Batumelebi

ბიძინა ივანიშვილის მიერ 2020 წლის არჩევნების პროპორციული სისტემით ჩატარების შესახებ გაკეთებული განცხადების შემდეგ, ექსპრეზიდენტ მიხეილ სააკაშვილი თავის ვიდეოჩართვაში ვადამდელი არჩევნების მოთხოვნით გამოდის:

„ბავშვებს დათხარეს თვალები, ჩაიდინეს საოცრებები და თურმე იმისთვის, რომ ივანიშვილმა შეინარჩუნოს გახარია, დღევანდელი საარჩევნო კომისია იჯდეს აქ 2020 წლის ოქტომბრამდე მანამ,  სანამ ყველაფერს დაალაგებს, ყველას დაიჭერს – პრაქტიკულად დღეს დაანონსა დაპატიმრებები, მოკეტოს რუსთავი 2, ყველასთან „გაიასნოს“ სიტუაცია და მერე, 2020 წელში, რაღაც გაურკვეველი ნულოვანი ბარიერით, რაც მსოფლიოში არ არსებობს… ეს ნიშნავს სათითაოდ ყველა პატარ-პატარა პარტიების ყიდვას, გაერთიანებების დაშლას… ამისთვის დგას ხალხი ქუჩაში, ამისთვის დაიღვარა სისხლი, ამისთვის არის ამხელა მოძრაობა მთელ მსოფლიოში? ეს კაცი მართლა გთვლით აბსოლუტურ იდიოტებად?

ერთი რამ არის ნათელი – ივანიშვილი არის პანიკაში, მაგრამ ახლა ყველა, ვინც ამას დათანხმდება, არის ან აბსოლუტური სულელი, ან ჩვეულებრივად ნაყიდი. ახლა აქ საუბარია იმაზე, რომ ამ კაცმა უნდა გადააყენოს გახარია, გამოუშვას ყველა დაპატიმრებული და დაუყოვნებლივ დანიშნოს რიგგარეშე არჩევნები პროპორციული სისტემით, გამოცვალოს ცესკოს ნაყიდი თავმჯდომარე თამარ ჟვანია, ჩამოვიყვანოთ საერთაშორისო დამკვირვებლები და ყველამ ერთად ჩავატაროთ ახალი არჩევნები“.

______

„ქართული ოცნების“ გადაწყვეტილებას, რომ 2020 წელს არჩევნები პროპორციული სისტემით ჩატარდეს,  „ევროპული საქართველო“ ეხმიანება.

„ეს გამარჯვება არის ძალიან მნიშვნელოვანი, გარდა იმისა, რომ თქვენ მოახერხეთ უკან დაახევინოთ ქართულ ოცნებას და მიაღწიეთ სამართლიან პროპორციულ სისტემას, თქვენ უთხარით ყველა პოლიტიკოს და ყველა მომდევნო მთავრობას, რომ არც ერთი შემთხვევა ჩვენი საზოგადოების ღირსების შელახვის ვერ გაივლის უკვალოდ და ყველა მომდევნო ხელისუფლება იქნება პასუხისმგებელი მსგავსი უღირსი და უკანონო საქმიანობის შედეგების,“ – ამბობს ელენე ხოშტარია, პარლამენტის ფრაქცია „ევროპული საქართველოს“ წევრი.

მისივე შეფასებით, „ქართული ოცნება“ ახლა ვაჭრობს გიორგი გახარიას ფიგურით.

