მოსამართლემ ბათუმის მეჩეთის საკითხის განხილვა დაიწყო


მოსამართლე ჯუმბერ ბეჟანიძეს კიდევ ერთხელ მოსთხოვა პროცესის გადადება ბათუმის მერიამ. მერიის იურისტმა თქვა, რომ სხვადასხვა ღონისძიების გამო ვერ შეხვდნენ მუსლიმ თემს და შეხვედრა ივნისის პირველ კვირაში აუცილებლად გაიმართება.

“ეს არის დისკრიმინაციული მიდგომა მუსლიმი თემის მიმართ, ეს არის უსამართლობა…” – მიმართა მოსამართლეს ერთ-ერთმა მუსლიმმა.

მოსამართლე ჯუმბერ ბეჟანიძემ სხდომის განხილვა აღარ გადადო და დასძინა, რომ ბათუმში ახალი მეჩეთის მშენებლობის პროცესი შესაძლოა დღეს დასრულდეს.

“ბათუმში ახალი მეჩეთის მშენებლობის ფონდმა” ბათუმის მერიას სასამართლოში 2017 წელს უჩივლა. ბოლო სხდომა ამ საკითხზე 10 აპრილს გაიმართა. მუსლიმი თემი მერიის გადაწყვეტილებას აპროტესტებს, რომლითაც თემს შეძენილი მიწის ნაკვეთზე მეჩეთის მშენებლობაზე უარი უთხრეს.

არსებითი განხილვის გაგრძელებამდე მოსამართლემ ხაზი გაუსვა იმას, რომ “სასამართლოს არ სურს პროცესის გაჭიანურება”. მოსამართლემ თქვა ისიც, რომ ამას ჟურნალისტების გასაგონად ამბობს.

მოსამართლე ჯუმბერ ბეჟანიძის განმარტებით, სასამართლოში დავის მოგება არ ნიშნავს იმას, რომ მუსლიმი თემი მშენებლობის ნებართვას მიიღებს. მოსამართლემ თქვა, რომ მხარეთა შეთანხმება ამიტომაც იქნებოდა მნიშვნელოვანი, რადგან მშენებლობის საბოლოო ნებართვის მისაღებად სამი ეტაპია გასავლელი, სადავო კი ჯერ მხოლოდ პირველია.

“სასამართლოს მცდელობა, რომ მხარეები შეთანხმდნენ, ემსახურება იმ მიზანს, რომ საკითხი გადაიჭრას სწრაფად. ეს დავა მხოლოდ სამართლებრივი არ არის საზოგადიებისთვის, ეს საკითხი რეზონანსული და სენსიტიურია… მაგრამ სასამართლო მას განიხილავს მხოლოდ სამართლებრივ ჭრილში… მხარეს არ უნდა დარჩეს შთაბეჭდილება, რომ სასამართლო განხილვას აჭიანურებს. ყველა დავა უნდა დასრულდეს ბოლოს,” – თქვა მოსამართლე ჯუმბერ ბეჟანიძემ.

ამჯერად მხარეები კითხვებს უსვამენ ერთმანეთს, რომლის შემდეგაც პაექრობა გაიმართება.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი