ქაოტურად იყო განთავსებული, რამაც კომპანიას პრობლემა შეუქმნა.“
