Batumelebi

„მე და ჩემი მეუღლე კარდაკარ დავდივართ და რელიგიურ თემებზე ვესაუბრებით ადამიანებს… პ.-თან როცა მივედით, ის იმყოფებოდა თავისი სახლის შუა ეზოში. ეზოში შეგვიპატიჟა, მაგრამ არ ჩავსულვართ, ჭიშკართან დავიწყეთ საუბარი. მან საუბარი დაიწყო არჩევნებზე. ორჯერ ვუთხარი, რომ რელიგიური ორგანიზაციიდან ვიყავით… ის ჩქარი ნაბიჯებით წავიდა სახლისკენ, ველოდებოდით.

დაახლოებით ნახევარ წუთში გამოვიდა სახლიდან პ. სანადირო თოფით, რომელიც გადაკეცილი ჰქონდა. მეუღლეს გადავულაპარაკე, რომ ჩვენი საქმე არ იყო კარგად. პ.-მ ორი ვაზნა ჩადო თოფში და დაიწყო ლანძღვა უშვერი სიტყვებით, „მე თქვენ გაჩვენებთ რელიგიურ ორგანიზაციას, მეორედ არ დაგინახოთ აქ მოსულიო“ და გაისროლა თოფი ჩვენი მიმართულებით,“ – ეს ერთ-ერთი დაზარალებულის ჩვენებაა, რომელიც მან მოსამართლე მარინა კიკნაძეს მისცა. დაზარალებული ლანჩხუთის ერთ-ერთ სოფელში მომხდარ შემთხვევას აღწერს. ოზურგეთის სასამართლომ ცოლ-ქმრის მიმართ დევნის ფაქტი დაადასტურა რელიგიური ნიშნით. ისინი იეჰოვას მოწმეები არიან.

გასროლის შემდეგ ცოლ-ქმარი ბრალდებულის სახლიდან გამოქცეულა. მათი თქმით, შემთხვევის შემსწრე არავინ ყოფილა, თუმცა სასამართლოს ჩვენებები მისცეს პ.-ს მეზობლებმა. „მანდარინის ბაღში ვიყავით და დავინახეთ, ადამიანებისკენ კი არა, ტყის მიმართულებით ისროლაო“, – უთხრეს მეზობლებმა მოსამართლეს.

დანაშაული არც ბრალდებულმა აღიარა. ჩხრეკის შედეგად მისი სახლიდან სამართალდამცველებმა ორი სანადირო თოფი ამოიღეს და ვაზნები. სასამართლო პროცესზე ბრალდებულმა თქვა: „თოფი ტყისკენ ვისროლე, ქორის დასაფრთხობად“.

მოსამართლისთვის დამაჯერებელი ცოლ-ქმრის ჩვენება აღმოჩნდა. მან არ გაიზიარა ადვოკატის მტკიცება იმასთან დაკავშირებით, რომ მტკიცებულებები არ არსებობს და ექსპერტიზითაც ვერ დადასტურდა, რა მიმართულებით გაისროლა ბრალდებულმა.

„ექსპერტიზა ვერ ადასტურებს, რა მიმართულებით მოხდა გასროლა, ვერ იქნა ნანახი საფანტის კვალი, სასამართლო მიუთითებს იმ გარემოებაზე, რომ პ.-ს საცხოვრებელი სახლიდან ამოღებულია ცეცხლსასროლი იარაღები – ორი ცალი სანადირო თოფი, დადგენილია და თვით დაცვის მხარის მოწმეებიც ადასტურებენ იმ ფაქტობრივ გარემოებას, რომ პ.-მ ნამდვილად განახორციელა ერთი გასროლა მის ხელთ არსებული სანადირო თოფიდან, თუმცა გაუგებარია, რატომ უნდა იქნას გაზიარებული დაცვის მხარის მოსაზრება იმასთან დაკავშირებით, რომ პ.-მ,  რომელიც დასცილდა ი.-ს და მალევე უკან დაბრუნდა თოფით ხელში და მუქარის სიტყვებით ,,გიჩვენებთ რელიგიურ ორგანიზაციას’’, სახლის უკან გაისროლა ქორის დასაფრთხობად, მაშინ როდესაც დაცვის მხარის მოწმეების ჩვენებები არის ურთიერთსაწინააღმდეგო და რატომ არ უნდა იქნას გაზიარებული ფაქტის უშუალო თვითმხილველი დაზარალებულების: მ.-ს და ი.-ს ჩვენებები, რომლებიც თანმიმდევრულად და დამაჯერებლად მიუთითებენ პ.-ს  მიერ მათი მიმართულების განხორციელებული გასროლის შესახებ,“ – ვკითხულობთ სასამართლოს განაჩენში.

მოსამართლე მარინა კიკნაძემ ბრალდებულს 2 ათასი ლარი ჯარიმის გადახდა დააკისრა. იგი სისხლის სამართლის კოდექსის 156-ე მუხლის შესაბამისად გასამართლდა, რაც გულისხმობს ადამიანის დევნას რელიგიურ მოღვაწეობასთან დაკავშირებით, ჩადენილს ძალადობით და ძალადობის მუქარით.

სურსათის ეროვნული სააგენტო და გაეროს სურსათისა და სოფლის მეურნეობის ორგანიზაცია (FAO) მომხმარებლებს მოუწოდებენ, არ შეიძინონ ხორცის, თევზისა და რძის პროდუქტები ისეთ ადგილებში, სადაც არ არის დაცული შენახვისა და რეალიზაციის პირობები.

ხორცისა და ხორცპროდუქტების შეძენისას ყურადღება მიაქციეთ შემდეგ გარემოებებს:

• ხორცი უნდა ინახებოდეს სუფთა, დახურულ მაცივარში, შესაბამისი ტემპერატურული რეჟიმის დაცვით, რომელიც განსაზღვრულია არაუმეტეს +6 გრადუსისა, ხოლო შენახვის ვადაა 48 საათი.

გასაყიდი ხორცის ეტიკეტზე დატანილი უნდა იყოს შემდეგი ინფორმაცია:

• მწარმოებლის დასახელება, სასაკლაოს აღიარების ან პირობითი აღიარების ნომერი (სადაც დაიკლა ცხოველი); ასევე დამზადების თარიღი და საათი;
• სურსათის დასახელება – მაგალითად, მსხვილფეხა საქონლის (ძროხის, კამეჩის) ხორცი გაცივებული;
• თუ ხორცი მიღებულია საქართველოში დაბადებული, გაზრდილი ცხოველისგან („წარმოშობა − საქართველო“), ეტიკეტზე მითითებული უნდა იყოს ცხოველის საიდენტიფიკაციო საყურე ნიშნის ნომერი;
• თუ ხორცი იმპორტირებულია, ეტიკეტზე მითითებული უნდა იყოს იმპორტიორი ქვეყნის დასახელება;
• ცხოველთა სასაკლაოზე ვეტერინარის ზედამხედველობით დაკლული ცხოველის ხორცზე უნდა იყოს დასმული ჯანმრთელობის ნიშანდება;
• სხვადასხვა წარმომავლობის ხორცი (საქონელი, ცხვარი, ღორი, თხა) მაცივარში განცალკევებით უნდა იყოს განთავსებული. ასევე, ცალ-ცალკე უნდა განთავსდეს სხვადასხვა ქვეყნიდან (ბრაზილია, უკრაინა და სხვა) იმპორტირებული ხორციც.
• ეტიკეტი გამოკრული უნდა იყოს თვალსაჩინო ადგილას იმ მაცივარზე, რომელშიც პროდუქტი ინახება.