„აღმაშფოთებელია გახარიას დატოვება თანამდებობაზე და ხალხთან ვაჭრობა თანამდებობებით. ისინი ვაჭრობდნენ ერთი დღე კობახიძით, ახლა ვაჭრობენ გახარიათი. გახარიას არ აქვს არც მორალური, არც სამართლებრივი და არც პოლიტიკური უფლება, იყოს შინაგან საქმეთა მინისტრი. გახარია არის შს მინისტრი, რომელმაც იყიდა სასიკვდილო და ნაკლებად სასიკვდილო ტყვიები და პირდაპირ დამიზნებით გასცა ბრძანება, რომ დამიზნებით ესროლათ ადამიანებისათვის და დაესახიჩრებინათ. დღემდე სამი ადამიანი ებრძვის სიკვდილს, ადამიანებმა დაკარგეს თვალი. ჩვენ ვნახეთ კადრები, როდესაც ხელგაშლილ ადამიანებს ესროდნენ პირდაპირ. ბაღებში დასდევდნენ მშვიდობიან ხალხს, რომელიც აქციიდან მიდიოდა და დამიზნებით ესროდნენ და ეს ვერ შერჩება შინაგან საქმეთა მინისტრს. ამიტომ მოეშვით ვაჭრობას და გადააყენეთ გახარია. გახარია არის ამ პოლიტიკური კრიზისის ერთ-ერთი გამომწვევი და პასუხისმგებელი,“ – ამბობს ელენე ხოშტარია.

„ჩვენ ვიხილეთ ძალადობა პოლიციელებზე, როგორ მომხდარიყო შეჭრა ჩვენს პარლამენტში… ბუნებრივია, ამ ნაბიჯს მიეცემა სამართთლებრივი შეფასება, ისევე, როგორც შემთხვევებს, სადაც შეიძლება ჰქონოდა ძალის გადამეტებას ადგილი,“ – განაცხადა პრემიერ-მინისტრმა მამუკა ბახტაძემ დღეს, 24 ივნისს, მას შემდეგ, რაც ბიძინა ივანიშვილმა პოლიტსაბჭოს სხდომის შემდეგ თქვა, რომ 2020 წლის საპარლამენტო არჩევნები პროპორციული წესით ჩატარდება.

პრემიერმა ასევე თქვა, რომ გამოძიების პროცესი წარიმართება გამჭვირვალედ.

პრემიერმა და ბიძინა ივანიშვილმა უპასუხოდ დატოვეს შეკითხვა შინაგან საქმეთა მინისტრის, გიორგი გახარიას თანამდებობიდან გადადგომის შესახებ. იმავე შეკითხვაზე კახი კალაძემ თქვა, რომ პოლიტსაბჭოზე ამ თემაზე არ უსაუბრიათ.

თბილისის მერმა კახა კალაძემ დღეს, 24 ივნისს, „ქართული ოცნების“ სატაო ოფისში გამართულ ბრიფინგზე განაცხადა, რომ შს მინისტრის გიორგი გახარიას გადადგომაზე საუბარი არ ყოფილა.

კახა კალაძე გახარიასთან დაკავშირებით არაერთი კითხვა დაუსვეს. სწორედ ამ კითხვების საპასუხოდა თქვა კახა კალაძემ, რომ არ ყოფილა ამაზე საუბარი.

დღეს პრემიერმა მამუკა ბახტაძემ და ბიძინა ივანიშვილმა უპასუხოდ დატოვეს შეკითხვა შინაგან საქმეთა მინისტრის, გიორგი გახარიას თანამდებობიდან გადადგომის შესახებ.

დღეს, 24 ივნისს, „ქართული ოცნების“ თავმჯდომარემ, ბიძინa ივანიშვილმა, „ქართული ოცნების“ ცენტრალურ ოფისში საგანგებო ბრიფინგზე ფართომასშტაბიანი პოლიტიკური რეფორმა დააანონსა.

„2020 წელს ჩატარდეს არჩევნები პროპორციული სისტემით, ნულოვანი საარჩევნო ბარიერის პირობებში. ჩვენ გთავაზობთ, სრულად გავაუქმოთ პროცენტული ბარიერი და იმედი გვაქვს, ამ გზით მივიღებთ პარლამენტს, სადაც თითქმის ყველა პოლიტიკური აქტორი იქნება წარმოდგენილი და არავის დასჭირდება ვინმესთან მიკედლება და საკუთარ პრინციპებზე უარის თქმა.

