ბათუმის შოთა რუსთაველის უნივერსიტეტის წარმომადგენლობითმა საბჭომ მხარი დაუჭირა უნივერსიტეტის ადმინისტრაციის ხელმძღვანელის თანამდებობაზე ალექსანდრე მითაიშვილის კანდიდატურას და იგი უნივერსიტეტის კანცლერად იქნა არჩეული ფარული კენჭისყრის შედეგად, ხმათა უმრავლესობით.
ალექსანდრე მითაიშვილი ბათუმის მერის მოადგილე იყო გიორგი ერმაკოვის მერობის დროს. იგი ბსუ-ს კანცლერის არჩევნებზე ერთადერთი კანდიდატი იყო.
ამ დრომდე უნივერსიტეტის კანცლერის პოსტი ჯემალ ანანიძეს ეკავა. ის კანცლერის თანამდებობაზე 2015 წლიდან მუშაობდა და 23 ივნისს ამოეწურა ამ პოსტზე მუშაობის ვადა. უნივერსიტეტის რექტორმა მერაბ ხალვაშმა ჯემალ ანანიძეს მადლობა გადაუხადა გაწეული მუშაობისთვის და უმაღლესი საგანმანათლებლო დაწესებულების განვითარებაში შეტანილი განსაკუთრებული წვლილისთვის უნივერსიტეტის უმაღლესი ჯილდო, შოთა რუსთაველის სახელობის მედალი და მადლობის სიგელი გადასცა.
უნივერსიტეტის კანცლერს ოთხი წლის ვადით ირჩევენ.
_____________________
ფოტოზე: ალექსანდრე მითაიშვილი. ფოტო: ბსუ