Batumelebi | 200 „ქოლგა“ ბათუმის მთავარ საახალწლო ნაძვის ხეზე 200 „ქოლგა“ ბათუმის მთავარ საახალწლო ნაძვის ხეზე – Batumelebi

200 „ქოლგა“ ბათუმის მთავარ საახალწლო ნაძვის ხეზე

ბათუმში მთავარი საახალწლო ნაძვის ხე წელს 200 მანათობელი „ქოლგით“ მორთეს. მთავარი საახალწლო ნაძვის ხის დეკორაციული სანათები , მათ შორის, სანათი „ქოლგები“, ბათუმის მერიის კულტურის ცენტრმა ტენდერში გამარჯვებულ კომპანია „აჭარგანათებისგან“ შეიძინა, ჯამში, 52 100 ლარად.

ბათუმის მთავარი საახალწლო ნაძვის ხე / 22.12.2019 / ფოტო: ჯაბა ანანიძე/„ბათუმელები“

ბათუმის კულტურის ცენტრს სანათების შეძენაზე ტენდერიც ზუსტად ამ თანხით ჰქონდა გამოცხადებული. დოკუმენტების მიხედვით, ერთ ქოლგაში, რომელიც ჩინური წარმოებისაა, 125 ლარია გადახდილი [ჯამში 25 000 ლარი].

12 800 ლარია გადახდილი 400 ცალ დეკორატიულ ნათურაში, 6 500 ლარი – ტენტის დეკორატიულ სარტყელში [ნაძვის ხის კენწეროსთვის] და 7 800 ლარი – ნაძვის ხის თავსართ დეკორატიულ ვარსკვლავში.

ბათუმში მთავარ საახალწლო ნაძვის ხეს 25 დეკემბერს აანთებენ.

ბათუმის მთავარი საახალწლო ნაძვის ხე / 22.12.2019 / ფოტო: ჯაბა ანანიძე/„ბათუმელები“

2020 წელს მთავარი საახალწლო კონცერტი ბათუმში ტრადიციულად ევროპის მოედანზე აღარ გაიმართება. მთავარი კონცერტის სცენა ბათუმის ბულვარში საზაფხულო თეატრთან დამონტაჟდება, ხოლო მთავარი ნაძვის ხე ბულვარის კოლონადებთან მრგვალ შადრევანზე დადგეს.

საახალწლო ღონისძიებების ჩატარებასა თუ ქალაქის გაფორმებაში ჩართულნი არიან ქალაქ ბათუმის მერიის სხვადასხვა სამსახურები, ბათუმის ბულვარი და სხვა ორგანიზაციები. ახალი წლის ღონისძიებებისთვის ჯამში, ბათუმისა და აჭარის ბიუჯეტებიდან, მიმდინარე წელს 1,5 მილიონამდე ლარი დაიხარჯება.

ამ თემაზე:

44 125 ლარი მომღერლებისა და წამყვანების ჰონორარისთვის – საახალწლო ღონისძიებები ბათუმში

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com