ჩვენი პოლიტიკური გუნდი მზადაა, მიმდინარე სასესიო კვირის დამთავრებისთანავე  დაიწყოს მოლაპარაკებები საპარლამენტო და არასაპარლამენტო პოლიტიკურ პარტიებთან“, – განაცხადა ივანიშვილმა.

ბერა ივანიშვილი საკუთარი ფეისბუკის გვერდზე პარლამენტის წინ მიმდინარე საპროტესტო აქციას გამოეხმაურა, სადაც ის ამბობს, რომ აქცია „ერთი გზააბნეული ქართველი პოლიტიკოსის შეცდომით დაიწყო და ჩასაფრებული რევანშისტების მიერ ორგანიზებული ძალადობით გაგრძელდა“.

„მინდა ჩემი ხმა შევუერთო ჩემი თავისუფლებისმოყვარე თანატოლების გულწრფელ და სამართლიან პროტესტს იმ სამარცხვინო პროცესების გამო, რაც ერთი გზააბნეული ქართველი პოლიტიკოსის შეცდომით დაიწყო და ჩასაფრებული რევანშისტების მიერ ორგანიზებული ძალადობით გაგრძელდა, რის შედეგადაც დაშავდნენ როგორც აქციის მონაწილეები, ასევე პოლიციელები.

მე თქვენთან ერთად მთელი გულით განვიცდი ამ ტკივილს და მზად ვარ, მხარში დავუდგე თითეოულ მათგანს. ჩვენ, დამოუკიდებლობის ხანაში დაბადებულები, არავის დავუთმობთ ჩვენი სამშობლოს თავისუფლებას და არავის დავანებებთ ჯიჯგნოს მისი სხეული.“

გერმანიის ქალაქ ჰამბურგში ქართველმა ემიგრანტებმა აქცია გამართეს. ისინი საქართველოში, პარლამენტის წინ მიმდინარე აქციის მონაწილეებს სოლიდარობას უცხადებენ და  რუსულ ოკუპაციას აპროტესტებენ.

მათ აქციის ჩასატარებლად ჰამბურგში ყველაზე ხალხმრავალი ადგილი შეარჩიეს, იმისთვის, რომ რაც შეიძლება ბევრი ადამიანისთვის მიეწვდინათ ხმა, საქართველოში განვითარებული მოვლენების შესახებ.

„ძალა არის ერთიანობაში, ჩვენ გვინდა საქართველოს დავანახოთ, რომ მართალია სამშობლოსგან მოშორებით ვართ, მაგრამ მათ გვერდით ვუდგავართ“ – ამბობენ აქციის მონაწილეები. აქციის მონაწილეები ითხოვენ ასევე თბილისის აქციაზე დაპატიმრებულების გათავისუფლებას.

აქციის მონაწილეებს თან ჰქონდათ საქართველოს დროშები და ტრანსპარანტები, წარწერით „რუსეთი ოკუპანტია“ , ისინი აქციის გამართვას ხვალაც გეგმავენ.

___________________________________________________________________

თბილისში, რუსეთის დუმის დეპუტატის, სერგეი გავრილოვის ვიზიტით გამოწვეული საზოგადოებრივი პროტესტის შემდეგ, რუსეთის პრეზიდენტმა ვლადიმერ პუტინმა, თავის მოქალაქეებს საქართველოს დატოვებისკენ მოუწოდა და განაცხადა, რომ 8 ივლისიდან საქართველოში რუსული ავიაკომპანიები აღარ იფრენენ.

აისახა თუ არა პუტინის განცხადება რუსი ტურისტების განწყობაზე და ნამდვილად ტოვებენ თუ არა ტურისტები საქართველოს, ამის შესახებ ინფორმაციის დაზუსტებას „ბათუმელები“ ტუროპერატორებთან და სასტუმროების შეეცადა. თუმცა მათ ამ ეტაპზე მედიასთან საუბარი არ სურთ.