„FAO და სურსათის ეროვნული სააგენტო ითვალისწინებენ იმ გარემოებას, რომ არაოფიციალურ სავაჭრო ადგილებში ხორცისა და ხორცპროდუქტების ფასი, შესაძლოა, მცირედით განსხვავდებოდეს სპეციალიზებულ მაღაზიებსა და ჰიპერმარკეტებში არსებული ფასებისაგან, თუმცა, მნიშვნელოვანია მოსახლეობას ახსოვდეს, რომ ვეტერინარული ზედამხედველობის გარეშე დაკლული და რეალიზებული ხორცისა და ცხოველური წარმოშობის პროდუქტებისაგან (რძე, ყველი, თევზი და ა.შ) ადამიანის დაავადების რისკი საკმაოდ მაღალია. ინფიცირებული ცხოველისაგან ადამიანი შეიძლება დაავადდეს და რისკი შეექმნას მის სიცოცხლესა და ჯანმრთელობას,“ – აღნიშნულია სურსათის ეროვნული სააგენტოს მიერ გავრცელებულ განცხადებაში.

განცხადებაში, ასევე, აღნიშნულია, რომ საეჭვო შემთხვევების გამოვლენისთანავე მომხმარებელი უნდა დაუკავშირდეს გარემოს დაცვისა და სოფლის მეურნეობის სამინისტროს ცხელ ხაზს – 15 01.

შინაგან საქმეთა სამინისტროს საგანგებო სიტუაციების მართვის სამსახურის განცხადებით ამ დროისთვის, მთელი საქართველოს მასშტაბით ტყის ქვედა საფარის ხანძრის 10 აქტიური კერაა. ყველა შემთხვევაში ცეცხლი უკიდია ეკალ-ბარდს, ბალახს და ფოთლებს.

„სომხეთ-საქართველოს საზღვარზე, სოფელ ირგანჩაისთან მთელი ღამის განმავლობაში უწყვეტ რეჟიმში მიმდინარეობდა ხანძრის ქრობის სამუშაოები. პროცესში ჩართულია 80-მდე მეხანძრე-მაშველი. ხანძარი ლოკალიზებულია.

მთავარი ფოტო: „ბათუმელების“ არქივიდან

სამი წლის ბავშვი, რომელიც გუშინ, 23 დეკემბერს ქობულეთი-ოზურგეთის გზაზე მომხდარი ავტოკატასტროფის შედეგად დაშავდა, კომატოზურ მდგომარეობაში, მართვით სუნთქვაზე იმყოფება. მისი მდგომარეობა მძიმეა.

„იმყოფება მართვით სუნთქვაზე, მკურნალობას განაგრძობს კრიტიკული მედიცინის დეპარტამენტში, არის კომატოზურ მდგომარეობაში, მიმდინარეობს მონიტორინგი და მკურნალობა. გუშინ მას ჩაუტარდა ნეიროქირურგიული ჩარევა, ბავშვს ასევე აღენიშნებოდა მუცლის დახურული ტრავმა და მოტეხილობები ქვედა კიდურების არეში,“ – უთხრეს „ბათუმელებს“ ბათუმის იაშვილის კლინიკის დედათა და ბავშვთა ცენტრში.

ავარია ქობულეთი-ოზურგეთის დამაკავშირებელ გზაზე 23 დეკემბერს მოხდა. ერთმანეთს მსუბუქი ავტომანქანა და ტრაილერი შეეჯახა, რის შედეგადაც დაიღუპა აჭარაში მცხოვრები ოჯახის სამი წევრი: დედა, მამა, მათი 10 წლის შვილი და ახლო ნათესავი. 3 წლის ბავშვი, რომელიც ამჟამად კლინიკაში იმყოფება, მანქანიდან ავარიის შედეგად გამოიტყორცნა და იგი გამვლელმა გადაიყვანა კლინიკაში.

ავარიის შედეგად დაშავებულია ტრაილერის მძღოლიც.

გამოძიება დაწყებულია სისხლის სამართლის კოდექსის 276-ე მუხლის მერვე ნაწილით – ტრანსპორტის მოძრაობის უსაფრთხოების ან ექსპლუატაციის წესის დარღვევა, რამაც ორი ან მეტი ადამიანის სიცოცხლის მოსპობა გამოიწვია.

დღეს, 23 დეკემბერს, ქობულეთი-ოზურგეთის გზაზე აჭარაში მცხოვრები ოჯახის სამი წევრი: დედა, მამა, მათი 10 წლის შვილი და ახლო ნათესავი დაიღუპა. ოჯახის კიდევ ერთი წევრი, 3 წლის პატარა ბიჭი ამჟამად ბათუმის იაშვილის კლინიკის დედათა და ბავშვთა ცენტრში იმყოფება და მას დღეს მეორე ოპერაცია უკეთდება.

„ბავშვს პოლიტრავმის ფონზე აღენიშნებოდა მუცლის ღრუს დახურული ტრავმა, შინაგანი სისხლდენით. ქობულეთში სასწრაფოდ შეიყვანეს საოპერაციოში, გაიხსნა მუცლის ღრუ, გაიკერა ელენთა, რომელიც იყო გახეთქილი, ნაწლავი, პანკრეასი და შედეგად შეჩერდა სისხლდენა. რადგან ბავშვს აღენიშნება თავის ქალის დაზიანება, ოპერაციიდან პირდაპირ კატასტროფის მედიცინის მანქანით გადმოყვანილია ბათუმში იაშვილის დედათა და ბავშვთა ცენტრში. ახლა მიმდინარეობს ნეიროქირირგიული ოპერაცია“ – გვითხრა ზაალ მიქელაძემ, აჭარის ჯანდაცვის მინისტრმა, რომელმაც თავად მოინახულა ავარიის შედეგად დაშავებული ბავშვი და მამაკაცი, ტრაილერის მძღოლი.

ავარია ქობულეთი-ოზურგეთის დამაკავშირებელ გზაზე დღეს მოხდა. ერთმანეთს მსუბუქი ავტომაქანა და ტრაილერი შეეჯახა.

