“Stop Russia” – აქცია ბათუმის ევროპის მოედანზე [ფოტო]

გიორგი გახარიას გადადგომას და ვადამდელ საპარლამენტო არჩევნებს ბათუმის ევროპის მოედანზე გამართულ საპროტესტო აქციაზეც ითხოვენ. შეკრებილები თვლიან, რომ გუშინდელი ღამის შემდეგ მხოლოდ ირაკლი კობახიძის თანამდებობიდან წასვლა საკმარისი არ არის.

“გახარიამ ისე ილაპარაკა, შესაძლებელია, ადამიანი, რომელმაც თვალი დაკარგა, გისოსებს მიღმა აღმოჩნდეს… ხელისუფლებამ იმის ნაცვლად, რომ დაეცვა ხალხი, პირიქით, დაარბია. მათ უნდა გააცნობიერონ, რომ ხალხშია ძალა და ხელისუფლება არის ანგარიშვალდებული ხალხის წინაშე,” – ამბობს გიორგი ქამადაძე, “ევროპული საქართველოს” ახალგაზრდული ფრთის ხელმძღვანელი. მისივე თქმით, აქციაზე მხოლოდ პოლიტიკური პარტიების მხარდამჭერები არ არიან.

აქციაზე ახალგაზრდები მრავლად არიან. მაგალითად, ედო მჟავანაძე ამბობს, რომ ის არ არის პარტიული და აქციაზე სამოქალაქო ჯგუფის კონკრეტულ მოთხოვნებს უჭერს მხარს.

“ჩვენ ვითხოვთ იმას, რომ დაუყონებლივ გათავისუფლდნენ აქციაზე დაკავებულები, ასევე გამოიძიონ და დროულად დასაჯონ ის ადამიანები, რომლებიც გუშინ პარლამენტთან დაპირისპირების დროს უფლებებს არღვევდნენ”, – გვითხრა ედო მჟავანაძემ.

“მე მეზღვაური ვარ და მოვედი აქციაზე… მთავარია, გახარია წავიდეს. გუშინ რომ წასულიყო, ეს არ მოხდებოდა,” – ამბობს დავით მახარაძე.

აქცია ბათუმში, ევროპის მოედანზე

შეკრებილები აპირებენ თბილისში მიმდინარე აქციას ევროპის მოედანზე მოწყობილი დიდი ეკრანიდან ადევნონ თვალი.