„360 რეგისტრირებული სასტუმროა და ყველასგან არ გვაქვს დაზუსტებული ინფორმაცია, ამიტომ საერთო მდგომარეობაზე ვერ ვისაუბრებთ. არის შემთხვევები, სადაც ჯავშანი გააუქმეს, მაგრამ სად რამდენი შემთხვევაა, არ გვაქვს ზუსტი მონაცემები და მოკვლევა მიმდინარეობს“. – გვეუბნებიან აჭარის ტურიზმის დეპარტამენტში.

დაზუსტებულ ინფორმაციას  ფრენების შემცირებაზე ან დამატებაზე, არც სამოქალაქო ავიაციის სააგენტოში ფლობენ. როგორც გვეუბნებიან, ისინიც მოკვლევას აწარმოებენ.

აჭარის ტურიზმის დეპარტამენტის ინფორმაციით, 5 თვის მონაცემებით, აჭარას რაოდენობრივად ყველაზე მეტი ტურისტი ადმინისტრაციული საზღვრის კვეთის მონაცემებით თურქეთიდან (277 595), აზერბაიჯანიდან (54 766) და ისრაელიდან (28 207) ეწვია. რუსეთიდან კი ხუთი თვის მონაცემით, 25 ათასი საერთაშორისო მოგზაურის ვიზიტი დაფიქსირდა.

დეპარტამენტის ინფორმაციით, პროცენტული ზრდის კუთხით დადებითი ტენდენციები შენარჩუნებულია ისეთი ევროპული ქვეყნებიდან, როგორიცაა გერმანია (+5%), ესტონეთი (+59%) და დიდი ბრიტანეთი (+20%).  ეს არის სარფის სასაზღვრო პუნქტის, პორტისა და აეროპორტის კვეთის მონაცემები.

——————————————————————

ბათუმის საერთაშორისო აეროპორტში „ბათუმელებს“ უთხრეს, რომ რუსეთის მიმართულებით და პირიქით ორი რუსული კომპანია – „სიბირი“ და „ურალი“ ასრულებენ ფრენებს და ერთი ქართული კომპანია – აირზენა.

აეროპორტის სალაროებში მიღებული ინფორმაციით, რუსული კომპანიები დღეში ასრულებენ 3-4 რეისს და დღეს, ისე როგორც გუშინ, არც ერთი ფრენა არ გადადებულა.

აეროპორტში „ბათუმელებს“ უთხრეს, რომ დღესაც ჩვეულებრივად იყიდება ბილეთები რუსეთის მიმართულებით და პირიქით. ბილეთები ქსელში იყიდება 7 ივლისის ჩათვლით, ხოლო 8 ივლისიდან გასაყიდი ბილეთები ქსელში აღარ არის.

აეროპორტში აცხადებენ, რომ არ ყოფილა რუსეთის მიმართულებით არც ერთი საგანგებოდ ჩანიშნული ჩარტერული რეისი.

რუსეთის პრეზიდენტის მიერ გამოცემულ ბრძანებას, 8 ივნისიდან აეკრძალოთ რუსულ ავიაკომპანიებს საქართველოს მიმართულებით და პირიქით ფრენა, სოციალურ ქსელებში აქტიურად განიხილავენ რუსეთის მოქალაქეებიც. მაგალითად, რუსეთის ერთ-ერთმა მოქალაქემ 6 საათის წინ გამოაქვეყნა პოსტი, სადაც ის აღწერს, როგორ ისვენებს ბათუმში. ის ამბობს, რომ აქ მოსკოვთან შედარებით ყველაფერი იაფი და ხარისხიანია. „ჩვენ უკვე ექვსი დღეა ვიმყოფებით ბათუმში და სრულიად ვუჭერთ მხარს ჩვენი ბრძენი იმპერატორის გადაწყვეტილებას თანამემამულეების გადარჩენაზე“, – წერს ის პუტინის მისამართით ერთგვარი ცინიზმით.

6 საათის წინ ამ მოქალაქის მიერ დაწერილი პოსტი უკვე გაზიარებული აქვს 3600 სხვა მომხმარებელს. პოსტის ქვეშ 1200-ზე მეტი კომენტარია, სადაც ძირითადად რუსეთის მოქალაქეები პოსტავენ. ამ პოსტების სრული უმრავლესობა იგივე შინაარსისაა – მათ მოსწონთ ბათუმში დასვენება, რამდენიმე მიზეზის გამო – ფასი, მომღიმარი ხალხი, საუკეთესო ზღვა, უგემრიელესი კერძები და ღვინო.

ამავე თემაზე: 

https://netgazeti.ge/news/374305/

ქუთაისში მშვიდობიანი საპროტესტო აქცია გაიმართა. ქალაქის ცენტრალურ მოედანზე შეკრებილმა ასობით ახალგაზრდა რუსეთის მიერ საქართველოს ოკუპაციას აპროტესტებდა. აქციის მონაწილეები თავდაპირველად მესხიშვილის თეატრის წინ გამოდიოდნენ, შემდეგ კი მსვლელობით დაიძრნენ პარლამენტის ყოფილი შენობისკენ.

———————————————–

ხელისუფლებამ 20 ივნისს ძალის გამოყენებით დაშალა საპროტესტო აქცია თბილისში, პარლამენტთან. პოლიციის გამოყენებული ძალის შედეგად დაშავდა ათეულობით ადამიანი. დაშავებულთა შორის არიან ჟურნალისტებიც. თვითმხილველთა მონათხრობისა და მედიის მიერ გადაღებული ვიდეოებით ჩანს, რომ სპეცრაზმელები რეზინის ტყვიებს მოქალაქეებს დამიზნებით ესროდნენ. დაშავებულთა ნაწილს დაზიანებები აქვთ თავისა და სახის არეში.

აქციაზე დაკავებულთა რაოდენობა 300-ს აჭარბებს.

ჯანდაცვის სამინისტროს ინფორმაციით, 20 ივნისის აქციის დარბევისას 240 მოქალაქე დაშავდა, მათ შორის 80 პოლიციელია, რომლებიც სხვადასხვა კლინიკებში შეიყვანეს. „ნიუ ჰოსპიტალის“ ინფორმაციით, ორ ადამიანს თვალის ამოღება დასჭირდა. მოქალაქეები კლინიკებში მიიყვანეს როგორც ცრემლსადენი გაზის მოწამვლით, ასევე სხეულის ქსოვილების სხვადასხვა დაზიანებით, რომელიც რეზინის ტყვიების სროლის შედეგად ჰქონდათ მიღებული.

21 ივნისის საღამოს მონაცემებით, კლინიკებში რჩება 50-ზე მეტი ადამიანი, მათგან სამის მდგომაროება მძიმეა – ისინი მართვით სუნთქვაზე იყოფებიან.

ვლადიმერ პუტინის შესაბამისი განკარგულება კრემლის ვებგვერდზე გამოქვეყნდა. დოკუმენტში ნათქვამია, რომ აკრძალვის მიზანია ეროვნული უსაფრთხოების უზრუნველყოფა და რუსეთის მოქალაქეების დაცვა.

ამასთან, ტუროპერატორებისთვის და აგენტებისთვის რეკომენდებულია, აკრძალვის პერიოდში თავი შეიკავონ ისეთი ტურისტული პროდუქტის რეალიზაცისგან, რომელიც საქართველოში მოგზაურობას შეეხება.

პუტინმა რუსეთის მთავრობას დაევალა, მიიღოს ზომები საქართველოს ტერიტორიაზე დროებით მყოფი რუსეთის მოქალაქეების სამშობლოში დასაბრუნებლად.

განკარგულებაში ნათქვამია, რომ რუსეთის საგარეო საქმეთა სამინისტრომ საქართველოს ხელისუფლებასთან კოორდინაციით უზრუნველყოს რუსეთის მოქალაქეების უსაფრთხოებასთან დაკავშირებული საკითხების მოგვარება.