გამოძიება დაწყებულია სისხლის სამართლის კოდექსის 276-ე მუხლის მერვე ნაწილით – ტრანსპორტის მოძრაობის უსაფრთხოების ან ექსპლუატაციის წესის დარღვევა, რამაც ორი ან მეტი ადამიანის სიცოცხლის მოსპობა გამოიწვია.

„ბათუმის წყლის“ ინფორმაციით, ავარიული დაზიანების გამო ღამის 21:00 საათამდე წყალმომარაგება შეუწყდა შემდეგ ქუჩებს:

• ფიროსმანის ქუჩა
• შარტავას ქუჩა
• ნურეთინ ჩარმიქლის ქუჩა
• შერიფ ხიმშიაშვილის ქუჩა
• რუსთაველის ქუჩა
• ზურაბ გორგილაძის ქუჩა
• ტბელ აბუსერიძის ქუჩა
• ალექსანდრე გრიბოედოვის ქუჩა
• ჯავახიშვილის ქუჩა
• ვახტანგ გორგასალის ქუჩა

„ბათუმის წყლის“ ინფორმაციით, წყალმომარაგების მიწოდების აღდგენის შემდეგ, შესაძლოა სარემონტო სამუშაოების გამო, წყალი იყოს მცირედით ამღვრეული, რაც გამოწვეულია მილზე არსებული ჯანმრთელობისათვის უსაფრთხო მინერალების ჩამორეცხვით.

ქობულეთში ყველაზე დიდი საწარმო რომ მანდარინს აღარ იღებს, ამის შესახებ „ბათუმელებს“ ქობულეთის ერთ-ერთმა მცხოვრებმა უთხრა. მოქალაქის თქმით, მას ახალსოფელში მდებარე საწარმოში – „ქართული მანდარინი“, უარი უთხრეს როგორც სტანდარტული, ასევე არასტადარტული მანდარინის მიღებაზე.

აჭარის სოფლის მეურნეობის სამინისტროს არ აქვს ინფორმაცია იმის შესახებ, რომ საწარმო მანდარინს აღარ იღებს.

„არასტანდარტული აღარ არის, ამოიწურა, სტანდარტულს კი იღებს ჩვეულებრივად,“ – გვითხრეს სამინისტროს პრესცენტრში.

„მიღება შეჩერებულია უკვე ორი დღეა, ჩვენ გეგმა უკვე შევასრულეთ და შევაჩერეთ, როგორც სტანდარტული, ისე არასტანდარტული მანდარინის მიღება,“ – ამბობს დავით კეკელიძე, შპს „ქართული მანდარინის“ წარმომადგენელი. მისივე განმარტებით, საწარმოში 2 ათასი ტონა არასტანდარტული, ხოლო 400 ტონაზე მეტი სტანდარტული მანდარინი მიიღეს.

ქობულეთში მცხოვრები ადამიანების თქმით, ასევე რიგი დგას რუსთაველის ქუჩაზე იმ საწარმოსთან, სადაც მხოლოდ არასტანდარტულ მანდარინს იბარებენ. რამდენიმე მოქალაქე ირწმუნება, რომ საწარმოში რიგის გარეშე მაშინ შეხვალ, თუკი ფულს – დაახლოებით 30 ლარს გადაიხდი.

აჭარის სოფლის მეურნეობის სამინისტროს პრესცენტრში ამ ინფორმაციასაც აბსურდი უწოდეს და თქვეს, რომ რიგი საწარმოსთან საერთოდ არ არის. „ბათუმელებს“ მოქალაქემ გამოუგზავნა დღეს, 23 დეკემბერს, გადაღებული ფოტო, სადაც ჩანს, რომ საწარმოსთან რიგია.

„ბათუმელებმა“ სცადა კომპანია GIAM Group-თან დაკავშირება. ეს კომპანია იბარებს ქობულეთში არასტანდარტულ მანდარინს, თუმცა საწარმოს დირექტორმა, რევაზ გოგიტიძემ, ჩვენს სატელეფონო ზარებს არ უპასუხა.

—————————————————-

აჭარის სოფლის მეურნეობის სამინისტროს ოფიციალური მონაცემებით, უკვე ექსპორტირებულია [რუსეთი, უკრაინა, სომხეთი, ყაზახეთი, აზეირბაიჯანი, ლიეტუვა, ყატარი, სლოვენია, სინგაპური, ბელორუსია, მოლდოვა] 18 650 ტონა სტანდარტული მანდარინი, ასევე მიღებული და გადამუშავებულია 4300 ტონა არასტანდარტული მანდარინი.

წელს მანდარინის მოსავლის საპროგნოზო მაჩვენებელი 55 ათას ტონამდეა.

„აჭარის ტელევიზიის“ დირექტორის მოადგილის, ნათია ზოიძის გამოკითხვა აჭარის პოლიციის მთავარ სამმართველოში დაახლოებით 4 საათს გაგრძელდა. ნათია ზოიძე გიორგი კოხრეიძის არჩევამდე დირექტორის მოვალეობას ასრულებდა და აცხადებს, რომ ახალი დირექტორი მას დევნის.

გამოძიების დაწყების მოთხოვნით ნათია ზოიძემ პროკურატურას 14 დეკემბერს მიმართა. მის ინტერესებს „ახალგაზრდა იურისტთა ასოციაცია“ იცავს.

საია-ს იურისტი, პაატა დიასამიძე, რომელიც დღეს, 23 დეკემბერს, ნათია ზოიძის გამოკითხვის პროცესს ესწრებოდა, განმარტავს, რომ დაწყებულია მოკვლევა სისხლის სამართლის კოდექსის 168-ე მუხლის შესაბამისად, რაც „შრომის თავისუფლების ხელყოფას“ გულისხმობს, გამოძიება კი, ჯერ არ დაწყებულა.  

„ჩვენ წარვადგინეთ განცხადება ტელევიზიაში მიმდინარე მოვლენებთან დაკავშირებით, მათ შორის, დირექტორის იმ განცხადებაზე, რომ ნათია ზოიძესთან გაფორმებული ხელშეკრულება წინააღმდეგობაში მოდის კანონთან. მივიჩნევთ, რომ დირექტორი ამით ერევა შრომით საქმიანობაში. ასევე დირექტორი საუბრობს ბეჟან გობაძის მიერ მოთხოვილი ინფორმაციის გაცემის უფლება ჰქონდა თუ არა ნათია ზოიძეს და ამბობს იმასაც, რომ მისთვის ცნობილია კონკრეტული სატელეფონო საუბრების შესახებ… ჩვენ მივაწვდით გამოძიებას წერილობით მტკიცებულებებსაც. ვფქირობთ, რომ იკვეთება 168-ე მუხლით გათვალისწინებული დანაშაულის ნიშნები,“ – გვითხრა პაატა დიასამიძემ.

