„გამოვიყენებ დუმილის უფლებას,“ – მიმართა სასამართლო პროცესის დაწყებისთანავე მოსამართლე გიორგი გრატიაშვილს ბრალდებულმა გელა ჭაღალიძემ. მას პროკურატურა პოლიციელზე თავდასხმას ედავება. დღეს ბათუმის საქალაქო სასამართლოში აღკვეთი ღონისძიების შეფარდების პროცესი გაიმართა. ბრალდებულს წინასწარი პატიმრობა შეუფარდეს.
საპატრულო პოლიციის თანამშრომელი – ოთარ თავართქილაძე 18 დეკემბერს, თბილისის მოედანთან დანით დაჭრეს. ყელში დაჭრილ პოლიციელს იმავე ღამით ჩაუტარდა ოპერაცია. ამ დროისთვის დაჭრილი პოლიციელის ჯანმრთელობის მდგომარეობა სტაბილურია.
კადრებში, რომლებიც პოლიციელის დაჭრას ასახავს, ჩანს, რომ მოქალაქე მიდის ჭავჭავაძის ქუჩაზე და საპირისპირო მიმართულებით მოძრავ საპატრულო ეკიპაჟის მანქანას აჩერებს. პატრულ-ინსპექტორი გადმოდის მანქანიდან და მას მოქალაქე დანით ჭრის. მეწყვილე გაქცეულ პირს აკავებს.
პროცესის დასაწყისშივე ბრალდებულმა ასევე თქვა, რომ მას პროცესზე წარმოდგენილი, ე.წ. სახაზინო ადვოკატის მომსახურება არ სურს.
“ჩემს ოჯახს აქვს ადვოკატის აყვანის საშუალება. გთხოვთ, ეს გაითვალისწინოთ,”- აღნიშნა ბრალდებულმა გელა ჭაღალიძემ, თუმცა პროცესზე მას კერძო ადვოკატი არ წარმოუდგენია.
“მას ჰქონდა დრო შეერჩია ადვოკატი… ჩვენ დროში შეზღუდული ვართ,”- უთხრა მოსამართლეს პროკურორმა ალექსანდრე ძირკვაძემ.
მოსამართლემ ბრალდებულის მოთხოვნა არ დააკმაყოფილა და დასძინა, რომ მას იმ მუხლით გათვალისწინებული დანაშაულის ჩადენას ედავებიან, რომელიც უვადო თავისუფლების აღკვეთასაც ითვალისწინებს.
პროკურატურის ვერსიით, ბრალდებულმა გამიზნულად დაარტყა დანა პოლიციელს მხოლოდ იმიტომ, რომ ის პოლიციელი იყო. პროკურორი ალექსანდრე ძირკვაძე ამბობს, რომ აქამდე პოლიციელს, რომელიც დაჭრეს, არანაირი ურთიერთობა არ ჰქონია ბრალდებულთან.
„პოლიციისადმი მტრულ დამოკიდებულებას მოწმობს ის, რომ ის 2018 წელს ადმინისტრაციულო წესით სახდელდადებულია პოლიციელის კანონიერი მოთხოვნის დაუმორჩილებლობის გამო,”- დასძინა პროკურორმა. მისივე თქმით, ბრალდებული ნასამართლევი არ ყოფილა.
პროკურატურას არ აქვს ვერსია, რატომ დაესხა თავს ბრალდებული კონკრეტულ პოლიციელებს. პროცესის დაწყებამდე პროკურორმა ალექსანდრე ძირკვაძემ გვითხრა, რომ საქმეში არ არის წარმოდგენილი რაიმე სახის ცნობა, რაც ბრალდებულის ფსიქიკურ ჯანმრთელობას დაადასტურებდა.
“მიმალვის საფრთხე არ არსებობს… უნდა ვთქვა ასევე მოწმეებზე. ისინი ძირითადად პოლიციელები არიან და მათზე ზემოქმედების მოხდენა გამორიცხულია,”- აღნიშნა ადვოკატმა დავით კეკელიძემ. მან მოსამართლეს უთხრა, რომ ბრალდებულს არც ერთი სახის აღკვეთი ღონისძიება არ უნდა შეეფარდოს.
ადვოკატის სიტყვის შემდეგ ბრალდებულმა ლაპარაკი გადაწყვიტა:
„არ ვიმსახურებ ამხელა ბრალს… მე დანა ორჯერ არ დამირტყამს… დანა არც იყო, მარა დანა ერქვა… იყო ფსიქოლოგიური ზეწოლა,“- დაახლოებით ამ სიტყვებით მიმართა ბრალდებულმა მოსამართლეს, თუმცა ის მოსამართლემ შეაჩერა.
„ვერ ვგებულობ, რომელ ზეწოლაზე საუბრობთ?“- იკითხა მოსამართლემ.
„არ მინდა, ჩემი ოჯახის წევრებზე ზეწოლა მოახდინონ,“- დასძინა ბრალდებულმა.
როცა მოსამართლე გადაწყვეტილების მისაღებად დარბაზიდან გავიდა, ბრალდებული ჟურნალისტებსაც გამოელაპარა.
„იმიტომ არ არიან დღეს ჩემი ოჯახის წევრები აქ, რომ მათზე ზეწოლაა…“ – თქვა ბრალდებულმა, თუმცა მალევე ბადრაგის სამსახურმა მას ხელბორკილი დაადო და დარბაზიდან გაიყვანა. მან აღარ უპასუხა ჟურნალისტების სხვა შეკითხვებს: „იცნობდით ამ პოლიციელს?“ „რა მოხდა რეალურად?“
დღევანდელ პროცესს დაზარალებული პოლიციელის ახლობლები არ დასწრებიან. დარბაზი ძირითადად პოლიციელებს და მედიის წარმომადგენლებს ჰქონდათ შევსებული.
პროცესს ესწრებოდა ბრალდებულის მხოლოდ ერთი ახლობელი, რომელმაც სასამართლო სხდომის დარბაზი უსიტყვოდ დატოვა.