თბილისში განვითარებული მოვლენები, რომელიც მართლმადიდებლობის საპარლამენტთაშორისო გენერალური ასამბლეის ფარგლებში რუსეთის დუმის დეპუტატების საქართველოში ვიზიტს მოჰყვა, განიხილეს რუსეთის უშიშროების საბჭოს სხდომაზე.

„ექსტრემისტული ელემენტების მიერ პროვოცირებული რუსოფობიული პროვოკაცია რუს დეპუტატებთან მიმართებაში შეფასდა, როგორც ძალიან სახიფათო გამოვლინება. საგარეო საქმეთა სამინისტროს მიეცა რეკომენდაცია, ექსტრემისტებიდან მომდინარე შესაძლო საფრთხის შესახებ გააფრთხილოს რუსეთის მოქალაქეები, მათ შორის ტურისტები, რომლებიც საქართველოში მიემგზავრებიან ან იქ იმყოფებიან“, – ნათქვამია კრემლის ვებ-გვერდზე გამოქვეყნებულ ინფორმაციაში.

თბილისში განვითარებულ მოვლენებთან დაკავშირებით კომენტარი გააკეთა რუსეთის დუმის დეპუტატმა სერგეი გავრილოვმაც. მისი თქმით, „რუსულმა მხარემ მონაწილეობა უნდა მიიღოს  თბილისის არეულობის გამოძიებასა და მის მხარდამჭერთა გამოვლენაში“.

სალომე ზურაბიშვილმა 20 ივნისს, საავადმყოფოში მყოფი, აქციაზე დაშავებული პირები მოინახულა.

„ყველა, ვინც გუშინ ქუჩაში იდგა – პოლიციელი თუ რიგითი მოქალაქე – ქუჩაში იდგა თავისი ქვეყნისთვის. უდიდეს თანადგომას ვუცხადებ ყველა ოჯახს, რომელსაც რაიმე ფორმით შეეხო ეს ტრაგედია. ეს არ არის მათი პირადი ტრაგედია, ეს არის მთელი ქვეყნის ტრაგედია. მთელმა საზოგადოებამ უნდა გავაცნობიეროთ, რომ ქვეყანაში დაპირისპირება დიდ დარტყმას აყენებს თითოეულ ჩვენგანს, მთელ სახელმწიფოს და აძლიერებს მტერს. მაშინ, როდესაც მეზობელ ქვეყანას ოკუპირებული აქვს ჩვენი ქვეყნის ტერიტორიები, ყველას მოგვეთხოვება ძალიან დიდი სიფრთხილე.  მადლობა იმ პოლიციელებს, რომლებიც ბოლო შესაძლებლობამდე ეცადნენ, მოქალაქეებისთვის მიეცათ სამართლიანი პროტესტის მშვიდობიანი ფორმით გამოხატვის საშუალება“ – ვკუთხულობთ პრეზიდენტის ფეისბუქგვერდზე.

ჯანდაცვის სამინისტროს ინფორმაციით, 20 ივნისს აქციაზე 240 მოქალაქე დაშავდა, მათ შორის 80 პოლიციელი.

20 ივნისს საქართველოს პარლამენტის წინ მოქალაქეები შეიკრიბნენ, სადაც ითხოვდნენ შინაგან საქმეთა მინისტრ გიორგი გახარიას, პარლამენტის თავმჯდომარის ირაკლი კობახიძის და სახელმწიფო უსაფრთხოების სამსახურის უფროსი ვახტანგ გომელაურის გადადგომას. პოლიციამ მშვიდობიანი დემონსტრანტები ძალის გამოყენებით დაშალა. დაშავებულია ათეულობით სამოქალაქო პირი. დაშავებულთა შორის არიან პოლიციელებიც.

20 ივნისს თბილისში განვითარებული მოვლენების შესახებ ყველა ინფორმაცია შეგიძლიათ ნახოთ Netgazeti.ge-ზე.