საზოგადოებრივი მაუწყებლის „აჭარის ტელევიზიისა და რადიოს“ ახალმა დირექტორმა, გიორგი კოხრეიძემ, ამ თანამდებობაზე არჩევისთანავე ნათია ზოიძეს უთხრა, რომ ის სარედაქციო პოლიტიკას უნდა ჩამოშორდეს. ნათია ზოიძესთან წინა დირექტორის – ნათია კაპანაძის გაფორმებული ხელშეკრულება კი, მისგან სწორედ სარედაქციო პოლიტიკის მართვას ითვალისწინებს, რამაც ტელევიზიაში სარედაქციო დამოუკიდებლობა უნდა უზრუნველყოს.

„ბათუმელებთან“ ინტერვიუს დროს გიორგი კოხრეიძემ ვერ დაგვისახელა კონკრტული სამართლებრივი ნორმა, რომელსაც ეწინააღმდეგება ნათია ზოიძესთან გაფორმებული ხელშეკრულება.

გიორგი კოხრეიძე ასევე აცხადებს, რომ მან იცის ნათია ზოიძის სატელეფონო კომუნიკაციის ჩანაწერების შესახებ, რომელსაც გაასაჯაროებს, თუ მისი პირობები არ იქნება მიღებული: „მაქვს მე ეჭვები და მაჩვენებს დრო, დაკვირვება, ვისთან ჰქონდა, როგორ ჰქონდა კავშირი“ .

საია-ს იურისტი, პაატა დიასამიძე მიიჩნევს, რომ გამოძიება უნდა დაინტერესდეს, საიდან ჰქონდა წვდომა გიორგი კოხრეიძეს სხვა პირის სატელეფონო საუბრებზე.

კიდევ ერთი საკითხი, რითაც გამოძიება შესაძლოა დაინტერესდეს, ტელევიზიის არქივის მასალებია. გიორგი კოხრეიძე ამბობს, რომ არქივის მასალა უსასყიდლოდ გაიტანეს იმ დროს, როცა ტელევიზიის დირექტორის მოვალეობას ნათია ზოიძე ასრულებდა.

საია-ს იურისტის თქმით, გამომძიებლებს მოკვლევის ფარგლებში ამ პროცესის მონაწილე სხვა ადამიანების, მათ შორის, ტელევიზიის დირექტორის, გიორგი კოხრეიძის პოზიციები ჯერ არ მოუსმენიათ.

დღეს, 23 დეკემბერს, აჭარის ჯანდაცვის სამინისტრომ დააჯილდოვა ექიმები, რომელთაც წელს პროფესიული საქმიანობით გამოიჩინეს თავი და ასევე, მედიკოსები, რომლებიც მრავალი წელია მუშაობენ რეგიონში.

მადლობის სიგელი გადაეცათ რესპუბლიკური საავადმყოფოს ქირურგებს: ვაჟა თედორაძეს, ეთერ იფშირაძეს, ინგა კონცელიძესა და ანესთეზიოლოგს – რუსუდან ფარტენაძეს,  რომელთაც 18 დეკემბერს ბათუმში დაჭრილი პატრულ-ინსპექტორის გადარჩენა შეძლეს.

ჯილდო გადაეცა 90 წლის ექიმს, ირა ვასაძეს, რომელიც ბათუმის ყოფილ N1 საავადმყოფოს ქირურგიულ განყოფილებაში 50 წლის განმავლობაში მუშაობდა.

კრიზისის დროს გამოჩენილი მაღალი პროფესიონალიზმისთვის ჯილდო გადაეცა ქობულეთის მუნიციპალიტეტის სასწრაფო სამედიცინო დახმარების ექიმს, ანა ვერულიძეს, რომელმაც ბინაზე ორი მშობიარობა მიიღო, ერთ შემთხვევაში დაიბადა ტყუპი ბიჭი, მეორე შემთხვევაში დედას მეათე შვილი, ვაჟი გაუჩნდა.

სიგელი გადაეცა 83 წლის ექთანს, ნაზი ჩაზმავას, რომელიც 43 წელი მუშაობდა ბათუმის სასწრაფოში მთავარ ექთნად.

აჭარის მოსახლეობის სამედიცინო მომსახურების სფეროში შეტანილი წვლილისათვის დაჯილდოვდა მამუკა შარაშიძე, ბათუმის რეფერალური საავადმყოფოს ორთოპედ-ტრავმატოლოგი. მან რეგიონში პირველმა დამოუკიდებლად ჩაატარა მენჯ-ბარძაყის პროთეზირება და მუხლის ართროსკოპია.

კურორტზე დამსვენებლებისა და მოიალაღეების მიმართ გამოჩენილი ყურადღებისათვის დაჯილდოვდა გულვარდი (გულერი) დეკანაძე, კურორტ ბეშუმის მედდა, რომელთან დაკავშირებითაც სამინისტრომ ხულოს მუნიციპალიტეტიდან რამდენჯერმე მიიღო წერილი, 100-მდე მოქალაქის ხელწერით.

ჯილდო გადაეცა „მედინას“ ანესთეზია-რეანიმაციის დეპარტამენტის ხელმძღვანელს, რეანიმატოლოგ მზია ბერიძეს, აჭარის მოსახლეობის სამედიცინო მომსახურების სფეროში შეტანილი წვლილისათვის.

აჭარის ჯანდაცვის სამინისტრომ დააჯილდოვა, იაშვილის სახელობის დედათა და ბავშვთა ჯანმრთელობის ცენტრის ექიმი რეანიმატოლოგი დარეჯან ბერიძე, რომელმაც, სამინისტროს განცხადებით, წელს გადამწყვეტი როლი შეასრულა 9 წლის პაციენტის გადარჩენაში, კერძოდ, მან შეძლო დაავადების დროული დიაგნოსტიკა, რომელიც აღნიშნულ ასაკში უიშვიათესია. მის მიერ განხორციელებულმა დროულმა ჩარევამ და გადაუდებელი რეანიმაციული ღონისძიებების თანმიმდევრულად ჩატარებამ განაპირობა 9 წლის ბავშვის გადარჩენა.

სიგელი გადაეცა საზღვაო ჰოსპიტალის ანესთეზიოლოგ-რეანიმატოლოგ დავით ბერიძეს აჭარაში ჯანმრთელობის დაცვის სფეროში შეტანილი წვლილისათვის. პროფესიული საქმიანობის განმავლობაში დავით ბერიძეს ჩატარებული აქვს 20 000-ზე მეტი წარმატებული ანესთეზია, მათ შორის დაახლოებით 7000 – სპინალური.

ჯილდო გადაეცა ბათუმის სასწრაფო სამედიცინო დახმარების ექიმს, ნინო გურგენიძეს, რომელმაც ორი ადამიანის სიცოცხლე გადაარჩინა.  პირველ შემთხვევაში ექიმმა 50 წლის მამაკაცი გადაარჩინა, რომელსაც გული ჰქონდა გაჩერებული. ნინო გურგენიძის მიერ ჩატარებული იქნა პირველადი რეანიმაციული ღონისძიებები და პაციენტი გადაყვანილი იქნა  ჰოსპიტალში, რომელიც გადარჩა. მეორე შემთხვევში კი ექიმმა მოხუც ქალს აღმოუჩინა დახმარება და შეუნარჩუნა სიცოცხლე.

ქედის მოსახლეობის სამედიცინო მომსახურების სფეროში შეტანილი წვლილისათვის სიგელები გადაეცათ ნატო ბეჟანიძესა და მზია მახარაძეს. ნატო ბეჟანიძე შუახევის მუნიციპალიტეტის საავადმყოფოს რეანიმატოლოგია, ხოლო მზია მახარაძე ქედის მუნიციპალიტეტის საავადმყოფოს ექიმი-პედიატრი, ნეონატოლოგი და პარალელურად მუშაობს ქედის თემის ამბულატორიაში ოჯახის ექიმად.

ჯილდო გადაეცა კლინიკა „მედცენტრის“ უროლოგს, როსტომ ხალვაშს უროლოგიაში ლაპარასკოპიული და ენდოსკოპიური თანამედროვე მეთოდების გამოყენებისათვის.

კრიზისულ სიტუაციაში გამოჩენილი პროფესიონალიზმისათვის, ჯილდო გადაეცა  „მედალფას“ ბონის კლინიკის რეანიმატოლოგ პაატა გაგუას, რომელმაც მოქალაქე გიორგი აბაშიძე გადაარჩინა. პაციენტი ზღვაში დახრჩობას გადაურჩა და კლინიკაში უმძიმეს მდგომარეობაში მიიყვანეს. სიგელი ექიმ პაატა გაგუას იმ პაციენტმა გადასცა, რომელიც მან გადაარჩინა.

აჭარის მოსახლეობის სამედიცინო მომსახურების სფეროში შეტანილი წვლილისათვის ასევე სიგელი გადაეცა ინფექციური პათოლოგიის, შიდსისა და ტუბერკულოზის რეგიონული ცენტრის ექიმ-რენტგენოლოგს  ჟიგული კაკალიაშვილსა და ბათუმის სამედიცინო ცენტრის ექიმ – ფსიქიატრს მარინა ჭელიძეს.

სამინისტრომ დააჯილდოვა ბათუმის საერთაშორისო ჰოსპიტალის ინტერვენციული კარდიოლოგი ირაკლი ხვიჩია. მიმდინარე წლის აპრილში ბათუმში ოფიციალური ვიზიტით იმყოფებოდა იორდანიის სამეფოს დელეგაცია. ვიზიტის ბოლო დღეს დელეგაციის ერთ-ერთი წევრი, იორდანიელი დიპლომატი შეუძლოდ გახდა და გულის შეტევის დიაგნოზით ბათუმის საერთაშორისო ჰოსპიტალში გადაიყვანეს. სამინისტროს ინფორმაციით, კლინიკის ექიმების, განსაკუთრებით კი, ირაკლი ხვიჩიას მიერ გამოჩენილი მაღალი პროფესიონალიზმის წყალობით კრიტიკულ მდგომარეობაში მყოფი დიპლომატი გადარჩა და რამდენიმე დღეში სამშობლოში დაბრუნება. აღნიშნული შემთხვევის გამო აჭარის ჯანმრთელობისა და სოციალური დაცვის სამინისტრომ ამერიკის შეერთებული შტატების საელჩოსგან მადლობის წერილი მიიღო.

ბათუმის მოსახლეობის სამედიცინო მომსახურების სფეროში შეტანილი წვლილისათვის სიგელი გადაეცა ბათუმის N1 პოლიკლინიკის ნევროლოგ მარინა ფირცხალაიშვილს.

სამინისტრომ დააჯილდოვა ქობულეთის რეგიონული საავადმყოფოს მეან-გინეკოლოგი გურამ ჩანტლაძე, რომელსაც, როგორც დაჯილდოვების ცერემონიაზე ითქვა, უამრავი რთული შემთხვევა ჰქონია სამედიცინო პრაქტიკაში, რომელიც წარმატებით დასრულდა.

სიგელი გადაეცა ზურაბ ორაგველიძეს, ბათუმის რესპუბლიკური კლინიკური საავადმყოფოს ექიმ რეანიმატოლოგს, აჭარის მოსახლეობის სამედიცინო მომსახურების სფეროში შეტანილი წვლილისათვის.

სამინისტრომ დააჯილდოვა როლანდ დიდმანიძე, ხელვაჩაურის სამედიცინო ცენტრის დირექტორი. მას 2020 წლის პირველ იანვარს 85 წელი შეუსრულდება.

სამინისტრომ დაჯილდოებულ ექიმებს სიგელი და ფასიანი საჩუქრები გადასცა.

____________

მთავარ ფოტოზე: ექიმ პაატა გაგუას ყოფილმა პაციენტმა გადასცა ჯილდო. ფოტო: აჭარის ჯანდაცვის სამინისტრო

„იმედი მაქვს, რომ ბრალდებულები თავისუფლებაში, თუ პატიმრობაში მყოფი, ბედნიერი შეხვდებიან ოჯახებში ახალ წელს,“ – ასე დაასრულა თავისი დასკვნითი სიტყვა დღევანდელ პროცესზე ადვოკატმა სიმონ ასათიანმა. იგი „მერიის მაღალჩინოსნების საქმეში“ ბათუმის ყოფილი ვიცე-მერის, თენგიზ პეტრიძის და კეთილმოწყობის სამსახურის ყოფილი უფროსის, ვლადიმერ ხინთიბიძის ინტერესებს იცავს.

ამ საქმეზე მოსამართლე დავით მამისეიშვილმა უკვე მოისმინა პროკურორის და ადვოკატების დასკვნითი სიტყვები. კიდევ ერთ სხდომაზე მხარეებს შორის პაექრობა გაიმართება, სადაც პროკურორები და ადვოკატები, ასევე მერიის ყოფილი მაღალჩინოსნები, ერთმანეთს რეპლიკებით მიმართავენ. სავარაუდოდ, ახალ წლამდე სასამართლო „მერიის ყოფილი მაღალჩინოსნების საქმეზე“ საბოლოო გადაწყვეტილებას მიიღებს.

დღეს, 23 დეკემბერს, მოსამართლემ თენგიზ პეტრიძის, ვლადიმერ ხინთიბიძისა და მათი ადვოკატის პოზიციები მოისმინა.

„ბუნენაში არ არსებობს 100-პროცენტიანი დაზღვევა არაფრის,“ – მიმართა მოსამართლეს ადვოკატმა სიმონ ასათიანმა. მან ხაზი გაუსვა იმას, რომ მისი დაცვის ქვეშ მყოფებმა ყველაფერი გააკეთეს იმისთვის, რომ დაზღვეული ყოფილიყო რისკები „იაფი სახლის“ პროექტზე.

„ასე შესაძლოა ნებისმიერი სატენდერო კომისიის წევრს წაუყენო ბრალი,“ – აღნიშნა ბათუმის ყოფილმა ვიცე-მერმა, თენგიზ პეტრიძემ. მან სხვა პროექტები გაიხსენა, მაგალითად, ანბანის კოშკის მიმდებარე ტერიტორიის კეთილმოწყობა ან „ჭაჭის კოშკის“ მშენებლობა.

„ამ შემთხვევებშიც ანალოგიური მიდგომები გვქონდა სატენდერო კომისიას, მაგრამ აუდიტს ან შესყიდვების სააგენტოს შენიშვნაც კი არ ჰქონია,“ – დასძინა თენგიზ პეტრიძემ.

„არ გვქონდა ჩვენ დისკვალიფიკაციის უფლება, სურვილის შემთხვევაშიც კი,“ – მიმართა მან მოსამართლეს.

ბათუმის ყოფილმა ვიცე-მერმა ასევე თქვა, რომ ბაზრის შესწავლა „არსებული მეთოდოლოგიით“ მოხდა და ბრალდების პოზიციას არც ამ ნაწილში ეთანხმება.

აუდიტის სამსახურის მუშაობაზე გაამახვილა ყურადღება ადვოკატმა სიმონ ასათიანმა.

„არავინ იმჩნევს აუდიტის დასკვნის იმ ჩანაწერს, სადაც აღნიშნულია, რომ ის წარმოადგენს მოსაზრებას… აუდიტი ამბობს, რომ მის მიერ მოპოვებული მტკიცებულებები შეაფასა თავისი ინტერპრეტაციით. კატეგორიულად რაღაცის თქმა არ შეუძლია აუდიტს,“ – აღნიშნა სიმონ ასათიანმა.

—

მერიის მაღალჩინოსნები „იაფი სახლის“ პროექტის საქმეზე 2019 წლის 30 მაისს დააკავეს.

დაკავებულებს შორის არიან: ბათუმის ყოფილი მერი გიორგი ერმაკოვი, აჭარის განათლებისა და კულტურის მინისტრის მოადგილე ბაგრატ მანველიძე [ის სადავო ტენდერის ჩატარების დროს ბათუმის ვიცე-მერი იყო და სატენდერო კომისიის თავმჯდომარე]; აჭარის ფინანსთა და ეკონომიკის მინისტრის მოადგილე არჩილ ვანაძე [ბათუმის მერიის საფინანსო სამსახურს ხელმძღვანელობდა], ბათუმის ვიცე-მერი თენგიზ პეტრიძე, მერიის მუნიციპალური სერვისების, ქონებისა მართვის სამსახურის უფროსი ეგარსლან ლომაძე, საქალაქო ინფრასტრუქტურისა და კეთილმოწყობის სამსახურის უფროსის მოადგილე ვლადიმერ ხინთიბიძე, მერიის შესყიდვის სამსახურის უფროსი ბექა ხალვაში.  

პროკურატურის ინფორმაციით, იაფი სახლის“ ტენდერის შედეგად 1 მილიონ 370 ათასი ლარი გაიფლანგა ბიუჯეტიდან.

ბრალდებულებს გამოძიება სისხლის სამართლის კოდექსის 182-ე მუხლის მეორე და მესამე ნაწილები, ასევე 332-ე მუხლის პირველი ნაწილით ედავება.

182-ე მუხლი მითვისებას, ან გაფლანგვას გულისხმობს. პროკურატურა მაღალჩინოსნებს „მძიმე შედეგის“ დადგომას ედავება, რაც 7-დან 11 წლამდე თავისუფლების აღკვეთას ითვალისწინებს.

332-ე მუხლი კი სამსახურებრივი უფლებამოსილების ბოროტად გამოყენებისთვის ითვალისწინებს თავისუფლების აღკვეთას სამი წლის ვადით.

ერთი წლით თავისუფლების აღკვეთა გურიაში, ლანჩხუთში მცხოვრებ ქალს პირადი ინფორმაციის უკანონოდ მოპოვებისა და გავრცელებისთვის მიუსაჯეს. გადაწყვეტილება ოზურგეთის რაიონულ სასამართლოში მოსამართლე ბიძინა სტურუამ მიიღო.

საქმის მასალების მიხედვით, ქალმა თავისი მულისა და მისი მეგობარი კაცის საწოლში გადაღებული ფოტო ჯერ უკანონოდ მოიპოვა, ხოლო შემდეგ „ფეისბუქში“ საკუთარ გვერდზე ატვირთა, „რითაც ნ.-ს და კ.-ს სხვების თვალში მორალური რეპუტაციის შელახვით მიაყენა მნიშვნელოვანი ზიანი,“ – აღნიშნულია განაჩენში.

მოსამართლემ ამ საქმეზე მხოლოდ ბრალდებულის ჩვენება მოისმინა, რომელმაც თავი დამნაშავედ ცნო და თქვა, რომ „ინანიებს ჩადენილ ქმედებას“. მას სადავოდ არ გაუხდია არც ერთი მტკიცებულება, რომელიც ამ საქმეზე პროკურორმა სასამართლოში წარმოადგინა. შესაბამისად, მოსამართლეს სხვების პოზიციები, მათ შორის, დაზარალებულების, არ მოუსმენია.

იმის გათვალისწინებით, რომ ბრალდებული ნასამართლევი არ ყოფილა და ჩადენილი დანაშაული მოინანია, მოსამართლემ მას სასჯელი პირობით ჩაუთვალა, ხოლო გამოსაცდელ ვადად ორი წელი დაუდგინა.

გარემოს დაცვისა და სოფლის მეურნეობის სამინისტროს ცნობით, საქართველოდან ექსპორტირებულმა ხურმამ და კარალიოკმა 7.3 ათასი ტონა შეადგინა და დაფიქსირდა 86%-იანი ზრდა.

ასევე, სამინსიტროს ცნობით, 2019 წლის აგვისტო-ნოემბრის პერიოდში, საქართველოდან მსოფლიოს 37 ქვეყანაში ექსპორტირებულია 8.3 ათასი ტონა თხილი, რაც 90%-ით აღემატება წინა წლის ანალოგიური პერიოდის მაჩვენებელს. გასულ წლებში თხილის მოსავალი საქართველოში დაზიანებული იყო, რამაც დიდი ზარალი მიაყენა თხილის ბიზნესს ქვეყანაში.

რაც შეეხება ციტრუსს, სამინისტროს ცნობით, 19 დეკემბრის მონაცემებით, მანდარინის ექსპორტმა 21,333 ტონა შეადგინა და საექსპორტო ქვეყნებს ოთხი ახალი ბაზარი დაემატა. წელს პირველად ექსპორტი განხორცილდა: ლიეტუვაში (120,9ტ); სინგაპურში (0,1ტ); კატარსა (0,4ტ) და სლოვენიაში (158,2ტ).

სეზონური გრიპის ვაქცინის გაკეთება მაქსიმუმ დეკემბრის თვის ბოლო რიცხვებამდეა რეკომენდებული. აცრის მსურველებს კიდევ ათი დღე რჩებათ, თუმცა სააფთიაქო ქსელებსა და კლინიკებში ვაქცინა აღარ აქვთ. წელს გრიპის ვაქცინაზე მოთხოვნა საკმაოდ მაღალი იყო და დეფიციტად იქცა იმ მოქალაქეებისთვის, ვინც რისკჯგუფში არ იყო და ჯანდაცვის სამინისტროს მიერ შეძენილი უფასო ვაქცინა არ ერგებოდა.

დაავადებათა კონტროლის ეროვნული ცენტრის წარმომადგენელი ხათუნა ზახაშვილი ამბობს, რომ მისი ინფორმაციით, შარშან, გრიპის ვაქცინის ბოლო, 2000 დოზა კომერციულ სექტორს „ჩაუწვა“ და ვერ გაყიდეს, წელს კი სააფთიაქო ქსელები და კლინიკები ვაქცინის ჭარბი რაოდენობით შემოტანას მოერიდნენ. მოსახლეობის ნდობა კი ამ ერთი წლის განმავლობაში გრიპის ვაქცინისადმი გაიზარდა, გაიზარდა მოთხოვნაც და შესაბამისად გაჩნდა დეფიციტი.

„ავერსის“ პრესსამსახურის ხელმძღვანელი ლალი ბრეგვაძე უარყოფს დაავადებათა კონტროლის ეროვნული ცენტრის ინფორმაციას იმის შესახებ, რომ შარშან კომერციულმა სექტორმა ვაქცინები სრულად ვერ გაყიდა, რის გამოც წელს აღარ შეუკვეთა გრიპის ვაქცინის საჭირო რაოდენობა.

„მცდარი აზრია, რომ თითქოს ვერ გავყიდეთ შარშან გრიპის ვაქცინა და წელს ამიტომ არ შევუკვეთეთ მომმარაგებელს საჭირო რაოდენობა. ჩვენ გვიკვეთავენ სხვადასხვა კლინიკები და აფთიაქები ვაქცინას, შესაბამისად შემომტანს ვუკვეთავთ რაოდენობას, რასაც გვთხოვენ“ – ამბობს „ავერსის“ პრესსამსახურის ხელმძღვანელი.

გრიპის ფრანგული ვაქცინის დისტრიბუტორები საქართველოში „ავერსი“ და „ჯიპისია“. სწორედ ისინი უკვეთავენ გრიპის ვაქცინას ფრანგულ კომპანია „სანოფი პასტერს“.

კლინიკა „ავერსის“ცხელ ხაზზე გვითხრეს, რომ მათი კომერციული მარაგი ამოწურულია.

„სახელმწიფო ეპიდემიოლოგთანაც გადავამოწმეთ ახლახანს და სახელწიფო პროგრამით რაც გვქონდა რისკჯგუფებისთვის, ეს მარაგიც ამოწურულია. გვქონდა ჰოლანდიური – სამკომპონენტიანი და ფრანგული ოთხკომპონენტიანი ვაქცინა. ფრანგული ვაქცინა ძალიან მცირე რაოდენობით იყო მოწოდებული „სანოფი პასტერის“ – მომწოდებლის მიერ.

არ ვიცით, რატომ შემოიტანა „სანოფის“ ფირმამ შეზღუდული რაოდენობით ვაქცინა. დიდი მომართვიანობის გამო ჩვენთან მარაგი მალე ამოიწურა“, – გვითხრეს კლინიკა „ავერსის“ ცხელ ხაზზე.

„ბათუმელები“ კომპანია „სანოფის“ წარმომადგენელს, მაკა ლაბახუას დაუკავშირდა, რომელმაც წერილობით გვიპასუხა, რომ კომპანიისგან ვაქცინის რაოდენობის შეზღუდვას მიწოდებისას ადგილი არ ჰქონია და მათ ზუსტად იმდენი დოზა ვაქცინა მიაწოდეს დისტრიბუტორებს, რამდენიც შეკვეთილი ჰქონდათ.

„სააფთიაქო ქსელებისთვის პროდუქციის მიწოდება ხდება დისტრიბუტორების საშუალებით, მოთხოვნილი რაოდენობის შესაბამისად, სახელმწიფო პროგრამებისთვის კი – სახელმწიფო ტენდერის ხელშეკრულების შესაბამისად.

2019 წელს სახელმწიფო პროგრამისთვის კომპანიამ ჩამოიტანა 100 000 დოზა გრიპის ვაქცინა, რაც მნიშვნელოვნად აღემატება წინა წლის მონაცემებს“ – გვწერს „სანოფი პასტერის“ წარმომადგენელი.

„ბათუმელებმა” საქართველოს ჯანდაცვის სამინსიტროს ჯანდაცვის პროგრამების სამმართველოს უფროსს, ეკატერინე ადამიას ჰკითხა კომერციულ სააფთიაქო ქსელებსა და კლინიკებში გრიპის ვაქცინის დეფიციტურობის შესახებ.

• ჯანდაცვის სამინისტროს ოფიციალურად გაცხადებული აქვს, რომ გრიპის ვაქცინაცია სასურველია ჩაუტარდეს 6 თვეს გადაცილებულ ყველა პირს. მედიის საშუალებით სამინისტრო მოსახლეობას მოუწოდებს აიცრან გრიპზე, მაშინ, როცა ვაქცინა უკვე აღარაა ხელმისაწვდომი. თუ დაინტერესდა სამინისტრო რატომ შეიქმნა ეს დეფიციტი?

ჯანდაცვის სამინისტროში დაავადებათა კონტროლის ცენტრთან კომუნიკაციით  იწერება სეზონური გრიპისთვის მზადყოფნის რეაგირების გეგმა, რაც მოიცავს ყველა ღონისძიებას, რაც გრიპის დროს უნდა იყოს გათვალისწინებული და ერთ-ერთი არის ვაქცინაცია. როგორც ყველა სხვა ქვეყანაში, საქართველოშიც ჯანდაცვის სამინისტრო აკეთებს აქცენტს მიზნობრივ ჯგუფებზე, ვინც მეტად მოწყვლადია გრიპის ვირუსის მიმართ. ჩვენი წლევანდელი მიზნობრივი ჯგუფის ჩამონათვალი საკმაოდ ვრცელია შარშანდელთან შედარებით – მათ ვაქცინას უფასოდ ვაწვდით და მარაგი ამ ჯგუფებისთვის ახლაც გვაქვს. არცერთ ქვეყანაში მთელი მოსახლეობის, ჩვენს შემთხვევაში 3 მილიონი ადამიანისთვის, სახელმწიფო უფასო ვაქცინაციას ვერ უზრუნველყოფს. აქ არის კომერციულ აფთიაქებში შექმნილი დეფიციტის თემა და ჩვენ გვაქვს მათთან მუდმივი კავშირი.

როგორც მე ვიცი კერძო სექტორს ვაქცინის გარკვეული რაოდენობა „ჩაუწვა” და წელს აღარ ელოდნენ, თუ მოთხოვნა ამდენად იქნებოდა გაზრდილი. ზუსტად ვერ გეტყვით შარშან და წელს რამდენი დოზა ვაქცინა შემოიტანა კერძო სექტორმა, ბაზრის კვლევა არ მიწარმოებია.

ერთი მხრივ ცუდია, რომ დეფიციტი შეიქმნა, მაგრამ კარგია, რომ ამაღლდა მოსახლეობის ცნობიერების დონე და ნდობა ვაქცინისადმი. წინა ზამთრის მოცემულობის მიხედვით ახლანდელი ზამთრის პროგნოზი ვერ გათვალეს სააფთიაქო ქსელებმა, რადგან არავინ ელოდა ვაქცინაზე გაორმაგებულ მოთხოვნას. ჩვენ სახელმწიფო პროგრამით გაორმაგებული რაოდენობა შევიძინეთ, რადგან გაფართოვდა გრიპის მიმართ მოწყვლადი რისკ-ჯგუფების რაოდენობა. ჩემი აზრით, დეფიციტის მიზეზი იყო კომერციული სექტორის მხრიდან მოთხოვნის მომატების ვერგათვლა. მიუხედავად იმისა, რომ დეფიციტი შეიქმნა, მიხარია, რომ გაიზარდა ადამიანების მოთხოვნა ვაქცინის მიმართ, წელს მეტი ადამიანი აიცრა ვიდრე შარშან – ეს ნიშნავს, რომ გრიპის ვირუსს შარშანდელივით აქტიურად გავრცელების საშუალება აღარ ექნება.

• რა ღონისძიებებს მიმართავს ჯანდაცვის სამინისტრო აფთიაქებში გრიპის ვაქცინის დეფიციტურობის თავიდან ასარიდებლად სამომავლოდ?

ისე გამოვიდა, რომ ვერ ვეწევით მიწოდებით იმ მოთხოვნას, რაც გრიპის ვაქცინაზე გაჩნდა. ჩვენი თხოვნა და რეკომენდაცია მომდევნო წელს კერძო სააფთიაქო სექტორებისადმი იქნება, რომ საკმარისი რაოდენობით იყოს შემოტანილი ვაქცინა, უნდა დაკმაყოფილდეს ყველა მსურველის მოთხოვნა და ასეთი სურათი არ უნდა შეიქმნას. ოღონდ ძალდატანებით ჩვენ ვერ დავაძალებთ კერძო სექტორს რა რამდენი შემოიტანოს. ჩვენი რეკომენდაცია და თხოვნაც იყო კერძო სექტორისადმი, დაეჩქარებინათ დროულად შემოტანა, მაგრამ რაოდენობა მაინც არასაკმარისი აღმოჩნდა. შემდეგ წელს ამას გავითვალისწინებთ, რომ რისკ-ჯგუფებში ვინც არ არის და უფასო ვაქცინა არ ერგებათ, ისინი სრულად იყვნენ დაკმაყოფილებულები.

• ირღვევა თუ არა ჩემი როგორც მოქალაქის ფუნდამენტური, ჯანმრთელობისა და მისი დაცვის უფლება, როცა რისკჯგუფში არ შევდივარ, გრიპის ვაქცინა უფასოდ არ მერგება და მსურს მისი საცალოდ ყიდვა, თუმცა ვერსად ვყიდულობ?  ვინ არის ამ უფლების დაცვაზე პასუხისმგებელი?

ჩვენ, სახელმწიფო სექტორმა რისკ-ჯგუფებისთვის საკმარისად შევუკვეთეთ ვაქცინა და ამის დეფიციტი მათთვის არ არის, მაგრამ წელს ასე მოხდა, რომ კერძო სექტორმა ვერ გათვალა მოთხოვნა თუ ასე გაიზრდებოდა, ცხადია მომავალი წელი ამ მხრივ უკეთაა დასაგეგმი.

რაც ეხება გრიპისთვის მზადყოფნას, ჩვენ გვაქვს საკმარისი რაოდენობით მომარაგებული „ტამიფლუ“, ვიცით როგორ უნდა მოვიქცეთ, რომ გრიპით დაავადების შემთხვევაში ჩვენს მოქალაქეებს როგორ დავეხმაროთ და მგონია რომ ამ სეზონს როგორღაც გადავლახავთ.

• გრიპის საწინააღმდეგო პრეპარატი ტამიფლუ, მართალია, ბოლოს, ვირუსის გააქტიურებისას უფასოდ გაიცემოდა, მაგრამ იქამდე საკმაოდ ძვირი ღირდა. არსებობს აზრი მოსახლეობაში, რომ წელს ვაქცინის დეფიციტი სპეციალურად შეიქმნა გრიპის ძვირადღირებული წამლების სარეალიზაციოდ. რას ფიქრობთ ამაზე?

ვერანაირად ვერ დავეთანხმები ამ აზრს და დანაშაულია, ეს რომ ვინმემ სპეციალურად გააკეთოს. გარდა ამისა წელს ვაქცინის ფასი თითქმის 60 ლარამდე იყო, კომერციულ სექტორს მისი შეძენა არ გასჭირვებია. პირობითად რომ ვთქვათ, კომერციულ სექტორს შეუძლია ვაქცინას დაადოს მაღალი ფასი და ამით ნახოს მოგება და არა გრიპის წამლებისგან. ვერაფრით ვიტყვი, რომ ამას აკეთებს ვინმე,  ეს სწორი არ არის.

მინდა მოვუწოდო კომერციულ სექტორს, აფთიაქებს, უფრო მომზადებული შეხვდნენ მომავალ წელს ვაქცინების მიწოდების მხრივ. ტექნიკურადაც რთულია ვაქცინების მოწოდების პროცესი, რადგან დროში იწელება თუ თავიდანვე არ გაკეთდა დიდი შეკვეთა. მერე  მომწოდებელი ვეღარ ასწრებს მოწოდებას, ვფიქრობ დაგეგმვის პროცესია უფრო ყურადღებით გასათვლელი. თუ ჩვენი მოქალაქეებიც ვაქცინის დროულად, ადრეულ შემოდგომაზე შეკვეთის კულტურას გამოიმუშავებენ, ფარმაცევტებსაც ექნებათ იმედი, რომ რეალიზაციას მოახდენს იმ რაოდენობის რამდენსაც შემოიტანს მე არა მგონია, რომ მერე რამე პრობლემა შეიქმნას, პირიქით მათთვის ხელსაყრელია, რომ გაყიდონ ვაქცინა და ამისგან მოგებაც მიიღონ.

ამავე თემაზე: