ბოლო დღეების განმავლობაში ბათუმის იაშვილის სახელობის დედათა და ბავშვთა კლინიკას დღეში 90 ან მეტი პაციენტი მიმართავს – ინფორმაცია ამის შესახებ „ბათუმელებს“ ამავე კლინიკის დირექტორმა, თამარ ბახტაძემ დაუდასტურა.
„გაზრდილია ჰოსპიტალიზაციის მაჩვენებელიც, თუმცა განსაკუთრებით რთული შემთხვევები არ აღინიშნება, მომართვიანობა დროულია. რეანიმაციულ განყოფილებაში ამჯერად მკურნალობას არც ერთი პაციენტი არ გადის, უმეტესწილად პედიატრიულ დეპარტამენტში არიან პაციენტები განთავსებული,” – ამბობს თამარ ბახტაძე.
მისივე თქმით, მოცემულ მომენტში ძირითადად ცირკულირებს გრიპი და გრიპისმაგვარი რამდენიმე ვირუსი, რომელთა იდენტიფიცირებაც ამჯერად არ ხდება. ძირითადად, ეს არის A და B ტიპის ვირუსები.
დედათა და ბავშვთა ჰოსპიტალის დირექტორის განმარტებით, ეს მაჩვენებელი წინა წლის ანალოგიურია და გრიპის ვირუსით პაციენტები კლინიკას სწორედ ამ დროიდან, დეკემბრის ბოლოდან მიმართავდნენ.
გრიპის ვირუსისგან თავდაცვის საშუალება გრიპის ვაქცინაა, რომელსაც ყოველ წელს იკეთებენ, თუმცა 2019-2020 წლის ზამთრის სეზონისთვის ვაქცინა დეფიციტად იქცა მათთვის, ვინც რისკჯგუფებში არ შედის და სახელმწიფოსგან ვაქცინის უფასო დოზა არ ერგება.
ჯანდაცვის სამინისტროს პროგრამების სამმართველოს უფროსის – ეკატერინე ადამიას თქმით, დეფიციტი შეიქმნა ვაქცინაზე გაორმაგებული მოთხოვნის გამო, რაც წელს აფთიაქებმა და კერძო კლინიკებმა ვერ დააკმაყოფილეს.
ჯანდაცვის სამინისტროს პროგრამების სამმართველოს უფროსისა და დაავადებათა კონტროლის ეროვნული ცენტრის წარმომადგენლის, ხათუნა ზახაშვილის ინფორმაციით შარშან კომერციულ სექტორს გრიპის ვაქცინა „ჩაუწვა” და შესაბამისად იმავე შედეგის ასაცილებლად მათ წელს ვაქცინის დიდი რაოდენობა არ შეუკვეთეს მწარმოებელ ფრანგულ კომპანია ,,სანოფი პასტერს”.
„მინდა, მოვუწოდო კომერციულ სექტორს, აფთიაქებს, უფრო მომზადებული შეხვდნენ მომავალ წელს ვაქცინების მიწოდების მხრივ. ტექნიკურადაც რთულია ვაქცინების მოწოდების პროცესი, რადგან დროში იწელება, თუ თავიდანვე არ გაკეთდა დიდი შეკვეთა. მერე მომწოდებელი ვეღარ ასწრებს მოწოდებას, ვფიქრობ, დაგეგმვის პროცესია უფრო ყურადღებით გასათვლელი. თუ ჩვენი მოქალაქეებიც ვაქცინის დროულად, ადრეულ შემოდგომაზე შეკვეთის კულტურას გამოიმუშავებენ, ფარმაცევტებსაც ექნებათ იმედი, რომ რეალიზაციას მოახდენს იმ რაოდენობის რამდენსაც შემოიტანს მე არა მგონია, რომ მერე რამე პრობლემა შეიქმნას” – განაცხადა რამდენიმე დღის წინ „ბათუმელებთან” საუბრისას ჯანდაცვის სამინისტროს პროგრამების სამმართველოს უფროსმა.
