სასამართლოს ორი მანდატური საკონსტიტუციო სასამართლოში პარლამენტის წინააღმდეგ დავობს. ჯიმშერ ცხადაძე და მამუკა ჭანტურია მანდატურის პოზიციიდან მხოლოდ იმიტომ დაითხოვეს, რომ მათ 50 წელი შეუსრულდათ. მამუკა ჭანტურია თბილისის სააპელაციო სასამართლოში მუშაობდა, ჯიმშერ ცხადაძე – თბილისის საქალაქო სასამართლოში.
მოსარჩელეები „საერთო სასამართლოების შესახებ“ კანონის იმ ჩანაწერს მიიჩნევენ არაკონსტიტუციურად, რომლის მიხედვითაც მანდატური 50 წლის მიღწევისას ავტომატურად თავისუფლდება სამსახურიდან. ყოფილი მანდატურები ფიქრობენ, რომ ეს მიდგომა დისკრიმინაციულია და არღვევს კონსტიტუციით გარანტირებულ თანასწორობის უფლებას.
„კანონმდებლობა ამ პროცესში გამორიცხავს პირის ინდივიდუალური უნარ-ჩვევებისა თუ ჯანმრთელობის მდგომარეობის შემოწმების საფუძველზე მისი გათავისუფლების შესახებ გადაწყვეტილების მიღების შესაძლებლობას,“ – აღნიშნავენ ყოფილი მანდატურები.
სარჩელში ნახავთ უცხოურ პრაქტიკასაც, მაგალითად, შეერთებულ შტატებში კანონი სასამართლოს უსაფრთხოების ოფიცრებს საკვალიფიკაციო მოთხოვნებს უდგენს, ზღვრული ასაკი კი დადგენილი არ არის. შეზღუდვა არსებობს მხოლოდ იმ შემთხვევაში, თუ კანდიდატი საჭირო უნარ-ჩვევებს ვერ დააკმაყოფილებს.
„შრომის უფლება არ წარმოადგენს აბსოლუტურ უფლებას, შესაბამისად, უფლებების შეზღუდვისთვის საჭიროა „ლეგიტიმური მიზანი“ და პროპორციის დაცვა მიზანსა და შეზღუდვას შორის. დემოკრატიული და სამართლებრივი სახელმწიფოს უპირველეს მიზანს წარმოადგენს ადამიანის უფლებების დაცვა. უფლების შეზღუდვა, ასეთის აუცილებლობის შემთხვევაში, უნდა განხორციელდეს დადგენილი სტანდარტების და პროცედურების დაცვით. წინააღმდეგ შემთხვევაში მოიშლება სამართლებრივი წესრიგი და უფლებათა შეზღუდვა ან რეგულირება ქაოტური და არაპროგნოზირებადი გახდება,“ – წერია საკონსტიტუციო სარჩელში.
მოსარჩელე მამუკა ჭანტურია სარჩელში ყურადღებას ამახვილებს იმაზეც, რომ ის ყოველგვარი ალტერნატიული შეთავაზების გარეშე უსამსახუროდ და შემოსავლის გარეშე დარჩა, რამაც ის მძიმე სოციალურ პირობებში ჩააყენა.
ყოფილი მანდატურების ინტერესებს სასამართლოში არჩილ ჩოფიკაშვილი იცავს, ორგანიზაცია „კონსტიტუციის 42-ე მუხლის“ იურისტი.
ყოფილი მანდატურების საკონსტიტუციო სარჩელის არსებითი განხილვა დღეს, 19 ოქტომბერს, დაიწყო საკონსტიტუციო სასამართლოს პლენუმმა.
