„ალიანს ფრივილიჯიმ“ ბათუმში, რუსთაველი #42-ში, სამშენებლო პროექტში ცვლილება მოითხოვა, ცვლილება პროექტის სიმაღლის კიდევ 9 მეტრით გაზრდას ითვალისწინებს, შესაბამისად, შეთანხმებული 176 მეტრი სიმაღლე 185 მეტრამდე გაიზრდება, კომპანია კიდევ ორი სართულის დამატებას შეძლებს და 52 სართულის ნაცვლად 54 სართულს ააშენებს. ცვლილებაზე აჭარის კულტურული მემკვიდრეობის ზონალურმა საბჭომ 16 დეკემბერს იმსჯელა და შეითანხმა. ახლა კომპანიას მერიის თანხმობა სჭირდება, თუმცა ამავე კომპანიის ვებგვერდზე გამოქვეყნებული ინფორმაციით თუ ვიმსჯელებთ, კომპანიას შესაძლოა ეს ნებართვა უკვე მოპოვებულიც ჰქონდეს.
ადგილი, სადაც კომპანია 54-სართულიან თაუერს აშენებს, ბათუმის ბულვარს ესაზღვრება, ბულვარს კი კულტურული მემკვიდრეობის ძეგლის სტატუსი აქვს, ამიტომაც მშენებლობას აჭარის კულტურული მემკვიდრეობის სააგენტოს ზონალური საბჭო ითანხმებს.
გარდა ამ ცვლილებისა, კომპანია პარკინგისა და სხვა დამხმარე ფართობებისთვის ორი მიწისქვეშა სართულის მოწყობას გეგმავდა და ახლა სამი სართულის მოწყობას აპირებს, თუმცა არ შეცვლილა კომპანიის ვალდებულებები პარკინგის ადგილების ოდენობასთან დაკავშირებით. „ალიანს ფრივილიჯის“ 130 მანქანის ადგილის მოწყობის ვალდებულება აქვს.
ამ დრომდე ბათუმში ყველაზე მაღალი შენობა „პორტა თაუერია“, მისი სიმაღლე 150 – მეტრამდეა, „ალიანს ფრივილიჯის“ შენობის სიმაღლე კი 185 მეტრი იქნება. დასრულების შემდეგ ეს იქნება ყველაზე მაღალი შენობა ბათუმში.
მაგრამ ეს სურათი შეიცვლება, თუ შპს „რივიერა ბათუმი“ ე.წ. ჭაჭის კოშკის მიმდებარედ დაგეგმილი პროექტის მშენებლობის ნებართვას მიიღებს. კომპანიის მიერ ბათუმის მერიაში წარდგენილი განაშენიანების რეგულირების გეგმის მიხედვით, ხუთი თაუერიდან ერთ-ერთი კოშკის სიმაღლე 200.60 მეტრი იქნება. სწორედ ეს 56-სართულიანი კოშკი იქნება ბათუმში ყველაზე მაღალი შენობა.
კომპანია „ალიანსი ფრივილიჯს“ ამ დროისთვის ოთხი მესაკუთრე ჰყავს: 15 % – აკაკი სონგულია; 16% – ბესიკ ჟღენტი; 18% – რუსეთის მოქალაქე ავთანდილ გორგილაძე; ხოლო 51%- ის მფლობელი „ალიანს ჯგუფის“ დამფუძნებლის გია ბიწაძის ვაჟი, თემურ ბიწაძეა.
https://batumelebi.netgazeti.ge/news/128928/