[checklist]

• ყველაფერი დაიწყო 20 ივნისის დილას, როცა რუსი დეპუტატი გავრილოვი საქართველოს პარლამენტის თავმჯდომარის სავარძელში და მართლმადიდებლობის საპარლამენტთაშორისო გენერალური ასამბლეის რიგით 26-ე სესია  რუსულ ენაზე წაიყვანა.
• გავრილოვის პარლამენტში გამოსვლა „ევროპული საქართველოს“ წარმომადგენლებმა გააპროტესტეს. მათ პარლამენტის სხდომათა დარბაზი დაიკავეს. რუსეთის დუმის დეპუტატმა სერგეი გავრილოვმა სესიის წაყვანა ვეღარ შეძლო. ღონისძიება ჩაიშალა.
• თბილისში დაიწყო საპროტესტო აქციები. გავრილოვმა სასტუმრო რედისონი, სადაც ის პარლამენტიდან გადაიყვანეს, პროტესტის ფონზე (ესროდნენ კვერცხებს, ბოთლებს) დატოვა და მოსკოვში გაფრინდა.
• გავრილოვის ამბების გასაპროტესტებლად პარლამენტთან აქცია დაიწყო
• ადამიანებს, რომლებიც პარლამენტის შენობის წინ იყვნენ შეკრებილები, ჰქონდათ პარლამენტის შენობაში შეჭრის მცდელობა
• პარლამენტის შენობის წინ მიმდინარე  მრავალათასიანი აქციის პარალელურად დაცვის სპეციალურმა სამსახურმა საქართველოს პარლამენტში აკრედიტირებული ჟურნალისტები შენობიდან გამოაძევა
• გვიან ღამით პოლიციამ აქციის დაშლა ცრემლსადენი გაზითა და რეზინის ტყვიებით დაიწყო
• აქციის დარბევისას დაშავდნენ პირველი არხის, რ2-სა და ტვ პირველის ოპერატორები
• რუსთაველის გამზირზე მშვიდობიანი აქციის მონაწილეების დარბევა მთელი ღამე გრძელდებოდა
• ათეულობით მშვიდობიანი დემონსტრანტი დაშავდა, ორმა ადამიანმა დაკარგა თვალი, ათეულობით ადამიანმა მიიღო სხვადასხვა სახის მძიმე დაზიანება
• 21 ივნისის დილას შსს-მ  ათეულობით ადამიანი დააკავა
• საერთაშორისო უფლებადამცველი ორგანიზაცია Human Rights Watch-მა განცხადება გაავრცელა. “პოლიციამ თბილისში რეზინის ტყვიები და ცრემლსადენი გაზი გაფრთხილების გარეშე გამოიყენა ათასობით მშვიდობიანი დემონსტრანტის წინააღმდეგ,” – წერს Human Rights Watch.
• ჯანდაცვის სამინისტრომ გამოაქვეყნა ოფიციალური ინფორმაცია, რომლის მიხედვითაც აქციიდან კლინიკებში სხეულის სხვადასხვა დაზიანებით 240 ადამიანი გადაიყვანეს
• თანამდებობიდან გადადგა საქართველოს პარლამენტის თავმჯდომარე ირაკლი კობახიძე
• 21 ივნისს დაიწყო კიდევ ერთი აქცია, შს მინისტრის გიორგი გახარიას გადადგომის და პროპორციული საარჩევნო სისტემის მოთხოვნით

[/checklist]

20 ივნისის საპროტესტო აქციას წინ უძღოდა რუსეთის დუმის დეპუტატების ვიზიტი საქართველოში და პარლამენტის თავმჯდომარის სავარძლიდან მართლმადიდებლობის საპარლამენტთაშორისო გენერალური ასამბლეის სესიის გახსნა. აღნიშნულის შემდეგ, შესვენებისას, პარლამენტის სხდომათა დარბაზში შევიდნენ “ევროპული საქართველოსა” და “ერთიანი ნაციონალური მოძრაობის” დეპუტატები და სესიის გაგრძელების საშუალება არ მისცეს.