ბათუმში საფეხბურთო სტადიონის მშენებლობის დასრულების სამუშაოების ტექნიკური ზედამხედველობისთვის აჭარის ბიუჯეტიდან ნახევარ მილიონზე მეტი ლარია გამოყოფილი. ტექნიკურ ზედამხედველს შპს „სტადიონი“, (რომლის 100% წილის მფლობელი აჭარის ავტონომიური რესპუბლიკაა), ტენდერით შეარჩევს. სატენდერო თანხა 576 670 ლარია. წინადადებების მიღება 2019 წლის 7 ივლისს დაიწყება და 10 ივლისს დამთავრდება.
სტადიონის მეორე ეტაპის [მშენებლობის დასრულების] სამუშაოებში აჭარის ბიუჯეტიდან დღგ-ს გარეშე 20 მილიონ 780 ათასი ლარი უნდა დაიხარჯოს.
დეტალურად იმ სამუშაოების შესახებ, რომელიც ბათუმში, ყოფილი მანქანათმშენებელი ქარხნის ტერიტორიაზე 20000 მაყურებელზე გათვლილი UEFA-ას IV კატეგორიის საფეხბურთო სტადიონის მშენებლობის დასრულებას [მეორე ეტაპს] მოიცავს, იხილეთ ბმულზე:
———-
საფეხბურთო სტადიონის მშენებლობას [პირველი ეტაპი] კომპანია „ანაგი“ ახორციელებს. ამავე კომპანიამ გაიმარჯვა მეორე ეტაპის სამუშაოების შესყიდვაზე გამოცხადებულ ტენდერშიც.
„ანაგმა“ მეორე ეტაპის სამუშაოების შესრულება „სტადიონს“ 20 მილიონ 780 ათას ლარად შესთავაზა [სატენდერო თანხა 21 922 803 ლარი იყო]. ხელშეკრულება კი მასთან 24 520 400 ლარზე [დღგ-ს ჩათვლით] 2019 წლის 10 აპრილს გაფორმდა.
საფეხბურთო სტადიონის მშენებლობაზე [პირველი ეტაპი] ტენდერში გამარჯვებულ კომპანია „ანაგთან“ ხელშეკრულება 99 448 408 ლარზეა გაფორმებული დღგ-ს გარეშე [117 349 122 ლარი დღგ-ს ჩათვლით].
სტადიონის მშენებლობის პირველი ეტაპის სამუშაოების შესრულებას კი ტექნიკურ ზედამხედველობას ასევე ტენდერში გამარჯვებული კომპანია „სიემსი“ უწევს, რომელთანაც ხელშეკრულება 2 388 580 ლარზეა გაფორმებული.
მშენებლობის პირველი და მეორე ეტაპები, ანუ მთლიანად საფეხბურთო სტადიონისმშენებლობა, 2020 წლის 15 ოქტომბრამდე უნდა დასრულდეს.