140 ათასი ლარი ბათუმში საბაევის სახლის „მცირე რეაბილიტაციისთვის“


ბათუმში, კულტურული მემკვიდრეობის ძეგლის, ე.წ. საბაევის სახლის „მცირე რეაბილიტაციისთვის“ აჭარის კულტურული მემკვიდრეობის დაცვის სააგენტომ ხელახალი ტენდერი გამოაცხადა. წინა ტენდერი, რომელშიც სააგენტოს ერთ-ერთი კომპანია მომსახურებას 128 267 ლარად სთავაზობდა, უარყოფითი შედეგით დასრულდა – კომპანიას დისკვალიფიკაცია მისცეს. ამჯერად სატენდერო თანხა 140 ათასი ლარია.

შენობაში, რომელიც ბათუმში, მემედ აბაშიძის გამზირისა და კონსტანტინე გამსახურდიას ქუჩის კვეთაში მდებარეობს, სახელმწიფო დაცვის სპეციალური სამსახურის ოფისია განთავსებული.

„საბაევის სახლის“ ფასადის რეაბილიტაციაში წინა წლებში სააგენტომ 415 200 ლარი გადაიხადა. რაც შეეხება შენობის შიდა რემონტს, 2017 წელს გამოცხადებული ტენდერიც უარყოფითი შედეგით დასრულდა. ტენდერში, სადაც თანხა 96 500 ლარი იყო, სამი კომპანია მონაწილეობდა, თუმცა სააგენტოს სატენდერო კომისიამ სამივეს დისკვალიფიკაცია მისცა, ტექნიკური დოკუმენტაციის გამო.

შენობის ინტერიერის გასარემონტებლად გამოცხადებულ ტენდერში წინადადებების მიღება ამჯერად 2019 წლის 2 ივლისს დაიწყება და 5 ივლისს დასრულდება. რემონტი 2019 წლის 1 ნოემბრამდე უნდა დასრულდეს.

შენობის შიგნით არსებული მდგომარეობის ამსახველი ფოტომასალა შეგიძლიათ იხილოთ ბმულზე.

ამ თემაზე:

ძეგლის მცირე რეაბილიტაცია – 135 ათასი ლარი სააგენტოსგან დაცვის სამსახურის ოფისის რემონტისთვის

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com